“6–12 Mei: ‘Wetem Paoa blong Lod.’ Mosaea 7–10,” Kam Folem Mi—Blong Hom mo Jos: Buk blong Momon 2024 (2024)
“6–12 Mei. Mosaea 7–10,” Kam Folem Mi—Blong Hom mo Jos: 2024 (2024)
Minerva Teichert (1888-1976), Amon long Fored blong King Limhae1949-1951, oel long msonaet, 35 15/16 x 48 inj. Brigham Yang Yunivesiti Miusiom blong Art, 1969.
6–12 Mei: “Wetem Paoa blong Lod”
Mosaea 7–10
Taem we ol pipol blong King Mosaea oli bin stap gohed blong “gat pis” long Sarahemla (Mosaea 7:1), ol tingting blong olgeta i tanem i go long wan nara grup blong Ol Man blong Nifae, we plante yia bifo, oli bin aot blong stap long graon blong Lihae-Nifae. Ol jeneresen oli pas, mo ol pipol blong Mosaea oli no bin harem wan samting nating abaot olgeta. Mekem se Mosaea i bin askem Amon blong lidim wan grup blong faenem Ol Man blong Nifae ia we oli bin aot. Grup ia i faenem se Ol Man blong Nifae ia, “from ol fasin nogud” (Mosaea 7:24), oli bin prisena blong Ol Man blong Leman. Be, taem we Amon mo ol brata blong hem oli go kasem olgeta, kwiktaem i bin gat hop blong oli kam fri.
Samtaem, yumi olsem Ol Man blong Nifae ia we oli prisena i stap, we yumi stap safa from ol sin blong yumi, mo yumi stap askem yumiwan hao nao bae yumi faenem pis bakegen. Samtaem yumi olsem Amon, we Spirit i pusum yumi blong go long ol narawan, mo long en, yumi faenem se ol traehad blong yumi oli bin givim insperesen long olgeta blong oli “leftemap hed blong [olgeta], mo stap glad, mo putum tras blong [olgeta] long God” (Mosaea 7:19). I nomata ol situesen blong yumi, yumi evriwan i nidim blong sakem sin, mo blong “tanem yumi i go long Lod wetem ful hat, wetem fet se “bae hem i mekem [yumi] kam fri” (Mosaea 7:33).
Ol tingting blong stap lan long Hom mo Jos
Jisas Kraes i gat paoa blong mekem yumi kam fri.
Taem King Limhae i bin mit wetem Amon, i bin givim hop, mo hem i bin wantem pasem hop ia nao i go long ol pipol blong hem. Ating ol toktok blong hem i save givim hop tu long yu. Blong bakgraon, tingting blong luklukbak long situesen blong ol pipol blong Limhae long Mosaea 7:20–25. Afta tingting hevi long ol kwestin ia taem yu ridim Mosaea 7:14–33:
-
?Wanem nao Limhae i talem blong mekem fet mo hop blong ol pipol blong hem i kam strong moa long Kraes?
-
?Wanem ol sentens nao i helpem yu filim hop? (luk long ol ves 19, 33).
-
?Wanem ol eksperiens nao i bin helpem yu blong trastem se God i save mo bae i mekem yu kam fri?
Luk tu long “Ridima blong Isrel,” STSP, pej 6.
Oli bin krietem mi “folem fasin mo bodi blong God.”
Long Mosaea 7:26–27, Limhae i eksplenem sam long ol trutok we Abinadae i bin tijim. ?Wanem nao ol trutok we yu save faenem insaed long ol ves ia? ?Olsem wanem ol trutok ia oli jenisim wei we yu luk God mo yuwan bakegen?
Luk tu long Russell M. Nelson, “Your Body: A Magnificent Gift to Cherish,” Liahona, Aug. 2019, 50–55.
Lod i givim ol profet, ol sia, mo ol reveleta blong gud blong ol man.
Taem Limhae i harem testemoni blong Amon, se Lod i mekem wan sia i stap, Limhae i “bin glad tumas, mo i bin talem tangkyu long God” (Mosaea 8:19). ?Yu yu ting se from wanem nao hem i bin filim olsem? ?Wanem nao yu lanem abaot ol sia aot long ol toktok blong Amon we i stap long Mosaea 8:13–19?
Tedei, yumi sastenem Fas Presidensi mo Kworom blong Olgeta Twelef Aposol olsem ol profet, sia, mo reveleta. ?Olsem wanem nao oli bin stap “wan gud samting” long yu? (Mosaea 8:18). ?Wanem nao oli bin tijim yu long hem abaot Jisas Kraes?
?Olsem wanem nao yu, olsem Amon, yu save tok stret abaot nid blong gat ol profet, ol sia mo ol reveleta? (luk long Mosaea 8:13–18). Eksampol, ?wanem nao bae yu save serem wetem famli blong yu, o long sosol media abaot?
-
Trutok we i bin kambak bakegen long dei blong yumi tru long Josef Smit mo ol nara profet blong Lod (olsem laefstael blong God, tabu aedentiti, o laefstael blong wan famli we i no save finis) Wan riviu blong “Restoresen blong Gospel blong Jisas Kraes, we I Fulwan”: o “Wan Ofisol Toktok I Go long Wol” (Gospel Library) maet i helpem yu tingting long sam long ol trutok ia.
-
Ol blesing blong ol komanmen o odinens (olsem Tok blong Waes, loa blong jastiti, o wan siling blong ol famli).
