O tala o loo i le Alema 30–31 o loo faaalia manino ai le mana o upu—mo le leaga ma mo le lelei. O “upu faaviivii” ma “leotetele” a se aoao pepelo e igoa ia Kori’oa sa faamata’uina e aumaia le “tele o agaga i lalo i le faafanoga” (Alema 30:31, 47). E faapena foi, o aoaoga a se sa Nifae liliuese na igoa ia Sorama na taitai ai se vaega o tagata e pauu “i sese tetele” ma “faapiopio ala o le Alii” (Alema 31:9, 11).
I le isi itu, sa i ai ia Alema se faatuatua e le maluelue e faapea, o le afioga a le Atua o le a i ai se “uiga mamana tele atu i luga o mafaufau o tagata nai lo le pelu, po o se isi lava mea” (Alema 31:5). O upu a Alema na faaalia ai le upumoni e faavavau ma valaau atu ai i le mana o Iesu Keriso e faafilemu ai Kori’oa (tagai Alema 30:39–50), ma na latou valaauliaina ai Ana faamanuiaga i luga o i latou o e na latou o e toe aumai sa Sorama i le upumoni (tagai Alema 31:31–38). O ni faataitaiga taua nei mo soo o Keriso i aso nei pe a taatele savali sese. E mafai ona tatou maua le upumoni e ala i le faatuatuaina, e pei ona sa faia e Alema, [o] “le mana o le afioga a le Atua” (Alema 31:5).
I le Alema 30, o loo ta’ua ai Kori’oa o se “Aneti-Keriso” (fuaiupu 6). O se aneti-Keriso o soo se tasi po o soo se mea e faaaliali pe faalilolilo e tetee atu ia Iesu Keriso ma Lana talalelei. O a fuaiupu i le Alema 30:6-31 o faaalia ai le fetaui lelei o lenei faamatalaga ia Korioa? O le suesueina o aoaoga sese a Korioa e mafai ona fesoasoani ia te oe e iloa ai ma teena aoaoga faapena. E mafai ona fesoasoani gaoioiga nei i lau suesuega:
O a ni lesona faitino e mafai ona e mafaufau i ai ia malamalama atili ai i le eseesega i le va o aoaoga a le Faaola ma faataitaiga sese a Satani? O nisi o faataitaiga o se maunu e faaaoga mo fagotaga, tupe pepelo, ma faasalalauga sese. E mafai faapefea ona e iloa pe o se mea e pepelo? E mafai faapefea ona e iloa le mea moni?
Mafaufau e fai se lisi o aoaoga faavae sese na aoaoina e Kori’oa i le Alema 30:6–31. O le fea o ana aoaoga atonu o faatosina mai i aso nei? (tagai Alema 30:12–18, 23–28). O le a se mea e afaina ai le taliaina o na manatu? O a savali sese o loo faaaoga e le fili e taumafai ai e faasese oe i le asō?
O le a le mea na fai e Alema e faafetaiaia ai aoaoga a Korioa e [faaaoga] ai mea moni? (tagai Alema 30:31–54). E faapefea ona e faaaogaina nei lava mataupu faavae i lou olaga?
E pei o Alema, o perofeta ma aposetolo o aso nei e fesoasoani ia i tatou ia iloa le eseesega i le va o le upumoni ma pepelo a Satani. O le a se fautuaga e te maua i nei savali: Gary E. Stevenson, “Aua E Te Taufaasese Mai Ia Te Au” (Liahona, Nov. 2019, 00–00); Dallin H. Oaks “Aua Nei Faaseseina” (Liahona, Nov. 2004, 00).
Tagai foi Gospel Topics, “Seek Truth and Avoid Deception,” Gospel Library; “Upu Moni o A?,” Viiga, nu. 170.
Ata
O Kori’oa o loo talanoa ma Alema
Kori’oa o Loo Lu’iina Alema, saunia e Robert T. Barrett
E toatele tagata i aso nei ua talitonu e leai se Atua. O le a se mea e te maua i le Alema 30:39–46 e fesoasoani e te iloa ai e moni le Atua? O le a le mea e taofia ai i tatou mai le iloaina o Ia? O a isi molimau ua tuuina atu e le Atua ia te oe o loo soifua o Ia?
O le a se mea ua e aoao mai i le Alema 30:56–60 e uiga i le auala e taulima ai e le tiapolo ona soo? O a ni mea e mafai ona e faia e puipuia ai lou aiga e faasaga i ana faatosinaga?
E i ai i le afioga a le Atua le mana e taitai atu ai tagata i le amiotonu.
O le faafitauli o le vavaeeseina o sa Sorama mai sa Nifae, atonu sa foliga mai i nisi, e pei sa manaomia ai se fofo faaleupufai pe faamiliteli (tagai Alema 31:1–4). Ae sa aoao Alema ia faalagolago “i le mana o le afioga a le Atua” (Alema 31:5). O le a se mea ua e aoaoina mai le Alema 31:5 e uiga i le mana o le afioga a le Atua? (tagai foi Eperu 4:12; 1 Nifae 15:23–24; 2 Nifae 31:20; Iakopo 2:8; Helamana 3:29–30).
