Panumduma ang tanan nga mga rason nga pwede ihatag sang mga tawo sa indi pagpaambit sang ebanghelyo: “Diutay lang ang akon nahibal-an” ukon “Indi ako sigurado kon mangin interesado sila” ukon basi “Nahadlok ako nga balibaran ko nila.” Siguro ikaw mismo nakapamensar sang pareho sini nga mga butang kon kaisa. May dugang pa nga rason ang mga Nefinhon sa indi pagwali sang ebanghelyo sa mga Lamanhon: ginlaragway sila nga mga “maila kag isa ka nagtig-a kag isa ka mabangis nga katawhan; isa ka katawhan nga nagakalipay sa pagpamatay sang mga Nefinhon” (Alma 17:14; tan-awa man sa Alma 26:23–25). Pero ang mga anak ni Mosias may mas mabaskog nga rason kon ngaa nabatyagan nila nga kinahanglan ipaambit ang ebanghelyo sa mga Lamanhon: “Nagahandum sila nga ang kaluwasan igapahayag sa tagsa ka tinuga, kay indi nila mabatas nga ang bisan sin-o nga tawhanon nga kalag mawala” (Mosias 28:3). Ang ining pagpalangga nga nag-inspirar kay Amon kag sa iya kauturan sarang man mag-inspirar sa imo sa pagpaambit sang ebanghelyo sa imo pamilya, kaabyanan, kag mga kakilala—bisan pa sa ila nga daw indi ang tipo nga magbaton sini.
Ang simple, sige-sige nga mga buhat sang debosyon kay Cristo nagabulig sa akon nga mabaton ang Iya gahum.
Ano ang imo matun-an sa Alma 17:1–4 parte sa kon paano mapapabilin ang imo testimonya kag pangako kay Jesucristo nga mabakod? Ano ang ginhimo sang mga anak ni Mosias, kag paano sila ginbugayan sang Ginuo?
Samtang imo ginabasa ang mga eksperiyensya sang mga anak ni Mosias sa Alma 17–22, tandai kon paano nakaapekto ang ila espirituhanon nga preparasyon sa ila pagserbisyo sa mga Lamanhon (halimbawa, tan-awa sa Alma 18:10–18, 34–36; 20:2–5; 22:12–16). Ano ang nabatyagan mo nga imo himuon para sundon ang ila ehemplo?
Sarang ako mangin instrumento sa mga kamot sang Dios.
Ang mga istorya sang pagkahaylo nga mabasahan naton sa balaan nga mga kasulatan masami nga makahalawhaw, pero sa tunga sini masami makita naton ang mga indibidwal nga may kaisog sa paghambal kag pagpaambit sang ila pagtuo kay Jesucristo. Hunahunaa ini samtang ginabasa mo ang parte kay Abis kag sa mga anak ni Mosias sini nga semana.
Ano sa banta mo ang buot silingon sang mangin instrumento sa mga kamot sang Dios? Basi makabulig ang pagpanumdom sang mga instrumento ukon gamit nga pwede mo gamiton sa adlaw-adlaw nga pagpangabuhi. Sa Alma 17:6–12, pangitaa kon ano ang ginhimo sang mga anak ni Mosias para mangin mga instrumento sila sa mga kamot sang Dios. Paano ka mangin mas epektibo nga instrumento sa pagbulig sa iban nga magpalapit kay Cristo?
Ano ang nanamian mo kay Abis sa Alma 19:16–36? Ano ang imo matun-an sa iya parte sa pagbulig sa iban nga magpatubo sang pagtuo kay Cristo? Halimbawa, ano sa pamatyag mo ang makabulig sa imo mga pinalangga nga “magpati sa gahum sang Dios”? Alma 19:17
Pwede mo man ikumparar ang eksperiyensya ni Abis sa mga prinsipyo nga gintudlo ni Elder Dieter F. Uchtdorf sa “Pangmisyonaryo nga Buluhaton: Pagpaambit sang Kon Ano nga Ara sa Imo Tagipusuon” (Liahona, Mayo 2019, 15–18). Paano ginpakita ni Abis ang “Lima ka Simple nga mga Panugyan” ni Elder Uchtdorf? Tilawi nga isulat ang pila ka butang nga pwede mo ihambal parte kay Jesucristo. Halimbawa, “Para sa akon, si Jesucristo …” ukon “Ginabuligan ako sang Manluluwas nga …”
Maggamit sang mga leksyon gamit ang isa ka bagay. Tagsa nga makita ukon mahikap sang mga tawo ang butang nga may angot sa ila ginatun-an, labanlaban nga mas madumduman nila ini. Kon nagatudlo ka sang Alma 17:11, halimbawa, pamensara nga magpakita sang mga instrumento sa musika ukon pagsulat nga magabukas sang diskusyon parte sa pagkainstrumento sa mga kamot sang Dios.
Kon ginapakita naton ang pagpalangga sa iban, mabuligan naton sila nga batunon ang ebanghelyo ni Jesucristo.
Pangitaa ang mga bersikulo sa Alma 17–19 nga nagapakita kon paano gin-inspirar sang pagpalangga ni Amon sa mga Lamanhon ang iya mga pagpaninguha sa pagpaambit sang ebanghelyo ni Jesucristo. Ano pa nga mga kamatuoran parte sa pagpaambit sang ebanghelyo ang imo natun-an sa iya ehemplo?
