“13–19 ni Me: ‘Na Rarama … Ka Sega ni Vakabutobutotaki Rawa.’ Mosaia 11–17,” Lako Mai, Mo Muri Au—Me Baleta na iTikotiko kei na Lotu: iVola i Momani 2024 (2024)
“13–19 ni Me. Mosaia 11-17,” Lako Mai, Mo Muri Au—Me Baleta na iTikotiko kei na Lotu: 2024 (2024)
Sa Tu e Matai Tui Noa o Apinatai, mai vei Andrew Bosley
13–19 ni Me: “Na Rarama … Ka Sega ni Vakabutobutotaki Rawa”
Mosaia 11–17
Na kama lelevu ena rawa ni tekivu mai na dua na caudre lailai. E dua ga na tamata o Apinatai a soli ivakadinadina ni saqata tiko e dua na tui kaukauwa kei na nona mataveilewai. E sega ni ciqomi e levu na nona vosa, ka sa vakatauci vua na lewa me mate. Ia, na nona ivakadinadina i Jisu Karisito, o koya na “rarama … ka sega ni vakabutobutotaki rawa” (Mosaia 16:9), e vakacaudretaka e dua na ka e lomana na talatala gone o Alama. Sa qai caudre mai vakamalua na veisau nei Alama ena nona kauti ira mai na lewevuqa me ra veivutuni ka vakabauti Jisu Karisito. Na yameyame ka vakamatei Apinatai e qai malumalumu ka mate sobu, ia na bukawaqa ni vakabauta e tauyavutaka na nona vosa e tawamudu na kena veivakayarayarataki vei ira na Nifaiti—kei ira era wilika na nona vosa ena gauna nikua. E vuqa vei keda eda na sega ni sotava beka na veika e sotava o Apinatai baleta na noda ivakadinadina, ia e tiko na noda veigauna e vakatovolei kina na noda yalodei kei na vakabauti Jisu Karisito. Ena rawa beka ni vakacaudretaka mai na ivakadinadina kei na yalodei e tu vei iko ni o vulica na ivakadinadina i Apinatai.
Raica talega na “Abinadi Testifies of Jesus Christ” (vidio), Gospel Library.
Vakasama eso ni Vuli ena iTikotiko kei na Lotu
E rawa ni’u tutaki JIsu Karisito, kevaka sara mada ga au tu duadua.
Ni o vulica tiko na Mosaia 11–13; 17, raica na iyaloyalo kei Apinatai ena ituvatuva oqo. Na cava o vulica me baleta nomu tu mo ivakadinadina kei Karisito? Vakabibi, sa rawa mo vakanamatataka na nomu vuli ena veimalanivosa kei na taro vakaoqo:
-
O na vakamacalataki Noa vakacava kei ira na nona tamata? Na cava na vuna ena gadrevi kina na yaloqaqa vei Apinatai me wasea vei ira na itukutuku ni Kalou? (raica na Mosaia 11:1–19, 27–29; 12:9–15).
-
O na vakamacalataki Apinatai vakacava? Na cava a kila o Apinatai ka vukei koya me doudou ena nona ivakadinadina? (raica na Mosaia 13:2–9, 28, 33–35; 17:8–10, 20).
Ena gauna cava o sa bau vakila kina ni o tu taudua tu ena nomu taqomaka na iVakabula kei na Nona kosipeli? E vukei iko vakacava o Koya mo vakila ni tiko vata kei iko o Koya? Ni ko vakasamataka vakatitobu oqo, sa rawa mo wilika na italanoa kei Ilaisa kei na nona italai gone ena 2 Tui 6:14–17. Na cava e veivakauqeti vei iko me baleta na nona ivakaraitaki?
E rawa talega ni o vakasaqaqara ena tabana e 31–33 ni Me iSakisaki ni iTabagone me raici kina na malanivosa e solia vei iko na yaloqaqa mo taqomaka na dina. Se o rawa ni cakava talega ena qaqani dua na serenilotu vakataka na “Do What Is Right” se “Let Us All Press On” (Serenilotu, naba 237, 243).
