“Hunyo 3–9: ‘Mga Malig-on Sila kag Indi Malingkang.’ Mosias 29– Alma 4,” Dali, Magsunod sa Akon—Para sa Puluy-an kag Simbahan: Libro ni Mormon 2024 (2024)
“Hunyo 3–9. Mosias 29–Alma 4,” Dali, Magsunod sa Akon—Para sa Puluy-an kag Simbahan: 2024 (2024)
Alma the Younger Preaching [Si Alma nga Lamharon nga Nagawali], ni Gary L. Kapp
Hunyo 3–9: “Mga Malig-on Sila kag Indi Malingkang”
Mosias 29–Alma 4
Mahimo nga ginakabig sang iban ang panugyan ni Haring Mosias nga islan ang mga hari sang pinili nga mga hukom bilang isa ka maalam nga reporma sa politika lamang. Pero sa mga Nefinhon, labi na gid sa mga nangabuhi sa idalom sang malaut nga Haring Noe, ining pagbag-o may espirituhanon man nga importansya. Nakita nila kon paano gin-impluwensyahan sang isa ka malaut nga hari ang iya katawhan, kag “tuman [sila] nga naghangad” nga mangin hilway sa amo sini nga impluwensya. Ining pagbag-o nagatugot sa ila nga mangin responsable para sa ila kaugalingon nga pagkamatarong kag “magsabat para sa [ila] kaugalingon nga mga sala” (Mosias 29:38).
Siyempre, ang katapusan sang pagdumala sang mga hari wala nagkahulugan sang pag-untat sang mga problema sang Nefinhon nga sosyedad. Ang tuso nga mga tawo pareho nanday Nehor kag Amlici nagpalapta sang butig nga mga ideya, ang mga wala nagatuo nagpanghingabot sang mga Santos, kag madamo nga mga miyembro sang Simbahan ang nangin bugalon kag nadula sa simbahan. Pero ang “mapainubuson nga mga sumulunod sang Dios” nagpabilin nga “malig-on kag indi malingkang” wala sapayan sa nagakatabo sa ila palibot (Alma 4:15; 1:25).
Mga Ideya sa Pagtuon sa Puluy-an kag sa Simbahan
Sarang ako mangin positibo nga impluwensya sa akon komunidad.
Lima pa lang ka tuig sugod sang pagdumala sang mga hukom, nagtuhaw ang isa ka krisis nga magahangkat sang deklarasyon ni Mosias nga ang tingug sang katawhan masami magapili sang kon ano ang husto (tan-awa sa Mosias 29:26). Tun-i ang Alma 2:1–7 para mahibal-an kon ano ang isyu kag kon ano ang ginhimo sang mga Nefinhon. Ano ayhan ang natabo kon ang “katawhan sang simbahan” wala nagpabati sang ila mga tingug? Ano pa ang imo matun-an sa sining panaysayon parte sa kon paano gusto sang Ginuo nga makigbahin ka sa imo komunidad? (tan-awa man sa Mosias 29:26–27).
Ano ang importante nga mga isyu nga ginaatubang sang imo komunidad? Pamensara kon paano mo, pareho sa mga Nefinhon, masiguro nga ang imo tingug nalakip sa “tingug sang katawhan.” Ano ang iban nga paagi nga ikaw, bilang sumulunod ni Jesucristo, makaimpluwensya sa imo komunidad sa kaayuhan?
Tan-awa man sa Dallin H. Oaks, “Higugmaa ang Inyo mga Kaaway,” Liahona, Nob. 2020, 26–29.
Ang pulong sang Dios makabulig sa akon nga makilala ang sayop nga doktrina.
Bisan pa nga sang ulihi nag-ako si Nehor nga butig ang iya ginpanudlo, ang iya mga pinanudlo nagpadayon sa pag-impluwensya sa mga Nefinhon sa madamo nga tinuig. Ngaa sa banta mo nga nanamian ang mga tawo sang ginpanudlo ni Nehor? Sa Alma 1:2–6, pangitaa ang mga kabutigan sa pinanudlo ni Nehor—kag ang mga kamatuoran nga iya gingamit para taguon ato nga mga kabutigan.
