A faatusa i autau a sa Lamana, e le mafai ona maua e le “autau laitiiti” (Alema 56:33) o alii talavou se avanoa e [manumalo] ai. E ese mai i le toalaiti o le fuainumera, o fitafita a Helamana “sa laiti … i latou uma,” ma “latou te le’i tau lava” (Alema 56:46–47). I nisi o itu, atonu e tai pei e tutusa lo latou tulaga ma i tatou o e lagonaina i nisi o taimi le toaitiiti ma lofituina i la tatou taua i aso e gata ai e faasaga ia Satani ma au a le tiapolo i le lalolagi.
Peitai sa i ai nisi o tulaga na sili atu ai le autau a Helamana nai lo o sa Lamana lea sa leai ma se sootaga i le fuainumera po o tomai faamiliteli. Sa latou filifilia Helamana, o se perofeta, e taitaia i latou (tagai Alema 53:19); “sa aoaoina i latou e o latou tinā, e faapea afai latou te le masalosalo, o le a laveaiina i latou e le Atua” (Alema 56:47); ma sa latou “faatuatua tele i ia mea sa aoaoina [ai] i latou.” O se taunuuga, sa puipuia i latou e ala “i le mana faavavega o le Atua” (Alema 57:26). A feagai la ma taua o le olaga, e mafai ona tatou maua le lototele. Ua aoao i tatou e le autau a Helamana e faapea “ua i ai [se Atua faamasinotonu], ma o soo se tasi e le masalosalo, [o le a] faasaoina i latou i lona mana faavavega” (Alema 57:26).
O le i ai o le faatuatua i le Atua e fesoasoani ia te au e faatoilalo ai le fefe.
Ana faapea e le mo lo latou faatuatua, semanu e i ai i fitafita talavou a Helamana se mafuaaga lelei e lagona ai le fefe. Ae ona o lo latou faatuatua, sa atili ai ona latou maua se mafuaaga e lototetele ai. A o e faitau e uiga ia i latou i le Alema 53–58, vaavaai mo mea e fesoasoani ia te oe e faafetaiaia ai ou popolega ma le faatuatua ia Keriso. Mafaufau e taulai atu i fuaiupu nei: Alema 53:10–22; 56:43–49, 55–56; 57:20–27; ma le 58:39–40. E mafai ona fesoasoani lenei siata ia te oe e faamaumau ai mea e te maua.
Uiga o fitafita talavou a Helamana:
O mafuaaga atonu sa matua malosi ai lo latou faatuatua ia Keriso:
O mea na latou faia e faatino ai le faatuatua ia Keriso:
O le ala na faamanuiaina ai i latou e le Atua:
Ina ia manumalo i a tatou taua faaleagaga, tatou te manaomia foi le mana o Iesu Keriso. E mafai faapefea ona e maua Lona mana? Vaai mo tali i le savali a Peresitene Russel M. Nelson “Mauaina o le Mana o Iesu Keriso i o Tatou Olaga” (Liahona,, Me 2017, 39–42). E mafai ona e faatusatusaina lana fautuaga i mea na faia e fitafita a Helamana.
A uma ona suesue i nei mea, mafaufau i au lava taua faaleagaga. Tusi i lalo mea ua e lagona le musuia e fai e faaaoga ai lou faatuatua ia Iesu Keriso.
Sa i ai ia Helamana ma Paorana ni mafuaaga lelei e tiga ai. Sa le’i maua e Helamana le lagolago talafeagai mo lana autau, ae sa tuuai seseina Paorana e Moronae i le taofiofia o lena lagolago (tagai i le Alema 58:4–9, 31–32; 60). O le a se mea e faagaeetia ai oe e uiga i a laua tali atu i le Alema 58:1–12, 31–37 ma le Alema 61? Aisea e te manatu ai na latou tali atu ai faapea?
Sa faasino atu Elder David A. Bednar ia Paorana o se faataitaiga o le agamalu ma aoao atu faapea “o faataitaiga sili ona mamalu ma anoa o le agamalu o loo maua i le soifuaga o le Faaola lava Ia” (“Agamalu ma Maulalo i le Loto,” Liahona, Me 2018, 32). Mafaufau loloto pe na faapefea ona faaalia e le Faaola le agamalu. Tagai, mo se faataitaiga, Mataio 27:11–26; Luka 22:41–42; Ioane 13:4–17. E mafai faapefea ona e mulimuli i Lana faataitaiga?
Ua i ai so’u tiutetauave e siitia i latou o siomia a’u.
Na tusi atu Moronae faapea o le a tauia e le Atua ia Paorana pe afai na te tuulafoaia ma le iloa manaoga o au tau a sa Nifae. O le a se mea ua e aoaoina mai le Alema 60:7–14 e uiga i le tausiga o tagata e manaomia le fesoasoani? O a ni mea e mafai ona e faia e iloa ai ma faamalieina manaoga o isi?
Afai ou te lotomaualalo, e mafai e luitau o le olaga ona liliu atu lo’u loto i le Alii.