O na bulataka vakacava na veika o sa vulica mai vei Apinatai? Na vidio “Dare to Stand Alone” (Gospel Library) e vakaraitaka na ituvaki eso o rawa ni tutaka kina na Karisito kei na Nona kosipeli. Na cava eso tale na ivakaraitaki o rawa ni vakasamataka?
Raica talega na Roma 1:16; 2 Timoci 1:7–8; “Wase 8: Na Kaci ni Yaloqaqa,” Nodra iVakavuvuli na Peresitedi ni Lotu: Thomas S. Monson (2022), 135–47; Gospel Topics, “Faith in Jesus Christ,” Gospel Library.
Veivakavulici ena Yalo “Na veivakavulici kaukauwa ni kosipeli e sega ni gadrevi walega kina na vakarautaki ni lesoni ia na nomu vakarautaki iko vakayalo mo rogoca ka muria na veidusimaki ni Yalo ni o veivakavulici”Teaching in the Savior’s Way, 17).
Au gadreva meu bulataka e lomaqu na kena kilai vakavinaka na vosa ni Kalou.
Era kila vinaka tu na bete nei Noa na Tui na vosa ni Kalou. Era a rawa ni cavuta eso na malanivosa ni ivolanikalou ka kaya ni ra sa vakavulica tiko na ivunau. Ia, e vaka me sega ni yavalati na nodra bula ena kosipeli ni iVakabula. Na cava na vuna?
Vakasamataka na veika oqo ni ko wilika na Mosaia 12:19–37 Na cava o nanuma e kena ibalebale mo vakayagataka na yalomu mo kila vinaka na vosa ni Kalou? Na vosa se malanivosa cava sa vakauqeti iko mo veisautaka na sala ni nomu vulica na kosipeli?
E dodonu me volai na ivakaro ni Kalou e yaloqu.
Vakasamataka vakatitobu na nona vakadikeva o Apinatai ni ivakaro era “sega ni volai tu e lomadra” na bete (Mosaia 13:11). Na cava beka na ibalebale ni malanivosa oqo? Ni o wilika na Mosaia 13:11–26, raica mada ke sa volai tu e yalomu na ivakaro oqo.
Raica talega na Jeremaia 31:31–34; 2 Korinica 3:3.
A vakararawataki o Jisu Karisito me baleti au.
Ena Mosaia 14–15, vakaraica na vosa kei na malanivosa e vakamacalataka na iVakabula kei na veivakararawataki e sotava o Koya ena vukumu. Na tikina cava so e vakatitobutaka na nomu loloma kei na vakavinavinaka vei Koya?
E yaco vakacava me Tama ka Luvena talega o Jisu Karisito?
E vakatavulica o Apinatai o Koya na Kalou na Luvena—o Jisu Karisito—ena Dauveivueti (raica na Mosaia 15:1), a mai bula vakayago, yaco me tamata ka Kalou talega (tikina 2–3) E soli Koya vakataucoko ki na lewa nei Kalou na Tamada (tikina 5–9). Baleta na veika oqo, e Luve ni Kalou o Jisu Karisito ka sa matataka vakataucoko na Kalou na Tamana (raica na Joni 14:6–10).
O Jisu Karisito talega na Tamada ena vakasama ni gauna eda ciqoma kina na Nona veivueti, eda sa yaco meda sa “nona kawa” ka “taukena na matanitu ni Kalou” (Mosaia 15:11–12). E dua tale na kena itukutukuni, eda sa sucu tale vakayalo ena Vukuna (raica na Mosaia 5:7).
Na cava na vuna o nanuma kina ni bibi mo kila na dina oqo me baleta na Tamada Vakalomalagi kei Jisu Karisito? E vaqaqacotaka vakacava na nomu vakabauti Rau na ivakadinadina nei Apinatai?
