Nakomai, Iriirai 2024
Tebetembwa 16–22: “Tabekarake Atuum ao Kukurei.” 3 Nibwaai 1–7

“Tebetembwa 16–22: ‘Tabekarake Atuum ao Kukurei.’ 3 Nibwaai 1–7,” Nakomai, Iriirai—Ibukin te Mweenga ao te Taromauri: Ana Boki Moomon 2024 (2023)

“Tebetembwa 16–22. 3 Nibwaai 1–7,” Nakomai, Iriirai—Ibukin te Mweenga ao te Taromauri: 2024 (2023)

Tamnei
A kakoauaa te ngaina Nibwaite n akean te tairiki

Teuana te Ngaina, Teuana te Bong, ao Teuana te Ngaina, iroun Jorge Cocco

Tebetembwa 16–22: “Tabekarake Atuum ao Kukurei”

3 Nibwaai 1–7

Ni kawai tabeua, bon te tai ae kamiimi n riki bwa te tia kakoaua iroun Iesu Kristo. A tia ni koro bukin taeka ni burabeti—kanikinaa aika a korakora ao kakai ibuakoia aomata e kaotia bwa e na waekoa ni bungiaki te Tia Kamaiu. N taekana teuana, bon te tai naba ae kararaoma ibukiia taan onimaki ibukina bwa, n aki tabe ma kakai ni kabane, a taekinna taan aki onimaki bwa “e a bwakanako te tai” ibukin te Tia Kamaiu bwa e na bungiaki (3 Nibwaai 1:5). Aomata aikai a karika te “te kiriwe ae korakora ni kabutaa te aba” (3 Nibwaai 1:7) ao a karea te tai are a na tiringiia taan onimaki ni kabane ngkana te kanikinaa are e taetae ni burabetiaki iroun Tamuera, te Reimwanaite—te tairiki n akea te roo—e aki riki.

N tain kaangaanga, te burabeti Nibwaai e “takarua n te bwanaa ae korakora nakon te Atua ibukiia ana aomata” (3 Nibwaai 1:11). Ana kaeka te Uea e kaunganano nakoia aomata ae a kaitara ma te bwainikirinaki ke te raraoma ao e riai n ataaki bwa te ota e na tokanikai iaon te roo: “Tabekarake atuum ao kukurei; … N na kakoroi bukin bwaai ni kabane ake I a tia n tua bwa a na taekinaki ni wiia au burabeti aika a tabu” (3 Nibwaai 1:13).

Iango ibukin Reiakinana n te Mweenga ao n te Taromauri

3 Nibwaai 1–7

Te rairaki nakon ana euangkerio Iesu Kristo e kainanoa te taotaonaki n nano ao te mwakuri korakora.

3 Nibwaai 1–7 e kabwarabwaraiia aomata ake a rairaki nakon te Uea ao te koraki naba ake aaki. Tera te bwai ae karika te kaokoro imarenaia kurubu aikai? Te tiaata aron ae imwina aei e kona ni buokiko ni barongai am iango:

Bwaai aika a kamamaara te rairaki

Bwaai aika a kakorakora te rairaki

3 Nibwaai 1:5–11

Aki kakoauaan ana taeka te burabeti ao bwainingareaia aomata aika raraoi

Karekean te onimaki n aia taeka burabeti ao te tataro ibukin te buoka

3 Nibwaai 1:29–30

3 Nibwaai 2:1–3

3 Nibwaai 3:12–16

3 Nibwaai 4:8–10, 30–33

3 Nibwaai 6:13–18

3 Nibwaai 7:15–22

Titiraki titiraki aika a kaeineti nakoim ngkana ko kamatebwai. Te katoto, inanon tain katabwaninan te tiaata, ko kona n titiraki n aron, “Tera te reirei ibukiu ikai?” Aio e na kona n karika te unga n nano mai iroun te Tamnei ae Raoiroi.

