Sang makita ni Alma ang kalainan sa iya palibot, nakabatyag sia sang mabug-at nga “kasubo,” “pag-antos,” kag “pagkagha sang kalag” (Alma 8:14). “Ang pagkamalaut sa tunga sining katawhan,” ginsiling niya parte sa mga Zoramnon, “nagasakit sang akon kalag” (Alma 31:30). Nakabatyag sia sang daw pareho sini pagbalik niya halin sa iya misyon sa mga Zoramnon—naobserbahan niya nga ang mga tagipusuon sang madamo nga Nefinhon “nagsugod sa pagtig-a, kag nga nagsugod sila nga masaklaw tungod sang kaistrikto sang pulong,” kag nahimo ang iya tagipusuon nga “tuman kamasinulub-on” (Alma 35:15). Ano ang ginhimo ni Alma parte sa iya nakita kag nabatyagan? Wala sia ginpangluyahan ukon nagduda sa estado sang kalibutan. Kundi, “nagsugo sia nga ang iya mga anak nga lalaki magtililipon sing tingob” kag gintudloan sila parte sa “mga butang nga mahiangot sa pagkamatarong” (Alma 35:16). Gintudloan niya sila nga “wala na sing iban pa nga paagi ukon mga pahito nga sa sini ang tawo mahimo nga maluwas, lamang sa kalalangan kag paagi kay Cristo. … Yari karon, sia ang kabuhi kag ang kapawa sang kalibutan” (Alma 38:9).
Pila lang sa aton ang makaeksperiyensya sang pareho ka makahalangyag nga pagbag-o pareho kay Alma. Pero ang tanan kinahanglan nga “mabun-ag sa Dios,” bisan nga masami nagakatabo ini sing amat-amat (Alma 36:2338:6). Samtang imo ginabasa ang Alma 36, pamensara kon ano ang buot silingon sang mabun-ag sa Dios. Halimbawa, sa proseso sang pagkabun-ag sa Dios, ano ang nabatyagan mo parte sa sala? parte kay Jesucristo? Paano nagaapekto ang pagkabun-ag sa Dios sa imo ginahimo bilang reaksyon sa imo kaugalingon nga mga sala? Ano pa nga mga pagbag-o ang nagakatabo sa imo mga pagpati kag mga aksyon? Binagbinaga kon paano mo nagakaeksperiyensyahan ining mga pagbag-o.
Kon kaisa nahadlok ang mga tawo nga maghinulsol tungod ginakabig nila ang paghinulsol bilang isa ka masakit nga silot sa sala. Ano sa banta mo ang ihambal ni Alma parte dira? Para hibaluon, pwede mo ikumparar ang kabuhi ni Alma antes sia maghinulsol (tan-awa sa Alma 36:6–17) sa iya paglaragway sang iya kaugalingon pagkatapos niya maghinulsol (tan-awa sa mga bersikulo 18–27). Suno sa Alma 36:17–18, paano ni Alma nabaton ining kapatawaran?
Ang balaan nga mga kasulatan gin-amligan “para sa isa ka maalamon nga katuyuan.”
Pamensara kon daw ano nga milagro kag bugay ang makaangkon sang balaan nga mga kasulatan sa karon nga panahon! Samtang imo ginabasa ang Alma 37, pangitaa ang mga bugay nga nagaabot tungod may ara kita sang balaan nga mga kasulatan (tan-awa halimbawa, sa mga bersikulo 7–10, 18–19, 44–45).
Sa Alma 37:38–47, ginkumparar ni Alma “ang pulong ni Cristo” sa Liahona. Samtang imo ginabinagbinag ining pagkumparar, pamensara ang mga paagi nga imo naeksperiyensyahan ang milagro kag gahum sang mga pinanudlo ni Cristo “adlaw-adlaw” (Alma 37:40).
Litrato
babayi nga nagabasa sang balaan nga mga kasulatan
Ang balaan nga mga kasulatan nagatudlo sa aton kon paano sundon ang Dios.
”Paagi sa diutay kag [simple] nga mga butang ginapahanabo ang dalagko nga mga butang.”
Kon kaisa pamatyag naton ang aton mga problema tam-an kadako kag kakomplikado nga ang mga solusyon kinahanglan man nga dalagko kag komplikado. Pero indi amo sina pirme ang pamaagi sang Ginuo. Samtang imo ginabasa ang Alma 37:1–14, pamensara kon ano ang nanamian mo sa pamaagi nga ginahimo Niya ang Iya buluhaton. Dayon pwede mo binagbinagon kag isulat ang mga paagi nga nakita mo ining prinsipyo sa imo kabuhi.
Kon itudlo mo ini nga prinsipyo sa iban, ano nga mga halimbawa sa kinaugali ukon sa adlaw-adlaw nga pangabuhi ang imo gamiton para ilarawan ini?
Ano ang pila sa diutay kag simple nga mga bugang nga mas nagapalapit sa imo sa Amay nga Langitnon kag kay Jesucristo?
