“Nooria, bon Iesu Kristo ngai, are a kakoaua ibukina burabeti bwa e na roko nakon te aonaaba” (3 Nibwaai 11:10). Ma taeka aikai, te Tia Kamaiu ae e a uti E kabwarabwaraa bon Ngaia, ni kakoroa bukin te taetae ni burabeti ae raka iaon 600 te ririki ibukin Ana Boki Moomon. “Te kaoti anne ao te katanoata anne,” ae e koroia Unimwaane Jeffrey R. Holland, “bon kanoana aika moan te kakawaki, te tai ae moan te tamaroa, ni kabutaa rongorongon Ana Boki Moomon. Bon kakoauaan ao te katanoata ae e a tia ni kaongoia ao ni kaungaia aia burabeti ni kabane Nibwaite. … A bane n tia n taetae ibukina, n aneneia, miia, n tataro ibukin kaotina—ma ikai e bon mena ikai. Te bong are e kaoti iai bon te bong ae moan te kakawaki nakoia! Te Atua are e bitii tairiki ni kabane aika roo nakon rokon otan te moaningabong” (Kristo ao te Berita ae Boou [1997], 250–51).
Taraa naba “Iesu Kristo E Kaoti i Amerika” (witeo), Gospel Library.
Iango ibukin Reiakinana n te Mweenga ao n te Taromauri
Ko na bae ni kinai kanikinaa aika irekereke ma te roo ao te ota rinanon 3 Nibwaai 8–11. Tera ae ko reiakinna man mwakoro aikai iaon te rootongitong ao te oota n te tamnei? (taraa, te katoto, 3 Nibwaai 8:19–23; 9:18; 10:9–13). Tera ae uota te roo nakon maium? Tera ae uota te ota? Bukin tera n am iango te Tia Kamaiu E kabwarabwaraa bwa Ngaia “te ota ao maiun te aonaaba”? (3 Nibwaai 9:18; 11:11).
Kanoan bwaai aika riki ake a kabwarabwaraaki n 3 Nibwaai 9–11 bon teuana mai ibuakon bwaai aika a tabu inanon Ana Boki Moomon. Karaua warekia, ao n karaua naba n iangoia inanom. Aikai tabeua titiraki ae e na buokiko. Iangoia bwa ko na korei am namakin ake a roko nakoim.
E na tera au namakin ngke arona bwa ngai temanna ibuakoia aomata akekei?
Tera ae anaaki iai nanom iaon te Tia Kamaiu ni mwakoro aikai?
N na kanga n ataia ae Iesu Kristo bon au Tia Kamaiu?
E taku Unimwaane Neil L. Andersen, “I kakoauaa ae te Tia Kamaiu e kona ao e ingainga ni kabwarai ara bure” (“Rairannanom … Ao N na Kamaiuko,” Riaona, Nob. 2009, 40). Ukera 3 Nibwaai 9–10 ibukin kakoauaan ingaingan Kristo ni kabwara te bure. Tera ae ko kunea n 3 Nibwaai 9:13–22; 10:1–6 ae e na buokiko n namakina Ana tangira ao Ana nanoanga te Tia Kamaiu? Ningai te tai ae ko namakinna bwa E “ikoikotiko” ao n “tabeakiniko”? (taraa 3 Nibwaai 10:4).
Te Uea e kainnanoa “te nano ae uruaki ao te tamnei ae raraoma.”
Imwain manga okin te Tia Kamaiu, te anga karea irouia maan bon kanikinaean ana anga karea Iesu Kristo (taraa Mote 5:5–8). Tera te tua ae boou ae e anga te Tia Kamaiu inanon 3 Nibwaai 9:20–22? E kanga n kaeinetiira Nakoina ao Ana anga karea?
Tera nanona iroum bwa kona anga te karea ae te nano ae uruaki ao te tamnei ae raraoma? E aera kai ko namakinna bwa te Tia Kamaiu e tangira te anga karea aio mai iroum?
I kona n reirei n ongo ao n oota ni bwanaan te Atua.
Ko kanga n ataia ngkana E taetae nakoim te Atua? Tao aia taneiai aomata n 3 Nibwaai 11:1–8 e kona ni buokiko ni kaotako n tabeua reirei n ongora ao n ataakin bwanaan te Atua. Ko na bae n taua mwiin aron tein bwanaan te Atua ake a ongo aomata ao tera ae a karaoia bwa a aonga n ota iai.
Ko kona naba n raka man ongoraeakinan bwanaaia burabeti ni boong aikai, abotoro, ao taan kairiiri n te Ekaretia ake a tia n taneiai n ongoongo ao n iriira bwanaan te Atua. Tabeman mai buakoia a tibwauai aia taneiai n “Ongo Irouna!” ake tenaan witeo n te Gospel Library. Iangoia bwa kona mataku n teuana ke ae e mwaiti riki.
