Nobyembre 18–24: “Agud ang Kalainan Mahimo nga Madula Na.” Eter 6–11
“Nobyembre 18–24: ‘Agud ang Kalainan Mahimo nga Madula Na.’ Eter 6–11,” Dali, Magsunod sa Akon—Para sa Puluy-an kag Simbahan: Libro ni Mormon 2024 (2023)
“Nobyembre 18–24. Eter 6–11,” Dali, Magsunod sa Akon—Para sa Puluy-an kag Simbahan: 2024 (2023)
Litrato
Jarednon nga mga barkasa sa dagat
I Will Bring You up Again out of the Depths [Dalhon Ko Kamo Liwat Paibabaw Gikan sa Kaidadalman sang Dagat], ni Jonathan Arthur Clarke
Nobyembre 18–24: “Agud ang Kalainan Mahimo nga Madula Na”
Ginatos ka tuig pagkatapos nga maubos ang mga Jarednon, nadiskubrehan sang mga Nefinhon ang mga bilin sang ila dumaan nga sibilisasyon. Naupod sa ginub-an amo ang isa ka misteryoso nga kasulatan—mga lamina nga “puraw-bulawan” nga “napuno sang mga kinurit,” kag ang mga Nefinhon “indi matakos ang ila handum” nga basahon ini (Mosias 8:9; 28:12). Sa karon ara sa imo ang pinalip-ot sining kasulatan, kag ginatawag ini nga libro ni Eter. Sang mabasahan ini sang mga Nefinhon, “napuno sila sang kasubo” sang mahibal-an ang masubo nga pagkalaglag sang mga Jarednon. “Wala’y sapayan sini naghatag ini sa ila sing dako nga ihibalo, nga sa sini sila nagkasadya” (Mosias 28: 12, 18). Ikaw man, mahimo nga makabatyag sang tinion sang kasubo sa sining libro. Pero pwede ka man magkasadya sa sining regalo sang ihibalo. Sa ginsulat ni Moroni, “isa ka kaalam sa Dios nga ining mga butang igapakita sa inyo … agud ang kalainan mahimo nga madula na, kag nga ang tion mahimo nga mag-abot nga si Satanas mahimo nga indi na makaangkon sing gahum sa pagpangibabaw sa mga tagipusuon sang mga anak sang tawo” (Eter 8:26).
Ang Ginuo magagiya sa akon sa bilog ko nga pagpanglakaton sa kabuhi.
Mahimo ka nga makakita sang espirituhanon nga mga ideya kon imo ikumparar ang biyahe sang mga Jarednon patabok sa kadagatan sa imo pagpanglakaton sa kabuhi. Halimbawa, ano ang gintigana sang Ginuo nga nagaiwag sang imo dalan pareho sang mga bato sa sulod sang mga barkasa sang mga Jarednon? Ano ayhan ang ginarepresentar sang mga barkasa, ukon sang hangin nga “naghuyop padulong sa duta nga ginpanaad”? (Eter 6:8). Ano ang imo matun-an sa mga aksyon sang mga Jarednon antes, sa tion sang, kag pagkatapos sang biyahe? Paano ka ginatuytuyan sang Ginuo padulong sa imo dutang ginpanaad?
“Mag-amba sang mga pagdayaw sa Ginuo.” Ginpahayag sang mga Jarednon ang ila pagpasalamat kag pagpalangga sa Dios paagi sa kanta kag pagdayaw (tan-awa sa Eter 6:9). Pwede ka magpangita ukon maghimo sang mga oportunidad sa paggamit sang musika kag hugot sa tagipusuon nga testimonya sa pagdayaw sa Dios sa balay kag sa simbahan.
Litrato
Jarednon nga pamilya sa sulod sang ila barkasa
Baby on Board [May Sakay nga Bata], ni Kendal Ray Johnson
“Maglakat sing mapainubuson sa atubang sang Ginuo.”
Bisan nga daw nangibabaw ang bugal kag kalautan sa kasaysayan sang Jarednon, may mga halimbawa man sang pagkamapainubuson sa sining mga kapitulo—ilabi na sa Eter 6:5–18, 30; 9:28–35; kag 10:1–2. Ang pagbinagbinag sang masunod nga mga pamangkot makabulig sa imo nga makatuon sa sining mga halimbawa: Ngaa nga ginpaubos sang mga Jarednon ang ila mga kaugalingon sa sining mga sitwasyon? Paano nila ginpakita ang ila pagpaubos? Paano sila ginbugayan sang Dios bilang resulta sini? Binagbinaga kon ano ang pwede mo himuon agud hugot sa buot nga “maglakat sing mapainubusuon sa atubang sang Ginuo” (Eter 6:17) imbes nga ginapilit nga mangin mapainubuson (tan-awa sa Mosias 4:11–12; Alma 32:14–18).