Litrato
Si Amon nga ginasalbar ang mga carnero sang hari
Minerva K. Teichert (1888–1976), Ammon Saves the King’s Flocks [Ginsalbar ni Amon ang mga Panong sang Hari], 1949–1951, oil sa masonite, 35 15/16 x 48 pulgada. Brigham Young University Museum of Art, 1969.
Pagkatapos nga isaysay ang pagkahaylo ni Lamoni kag sang iya katawhan, ginpalip-ot ni Mormon ang panaysayon sa isa ka obserbasyon parte kay Jesucristo. Ano ang ginatudlo sang Alma 19:36 sa imo parte sa karakter sang Ginuo? Ano pa gid ang ginatudlo sa imo sang kasaysayan sa Alma 19:16–36 parte sa Iya? Sang san-o mo nabatyagan nga nagauntay ang kamot sang Ginuo sa imo?
Ang makilala ang Dios labaw pa sa bisan ano nga sakripisyo.
Ikumparar kon ano ang handa nga isakripisyo sang tatay ni Lamoni para maluwas ang iya kabuhi (tan-awa sa Alma 20:23) sa kon ano ang handa niya ihatag para mabaton ang kalipay sang ebanghelyo kag para makilala ang Dios (tan-awa sa Alma 22:15, 18). Binagbinaga kon ano ang handa mo nga isakripisyo para mas makilala pa gid ang Dios.
Para sa dugang nga mga ideya, tan-awa sa mga isyu sini nga bulan sang mga magasin nga Liahona kag Para sa Kusog sang mga Lamharon.
Ang akon testimonya kay Jesucristo nagatubo kon magbasa ako sang balaan nga mga kasulatan, magpangamuyo, kag magpuasa.
Paano makabulig ang mga ehemplo sang mga kabataan ni Mosias sa imo kabataan nga magpatubo sang ila mga testimonya parte kay Jesucristo? Pwede mo buligan ang imo kabataan nga pangitaon kon ano ang ginhimo sang mga anak ni Mosias para padakuon ang ila espirituhanon nga kusog sa Alma 17:2–3. Dayon pwede sila magdrowing ukon magpangita sang mga butang nga nagasimbolo sining mga butang. Buligi sila nga magplano kon ano ang ila himuon para pabakuron ang ila mga testimonya parte sa Manluluwas.
Pwede ko ipaambit ang ebanghelyo ni Jesucristo sa iban.
Para magtuon kon paano mangin instrumento sa mga kamot sang Dios, pareho sang mga anak ni Mosias, pwede kamo sang imo kabataan magtan-aw sang isa ka instrumento ukon galamiton kag hambalan kon para sa ano ini ginagamit. Dayon pwede ninyo basahon ang Alma 17:11 kag hambalan kon ano ang buot silingon sang mangin instrumento sang Amay nga Langitnon sa pagbulig sang mga tawo nga magtuon parte kay Jesucristo.
Ang pahina para sa kahiwatan sini nga semana may mga litrato nga nagarepresentar sang mga kamatuoran nga gintudlo ni Amon kay Haring Lamoni. Pwede mo buligan ang imo kabataan nga pangitaon ining mga kamatuoran sa Alma 18:24–40. Pwede mag-akto ang imo kabataan nga kuno abi mga misyonero sila kag iistorya kon ano ang ila nahibal-an parte sa sining mga kamatuoran.
Pagkatapos ninyo nga basahon sang imo kabataan ang parte kay Abis (tan-awa sa Alma 19:16–20, 28–29), pwede sila mag-akto nga kuno abi si Abis nga nagadalagan sa palibot, nga nagapanuktok sa mga pwertahan, kag nagasugid kon ano ang natabo sa Alma 19:1–17. Paano kita mangin pareho kay Abis kag ihambal kon ano ang nahibal-an naton parte kay Jesucristo kag sa Iya ebanghelyo?
Pwede ko buligan ang iban nga magpalapit kay Cristo paagi sa pagpakita sang akon pagpalangga sa ila.
Sang primero, si Haring Lamoni kag ang iya tatay matig-a ang tagipusuon sa ebanghelyo. Sang ulihi, naghumok ang ila mga tagipusuon, kag nagpati sila kay Jesucristo. Paano ini natabo? Buligi ang imo kabataan nga diskubrehon ang mga sabat sa sining pamangkot samtang inyo ginarebyu ang mga eksperiyensya ni Amon. Ukon basi gusto nga drowingon sang imo kabataan ang lainlain nga mga bahin sang istorya kag gamiton ang mga litrato sa pagsugid sang istorya. Ano ang ginhimo ni Amon para buligan si Lamoni kag ang iya tatay nga buksan ang ila mga tagipusuon sa ebanghelyo ni Jesucristo? (tan-awa sa Alma 17:21–25; 20:8–27; 22:1–3).
Basi may madumduman kamo sang imo kabataan nga tawo nga kinahanglan makahibalo parte kay Jesucristo. Buligi sila sa pagpanumdom sang mga paagi nga pwede sila mangin maayo nga ehemplo kag magpakita sang pagpalanga sa sina nga tawo, pareho sang ginhimo ni Amon kay Lamoni kag sa iya tatay.
Para sa dugang nga mga ideya, tan-awa sa sini nga bulan nga isyu sang Abyan nga magasin.
Litrato
larawan ni Abis
An illustration of Abish [Isa ka Larawan ni Abis], kay Dilleen Marsh