“20–26 Mei: ‘Mifala I Bin Mekem Wan Kavenan wetem Hem.’ Mosaea 18–24,” Kam Folem Mi—Blong Hom mo Jos: Buk blong Momon 2024 (2024)
“20–26 Mei. Mosaea 18-24,” Kam Folem Mi—Blong Hom mo Jos: 2024 (2024)
Teichert (1888-1976), King Limhae mo Ol Pipol blong Hem oli Ronwe1949–1951 oel long mesonaet, 35 7/8 x 48 inj. Brigham Yang Yunivesiti Miusiom blong Art, 1969
20–26 Mei: Mifala I Bin Mekem Wan Kavenan wetem Hem
Mosaea 18–24
Stori blong Alma mo ol pipol blong hem long Mosaea 18; 23–24 i soem wanem i minim blong “kam long yad blong God” (Mosaea 18:8). Taem ol pipol blong Alma oli kasem baptaes, oli bin mekem wan kavenan wetem God blong “wok blong Hem mo obei ol komanmen blong hem” (Mosaea 18:10). Hemia i bin wan bigfala komitmen we wanwan i mas mekem, mo tu, hem i abaot hao nao oli mas tritim olgeta wanwan. Yes, wokbaot we i gobak long Papa long Heven, hem i blong yuwan nomo, mo i no gat wan i save kipim ol kavenan long bihaf blong yumi, be hemia i no minim se yumi stap yumiwan. Yumi nidim wanwan long yumi. Olsem ol memba blong Jos blong Kraes, yumi mekem kavenan blong wok blong God taem yumi stap helpem mo givim seves long wanwan long yumi folem rod ia, “we yumi karem ol hevi samting blong wanwan long yumi” (Mosaea 18:8–10). Ol pipol blong Alma, i tru, oli bin gat ol hevi samting blong tekem, semmak olsem yumi tu. Mo wan wei we Lod i stap helpem yumi “save karem ol hevi samting blong olgeta isi nomo” (Mosaea 24:15), i taem Hem i givim yumi wan komuniti blong Ol Sent we oli bin promes blong krae wetem yumi, mo leftemap tingting blong yumi, semmak olsem we yumi bin promes blong mekem long olgeta.
Luk tu long “The Lord Delivers the Covenant Peoples of Alma and Limhi” (vidio), Gospel Library.
Ol tingting blong stap lan long Hom mo Jos
Taem mi baptaes, mi mekem wan kavenan wetem God.
Tingting long olsem wanem olgeta we oli biliv olsem we oli tokbaot long Mosaea 18 oli bin filim abaot Jisas Kraes. Oli mas mit haed nomo, blong king i no save long hem, blong oli save lanem abaot Hem (luk long ves 3). Mo taem oli gat janis blong soem komitmen blong olgeta tru long kavenan blong baptaes, “oli klapem han blong olgeta from glad mo oli singaot: Hemia nao wanem hat blong mifala i wantem” (Mosaea 18:11).
Stap ridim ol ves ia i save kam wan gudfala janis blong tingting hevi long hao ol kavenan blong yu oli impoten long yu. Taem yu stap stadi long Mosaea 18:8–14 tingting speseli long ol kwestin olsem:
-
?Wanem nao yu stap lanem aot long ol ves ia abaot ol promes we yu bin mekem long taem blong baptaes? ?Wanem nao God i stap promesem yu? (luk long ol ves 10, 13).
-
?Olsem wanem nao kavenan ia blong wok blong God i go wetem wok blong givhan taem yumi traehad blong givhan long wanwan long yumi? (luk long ol ves 8–9).
-
?I minim wanem long yu blong yu “stap olsem [wan witnes] blong God”?(ves 9).
-
?Olsem wanem taem yu stap kipim kavenan blong baptaes i helpem yu blong “stap fulap wetem Spirit”? (Mosaea 18:14). ?Olsem wanem nao Spirit i stap helpem yu blong kipim kavenan blong yu?