A o e suesueina le Alema 31, o a isi upumoni o le talalelei e mafai ona e maua e faatatau i aafiaga o lou olaga? Mo se faataitaiga:
O faapefea ona e vaaia le taitai atu e le afioga a le Atua ia tagata ia faia mea lelei”? (tagai fuaiupu 5).
Faatusatusa uiga faaalia, lagona, ma faatinoga a Alema e faatatau i isi (tagai fuaiupu 34–35) ma uiga o sa Sorama (tagai fuaiupu 17–28). E mafai faapefea ona e avea atili e faapei o Alema?
O a ni mea e te maua i le Alema 31:30-38 e mafai ona fesoasoani ia i latou e faanoanoa mo agasala a isi?
Ona o Iesu Keriso, e mafai ai e soo se tasi ona suia.
Matau le vaega o tagata na ave e Alema e aoao atu le talalelei i sa Sorama (tagai Alema 31:6). O le a se mea ua e iloa e uiga i olaga o nei tagata i le Mosaea 27:8–37; 28:4; Alema 10:1–6; 11:21–25; 15:3–12. O a ni savali atonu o i ai iina mo oe i o latou aafiaga?
Mo nisi manatu, tagai i lomiga o lenei masina o mekasini o le Liahona ma le Mo le Malosi o le Autalavou .
Ua lapataia au e le Tusi a Mamona e faasaga i aoaoga sese.
Mafaufau e faaali atu nisi o mea (e pei o tupe po o meaai) ma meataalo faafoliga o nei mea. O lenei mea e mafai ona taitai atu ai i se talanoaga e uiga i le auala e iloa ai le eseesega i le va o mea moni ma mea e sese. Ona mafai lea ona e fesoasoani i lau fanau e faailoa mai le Alema 30:12--18 o pepelo po o aoaoga sese na aoao mai e Korioa e uiga i le Atua. I le Alema 30:32–35, na faapefea ona tali atu Alema i na pepelo? O le a se mea ua tatou aoao mai i lana faataitaiga?
Na talanoa Alema e uiga i le auala o loo molimau mai ai mea i le lagi ma luga o le fogaeleele o loo soifua le Atua. Afai e mafai, ia e savalivali i fafo ma lau fanau pe fai atu foi ia i latou e tutu i le faamalama a o e faitauina le Alema 30:44. Fai atu i a i latou e faasino mai mea latou te vaai i ai e fesoasoani latou te iloa ai e moni le Atua ma e alofa ia i latou. E mafai foi ona latou tusia ni ata o mea latou te maua (tagai i le itulau o gaoioiga o lenei vaiaso).
A o outou usuina ma lau fanau le pese “E Alofa Lo’u Tama Faalelagi Ia Te A’u” (Tusipese a Tamaiti, 16), pasi faataamilo se polo po o se isi mea faitino. Taofi le musika mai lea taimi i lea taimi ma fai atu i le tamaitiiti o loo uuina le mea faitino e faasoa atu se mea se tasi na foafoaina e le Tama Faalelagi e faafetai ai o ia.
E aoao tamaiti e ala i mea faitino. O mea faitino o le a fesoasoani i lau fanau ia malamalama atili ai ma manatua umi ai mea sa aoaoina ai i latou. O le tele o gaoioiga mo tamaiti i lenei otootoga ua fautuaina atu ai ni mea faitino e faaaoga. Mafaufau e toe faaali atu ia mea faitino lava e tasi i le lumanai e fesoasoani ai i lau fanau ia manatua mea sa latou aoaoina.
E mafai faapefea ona e fesoasoani i lau fanau ia malamalama o le afioga a le Atua e sili atu ona mamana nai lo “se isi lava mea”? (Alema 31:5). Mafaufau e fesili atu ia i latou e mafaufau i se mea po o se tasi e malosi, pe faaali ata o ni nai mea malolosi. O le a le mea e malolosi ai? Faitau faatasi le Alema 31:5 , ma fesili i tamaiti pe o le a so latou manatu i le uiga o lenei fuaiupu. Faasoa atu se taimi na i ai se aafiaga mamana a le afioga a le Atua ia te oe.
Aotele faapuupuu le tala ia Alema ma sa Sorama, e faaaoga ai fuaiupu mai le Alema 31:8–35 (tagai foi “Mataupu 28: O sa Sorama ma le Rameutoma,” Tala o le Tusi a Mamona, 78–80). Fesoasoani i tamaiti e faailoa mea na fai mai ai sa Sorama i a latou tatalo (tagai Alema 31:15–18) ao latou fesoasoani ia te oe e fausia se olo Rameutoma i poloka po o maa. Faamalamalama atu e le o le auala lea tatou te tatalo ai. A o outou talanoa ma lau fanau e uiga i le auala e tatau ona tatou tatalo ai, tuu atu ia i latou e aveese poloka po o maa taitasi i le taimi. Atonu e mafai ona latou teu se tasi o maa i tafatafa o lo latou moega e fai ma faamanatu e tatalo i taeao ma po uma. Atonu foi latou te fiafia e teuteu a latou maa.
Mo nisi manatu, tagai i le lomiga o lenei masina o le mekasini o le Uo .
Ata
O le sa Sorama o loo tatalo i luga o le Rameutoma
O sa Sorama “ua faaneeneeina o latou loto i le mitamitavale tele, i lo latou faamaualuluga” (Alema 31:25).