Ang mga istorya sa Alma 30–31 maathag nga nagapakita sang gahum sang mga tinaga—sa kalainan kag sa kaayuhan. Ang “nagapang-utis” kag “mabaskog nga mga pulong” sang butig nga manunudlo nga ginhingadlan nga Korihor nagapamahog sa pagdala sang “madamo nga mga kalag paidalom sa kalaglagan” (Alma 30:31, 47). Sa amo man, ang mga pinanudlo sang rebelde nga Nefinhon nga ginhingadlan nga Zoram nagdala sang bilog nga grupo sang mga tawo nga mahulog sa “dako nga kasaypanan” kag “ginpatalang ang mga dalanon sang Ginuo” (Alma 31:9, 11).
Sa kabaliskaran, may indi maidog nga pagtuo si Alma nga ang pulong sang Dios may “mas gamhanan nga epekto sa mga kaisipan sang katawhan sangsa espada, ukon bisan ano pa man” (Alma 31:5). Ang mga pulong ni Alma nagpahayag sang wala katapusan nga kamatuoran kag nagsandig sa gahum ni Jesucristo para pahipuson si Korihor (tan-awa sa Alma 30:39–50), kag ila gin-agda ang Iya bendisyon sa mga nag-upod sa iya nga dalhon ang mga Zoramnon pabalik sa kamatuoran (tan-awa sa Alma 31:31–38). Malahalon ini nga mga halimbawa para sa mga sumulunod ni Cristo sa karon nga panahon kon diin lapnagon ang butig nga mga mensahe. Pwede naton makita ang kamatuoran paagi sa pagsalig, pareho sa ginhimo ni Alma, “sa gamhanan nga epekto sang pulong sang Dios” (Alma 31:5).
Ginatinguhaan sang kaaway nga intuon ako paagi sa indi matuod nga mga pinanudlo.
Sa Alma 30, gintawag si Korihor nga “Anti-Cristo” (bersikulo 6). Ang anti-Cristo amo ang bisan sin-o ukon bisan ano nga nagakontra sing hayag ukon sa tago kay Jesucristo kag sa Iya ebanghelyo. Diin nga mga bersikulo sa Alma 30:6–31 ang nagapakita nga sigo kay Korihor ini nga paglaragway? Ang pagtuon sang butig nga mga pinanudlo ni Korihor makabulig sa imo nga makilala kag sikwayon ang pareho nga mga pinanudlo. Mahimo nga makabulig sa imo pagtuon ang masunod nga aktibidades:
Ano nga mga bagay ang gamiton mo sa leksyon para mas maintiendihan ang kinalain sang mga pinanudlo sang Manluluwas kag sang butig nga mga imitasyon ni Satanas? Ang pila ka halimbawa amo ang paon sa bunit, peke nga kuwarta, kag patalang nga pasayod. Paano mo mahibal-an nga peke ang isa ka butang? Paano mo makilala ang matuod?
Pamensara nga ilista ang butig nga mga doktrina nga gintudlo ni Korihor sa Alma 30:6–31 Diin sa iya mga pinanudlo ang makagalanyat sa karon nga panahon? (tan-awa sa Alma 30:12–18, 23–28). Ano nga halit ang posible matabo tungod sa pagbaton sang amo sini nga mga ideya? Ano nga butig nga mga mensahe ang ginagamit sang kaaway para intuon ka sa karon nga panahon?
Ano ang ginhimo ni Alma para kontrahon ang mga pinanudlo ni Korihor gamit ang kamatuoran? (tan-awa sa Alma 30:31–54). Paano mo magamit ining amo man nga mga prinsipyo sa imo kabuhi?
Pareho kay Alma, ang moderno nga mga propeta kag apostoles nagabulig sa aton nga mahibal-an ang kamatuoran kag ang kabutigan ni Satanas.
Litrato
Si Korihor nagapakighambal kay Alma
Korihor Confronts Alma [Gin-atubang ni Korihor si Alma], ni Robert T. Barrett
Madamo nga mga tawo sa karon ang nagapati nga wala sang Dios. Ano ang makita mo sa Alma 30:39–46 nga nagabulig sa imo nga makahibalo nga matuod ang Dios? Ano ang nagapugong sa aton nga makilala Sia? Ano pa nga mga testimonya ang ginhatag sang Dios sa imo nga Sia buhi?
Ano ang imo matun-an sa Alma 30:56–60 parte sa kon paano ginatrato sang yawa ang iya mga sumulunod? Ano ang pwede mo himuon para protektahan ang imo panimalay batok sa iya impluwensya?
Ang pulong sang Dios may gahum nga dalhon ang mga tawo sa pagkamatarong.
Ang problema sang pagseparar sang mga Zoramnon sa mga Nefinhon para sa iban daw kinahanglan sang solusyon-pulitika ukon militar (tan-awa sa Alma 31:1–4). Pero natun-an ni Alma nga magsalig sa “gamhanan nga epekto sang pulong sang Dios” (Alma 31:5). Ano ang imo matun-an sa Alma 31:5 parte sa gahum sang pulong sang Dios? (tan-awa man sa Mga Hebreo 4:12; 1 Nefi 15:23–24; 2 Nefi 31:20; Jacob 2:8; Helaman 3:29–30).