Taem yu ansa long ol kwestin ia i save lidim yu blong tingting hevi se from wanem ol kavenan mo odinens oli impoten long God. Yu save faenem niu tingting long mesej blong Elda Gerrit W. Gong “Yumi Pat blong Kavenan” (Liahona, Nov. 2019, 80–83) o mesej blong Presiden Jean B. Bingham “Ol Kavenan wetem God Oli Protektem Yumi, Mekem Yumi Kam Strong Moa mo Rere from Glori Ia we I No Save Finis” (Liahona, Mei 2022, 66–69). ?From wanem nao yu glad long ol kavenan blong yu? ?Wanem nao yu stap mekem blong kipim ol promes blong yu?
Luk tu long Gospel Topics, “Baptism,” Gospel Library; “Alma the Elder Teaches and Baptizes at the Waters of Mormon” (vidio), Gospel Library.
Tijim trutok aot long skripja mo ol toktok blong ol profet blong las dei. Taem yu tij—mo lan—tingbaot se wan long ol moa gud wei blong mekem fet blong yumi long Kraes i kam antap, i blong lukluk moa long ol skripja mo ol toktok blong ol profet blong las dei.(luk long Mosaea 18:19).
God i komandem ol pipol blong Hem blong oli kam tugeta, oganaes, mo stap yunaet.
Sam pipol oli save askem se ?From wanem yumi nidim wan jos? Lukluk long Mosaea 18:17–31, stap lukaotem gud samting ia we ol pipol blong Alam oli faenem taem we oli kam tugeta long “jos blong Kraes” (Mosaea 18:17). ?Wanem sam samting we yu luk long Jos blong Jisas Kraes long dei blong Alma we i semmak long dei blong yumi?
?Olsem wanem nao bae yu ansarem wan fren o wan memba blong famli we i no biliv se i nidim blong gat wan jos we i oganaes? ?From wanem yumi glad tumas blong save stap pat long Jos la blong Jisas Kraes?
?Tingbaot long wanem nao yu save mekem blong helpem ol memba blong wod o branj blong yu oli gat “hat blong olgeta oli joen tugeta blong kam wan long lav”? (Mosaea 18:21).
Luk tu long Dallin H. Oaks, “Nid blong Gat Wan Jos,” Liahona, Nov. 2021, 24–26; “Love One Another,” Hymns, no. 308.
God i helpem mi blong karem ol hevi samting blong mi.
Ol pipol blong Limhae mo ol pipol blong Alma, tufala tugeta i foldaon long fasin blong stap slef, nomata from ol defren risen mo long ol defren situesen. ?Wanem nao yu lanem taem yu komperem ol stori blong ol pipol blong Limhae we i stap long Mosaea 19–22 mo stori blong ol pipol blong Alma long Mosaea 18; 23–24? Taem yu stap mekem olsem, lukaotem ol mesej we yu yusum long laef blong yu. Eksampol,?wanem i minim blong “kam antap gud smolsmol”? (Mosaea 21:16). ?Olsem wanem yu save yusum prinsipol ia?
Mi save trastem Lod.
I nomata we oli bin sakem ol sin blong olgeta, Alma mo ol pipol blong hem oli stap yet long fasin blong stap slef. Ol eksperiens blong olgeta ia i soem se blong trastem Lod mo blong stap laef folem ol kavenan blong yumi, i no stap karemaot ol hadtaem blong yumi oltaem, be i helpem yumi blong winim ol hadtaem ia. Taem yu stap ridim Mosaea 23:21–24 mo 24:8–17, makem ol toktok mo ol sentens we i save helpem yu blong trastem Lod, nomata wanem situesen blong yu.
Luk tu long David A. Bednar, “Bear Up Their Burdens with Ease,” Liahona, Mei 2014, 87–90.
