Oktubre 28–Nobyembre 3: “Luyag Ko nga Malugpayan Ko Kamo Tanan … sa Paghinulsol.” Mormon 1–6
“Oktubre 28–Nobyembre 3: ‘Luyag Ko nga Malugpayan Ko Kamo Tanan … sa Paghinulsol.’ Mormon 1–6,” Dali, Magsunod sa Akon—Para sa Puluy-an kag Simbahan: Libro ni Mormon 2024 (2023)
“Oktubre 28–Nobyembre 3. Mormon 1–6,” Dali, Magsunod sa Akon—Para sa Puluy-an kag Simbahan: 2024 (2023)
Litrato
Si Mormon nga nagasulat sa bulawan nga mga lamina
Mormon Abridging the Plates [Si Mormon nga Nagapalip-ot sang mga Lamina], ni Tom Lovell
Oktubre 28–Nobyembre 3: “Luyag Ko nga Malugpayan Ko Kamo Tanan … sa Paghinulsol”
Wala na ginsulat ni Mormon ang “bug-os nga kasaysayan” sang “makakulugmat nga talan-awon” sang kalautan kag pagpatyanay nga iya nakita sa tunga sang mga Nefinhon (Mormon 2:18; 5:8 Pero ang iya ginsulat sa Mormon 1–6 hustohan na agud padumdumon kita kon paano kadalom mahulog sa sala ang sadto matarong nga katawhan. Sa tunga sang malapnagon nga kalautan, wala sing may makabasol kay Mormon nga makapoy kag bisan pa gani mangluya. Pero sa tunga sang tanan nga iya nakita kag naeksperiyensyahan, wala sia nawad-an sang pagsalig sa dako nga kaluoy sang Dios kag sang pagpati nga ang paghinulsol amo ang paagi agud mabaton ini. Kag bisan pa nga ginsikway sang katawhan mismo ni Mormon ang iya nagapangabay nga mga imbitasyon sa paghinulsol nahibal-an niya nga may mas dako sia nga tagpalamati nga dapat kumbinsihon. “Yari karon,” pahayag niya, “nagasulat ako sa tanan nga mga yara sa mga ukbong sang duta.” Buot silingon, nagsulat sia sa imo (tan-awa sa Mormon 3:17–20). Kag ang iya mensahe sa imo, sa sini nga panahon, amo man nga mensahe nga nakaluwas kuntani sa mga Nefinhon sa ila panahon: “Magpati sa ebanghelyo ni Jesucristo. … [Maghinulsol] kag maghanda sa pagtindog sa atubang sang hukom-lingkuranan ni Cristo” (Mormon 3:21–22).
Sarang ko sundon si Jesucristo bisan ano pa ang ginahimo sang iban nga tawo.
Sang panahon nga sia mga 10 anyos ang edad, lain gid si Mormon sa mga tawo nga ara sa iya palibot. Samtang imo ginabasa ang Mormon 1–6, pangitaa ang mga paagi nga ang pagtuo ni Mormon kay Jesucristo naghimo sa iya nga pinasahi kag naghatag sa iya sang mga oportunidad nga mag-alagad kag bugayan ang iban. Ang masunod nga mga bersikulo mahimo nga makabulig sa imo nga magsugod:
Mormon 1:2–3, 13–17.Ano ang mga kinalain nga imo natalupangdan kay Mormon kag sa iya katawhan? Ano sa mga kalidad niya ang nagbulig sa iya nga magpabilin nga mabakod sa espirituhanon sa amo kabudlay nga panahon?
Mormon 2:18–19.Ano nga mga tinaga ang gingamit ni Mormon sa paglaragway sang kalibutan nga iya ginaestaran? Paano niya ginmentinar ang paglaum wala sapayan sang iya palibot?
Mormon 3:12Ano ang nabatyagan ni Mormon parte sa mga tawo sa iya palibot? Ano ang pwede mo himuon para patubuon ang klase sang pagpalangga niya?
Ano pa nga mga bersikulo sa Mormon 1–6 ang nagapakita sang pagtuo ni Mormon kay Jesucristo? Ano nga mga oportunidad ang ginhatag sa iya tungod ginpili niya nga magpabilin nga matinuohon?
Pamensara nga tun-an ang mensahe ni Pangulong Thomas S. Monson “Mangin Ehemplo kag Kapawa” (Liahona, Nob. 2015, 86–88), nga ginapangita ang mga rason kon ngaa importante sa mga sumulunod ni Jesucristo nga mangin kitaon ukon mangin lain. Paano mo kompletuhon ang nga dinalan pareho sini? “Si nangin halimbawa sa akon sang sia . Nakabulig ini sa akon nga maghandum nga .”
Siguro nabatyagan ni Mormon nga ang iya ehemplo wala sing epekto sa iya katawhan. Kon may tsansa ka nga mahambal kay Mormon, ano ang imo ihambal sa iya parte sa kinalain nga natuga sang iya ehemplo sa imo?
Buligi ang iban nga iistorya ang ila natun-an. Kon ginasugid sang iban ang ila natun-an, ginapabakod nila ang ila mismo nga pagtuo kag ang pagtuo sang iban (tan-awa sa Doktrina kag mga Kasugtanan 88:122). Tilawi nga pamangkuton ang imo pamilya ukon klase kon ano ang ila mga eksperiyensya samtang ginatun-an nila ang pulong sang Dios.
Litrato
Ang mga Nefinhon kag mga Lamanhon nga nagailinaway
Ang diosnon nga kasubo nagagiya sa akon kay Cristo kag sa nagalawig nga pagbag-o.
