“10–16 Jun: ‘?Yufala I Ting se Yufala I Bin Kasem Bigfala Jenis Ia long Hat blong Yufala?’ Alma 5–7,” Kam Folem Mi—Blong Hom mo Jos: Buk blong Momon 2024 (2024)
10–16 Jun Alma 5-7,” Kam Folem Mi—Blong Hom mo Jos: 2024 (2024)
Yangfala Alma i stap tijim ol pipol blong Soram
10–16 Jun: “?Yufala I Ting se Yufala I Bin Kasem Bigfala Jenis Ia long Hat blong Yufala?”
Alma 5–7
Alma i no bin save abaot ol fasin blong tedei blong katem man mo operetem hat blong man blong sevem laef blong man, we i mekem se oli save riplesem wan hat we i sik wetem wan we i helti. Be hem i bin save abaot wan “jenis long hat” we i mekem ol merikel (Alma 5:26)—wei ia we Sevya i stap yusum blong givim yumi wan niu laef long saed blong spirit, we i olsem se yumi “bon bakegen” (luk long Alma 5:14,49). Alma i bin save luk se, jenis blong hat ia, i wanem we plante long Ol Man blong Nifae oli bin nidim. Sam oli bin rij, mo sam oli bin pua, sam oli gat hae tingting, mo sam tingting blong olgeta i stap daon, sam oli mekem nogud long man, mo ol narawan oli gat ol hadtaem from man i mekem nogud long olgeta (luk long Alma 4:6–15). Be evriwan i bin nidim blong kam long Jisas Kraes blong oli kam oraet evriwan—semmak olsem we yumi evriwan i nidim tedei. Sapos yumi stap wantem blong winim hae tingting, o blong stap strong tru long ol hadtaem, mesej blong Alma i semmak nomo: “kam mo no fraet” (Alma 7:15). Letem Sevya i jenisim wan hat we i strong, we i sin, o i karekil, i kam wan hat we tingting blong hem i stap daon, i klin evriwan mo i niu.
Ol tingting blong stap lan long Hom mo Jos
Mi mas gat eksperiens—mo gohed blong filim—wan bigfala jenis insaed long hat.
Presiden M. Russell Ballard i bin eksplenem valiu blong ol kwestin ia: “Mi nidim blong tekem taem blong askem miwan oltaem: ‘?Hao nao mi stap mekem?’ Olsem wan gaed blong mi, long taem blong praevet intaviu abaot miwan, wetem miwan, mi laekem blong ridim mo tingting hevi long ol kwestin we i kambak long miwan, we mi save faenem long japta blong Alma” (“Return and Receive,” Liahona, Mei 2017, 64).
Tingting blong ridim Alma 5:14–33 olsem se yu stap intaviu long yuwan, mo yu stap luklukgud evri pat blong hat blong yu. Yu save raetemdaon ol ansa blong ol kwestin ia. ?Wanem nao yu lanem abaot yuwan? ?Wanem nao yu filim we i givim insperesen long yu blong go mekem olsem risal blong intaviu ia?
Luk long Dale G. Renlund, “Preserving the Heart’s Mighty Change,” Liahona, Nov. 2009, 97–99.
Taem yumi stap tanem yumi i go long God, yumi save gotru long wan “jenis long hat.”
Mi save kasem witnes blong miwan abaot Sevya mo gospel blong Hem tru long Tabu Spirit.
Long Alma 5, taem Alma i eksplenem hao hem i bin kasem wan testemoni abaot Sevya, hem i no bin talem abaot eksperiens blong hem we hem i bin luk wan enjel (luk long Mosaea 27:10–17). ?Hao nao Alma i bin kam blong save trutok hemwan? Ating yu save yusum wanem we yu faenem insaed long Alma 5:44–51 blong raetem wan “resipi” blong kasem wan testemoni blong Jisas Kraes mo ol tijing blong Hem. Wanem ol “samting blong yusum” (ol trutok blong gospel) mo “ol instraksen” (ol samting yumi save mekem blong lukaotem trutok) we Alma i putum insaed? ?Wanem “samting blong yusum” mo “instraksen” oli save ademap long resipi blong olgeta aot long eksperiens blong olgetawan, o aot long ol eksperiens we oli stap long ol skripja?
“From mi luk se yufala i stap long ol rod blong stret mo gud fasin.”
Samtaem yumi olsem ol pipol long Sarahemla, we oli nidim blong oli singaotem olgeta blong sakem sin (luk long Alma 5:32). Ol narafala taem, yumi kam moa olsem ol pipol blong Gidion, we oli traem blong wokbaot “long rod ia blong stret mo gud fasin” (Alma 7:19). Wanem nao yu faenem long mesej blong Alma long Gidion (long Alma 7) we i semmak long wanem we hem i bin talem long Sarahemla (long Alma 5)? ?Wanem ol samting we i defren we yu bin luksave? Lukaotem ol samting we Alma i bin tijim we i save helpem yu stap “long rod ia we i lid i go long kingdom blong God” (Alma 7:19).
Sevya i tekem long Hemwan ol sin blong yumi, ol sobodi blong yumi, mo ol hadtaem blong yumi.
?Yu bin filim se i no gat wan i andastanem ol traehad o ol jalenj blong yu? Sapos i olsem, ol trutok we Alma i bin tijim oli save help. Taem yu stap rid, tingtingbak long wanem nao ol ves ia oli bin tijim abaot ol stamba tingting blong sakrifaes blong Sevya. Maet yu save mekem wan jat wetem ol heding Wanem samting nao Sevya i safa from mo From wanem Hem i safa mo listim wanem yu faenem long Alma 7:7–16 (luk tu long Aesea 53:3–5). ?Yu save tingbaot wan spesel taem we Hem i bin safa from sam long ol samting ia? Hemia sam long ol eksampol insaed long ol skripja: Matiu 4:1–13; 26:55–56; 27:39–44; Mak 14:43–46; Luk 9:58. ?Wanem nao yu save ademap long lis blong yu aot long ol ves ia?