Samtang ginatun-an mo ang Alma 31, ano pa nga mga kamatuoran sang ebanghelyo ang imo makita nga may koneksyon sa imo mga eksperiyensya sa kabuhi? Halimbawa:
Paano mo nakita ang pulong sang Dios nga naggiya sang katawhan sa paghimo sang maayo nga mga butang? (tan-awa sa bersikulo 5).
Ikumparar ang mga pamatasan, mga balatyagon, kag mga aksyon ni Alma tuhoy sa iban nga tawo (tan-awa sa mga bersikulo 34–35) sa iya sang mga Zoramnon (tan-awa sa mga bersikulo 17–28). Paano ka mangin mas pareho kay Alma?
Ano ang makita mo sa Alma 31:30–38 nga makabulig sa mga tawo nga nagakasubo tungod sa mga sala sang iban?
Tungod kay Jesucristo, mahimo nga magbag-o ang bisan sin-o.
Pat-ini ang grupo sang mga tawo nga gin-upod ni Alma sa pagtudlo sang ebanghelyo sa mga Zoramnon (tan-awa sa Alma 31:6). Ano ang imo matun-an parte sa mga kabuhi sining mga tawo sa Mosias 27:8–37; 28:4; Alma 10:1–6; 11:21–25; 15:3–12? Ano ayhan ang mensahe para sa imo sang ila mga eksperiyensya?
Para sa dugang nga mga ideya, tan-awa sa mga isyu sini nga bulan sang mga magasin nga Liahona kag Para sa Kusog sang mga Lamharon.
Ang Libro ni Mormon nagapaandam sa akon sa patalang nga mga pinanudlo.
Pamensara ang pag-display sang pila ka bagay (pareho sang kuwarta ukon pagkaon) kag halampangan nga mga imitasyon sining mga bagay. Pwede ini magpadulong sa paghinambalanay parte sa paghibalo sang kinalain sang matuodtuod nga mga bagay kag sang peke nga mga bagay. Dayon pwede mo buligan ang imo kabataan nga ihambal kon diin sa Alma 30:12–18 ang binutig ukon indi matuod nga mga pinanudlo nga gintudlo ni Korihor parte sa Dios. Sa Alma 30:32–35, ano ang reaksyon ni Alma sa sinang mga binutig? Ano ang aton matun-an sa iya ehemplo?
Naghambal si Alma kon paano ang mga butang sa langit kag sa duta nagapamatuod nga buhi ang Dios. Kon posible, maglakat-lakat kamo sang imo kabataan sa gwa ukon magtindog sa tupad sang bintana samtang inyo ginabasa ang Alma 30:44. Ipatudlo sa ila ang mga butang nga nagabulig sa ila nga makahibalo nga matuod ang Dios kag palangga Niya sila. Pwede man sila magdrowing sang mga litrato sang mga butang nga ila nadiskubrehan (tan-awa sa pahina para sa kahiwatan sini nga semana).
Ang mga kabataan nagatuon paagi sa mga visual. Ang mga visual nagabulig sa imo kabataan nga mas maintiendihan kag madumduman kon ano ang gintudlo sa ila. Kalabanan sa aktibidades para sa kabataan sa sini nga outline nagapanugyan sang gamiton nga mga visual. Pamensara ang paggamit sang pareho gihapon nga mga visual sa palaabuton para buligan ang imo kabataan nga madumduman kon ano ang ila natun-an.
Paano mo buligan ang imo kabataan nga maintiendihan nga ang pulong sang Dios mas mabaskog sangsa “bisan ano pa man”? Alma 31:5 Pahunahunaa sila sang butang ukon tawo nga grabe ang gahum/impluwensya, ukon magpakita sang mga litrato sang pila ka gamhanan nga mga butang. Ano ang nagapagamhanan sa ila? Basaha ang Alma 31:5 sing ululupod, kag pamangkuta ang imo kabataan kon ano sa banta nila ang buot silingon sining bersikulo. Mag-istorya sang eksperiyensya sang ang pulong sang Dios may mabaskog nga impluwensya sa imo.
Ginapamatian sang Amay nga Langitnon ang akon mga pangamuyo.
Iistorya sa malip-ot ang sugilanon ni Alma kag sang mga Zoramnon, nga ginagamit ang mga bersikulo sa Alma 31:8–35. Buligi ang imo kabataan nga hibaluon kon ano ang ginhambal sang mga Zoramnon sa ila pangamuyo (tan-awa sa Alma 31:15–18) samtang ginabuligan ka nila sa paghimo sang tore nga Rameumptom gamit ang mga bloke ukon mga bato. Ipaathag nga indi ini ang paagi nga magpangamuyo kita. Samtang ginaistoryahan ninyo sang imo kabataan kon paano kita dapat magpangamuyo, ipakakas sa ila ang mga bloke ukon bato sing tag-isaisa. Basi pwede man nila itupad sa ila hiligdaan ang isa sang mga bato bilang pahanumdom nga magpangamuyo kada aga kag gab-i. Basi malingaw sila nga dekorahan ang ila bato.
Para sa dugang nga mga ideya, tan-awa sa isyu sang Abyan nga magasin sini nga bulan.
Litrato
Isa ka Zoramnon nga nagapangamuyo sa Rameumptom
Ang mga tagipusuon sang mga Zoramnon “naalsa tubtob sa tuman nga pagpalabi-labi, sa ila bugal” (Alma 31: 25).