Kon ang tawo nga palangga naton nakahimo sang seryoso nga sala, daw indi kita makahibalo kon ano ang himuon. Isa ka rason nga nangin malahalon ang Alma 39–42 amo nga ginapakita sini kon paano ni Alma—isa ka disipulo ni Cristo nga may iya man sadto mabug-at kaayo nga mga sala nga hinulsolan—gin-atubang ang amo nga sitwasyon. Ang anak ni Alma nga si Corianton nakahimo sang sekswal nga sala, kag si Alma, sa natun-an niya nga himuon sa iya pag-alagad, nagsalig sa gahum sang matuod nga doktrina agud hatagan ang iya anak sang panglantaw sa wala katapusan kag paisugon nga maghinulsol (tan-awa sa Alma 4:19; 31:5). Sa sining mga kapitulo, maobserbahan naton ang kaisog ni Alma sa pagkondenar sang sala kag ang iya kalulo kag pagpalangga kay Corianton. Kag sang ulihi, mabatyagan naton ang kompiyansa ni Alma nga ang Manluluwas “magakari sa pagkuha sang mga sala sang kalibutan [kag] sa pagpahayag sang malipayon nga balita sang kaluwasan sa iya katawhan” (Alma 39:15). Ang kamatuoran nga si Corianton naghinulsol kag sang ulihi nagbalik sa buluhaton sang pag-alagad (tan-awa sa Alma 49:30) makahatag sa aton sang paglaum sa kapatawaran kag pagtubos kon kita ginatublag sang aton kaugalingon nga mga sala ukon sang mga sala sang aton ginapalangga (Tan-awa sa Alma 42:29).
Ang laygay ni Alma sa iya anak nga si Corianton sa Alma 39 nagahatag sang maayo nga oportunidad sa pagtuon parte sa makahalalit nga mga epekto sang sekswal nga sala, lakip na ang pornograpiya. Siguro mas importante, makabulig man ini sa imo nga maintiendihan ang tanyag sang Manluluwas nga kapatawaran kag pagpang-ayo sa mga tawo nga nagahinulsol. Mahimo nga makabulig ining mga pamangkot kag aktibidades:
Ano nga mga kasaypanan ang nagtulod kay Corianton nga supakon ang layi sang kaputli? (tan-awa sa Alma 39:2–4, 8–9). Ano ang mga konsikwensya sang iya mga aksyon? (tan-awa sa mga bersikulo 5–13). Ano ang aton ebidensya nga naghinulsol na si Corianton? (tan-awa sa Alma 42:31; 49:30; 48:18). Ano ang imo matun-an parte sa Manluluwas sa sining eksperiyensya?
Basaha sa mga pahina 19–20 sang Para sa Kusog sang mga Lamharon: Giya sa Paghimo sang mga Pagpili. Dayon isulat ang imo kaugalingon nga paathag kon ano ang pornograpiya, ngaa delikado ini, kag kon ano ang imo himuon kon makasugata ka sini. (Tan-awa man sa Mateo 5:27–28 kag Doktrina kag mga Kasugtanan 63:16.)
Paano mo ipaathag sa isa ka abyan kon ngaa ginapili mo nga maglikaw sa pornograpiya kag ipangabuhi ang layi sang kaputli? Ano nga mga ihibalo ang imo maistorya halin sa “Ang Imo Lawas Sagrado” sa Para sa Kusog sang mga Lamharon: Giya sa Paghimo sang mga Pagpili (mga pahina 22–29)?
Tan-awa man sa “Pornography” sa “Bulig sa Kabuhi” nga koleksyon sang Librarya sang Ebanghelyo.
Si Corianton may pila ka mga pamangkot parte sa kon ano ang matabo pagkatapos sang kamatayon. Ang iya mga pamangkot nagresulta sa pagtudlo ni Alma sang mga prinsipyo nga makita sa Alma 40–41. Samtang nagatuon ka, maghimo sang listahan sang mga kamatuoran nga makita mo parte sa mga butang pareho sang kalibutan sang espiritu, pagkabanhaw, kag paghukom. Pamensara nga basahon ining mga kapitulo halin sa panan-aw sang isa nga, pareho kay Corianton, kinahanglan maghinulsol—nga kon hunahunaon, matuod gid para sa aton tanan.
Mahimo ako nga magpangayo sang mga sabat sa akon mga pamangkot nga may pagtuo kay Jesucristo.
Kon kaisa ginapensar naton nga nahibal-an sang mga propeta ang sabat sa tagsa ka pamangkot parte sa ebanghelyo. Pero talupangda ang wala ginsabat nga mga pamangkot sa kapitulo 40. Ano ang iya ginhimo para mangita sang mga sabat? Ano ang iya ginhimo sang wala sia sang isabat? Paano makabulig sa imo ang ehemplo ni Alma?
Litrato
babayi nga nagapangamuyo
Ang pangamuyo isa ka paagi nga makakita kita sang mga sabat sa mga pamangkot parte sa ebanghelyo.
Ang Pagbayad-Sala ni Jesucristo nagahimo sang pagtubos nga posible.