Hem i wan samting blong biliv se Sevya i bin safa from yu. ?Be hao nao safring blong Hem i mekem we i defren long laef blong yu evri dei? Hemia sam long ol skripja we i soem hao Jisas Kraes i save help o “givhan” long yu: Inos 1:5–6; Mosaea 16:7–8; 21:15; 24:14–15; 3 Nifae 17:6–7; Ita 12:27–29; Doktrin mo Ol Kavenan 121:7–10. ?Wanem nao yu bin lanem long ol ves ia? ?Wanem sam nara wei we Hem i kam blong helpem yu? ?Wetaem nao yu bin eksperiensem help blong Hem?
Wan hym olsem “Mi Nidim Yu Oltaem” o “Mi Save Ridima Hem I Laef” (STSP, ol pej 12, 38) i save soem glad mo bigfala tangkyu blong yu from givhan blong Sevya. ?Wanem ol sentens long ol hym ia i talemaot ol filing blong yu long Hem?
Luk tu long Gospel Topics, “Atonement of Jesus Christ,” Gospel Library; “His Grace” (koleksen blong vidio), Gospel Library.
Testifae abaot Jisas Kraes. Tingting long ol wei we yu save serem ol testemoni blong yu abaot Sevya mo Hamas Hem i tabu, gladhat, mo lav blong Hem. Yu save leftemap tingting blong ol pipol we yu tijim blong testifae abaot Hem taem oli stap askem ol kwestin we i pusum olgeta blong serem hao oli filim abaot Hem.
Blong moa tingting, luk long namba blong manis ia long Liahona mo Blong Ol Yut Oli Kam Strong magasin.
Sam Tingting blong Tijim Ol Pikinini
Mi save kasem testemoni blong miwan tru long Tabu Spirit.
-
Blong helpem ol pikinini blong yu blong oli lanem blong mekem testemoni blong olgetawan i gro, yu save soem long olgeta pikja andanit ia mo askem hao yumi helpem ol bebi animol ia blong gro. Afta yu save yusum hemia i go kasem pat ia blong stap kea long ol testemoni blong yumi. ?Wanem kaen kea we yumi nidim long ol testemoni blong yumi? ?Olsem wanem yumi save talem se ol testemoni blong yumi i stap gro?
Pikjatu boe wetem ol bebi animolTaem yumi akseptem gospel, i olsem we yumi stap statem wan niu laef.
-
?Olsem wanem nao Alma i kasem wan strong testemoni blong Jisas Kraes? Yu save ridim Alma 5:44–46 wetem ol pikinini blong yu blong faenem ol ansa long kwestin ia. Ating ol pikinini blong yu i save raetemdaon wan plan blong mekem wan samting long wik ia blong mekem testemoni blong olgeta i kam strong moa.
Sevya i tekem long Hemwan ol sin blong mi, ol harem nogud, mo ol hadtaem blong mi.
-
?Hao nao yu save helpem ol pikinini blong yu blong andastanem Alma 7:10–13 blong mekem se oli save kam blong save se Jisas Kraes i kea from olgeta mo Hem i save helpem olgeta? Maet yu save askem olgeta blong serem wan eksperiens long taem we oli bin sik o harem bodi i soa o gat wan nara problem we i mekem oli no harem gud. ?Olsem wanem nao ol narawan i helpem olgeta blong filim gud moa? Serem testemoni blong yu se Sevya i bin safa from ol samting ia tu, mo tokbaot wan taem we Hem i bin kamfotem mo helpem yu.
-
Taem yu mo ol pikinini blong yu i rid long Alma 7:11–13, lukaotem ol samting we Jisas Kraes i bin safa from blong yumi. Invaetem ol pikinini blong yu blong yusum ol toktok mo sentens we oli faenem blong komplitim sentens ia: “Jisas i bin safa blong mekem se Hem i save helpem mi.” ?Olsem wanem nao hem i helpem yumi blong save se Jisas i andastanem ol hadwok blong yumi? ?Olsem wanem nao yumi kasem help blong Hem? Serem testemoni blong yu abaot Jisas Kraes.
Blong stap folem Jisas Kraes, i kipim mi long stret rod i gobak long Papa antap long Heven.
-
Lego ol pikinini blong yu i lukluk long wan mira taem yufala rid long Alma 5:14 (luk tu long aktiviti pej blong wik ia). ?I minim wanem blong gat fes blong Sevya long yumi?
-
?Olsem wanem nao yu save yusum wei we Alma i bin tokbaot rod ia we i gobak long Papa long Heven blong helpem ol pikinini blong lanem blong stap mekem ol gudfala joes? Yu save ridim Alma 7:19–20 i go long olgeta mo letem oli ak folem taem oli wokbaot long ol “rod we i kruked” mo stap wokbaot long wan stret rod. Helpem olgeta blong tingting long ol joes wei helpem yumi blong stap long rod mo ol nara joes we bae i tekem yumi aot long rod ia. Yu save lukluk tu long ol pikja blong Jisas tugeta mo tokbaot ol samting we Hem i bin mekem blong soem rod i go bak long Papa long Heven. Wan singsing olsem: “Mi Traem blong Kam Olsem Jisas”(Liahona, Epril 2012, 64.) i save givim sam tingting.
Blong moa tingting, luk long namba blong manis ia long Fren magasin.
Loya blong Yumi, i kam long Jay Bryant Ward