3 Nibwaai 1:1–23

Tamnei
seminary icon
Ibukin Iesu Kristo, I kona n “kukurei.”

Tamam are i Karawa e ataia ae maium e airi ma taai aika a na roko iai kanganga, ae kona naba ni kakamaku. Ma E tangiriko naba bwa kona namakina te kimwareirei inanon tain waakin te maiu. Wareka 3 Nibwaai 1:1–23 n reiakinii bukina bwa e aera ana riai n maaku Nibwaite ake a kakaonimaki. Tera bukin are e anganiia te Uea bwa ana “kukurei”?

Te Tia Kamaiu ea tia n kabonganaa te kibuntaeka ae “kukurei” n taai tabetai—te katoto, inanon Mataio 14:24–27; Ioane 16:33; Reirei ao Berita aika Tabu 61:36; 78:17–19. Tera ae anaaki nanom iai ni berita aikai? Ko kona n warekii kiibu akana irarikina n kaotako ni bwaai ake e taekin te Tia Kamaiu n taeka aikai. Ni katoa te tai, tera bukina ake E anganiia ni buokiia aomata n katarai aia kanganga? E kanga ni karaoa aei ibukim?

Iangoia bwa kona kamatebwaia ana rongorongo Beretitenti Russell M. Nelson “Joy and Spiritual Survival” (Riaona, Nob. 2016, 81–84). Tera ae e reireiniko Beretitenti Nelson iaon kakaean te kukurei inanon bwaai aika a riki? Karaua kamatebwaia bwa iraua te tai ae Beretitenti Nelson e kabonganaa te taeka katurua iangoana. Tao ko kona n kabotaua ma kamwatauan raoi te kai n rawetamnei ke matan te kai n rawetamnei n kabotoa iaon Iesu Kristo. Ko na kanga n kabotoko riki Iaona?

Taraa naba “Nanokawaki,” “Kantaninga,” “Marurungin te Iango,” ke atuu n rongorongo n ana itera te “Life Help” n te Gospel Library.

3 Nibwaai 1:4–21; 5:1–3

Te Uea e na kakoroi nanon Ana taeka ni kabane ni bon oin Ana tai.

Wareka 3 Nibwaai 1:4–7 ao iangoia bwa e na tera am namakin ngke arona bwa temanna ngkoe mai buakoia taan kakoaua. Tera ae a karaoia n kakorakora aia onimaki? (taraa 3 Nibwaai 1:4–21 and 5:1–3). A kanga n koro nanon ana taeka Tamuera? (taraa 3 Nibwaai 1:19–21). E kanga te Uea ni kakoroi bukin ana taeka inanon maium?

3 Nibwaai 1:4–15; 5:12–26; 6:10–15; 7:15–26

Ngai bon ana reirei Iesu Kristo.

E taekinna Moomon, “Nooria, bon Ngai ana reirei Iesu Kristo” (3 Nibwaai 5:13). Tera nanon te kibuntaeka aio iroum? Iangoa ukeran 3 Nibwaai 1:4–15; 5:12–26; 6:10–15; ao 7:15–26, n tarai korakora, koaua ao aia mwakuri ana reirei Kristo.

Taraa naba “I’m Trying to Be like Jesus,” Aia Boki n Anene Ataei, 78.

3 Nibwaai 2:11–12; 3:1–26

Ngkana I kammwakura te onimaki iroun Iesu Kristo, I aki kainanoia bwa N na maaku.

Aia taneiai Nibwaite ma taan irae ake a mwaiti e kona n reke iai reirei ae e na kona n buokiko ma te kanganga n tamnei ae ko aitara ma ngaai. Tarai reirei aikai inanon 3 Nibwaai 2:11–12 ao 3:1–26. Te katooto, ko kona n ukerii ana taeka Kiteaenaai inanon 3 Nibwaai 3:2–10 ao ni kabotaua ma kawai are e na kona n mwanaiko iai Tatan. Tera ae ko reiakinna man ana banna ni katooto Ratonati?