Sang nakita ni Mormon ang kasubo sang iya katawhan, naglaum sia nga magahinulsol sila. Pero “ang ila pagpangalisud indi tuhoy sa paghinulsol” (Mormon 2:13)—indi ato diosnon nga kasubo kundi kalibutanon nga kasubo. Para maintiendihan ang kinalain, pamensara nga isulat ang imo natun-an sa Mormon 2:10–15 sa isa ka tsart pareho sini:
Paano mo mahibal-an kon ang imo kasubo diosnon ukon kalibutanon? Kon nagaeksperiyensya ka sang kalibutanon nga kasubo, paano mo ini islan sang diosnon nga kasubo?
“Wala sila makahangop nga ang Ginuo amo ang nagluwas sa ila.”
Naobserbahan ni Mormon nga ang mga Nefinhon wala nagakilala sang mga paagi nga ginabugayan sila sang Ginuo. Samtang imo ginabasa ang Mormon 3:3, 9, pwede mo binagbinagon kon paano mo ginakilala ang impluwensya sang Dios sa imo kabuhi. Ano nga mga bugay ang magaabot kon imo kilalahon ang Iya impluwensya? Ano ang mga konsikwensya sang indi pagkilala sa Iya? (tan-awa sa Mormon 2:26; Doktrina kag mga Kasugtanan 59:21).
Nagatindog si Jesucristo nga bukas ang mga kamot sa pagbaton sa akon.
Kon pamatyag mo ginaluyahan ka tungod sang imo kaugalingon nga mga sala, ang paglaragway ni Mormon sa Manluluwas nga nagatindog nga “bukas ang mga kamot sa pagbaton sa imo” makahatag sang pagpasalig. Samtang imo ginabasa ang Mormon 5:8–24 kag 6:16–22, ano ang imo matun-an parte sa mga balatyagon sang Amay nga Langitnon kag ni Jesus sa imo, bisan pa nga makasala ka? Paano mo nabatyagan ang paglab-ot ni Jesucristo sa imo nga bukas ang mga kamot? Ano ang ginapabatyag sa imo nga imo himuon bilang resulta?
Pareho kay Mormon, sarang ko sundon si Jesucristo.
Tungod hubin pa kaayo si Mormon sang napatubo niya ang iya pagtuo kay Cristo, pwede sia mangin inspirasyon sa imo kabataan. Basi pwede mo basahon ang Mormon 1:1–3 kag pamatian sang imo kabataan kon pila ang iya edad sang ginhatagan sia ni Amaron sang espesyal nga misyon. Pwede mo man sila buligan nga pangitaon sa sining mga bersikulo ang mga kalidad nga nakita ni Amaron kay Mormon. Paano kita ginabuligan sining mga kalidad nga sundon si Jesucristo?
Litrato
Si Mormon sang lamharon pa
Mormon, Age 10 [Mormon, 10 Anyos], ni Scott M. Snow
Tungod ginsunod ni Mormon si Jesucristo, ginhatagan sia sang mga oportunidad nga mag-alagad kag bugayan ang iban. Pwede mo hagaron ang imo kabataan nga basahon ang isa ukon madamo pa sa masunod nga mga dinalan kag buligan sila nga iistorya kon ano ang ila natun-an parte kay Mormon: Mormon 1:1–3; 2:1, 23–24; kag 3:1–3, 12, 20–22. Paano niya ginsunod si Jesucristo? Paano nakabulig kag nagbugay sa iban ang iya pagtuo kay Jesucristo? Paano makabulig ang aton pagtuo sa mga tawo nga kilala naton?
Ang diosnon nga kasubo nagagiya sa akon kay Cristo kag sa nagadugay nga pagbag-o.
Basi pwede ka maghimo sang tsart nga pareho sang ara sa “Mga Ideya sa Pagtuon sa Puluy-an kag sa Simbahan” para buligan ang imo kabataan nga maintiendihan ang kinalain sang kalibutanon kag diosnon nga kasubo samtang ila ginabasa ang Mormon 2:8, 10–15. Dayon pwede man nila usisaon ang Mormon 2:12 para pangitaon ang mga rason kon ngaa ang paghinulsol nagatuga sang aton “[nga tagipusuon … [nga magkasadya].” Paano naton sigurohon nga ang kasubo nga aton nabatyagan para sa aton mga sala nagagiya sa aton sa pagpangayo sang bulig sang Dios para magbag-o?
Ang Amay nga Langitnon nagahatag sa akon sang madamo nga mga bugay.
Ang paghagad sa imo kabataan nga ilista (ukon idrowing) ang pila sa mga butang nga ila ginapasalamatan mahimo nga maayo nga paagi para buligan sila nga makabatyag sang pagpasalamat sa Dios. Pagkatapos nila nga maglista, pwede mo basahon ang Mormon 3:3, 9 kag ipaathag nga ang Amay nga Langitnon nagbugay man sang mga Nefinhon, pero wala nila ini ginakilala. Ano ang pwede naton himuon para ipakita nga nagapasalamat kita sa Amay nga Langitnon sa aton mga bugay?
Gusto sang Amay nga Langitnon nga palanggaon ko ang tanan.
Bisan pa nga malain ang mga Nefinhon, wala nag-untat si Mormon sa pagpalangga sa ila. Buligi ang imo kabataan nga pangitaon ang mga tinaga nga “ginpalangga” kag “gugma” sa Mormon 3:12. Magpamatuod parte sa gugma sang Dios para sa tanan Niya nga mga anak.
Para sa dugang nga mga ideya, tan-awa sa isyu sang Abyan nga magasin sini nga bulan.
Litrato
bulawan nga mga lamina
Ang Libro ni Mormon ginsulat “agud kamo mahimo nga magpati sa ebanghelyo ni Jesucristo” (Mormon 3:21).