Ko na kanga n maiuakina te bwai ae ko a tia n reiakinna n ongora ao n kinaa iai bwanaan te Atua n te aro ae mataata riki?
Taraa naba Russell M. Nelson, “Ongo Irouna,” Riaona, Meei 2020, 88–92; “Aio Natiu Ae I Tangiria,” Aia Boki n Anene Ataei, 76; Gospel Topics, “Personal Revelation,” Gospel Library.
E kaoai Iesu Kristo bwa N na karekea oin au kakoaua Ibukina.
E kaniia 2,500 aomata aika a bootaki n te tembora n te Aba ni Mari ngke e kaoti Iesu Kristo (taraa 3 Nibwaai 17:25). N aki tabe ma te mwaiti ae korakora aei, e kaoiia te Tia Kamaiu n tatabemaniia “temanna imwiin temanna” n namakina mwiin te neera inanon Baina ao waena (3 Nibwaai 11:14–15). Ngkai ko wareware, iangoia bwa tera arona ngke e mena te aba ikekei. N te aro raa ae e kaoko iai te Tia Kamaiu n “teirake ao nakomai ” Nakoina? (3 Nibwaai 11:14).
Ibukin iango riki tabeua, taraa te beeba ni kaongora n te namwakain aio n te Riaona ao Ibukin Kakorakoraia Kairake maekatiin.
Ngkana I mena n te roo, Iesu Kristo e kona n riki bwa au ota.
Ni buoka am ataei taekina te taneiai ae kabwarabwaraaki n 3 Nibwaai 8–9, ko kona ni manga karakina kaua ke n ni kakauongo nakon te rawerawe ni mwakoron mwakoro aikai inanon te ruu ae rotongitong. Kabwarabwara bwa e na kanga aron te mena inanon te rotongitong inanon teniua te bong. Ko kona ni maroroakinna bwa e aera ngke e aranna Iesu Kristo bwa Ngaia Otan te Aonaaba (taraa 3 Nibwaai 9:18). Bukin tera e kaoiia aomata Iesu, ao ngaira, bwa ngkana ti karaoia E na riki bwa otara? (taraa 3 Nibwaai 9:20–22).
Iesu e kamanoia Ana aomata n aron te moaine ae e kamanoia ana kiokio.
Te kabootau iroun te moaaine ngke e ikoikotiia natina e kona n riki bwa te bwai n anga reirei ae moan te korakora ni buokiia ataei n ataa katein ao ana mition te Tia Kamaiu. Ko kona n wareka 3 Nibwaai 10:4–6 ngkai am utu a tarai tamneia moaine ao kiokio. Bukin tera te moaaine e kainnanoia ni ikoikotiia natina? Bukin tera te Tia Kamaiu e tangiria ni ikoikotiira ni kaniira Nakoina? Ti na kanga n Nakoina ni karekea kamanoakira?
Ko na kanga n buokiia am ataei n namakina te Tamnei ngkana a wareka 3 Nibwaai 11:1–15 ni bootaki? Tao ko kona n tuangiia bwa ana tuangko ngkana a kaitibo ma te bwai teuana inanon kiibu akanne ae e buokiia n namakina Ana tangira te Atua. Ko kona n karaoa ae titebo ma te tamnei inanon te witeo “E Kaoti Iesu Kristo n te Tembora” (Gospel Library). Tuangiia am ataei aron am namakin ngke ko wareki ao n iangoi bwaai aikai. Anganiia bwa a na tibwaua naba aia namakin.
E taetae te Atua nakoiu n te bwanaa ae maraara, ae uarereke.
Tao ko kona ni wareki tabeua kiibu aikai n te, “bwana ae uarereke” (3 Nibwaai 11:3). Ke ko kona n katanga te rawerawe n te anene n aron “This Is My Beloved Son” (Aia Boki n Anene Ataei, 76) n te bwanaa ae maraara bwa e aonga n kanganga te ongora. Tera ae a karaoia aomata bwa ana oota n te bwanaa are e roko mai karawa? (taraa kiibu 5–7). Tera ae ti reiakinna man aia taneiai?
Kai ko wareka 3 Nibwaai 11:21–26, ko kona n kaoia natim bwa ana tei ni katoa tai a ongo iai te taeka ae bwabetito. Tera ae reirei Iesu iaon te bwabetito? Ngkana a tia n noora te bwabetito am ataei mai mwaaina, titirakiniia bwa ana kabwarabwa te bwai ae a nooria. Bukin tera e tangiria te Atua bwa ti bwabetitoaki?
Ibukin iango riki tabeua, taraa te beeba ni kaongora n te namwakaina aio n te Rao maekatiin.