Tuu se fuamoa mata ma se pateta i le vai o pupuna e fesoasoani ia te oe e mafaufau ai pe mafai faapefea ona e filifili a le o le “faamaluluina” po o le “faamaaaina” e ou tofotofoga. A o kukaina lau fuamoa ma le pateta, suesue le Alema 62:39–51, ma matau le ala na tali atu ai tagata i le galuega a Helamana ina ua mavae le latou taua umi ma sa Lamana. Ona mafai lea ona e faatusatusaina lenei mea i le ala na latou tali atu ai i lana talaiga i le 13 tausaga na muamua atu (tagai Alema 45:20–24). Na faapefea ona eseese aafiaga o sa Nifae i puapuaga lava e tasi? Pe a vela lelei le fuamoa ma le pateta, tata’e le fuamoa ma tipi le pateta. Na faapefea ona eseese aafiaga o mea ia e lua i le vai vevela? O le a se mea ua e aoaoina e uiga i le auala e mafai ona tatou filifili ai e tali atu i puapuaga? E mafai faapefea ona e liliu atu i le Atua i taimi o ou puapuaga?
Mafaufau i aafiaga i le aiga. Afai e te faiaoga i se vasega o le Ekalesia, fai atu i tagata o le vasega e faasoa mai mea na latou aoaoina i le fale. Mo se faataitaiga, saili mea na latou aoaoina e uiga i puapuaga ma le lotomaualalo mai le faapunaina o fuamoa ma pateta.
Mo nisi manatu, tagai i lomiga o lenei masina o mekasini o le Liahona ma le Mo le Malosi o le Autalavou .
E mafai ona ou faamaoni i le Atua e pei o le autau talavou.
E mafai ona e faaaogaina le tele o punaoa e faasoa atu ai le tala i fitafita a Helamana, e aofia ai ata o loo i lenei otootoga ma le “Mataupu 34: Helamana ma Fitafita Talavou e 2,000” (Tala o le Tusi a Mamona, 93–94). O le itulau o gaoioiga o lenei vaiaso e mafai ona fesoasoani i lau fanau e mafaufau ai i auala e mafai ai ona pei i latou o le autau a Helamana. Mafaufau e faasoa atu nisi o uiga auaumama o fitafita talavou mai le Alema 53:20–21 e amata ai. E mafai foi ona outou usu faatasi le “Matou Te Aumaia Le Upu Moni I Le Lalolagi” (Tusipese a Tamaiti, 92–93).
E mafai ona ou faamaoni i mea e aoao mai e o’u matua i le amiotonu.
Sa tilotilo atu fitafita talavou a Helamana i le faatuatua o o latou tina ina ua latou feagai ma se luitau tele. Atonu e mafai ona e faitauina faatasi ma lau fanau le Alema 56:46–48 ma valaaulia i latou e faalogo mo mea na aoaoina ai i latou e tina o nei alii talavou e uiga i le faatuatua. E mafai ona e fesili atu ia i latou po o a mea na latou aoaoina mai o latou matua—po o isi tagata matutua faamaoni—e uiga i le Faaola. Aisea e taua ai le usitai “ma le sao atoatoa”? (Alema 57:21).
E mafai faapefea ona e—pei o tina o fitafita talavou—ia mautinoa ua iloa e lau fanau lou faatuatua i le Atua? O se tasi o auala o le faasoa atu lea o auala e aafia ai lou olaga i lou faatuatua. Mo se faataitaiga, na faapefea ona Ia “laveaiina” oe ina ua e “le masalosalo”?
Atonu e mafai e lau fanau ona talanoa e uiga i se taimi na faia ai e se tasi ma tausia se folafolaga ma i latou. Sa faape’i o latou lagona ina ua faataunuuina le folafolaga? E mafai ona e faitauina le Alema 53:10–18 ma valaaulia lau fanau e vaavaai pe na faapefea e Helamana, le nuu o Amona, ma atalii o le nuu o Amona ona osia ma tausia a latou folafolaga, po o feagaiga. E mafai ona e faasoa atu pe faapefea ona faamanuiaina oe e le Tama Faalelagi a o e tausia au feagaiga.
Mafaufau e valaaulia lau fanau e mafaufau e uiga i se taimi na tuuaia ai i latou i le faia o se mea latou te lei faia. Tau atu ia i latou le ala na tupu ai lenei mea ia Paorana (tagai Alema 60–61; tagai foi “Mataupu 35: Kapeteni Moronae ma Paorana,” Tala o le Tusi a Mamona, 95–97). Ina ia aoao pe na faapefea ona tali atu Paorana, ia auauai i le faitauina o fuaiupu mai le Alema 61:3-14. O le a le mea na faia e Paorana ina ua tuuaia o ia e Moronae? (tagai Alema 61:2–3, 8–9). O a ni mea ua tatou aoaoina e uiga i le faamagalo atu mai le faataitaiga a le Faaola? (tagai i le Luka 23:34).
Mo nisi manatu, tagai i le lomiga o lenei masina o le mekasini o le Uo .
Ata
o fitafita talavou e lua afe
E Moni, Lau Susuga, O Loo Auai Uma ma Ua Faamaonia, saunia e Clark Kelly Price.