Sam Tingting blong Tijim Ol Pikinini
Taem mi baptaes, mi mekem wan kavenan wetem God.
-
Wan impoten wei blong helpem ol pikinini blong rere from baptaes hem i blong tijim olgeta abaot kavenan we bae oli mekem taem oli kasem baptaes. Hemia i simpol nomo olsem blong soem wan pikja we i stap long en blong aotlaen blong wik ia mo stap rid abaot kavenan wetem olgeta long Mosaea 18:9–10. Tingting blong invaetem wan pikinini we i bin baptaes finis blong tijim hemia long olgeta pikinini we oli smol. Ol pikinini blong yu maet oli glad blong harem yu tokbaot baptaes blong yu. ?Olsem wanem nao taem kipim ol kavenan wetem God i blesem laef blong yu?
-
Ol pikinini we oli bin baptaes oli save yusum ol defren wei blong rimaenem olgeta long ol kavenan we oli bin mekem mo riniu ol kavenan blong olgeta evri wik wetem sakramen. Ating ol pikinini blong yu oli save komperem kavenan blong baptaes olsem we oli tokbaot long Mosaea 18:8–10 wetem ol sakramen prea (luk long Doktrin mo Ol Kavenan 20:77,79). ?Olsem wanem nao yumi save mekem sakramen wan spesel, kwaet taem, semmak olsem ol taem we yumi bin kasem baptaes?
Yumi mekem wan kavenan wetem God taem yumi kasem baptaes.
Taem mi bin baptaes, mi kam wan memba blong Jos Ia blong Jisas Kraes blong Ol Lata-dei Sent.
-
?Ol pikinini blong yu oli save se i minim wanem blong kam wan memba blong Jos Ia blong Jisas Kraes blong Ol Lata-dei Sent? Tingting blong stap helpem olgeta faenem ol pikja we i ripresentem ol samting we ol memba blong Jos oli bin mekem long Mosaea 18:17–28. Eksampol, ol pikja ia Odinesen blong Prishud mo Peimen blong Taeting (Gospel Art Buk, ol namba. 106, 113) maet i ripresentem ol ves 18 mo 27–28. Talem long olgeta from wanem yu glad tumas blong stap olsem wan memba blong Jos Ia blong Jisas Kraes.
-
Stap helpem ol pikinini oli filim “hat blong olgeta oli joen tugeta blong kam wan long lav” (Mosaea 18:21) i helpem olgeta blong stap fas long Jos truaot long laef blong olgeta. Tingting blong stap invaetem ol pikinini blong yu blong rid long Mosaea 18:17–28. ?Wanem nao ol memba blong Jos blong Kraes long dei blong Alma i mekem blong lavem mo givim seves long wanwan long olgeta? ?Olsem wanem nao yumi save mekem sem samting insaed long wod, branj, o komuniti blong yumi? Wan singsing abaot lav, olsem “I’ll Walk with You” (Children’s Songbook, 140), i save putumaot strong mesej ia bakegen.
God i save mekem ol hevi samting oli nomo hevi.
-
Wan simpol objek lesen i save mekem yumi no save fogetem wanem yumi lanem. Tingting blong stap fulumap wan basket wetem ol hevi samting (blong ripresentem ol hevi samting), mo invaetem wan pikinini blong holem basket ia. Taem yu rid long Mosaea 24:8–17 wetem ol pikinini blong yu, askem olgeta blong karemaot wanwan hevi samting ia aot long basket evri taem we oli harem wan samting we Alma mo ol pipol blong hem oli bin mekem blong kasem help long God wetem ol hevi samting blong olgeta. Yu save toktok wetem olgeta abaot hao Papa long Heven i save mekem ol hevi samting blong olgeta i nomo hevi taem oli lukaotem blong kasem help blong Hem.
Blong moa tingting, luk long namba blong manis ia blong Fren magasin.
Ol Wota blong Momon, i kam long Jorge Cocco