“27 Mei–2 Jun: ‘Oli Singaotem Olgeta Ol Pipol blong God.’ Mosaea 25–28,” Kam Folem Mi—Blong Hom mo Jos: Buk blong Momon 2024 (2024)
27 Mei–2 Jun. Mosaea 25-28,” Kam Folem Mi—Blong Hom mo Jos: 2024 (2024)
Taem Yangfala Alma I Jenisim Laef blong Hem, i kam long Gary L. Kapp
27 Mei–2 Jun: “Oli Singaotem Olgeta Ol Pipol blong God.”
Mosaea 25–28
Afta kolosap long tri jeneresen blong stap laef long ol seperet graon, Ol Man blong Nifae oli bin kam wan pipol bakegen. Ol pipol blong Limhae, ol pipol blong Alma, mo ol pipol blong Mosaea—iven ol pipol blong Sarahemla, we oli no kamaot long laen blong Nifae—evriwan, “oli bin kaontem olgeta wetem Ol Man blong Nifae” (Mosaea 25:13). Plante long olgeta oli bin wantem tu blong kam ol memba blong Jos blong Lod, olsem ol pipol blong Alma. Mekem se, evriwan we oli bin “wantem blong tekem long olgeta nem blong Kraes,” oli bin baptaes, “mo oli singaotem olgeta ol pipol blong God” (Mosaea 25:23–24). Afta plante yia blong faet mo stap prisena, i luk se Ol Man blong Nifae oli stap glad long wan taem blong pis.
Be, i no tekem taem nating blong olgeta we oli no biliv oli stat blong mekem nogud bakegen long Ol Sent. Wanem we i mekem hat i soa long hemia, i we, plante long olgeta ia we oli no bin biliv, oli ol pikinini blong olgeta we oli stap biliv—“jeneresen ia we i stap kam antap” (Mosaea 26:1), wetem ol boe blong Mosaea, mo wan boe blong Alma. Stori i abaot wan long ol merikel visit blong wan enjel. Be tru merikel blong stori ia i no abaot ol enjel nomo be hem i abaot ol boe ia we oli go longwe long trutok. Tru jenis long laef, i wan merikel we, long wan wei o wan nara wei, bae i nidim blong i hapen long yumi evriwan.
Ol tingting blong stap lan long Hom mo Jos
Mi save helpem ol narawan blong kam long Jisas Kraes.
Tru jenis long laef i blong wanwan man—i no wan samting spesel o wan memori we bae i nid blong pasem i go long wan long ol pikinini. Taem yu stap ridim Mosaea 26:1–6tingting hevi long sam risen abaot “jeneresen we i stap kam antap” oli foldaon mo luksave ol en risal blong olgeta we oli no biliv. Maet bae yu tingting tu abaot ol pipol we yu wantem tumas se bae yu tekem olgeta oli kam long Kraes. Truaot stadi blong yu long Mosaea 25–28, smol voes blong Spirit i save talem long yu ol samting we yu save mekem blong helpem olgeta blong bildimap fet long Jisas Kraes.
Ol fetful wokman blong God oli stap lukaot blong mekem tingting blong Hem.
Samtaem, yumi save ting se wan lida blong Jos olsem Alma, oltaem nomo hem i save stret wanem blong mekem. Long Mosaea 26 yumi stap rid abaot wan problem insaed long Jos we Alma i neva fesem. ?Wanem nao Alma i bin mekem taem hem i bin stap long situesen ia? (luk long Mosaea 26:13–14, 33–34, 38–39). ?Wanem tingting nao eksperiens blong Alma i givim long wei blong fesem ol problem we i had insaed long famli blong yu, o insaed long Jos seves?
Wanem nao Lod i tijim Alma long hem long Mosaea 26:15–32? Luk se sam long ol ansa blong Lod, oli no ansarem stret kwestin blong Alma. Wanem tingting nao hemia i givim long yu abaot prea mo fasin blong kasem revelesen we i blong yuwan?
Ol Prinsipol we Oli No Save Finis. Tingting long hao nao ol stori mo ol tijing blong ol skripja, oli go stret wetem laef blong yumi. Eksampol. Yu save askem yuwan: “?Wanem eksperiens nao mi bin gat we oli semmak long Alma?” o “?Wanem ol trutok we Alma i bin tijim we i save helpem mi?”
Papa long Heven bae i fogivim mi, taem bae mi fogivim ol narafala man.
Fasin blong sakem sin, mo fasin blong fogiv, oli ol stamba toktok we oli kamaot oltaem long Mosaea 26–27. Lukaotem ol toktok mo ol sentens we i tij abaot fasin blong sakem sin mo fasin blong fogiv long Mosaea 26:22–24, 29–31; 27:23–37.
Sam pipol oli save askem olgetawan sapos God i fogivim tru olgeta. ?Olsem wanem yu pikja long maen blong yu Olfala Alma we bae i givim kaonsel long wan memba blong Jos long Sarahemla we i gat wari long saed ia? ?Wanem nao Alma i bin lanem long Lod insaed Mosaea 26:15–31 we i save helpem Jos memba ia? (Luk tu long Moronae 6:8; Doktrin mo Ol Kavenan 19:16–18; 58:42–43).
Tru long Jisas Kraes, mi save jenis blong kam gud moa.
I klia long mifala se Yangfala Alma i nidim blong bon bakegen long saed blong spirit. Hem mo ol boe blong Mosaea oli ol “moa nogud long ol rabis man blong mekem ol sin” (Mosaea 28:4). Be i no longtaem afta we hem i jenisim laef blong hem, Alma i testifae se fasin blong jenisim laef, i wan nid— blong evriwan: “No sapraes,” hem i talem, “se evri man man mo woman … oli mas bon bakegen” (Mosaea 27:25; oli ademap italik).