Nakigsumpong si Gideon kay Nehor “paagi sa mga pulong sang Dios” (Alma 1:7, 9 Ari ang pila ka balaan nga mga kasulatan nga nagabali sang mga binutig ni Nehor: Mateo 7:21–23; 2 Nefi 26:29–31; Mosias 18:24–26; kag Helaman 12:25–26. Tilawi nga palip-uton ang ginasiling sang tagsa ka dinalan sa balaan nga kasulatan. Ano ang imo natun-an sa buhi nga mga propeta nga nagabali sang butig nga mga pinanudlo sa aton panahon?
Ang matuod nga mga disipulo ni Jesucristo “mapainubuson nga mga sumolunod sang Dios.”
Ang kapitulo 1 kag 4 sang Alma nagalaragway sang mga panahon sang ang Simbahan nag-uswag, pero lainlain ang reaksyon sang mga miyembro sang Simbahan sa sinang kabuganaan. Halimbawa, ikumparar ang Alma 1:19–30 sa Alma 4:6–15 para makita kon paano nagliwat ang mga miyembro sang Simbahan sa pila lamang ka tuig. Base sa imo nabasa, ano ang pagtamod sang matuod nga mga disipulo ni Cristo sa mga tawo nga lain ang ginapatihan? Ano ang pagtamod sang matuod nga mga disipulo ni Cristo sa manggad kag katin-aran? Ano ang nabatyagan mo nga kinahanglan bag-uhon sa imo kaugalingon nga panimuot?
Ipaanggid ang balaan nga mga kasulatan sa imo kaugalingon. Pamensara kon paano ang mga istorya kag pinanudlo sa balaan nga mga kasulatan magamit sa imo kabuhi. Halimbawa, mahimo nga makakita ka sang pagpalareho sa mga problema nga natalupangdan mo sa karon kag sa mga problema nga gin-atubang sang mga Nefinhon sa Alma 1–4.
Ang akon ehemplo kag testimonya sarang magbag-o sang mga tagipusuon.
Mahimo nga naintiendihan mo ang kasubo nga nabatyagan ni Alma sang makita niya ang nagakatabo sa iya katawhan. Pangitaa ang mga problema nga iya nakita sa Alma 4:6–15. May natalupangdan ka bala nga pareho nga mga problema? Siguro nagakabalaka ka sa isa ka mahal sa kabuhi nga ginabudlayan sa sini nga mga problema. Nakapanumdom ka bala kon ano ang pwede mo himuon para magbulig?
Makasiling ang iban nga si Alma, bilang puno nga hukom, amo ang pinakamaayo nga tawo nga magsolbar sining mga problema. Pero nabatyagan ni Alma nga may mas maayo pa nga paagi. Samtang ginabasa mo ang mga bersikulo 16–20, ano ang nanamian mo sa iya pamaagi sa pagbulig sa iya katawhan?
May dako nga pagtuo si Alma sa pulong sang Dios kag sa “pat-od nga panaksihon” (bersikulo 19). Ano nga mga halimbawa ang imo nakita parte sa gahum sang pat-od nga panaksihon? Samtang ginabinagbinag mo ang lainlain nga pamaagi nga mapaambit mo ang imo testimonya kay Jesucristo kag sa Iya ebanghelyo, pwede mo nga basahon liwat ang Alma 4:6–14. Ano ang ginapakita sang mga aksyon sang mga miyembro sang Simbahan parte sa ila mga testimonya kay Jesucristo kag sa Iya mga pinanudlo? Ano ang natalupangdan mo nga epekto sang ila mga aksyon—sa ila kaugalingon kag sa iban? Pwede ka man magpanghunahuna sang mga paagi nga ginbugayan ka tungod sa pat-od nga panaksihon sang iban, bisan man kon ginpaambit ini paagi sa pulong ukon sa aksyon.