Las manis, yumi harem ol toktok i kam long ol profet, ol sia, mo ol reveleta long jeneral konfrens. ?Wanem mesej nao i givim insperesen long yu? ?Wanem nao bae yu mekem i defren folem wanem we yu bin lanem? ?Wanem nao ol sia blong Lod oli talem abaot “ol samting we bambae oli kam”? (Mosaea 8:17).
Luk tu long Gospel Topics, “Prophets,” Gospel Library.
Mi save fesem ol jalenj blong mi “wetem paoa blong Lod.”
Senif i bin akseptem se ol mistek blong hem i bin putum ol pipol blong hem long wan hadtaem. Samtaem afta, hem i bin go faet agensem Ol Man blong Leman, mo i helpem ol pipol blong hem blong fesem ol jalenj blong olgeta wetem fet long Lod. Taem yu stap ridim Mosaea 9–10, lukaotem wanem nao ol pipol blong Senif oli mekem blong soem fet blong olgeta. ?Olsem wanem nao God i bin mekem olgeta oli kam strong moa? ?Olsem wanem nao Hem i bin mekem yu kam strong moa? ?Hem i minim wanem long yu blong go “wetem paoa blong Lod”? (Mosaea 9:17; 10:10–11).
Ol joes blong mi i save lidim plante jeneresen.
Taem yu ridim Mosaea 10:11–17, faenemaot olsem wanem nao ol aksen mo fasin blong ol bubu blong Ol Man blong Leman i stopem Ol Man blong Leman we i stap kam antap yet. ?Hemia i stap givim wanem tingting abaot hao joes blong yu i save spolem ol narawan—long gud saed o nogud saed—wetem ol pipol we oli no bon yet?
Yusum ol objek lesen. Ol objek lesen i mekem fasin blong lan i fan mo mekem yu no save foget. Ating wan laen blong ol domino i save soem hao ol joes blong ol pipol i save spolem ol apu blong yu (luk long Mosaea 10:11–17).
Sam Tingting blong Tijim Ol Pikinini
God i bin helpem ol pipol insaed long ol skripja, mo bae Hem i save helpem mi.
-
Taem ol pipol blong hem i bin stap long trabol, King Limhae i bin serem ol skripja blong bildimap fet blong olgeta. Askem ol pikinini blong yu abaot ol skripja stori o ol man insaed long ol stori we i helpem olgeta blong gat fet. Afta yu save ridim Mosaea 7:19 long olgeta mo riviu long ol stori we oli tokbaot long ves ia (luk long “Pasova” mo “Ol Man Isrel long Waelples” insaed long Ol Stori blong OlTesteman, 70–76). Ating ol pikinini blong yu oli wantem aktemaot olgeta. ?Olsem wanem nao Lod i bin helpem ol pipol insaed long ol stori ia? ?Olsem wanem nao bae Hem i helpem yumi?
-
Blong moa eksampol long hao Lod i helpem yumi, jusum sam ves aot long “Book of Mormon Stories” o “Nephi’s Courage” (Children’s Songbook, 118–19, 120–21) blong singsing wetem ol pikinini blong yu. Helpem olgeta blong faenemaot olsem wanem Lod i bin helpem ol pipol insaed long Buk blong Momon—mo hao Hem i save helpem yumi.
God i givim long yumi ol profet, ol sia, mo ol reveleta.
-
Wan wei blong tij abaot ol sia, hem i blong komperem olgeta long ol samting we i helpem yumi luk moa gud, olsem ol glas, spaeglas, o wan maekroskop. Afta taem yu ridim Mosaea 8:17 i go long ol pikinini blong yu, oli save putum han blong olgeta i go long ol ae blong olgeta olsem we oli stap lukluk tru long spaeglas evri taem we oli harem toktok ia “sia” (luk tu long Moses 6:35–36). Tokbaot long olgeta ol samting we Lod i helpem ol profet oli “luk” we yumi no save luk. ?Wanem nao ol profet o sia, olsem Josef Smit i soemaot long yumi?
-
Afta ridim Mosaea 8:16–18 wetem ol pikinini blong yu, yu save helpem olgeta blong tingting long ol wei blong komplitim wan sentens olsem Wan sia i olsem wan … we i helpem yumi … . Eksampol, wan sia i olsem wan saen blong rod we i poenem yumi i go long Jisas.
-
Mekem ol trak blong leg aot long pepa, mo invaetem ol pikinini blong yu blong dro long ol pepa ia, ol pikja blong ol samting we ol profet i bin givim kaonsel long yumi blong mekem. Putum ol trak blong leg ia long wan rod we i go raon long rum, mo letem ol pikinini blong yu oli wokbaot long ol trak blong leg ia. ?Olsem wanem wan sia i save stap “wan gudfala samting” long yumi? (luk long Mosaea 8:17–18).
Taem mi no strong, Lod i save mekem mi kam strong moa.
-
Taem ol pikinini oli gat ol jalenj, samtaem oli save filim se oli no strong mo no gat help. ?Olsem wanem nao yu save helpem ol pikinini blong yu blong oli dipen long paoa blong Lod? Afta, yu save askem sam kwestin abaot japta ia blong luk wanem nao oli tingbaot. ?Hem i minim wanem blong gat “paoa blong ol man”? (luk long Mosaea 10:11). ?Hem i minim wanem blong gat “paoa blong Lod”? (luk long Mosaea 9:17–18; 10:10). ?Olsem wanem nao yumi stap kasem paoa blong Lod? Ol pikinini blong yu oli save droem wan pikja blong ol samting we i helpem olgeta kasem paoa blong Lod.
Blong moa tingting, luk long namba blong manis ia blong Fren magasin.
Visen i go long Josef Smit, i kam long Clark Kelley Price