Vakasama ni Nodra Tuberi na Gonelalai
E rawa ni’u tutaki Jisu Karisito, kevaka sara mada ga au tu duadua.
-
Ena so na gauna ena noda bula, eda dau sotava kece na veivakasaurarataki meda cakava na digidigi ka na saqata na noda vakabauti Jisu Karisito. Na cava era rawa ni vulica na luvemu mai vei Apinatai me baleta na nodra tu ka vakadinadinataki Jisu Karisito, ena gauna mada ga e sega ni kilai levu kina? Na cakacaka ni liga ena ituvatuva oqo se “Wase 14: Apinatai kei Tui Noa” (ena iTalanoa ena iVola i Momani, 38–42) sa rawa ni vukei ira mera raitayalotaka na itukutuku ena Mosaia 11–13; 17. Tarogi ira na cava era taleitaka me baleti Apinatai.
-
Era na marautaka na luvemu me ra matanataka na veitiki ni italanoa kei Apinatai. Me ra qai matanataka na ituvaki dina ni bula me vakatovotovotaki kina na cava era rawa ni cakava kevaka era vinakata eso me ra cakava e dua na ka cala. Se e rawa ni ra wasea na veika era sotava ni ra yaloqaqa ena muri Jisu Karisito. A muri Jisu Karisito vakacava o Apinatai? (raica na Mosaia 13:2–9; 17:7–10). Na cava e sega ni cakava kina na Tui o Noa na veika e kila ni dodonu? (raica na Mosaia 17:11–12).
E dodonu meu muria na iVakaro e Tini.
-
Era kila tu na bete i Noa na Tui na ivakaro ia era sega ni “vola e yalodra” (Mosaia 13:11). O na vukei ira vakacava na luvemu me ra kila na ivunau ka taleitaka? Sa rawa mera vola na ivakaro mai na Mosaia 12:33–36 kei na 13:11–24 vakakina ena veitiki ni pepa e ibulibuli ni yate. Ni ra vakayacora vakakina, veitalanoataka vata kei ira na ibalebale ni ivakaro oqo kei na sala me ra muria kina. Me da vola beka vakacava na veiyalayala oqo ki na yaloda?
-
Lagata vata e dua na sere ni ivakaro me vaka na “Keep the Commandments” (Nodra Sere na Lalai, 146-47). Na veivakalougatataki cava e yaco mai ena noda talairawarawa ena ivakaro?
Na ivolanikalou e vakavulica vei keda na ivakaro ni Kalou.
kA talai Jisu Karisito mai na Tamada Vakalomalagi me liutaki au lesu Vua.
-
E dina ni dua na wase lekaleka, na Mosaia 14 e tiko kina e vica na vosa kei na malanivosa e vakamacalataki Jisu Karisito. Sa rawa mo dou vola vata kei ira na luvemudou ni dou wilika vata tiko na iwase. Mo qai veivosakitaka na veika o vakila me baleta na iVakabula ni o vulica na veivosa kei na malanivosa eso oqo.
-
Me vakavuvulitaki Jisu Karisito, a cavuta o Abinatai na vosa ni parofita o Aisea, ka a vakatauvatani keda kei na sipi lakosese. Sureti ira na gone me ra wasea na gauna e yali kina vei ira e dua na ka se na gauna era yali kina o ira. Na cava era a vakila? Na cava a cakava? Sa rawa mo dou qai wilika vata na Mosaia 14:6 kei na 16:4–9. Eda tautauvata vakacava kei na sipi sa lakosese mai vua na Kalou? E vukei keda vakacava o Jisu Karisito me da lesu tale mai?
Me ikuri ni vakasama tale eso, raica na ilavelave ni vula oqo ena iTokani ena kena mekasini.
E Ramase na Matana ena Ramase Uasivi, mai vei Jeremy Winborg