Magpamensar sang mga paagi nga pwede mo ipaambit ang imo testimonya parte kay Jesucristo—sa pulong ukon sa buhat. Sin-o ang makabenepisyo sa imo pagpamatuod?
Para sa dugang nga mga ideya, tan-awa sa mga isyu sini nga bulan sang mga magasin nga Liahona kag Para sa Kusog sang mga Lamharon.
Mga Ideya para sa Pagtudlo sang mga Kabataan
Mabuligan ako sang Ginuo nga makilala ang indi husto nga mga panudlo.
-
Isa ka paagi nga tun-an ang Alma 1:2–4 upod sa imo kabataan amo ang buligan sila nga maghimo sang true-or-false nga quiz gamit ang mga ginpangtudlo ni Nehor, isa ka huwad nga manunudlo. Dayon hambalan ninyo sang imo kabataan kon ngaa masami ginasimpon ni Satanas ang mga kamatuoran sa kabutigan. Buligi ang imo kabataan nga magpanumdom sang iban pa nga mga halimbawa. Sa mga bersikulo 7–9, paano ginbatuan ni Gideon ang mga kabutigan ni Nehor?
Bilang miyembro sang Ang Simbahan ni Jesucristo sang mga Santos sa Ulihing mga Adlaw, palangga ko kag ginaalagaran ang iban.
-
Ang iban nga mga miyembro sang Simbahan sang Ginuo sa panahon ni Alma maalwan kag maatipanon, kag ang iban nga mga miyembro indi maayo kag bugalon. Para buligan ang imo kabataan nga magtuon sa sining mga eksperiyensya, pwede ninyo basahon sing ululupod ang Alma 1:27, 30 kag ilista ang mga klase sang tawo nga ginbuligan sang mga miyembro sang Simbahan sang Ginuo. Sin-o ang kilala naton nga basi “nagakinahanglan” (Alma 1:30) sang aton pagpalangga kag bulig?
-
Ano ang dapat naton himuon kon indi maayo ang mga tawo sa aton? Pamensara nga basahon upod sa imo kabataan kon paano gintrato ang mga sumulunod ni Cristo sa Alma 1:19–20. Hambali kon ano ang ila reaksyon sa mga bersikulo 22 kag 25. Basi pwede man kamo magpraktis sang mga paagi nga magsabat kon indi maayo ang iban.
Ang akon testimonya makapabakod sa iban.
-
Masami ang “pat-od nga panaksihon” (Alma 4:19) sang isa ka bata may mabaskog nga impluwensya sa iban. Para buligan ang imo kabataan nga madiskubrehan ini, pwede mo basahon upod sa ila ang Alma 4:8–12, 15, nga ginabuligan sila nga pangitaon ang mga problema nga nagakatabo sa Simbahan. Ano ang pwede himuon ni Alma para solbaron ining mga problema? Buligi sila nga tukibon kon ano ang gindesisyon ni Alma nga himuon sa Alma 4:16–20. Basi pwede ninyo iistorya sa isa kag isa kon paano kamo ginpabakod sang testimonya kay Jesucristo sang iban nga tawo.
-
Kon kinahanglan sang imo kabataan sang dugang nga mga halimbawa kon ano ang testimonya, pamensara nga magpakita sang video clip sang isa ka manughambal sa pangkabilogan nga komperensya nga nagahatag sang testimonya. Ano ang aton matun-an parte sa testimonya sa sining mga bulig? Tugoti ang imo kabataan nga magpraktis sa pagpaambit sang ila mga testimonya.
Para sa dugang nga mga ideya, tan-awa sa isyu sang Abyan nga magasin sini nga bulan.
Alma and Amlici [Si Alma kag si Amlici], ni Scott M. Snow