Ibukin iango riki tabeua, taraa te beeba ni kaongora n te namwakain aio n te Riaona ao Ibukin Kakorakoraia Kairake maekatiin.

Iango ibukin Reiakinaia Ataei

3 Nibwaai 1:4–15, 19–21

Te itoi ae boou e kaoti ngke e bungiaki Iesu.

3 Nibwaai 1:4–21

Aia taeka burabeti a kakoroaki bukiia n taainako.

  • Inanon am tai n wareware ma natim 3 Nibwaai 1:4–10, kaoiia bwa ana maroroakina bwa e na tera aia namakin ngke ngaiia mai buakoia taan kakoaua ake a maiu n te tai arei. Ngkanne, ngkai a warekia ni kabanea te mwakoro anne n kibu 11–15, a kona n karioi motikan te kibuntaeka aio: “Te reirei n te karaki aio irou bon …”

  • Tao ko kona n buokiia am ataei n iangoa te tai ngke te Atua e kakoroa bukin Ana berita are anga rinanon Ana burabeti. Tao a kona n tangiria n kakaei tamnei ni karaki n te Gospel Art Book (taraa, te katoto, nambwa 7–8 ao 81). Anganiia aia tai bwa a na tibwauai bwaai ake a atai ni karaki aikai, n ikotaki ma e kanga n kakoroaki nanon ana berita te Atua. Uaia ni wareka 3 Nibwaai 1:20, ao tibwauaa am kakoaua ae e onoti iaon koaua aikai.

3 Nibwaai 2:11–12; 3:13–14, 24–26

Ti korakora ngkana ti bane ikotaki.

  • Buokiia am ataei bwa ana kunea irouia bukin ikotakiia Nibwaite ao kakawaia ake a reke nakoia inanon 3 Nibwaai 2:11–12 ao 3:13–14, 24–26. Bukin tera kai e kakawaki bwa ti na ikotaki n te bong aio n ara utu ao n te ekaretia?

  • Iai te bwai n reirei ae ko ataia e na kona n tei ibukin te korakora man te boonnano? Tao a kona am ataei ni kataia n otouaa teuana te kai ao imwiina manga te bwabwati ni kai ke n raeuaaka te moti ni beeba ao ngkanne manga te bwabwati ni beeba. N te aro ra ae titebo ngaira iai ma taian kai ke beeba?

3 Nibwaai 5:12–26; 6:14; 7:15–26

Ngai bon ana reirei Iesu Kristo.

  • Imwiin warekan 3 Nibwaai 5:13, kaoiia am ataei bwa a na kaokioka te mwakoro n taeka are “Ngai bon Ana reirei Iesu Kristo.” N reiakinna bwa tera nanon te riki bwa Ana reirei Iesu, uaia n warekii tabeua katooto aikai: Remwanaite ake a rairaki, (taraa 3 Nibwaai 6:14), Moomon (taraa 3 Nibwaai 5:12–26), ao Nibwaai (taraa 3 Nibwaai 7:15–26). Kam kona naba n kakaei iango inanon te anene n aron “I’m Trying to Be like Jesus” (Aia Boki n Anene Ataei, 78–79).

  • N te mwakoro ni beeba, buokia ataei bwa a na katanea mwin baia ao n ruamwiina n koreia. Korea “Ngai bon Ana reirei Iesu Kristo” n are te iterana, ao kaoiia bwa a na korea tamnein te bwai ae a kona ni karaoia n riki bwa ana reirei Iesu n iterana are teuana.

Ibukin iango riki tabeua, taraa te beeba ni kaongora n te namwakaina aio n te Rao maekatiin.

Tamnei
A kakoauaa te ngaina Nibwaite n akean te tairiki

Te Ngaina, te Tairiki, ao te Ngaina,, iroun Walter Rane.

Tamnei
iteraniba ibukin te waaki ni kakukurei: Aomata a noora kanikinaean bungiakin Kristo