Taem yu stap rid abaot eksperiens blong Alma long Mosaea 27:8–37, tingting blong putum yuwan long stori blong hem. ?Yu save tingting long sam samting long yuwan we i nidim blong jenisim? ?Hu nao, olsem papa blong Alma, maet i stap prea from yu “wetem plante fet”? ?Wanem eksperiens nao i bin help “blong winim tingting blong yu abaot paoa mo atoriti blong God”? (Mosaea 27:14). ?Wanem “bigfala samting” nao Lod i bin mekem blong yu mo famli blong yu we yu mas “tingbaot”? (Mosaea 27:16). ?Wanem samting yu lanem aot long ol toktok mo ol aksen blong Yangfala Alma long saed blong mining blong stap bon bakegen? ?Wanem ol eksampol nao yu bin luk?
Tekem smol taem blong rekodem sam long ol wei we Sevya i stap helpem jenisim yu—o mekem se yu bon bakegen—iven sapos ol eksperiens blong yu oli no gat tumas aksen o olsem hemia blong Alma. ?I gat wan hym yu save singsing o lisin long hem we i save soemaot filing blong yu, olsem “Mi Sapraes Tumas We Jisas Hem I Lavem Mi”? (STSP, namba 22). ?Hu nao bae i gat blesing blong harem eksperiens blong yu?
Elda David A. Bednar i komperem fasin blong bon bakegen wetem fasin blong mekem kukamba i kam ol smosmol pikel (luk long “Ye Must Be Born Again,” Liahona, Mei 2007, 19–22). ?Wanem nao fasin ia blong komperem kukamba i tijim yu abaot fasin ia blong jenisim laef?
Luk tu long Gospel Topics, “Become like Jesus Christ,” Gospel Library; “Alma Testifies He Has Been Born of God” (video), Gospel Library.
God i stap harem ol prea blong mi mo bae i ansarem olgeta folem tingting blong Hem.
Mebi yu bin stap long wan situesen olsem blong Olfala Alma, wetem wan famli memba we i stap mekem ol joes we i stap prapa spolem hem. ?Wanem nao yu faenem insaed long Mosaea 27:8–24 we i givim hop long yu? ?Olsem wanem ol ves ia i givim paoa long ol prea blong yu long bihaf blong ol narafalawan?
Blong moa tingting, luk long namba blong manis ia long Liahona mo Blong Ol Yut Oli Kam Strong magasin.
Sam Tingting blong Tijim Ol Pikinini
Lod i wantem mi blong fogiv.
-
Blong helpem ol pikinini blong yu blong faenem wanem we Lod i bin tijim Alma long hem abaot fasin blong fogiv, yu save invaetem olgeta blong ridim Mosaea 26:29–31 mo kaontem hamas taem toktok ia “fogiv” i kamaot. ?Wanem nao ol ves ia oli stap tijim yumi long saed blong fasin blong fogivim narafala man? (Luk tu long “Help Me, Dear Father,” Children’s Songbook, 99.)
-
Blong mekem i moa klia eksampol blong fasin blong fogiv we Sevya i mekem, yu save soem wan pikja blong Hem long kros mo rid tugeta long Luk 23:33–34. ?Wanem nao Jisas i bin askem Papa long Heven blong mekem long ol pipol we oli putum Hem long kros? Afta long toktokraon, ol yangfala pikinini blong yu oli save rolplei long fasin blong stap fogivim wanwan long olgeta.
-
Samtaem i had blong fogivim yumiwan bakegen taem yumi mekem ol mistek. ?Hao nao ol toktok blong God long Alma i help? Ol pikinini oli save priten se oli stap toktok long wan we i gat tingting ia se God bae i neva save fogivim olgeta. Invaetem ol pikinini blong yu blong faenem wan samting long Mosaea 26:22–23, 29–30 we maet bae i save helpem man ia.
Jisas Kraes i helpem mi blong kam moa olsem Hem.
-
Fasin blong Yangfala Alma mo ol boe blong Mosaea blong jenisim laef i save soem long ol pikinini blong yu se wetem paoa blong Sevya, eni man i save jenis. Yu o ol pikinini blong yu i save yusum ol peinting long aotlaen ia, long aktiviti pej long wik ia, mo sam ki skripja long Mosaea 27:8–37 blong talemaot stori (luk tu long “Japta 18: Yangfala Alma I Sakem Sin,” long Ol Stori long Buk blong Momon, 49–52). Mekem i klia gud long ves 24, blong tijim se Alma i sakem sin mo Jisas Kraes i helpem hem blong jenis. Letem ol pikinini oli aktem stori sapos oli wantem.
Papa blong Hem i Stap Glad, i kam long Walter Rane
Mi save prea mo livim kakae, blong mekem se God i blesem olgeta we mi lavem.
-
Ridim tugeta Mosaea 27:8–24, mo askem ol pikinini blong yu blong faenemaot wanem nao Alma mo ol pipol blong hem oli bin mekem blong helpem Yangfala Alma. ?Yu bin livim kakae, mo prea from wan narafala man? Serem ol eksperiens blong yu wetem ol pikinini blong yu, mo letem oli serem blong olgeta.
-
?Yu o pikinini blong yu i save wan we i nidim help blong God? Folem eksampol blong Alma, ating yu save prea tugeta from man ia, mo sapos oli save mekem, livim kakae from olgeta tu.
Blong moa tingting, luk long namba blong manis ia blong Fren magasin.
Pikja blong wan enjel i kamkamaot long Yangfala Alma, i kam long Kevin Keele