Nagpati si Corianton nga ang silot sa sala indi patas (tan-awa sa Alma 42:1). Sa Alma 35, paano ginsabat ni Alma ang iya pamangkot? Pwede mo painon ang mga dinalan sa sining kapitulo sa duha ka grupo: “Patas ang Dios” kag “Maluluy-on ang Dios.” Paano ginpatigayon sang Pagbayad-Sala sang Manluluwas ang pareho hustisya kag kaluoy?
Para sa dugang nga mga ideya, tan-awa sa mga isyu sini nga bulan sang mga magasin nga Liahona kag Para sa Kusog sang mga Lamharon.
Ang akon maayo nga ehemplo pwede maggiya sang iban kay Cristo.
Ang laygay ni Alma kay Corianton makabulig sa imo kabataan nga maintiendihan ang importansya sang mangin maayo nga halimbawa. Pamensara nga basahon sing ululupod ang Alma 39:1. Paano nangin maayo nga ehemplo ang utod ni Corianton nga si Siblon? Makakita ang imo kabataan sang dugang nga mga sabat sa sining pamangkot sa Alma 38:2–4.
Pwede man kamo maghampang sang imo kabataan nga nagabulos-bulos sa pagsunod ukon pagkopya sang isa kag isa. Gamita ining hampang para ipakita kon paano ang aton mga aksyon makabulig sa iban nga maghimo sang maayo nga mga pagpili.
Gamit ang flashlight ukon litrato sang adlaw, pwede mo ikumparar ang kasanag sa gahum sang maayo nga halimbawa. Pwede man kamo magtan-aw sang imo kabataan sang mga litrato ni Jesus nga nagahimo sang maayo nga mga butang kag hambalan ang ehemplo nga ginpahamtang Niya para sa aton.
Tungod kay Jesucristo, makahinulsol ako kon makahimo ako sang mga sayop.
Nga wala ginadetalye ang klase sang iya mga sala, ipaathag nga naghimo sang sayop nga pagpili si Corianton. Ano ang pwede naton ihambal para buligan sia? Pamensara nga basahon ang Alma 39:9 sa imo kabataan, kag buligi sila nga maintiendihan kon ano ang buot silingon sang hinulsulan kag talikdan. Magpamatuod nga ang paghinulsol posible paagi kay Jesucristo kag sa Iya Pagbayad-Sala.
Ari ang isa ka leksyon nga nagagamit sang bagay para ipakita ang kalipay sang paghinulsol: Hatagi ang bata sang bagay nga mabug-at kaptan samtang nagaistorya ka parte sa isa ka tawo nga nakahimo sang sala kag nagakakonsensya. Hambala ang imo kabataan nga ang bagay pareho sang pagkakonsensya nga mabatyagan naton kon makahimo kita sang sayop. Kuhaa ang mabug-at nga bagay sa bata samtang nagapamatuod ka nga masarangan sang Amay nga Langitnon kag ni Jesucristo nga kuhaon ang mabug-at, malaw-ay nga pamatyagan kag mabuligan kita nga mas mangin maayo kon maghinulsol kita.
Kon mapatay kita, ang aton mga espiritu nagakadto sa kalibutan sang mga espiritu hasta sa Pagkabanhaw kag Paghukom.
Natural lang nga magkatingala kon ano ang matabo sa aton pagkatapos naton nga mapatay. Ano ang pwede mo himuon para buligan ang imo kabataan nga makakita sang inspirado nga mga sabat? Pwede mo isulat ang kamatayon, kalibutan sang mga espiritu (paraiso kag prisuhan sang mga espiritu), pagkabanhaw, kag paghukom sa separado nga mga papel. Buligi ang imo kabataan nga maintiendihan kon ano ang buot silingon sining mga tinaga. Samtang ginabasa ninyo sing ululupod ang Alma 40:6–7, 11–14, 21–23, pwede nga iplastar sang imo kabataan ang mga tinaga suno sa pasunod sining mga hitabo sa sining mga bersikulo.
Mahimo nga makabenepisyo ang mas magulang nga kabataan sa pagpangita sang mga sabat sa mga pamangkot paagi sa pagpangita sa Alma 40:6–7, 11–14, 21–23. Pamensara nga pamangkuton ang imo mga kabataan sang mga pamangkot nga masabat sa sining mga bersikulo, pareho sang “Ano ang mangin hitsura sang akon lawas kon mabanhaw ako?” Hagara sila nga pangitaon ang mga sabat sa nagakabagay nga mga bersikulo.
Litrato
Si Maria kag si Jesus
Mary and the Resurrected Lord [Si Maria kag ang Nabanhaw nga Ginuo], ni Harry Anderson
May kilala bala ang imo kabataan nga napatay na? Basi pwede ninyo hambalan sing makadali ina nga tawo. Magpamatuod nga sa pila ka adlaw sia—kag ang tanan-tanan—mabanhaw tungod kay Jesucristo. Kon kinahanglan, gamita ang pahina para sa kahiwatan sini nga semana para ipaathag kon ano ang buot silingon sang mabanhaw.
Para sa dugang nga mga ideya, tan-awa sa isyu sang Abyan nga magasin sini nga bulan.
Litrato
Si Alma kag si Corianton
This My Son [Ini Anak Ko], ni Elspeth Caitlin Young