Masami, ang aton “diutay kag [simple]” nga mga pagpili nagahimo sang dalagko nga kinalain sa aton mga kabuhi. Pamensara nga magpili sang topiko sa Para sa Kusog sang mga Lamharon: Giya sa Paghimo sang mga Pagpili kag magpamangkot sa imo kaugalingon sang pareho sini: Paano makaapekto sa akon ang akon mga pagpili kag sa mga tawo sa akon palibot? Ano nga diutay kag simple nga mga pagbag-o ang pwede ko himuon nga magaresulta sa mas dako nga kalinong kag kalipay?
Maggamit sang diutay kag simple nga mga butang. Pareho sa madamo nga butang sa kabuhi, ang pagtudlo kag pagtuon sang ebanghelyo pwede himuon sa diutay kag simple nga mga paagi. Halimbawa, paano magamit ang diutay nga asin ukon yeast sa pagtudlo sang gahum sang diutay kag simple nga mga butang? (tan-awa sa Mateo 5:13; 13:33).
Sa Alma 37:35–37, pangitaa ang mga imbitasyon ni Alma sa iya anak nga si Helaman. Diin sining mga imbitasyon ang nabatyagan mo nga kinahanglan mo aktohan? Halimbawa, pwede mo binagbinagon kon ano ang buot silingon sang “makighinun-anon sa Ginuo” (bersikulo 37). Natilawan mo na bala ini nga himuon? Paano ka Niya gingiyahan para sa kaayuhan?
Ang pagpaambit sang akon testimonya parte kay Jesucristo makapabakod sang mga tawo nga palangga ko.
Ang mga pulong ni Alma sa iya anak nga si Siblon nagahatag sang maayo nga halimbawa kon paano pabakuron kag paisugon ang mga ginapalangga naton nga ipangabuhi ang ebanghelyo. Ang pagtuon sang Alma 38 mahimo nga makahatag sa imo sang mga ideya sa pagbulig sa mga miyembro sang pamilya kag mga abyan nga makakita sang kusog kay Jesucristo. Isulat ang imo makita.
Para sa dugang nga mga ideya, tan-awa sa mga isyu sini nga bulan sang mga magasin nga Liahona kag Para sa Kusog sang mga Lamharon.
Ang paghinulsol nagadala sa akon sang kalipay kay Jesucristo.
Para buligan ang imo kabataan nga maintiendihan nga ang paghinulsol nagadala sang kalipay, pwede mo sila hatagan sang papel nga may drowing sang nagayuhum nga guya kag masubo nga guya sa likod sini. Pangabaya sila nga magpamati samtang imo ginabasa ukon ginasaysay sa malip-ot ang Alma 36:13, 17–20 kag ipakita ang guya nga nagapakita sang nabatyagan ni Alma. Ang mas magulang nga kabataan pwede magsulat sang mga tinaga ukon dinalan nga nagalaragway sang iya nabatyagan. Ano ang nagpasubo kay Alma, kag ano ang nagpasadya sa iya? Dayon pwede mo sila istoryahan parte sa kalipay nga imo nabatyagan kon maghinulsol ka.
”Paagi sa diutay kag [simple] nga mga butang ginapahanabo ang dalagko nga mga butang.”
Basi masadyahan ang imo kabataan sa pagpangita sang diutay nga mga bagay nga nagaresulta sa dalagko nga mga butang. Ang mga bagay pareho sang baterya, yabi sang salakyan, ukon bisan halampangan nga nagapasulhay sa ila pwede gamiton nga mga halimbawa. Dayon pwede ninyo basahon ang Alma 37:6–7 sing ululupod kag hunahunaon ang pila ka diutay ukon simple nga mga butang nga gusto ipahimo sa aton sang Dios. Ano nga dalagko nga butang ang matabo kon tumanon naton ining diutay ukon simple nga mga kasuguan?
Pwede man nga tilawan sang imo kabataan ang pareho sini: sudli sang tubig ang baso, nga tag-isaisa lang ka tulo. Paano ini maangot sa Alma 37:6–7? Dayon pwede ninyo hambalan kon paano ang “diutay kag (simple) nga mga butang” sang Ginuo, pareho sang pagbasa sang balaan nga mga kasulatan adlaw-adlaw, daw makumparar sa tinulo sang tubig sa baso.
Buligi ang imo kabataan nga magpanumdom sang mga paagi nga makatuga sila sang dalagko nga mga butang sa balay, sa eskwelahan, ukon sa simbahan.
Ang balaan nga mga kasulatan makabulig sa akon adlaw-adlaw.
Paano mo buligan ang imo kabataan nga magpatubo sang pagpalangga sa pulong sang Dios, pareho sang ginhimo ni Alma kay Helaman? Pamensara ang pagpakita sa ila sang litrato sang Liahona (pareho sang Libro sang Larawan nga Pang-Ebanghelyo, num. 68) ukon paghagad sa ila nga magdrowing sini samtang ginaistorya nila ang ila nahibal-an parte sini (tan-awa sa Alma 37:38–47; 1 Nefi 16:10, 28–29). Paano ang balaan nga mga kasulatan makumparar sa Liahona?
Para sa dugang nga mga ideya, tan-awa sa isyu sang Abyan nga magasin sini nga bulan.
Litrato
anghel nga nagapakita kay Alma kag sa mga anak nga lalaki ni Mosias
Angel Appears to Alma and the Sons of Mosiah [Anghel Nagapakita kay Alma kag sa mga Anak nga Lalaki ni Mosias], ni Clark Kelley Price