Ang mga kapitulo 7–11 sang Eter nagaunod sang indi magnubo sa 28 ka mga henerasyon. Bisan diutay lang nga detalye ang mahatag sa amo sini kagamay nga espasyo, ang sulundan madasig nga nagaathag parte sa mga konsikwensya sang matarong kag malain nga pagkalider. Ano ang imo matun-an parte sa pagkalider sa mga ehemplo—negatibo kag positibo—sang mga hari nga nalista sa idalom?
Si Elder Dieter F. Uchtdorf naghatag sang mapuslanon nga laygay parte sa pagkalider sa iya nga mensahe “Ang Labing Daku sa Inyo” (Liahona, Mayo 2017, 78–81). Pamensara nga tun-an ining mensahe—labi na ang mga istorya nga iya ginasugid—nga ginapangita ang mga prinsipyo ukon sulundan sang Cristohanon nga pagkalider. Sang san-o mo nakita ining mga prinsipyo ukon sulundan nga ginpakita sa mga tawo nga nagapamuno?
Samtang imo ginabinagbinag ang imo natun-an, hunahunaa ang imo mga oportunidad sa pagpanguna ukon pag-impluwensya sa iban sa inyo balay, sa komunidad, sa calling sa Simbahan, kag iban pa. Paano ka magpatubo sang mga kalidad sang Cristohanon nga pagkalider, bisan pa nga wala ka sang partikular nga asaynment sa pagkalider?
Tan-awa man sa “Mga Prinsipyo sang Pagkalider sa Simbahan,” Libro sang Pangkabilogan nga Giya: Pagserbisyo sa Ang Simbahan ni Jesucristo sang mga Santos sa Ulihing mga Adlaw, 4.2 (ChurchofJesusChrist.org).
Kon ang mga tawo nagasugtanay nga isekreto ang ila malaut nga mga binuhatan, kabahin sila sang isa ka likom nga kaisahan. Dugang pa sa likom nga kaisahan nga ginlaragway sa Eter 8:7–18, ang iban pa nga mga halimbawa makita sa Helaman 1:9–12; 2:2–11; 6:16–30; Moises 5:29–33. Pamensara nga ikumparar ining mga bersikulo sa 2 Nefi 26:22–24, sa diin ginlaragway ni Nefi kon paano ginahimo sang Ginuo ang Iya buluhaton. Ngaa sa banta mo nga ginsugo si Moroni nga isulat ang iya ginsulat parte sa sekreto nga mga kaisahan?
Ano ang imo natun-an sa libro ni Eter nga makabulig sa imo nga mabaton ang mga bugay nga ginalaragway sa Eter 8:26?
Makasalig ako nga paumpawan ako sang Amay nga Langitnon kon nahadlok ako.
Ang tanan may mabudlay nga mga adlaw—bisan ang magagmay nga kabataan. Basi pwede mo buligan ang imo kabataan nga magpangita sang mga tinaga ukon mga dinalan sa Eter 6:1–12 nga nagapakita kon paano nagsalig ang mga Jarednon sa Dios sa mga tinion nga mabudlay kaayo ukon sa kahaladlukan nga mga adlaw. Pamensara ang pag-istorya sa isa kag isa sang pila ka mga eksperiyensya nga ginbuligan ka sa Dios sa mabudlay nga tinion sa imo kabuhi.
Ang pagdumdom sang mga ginhimo sang Dios nagadala sang pagpasalamat kag kalinong.
Pagkatapos nga mag-abot sa duta nga ginpanaad nga wala sang peligro, grabe ang pagpasalamat sang mga Jarednon nga “nagpaagay sang mga luha sang kalipay” (Eter 6:12). Pwede mo papagsikon ang imo kabataan nga makabatyag sang pagpasalamat sa mga bugay sang Dios paagi sa pagbulig sa ila nga magpangita sang mga dinalan sa Eter 6:9, 12 nga nagapakita kon paano ginpahayag sang mga Jarednon ang ila pagpasalamat sa Dios. Pangabaya ang imo kabataan nga sugiran ka sang pila ka mga butang nga ginapasalamatan nila.
Basi pwede nga basahon sang imo kabataan ang Eter 6:30; 7:27; kag 10:2 kag pangitaon kon ano ang nadumduman sining matarong nga mga hari. Paano ini nakaapekto sa ila pamaagi sa pagpamuno sang ila katawhan? Pwede ninyo hambalan sang imo kabataan ang mga paagi para pahanumdumon ang inyo mga kaugalingon kon ano ang nahimo sang Dios para sa inyo. Halimbawa, basi pwede sila magsulat parte sini ukon magdrowing sang mga litrato. Pwede mo ipanugyan nga himuon nila nga regular nga pangginawi ang pagsulat sang mga bugay nga natalupangdan nila halin sa Dios.
Ginabugayan ako kon ginasunod ko ang propeta sang Dios.
Basi masadyahan kamo sang imo kabataan sa pagdrama-drama sang pila ka mga butang nga gintudlo sang propeta nga inyo himuon. Pwede man gani nga himuon ninyo ini nga hampang sa diin pakton ninyo kon ano ang ginarepresentar sang aksyon. Pwede sini mahanda ang imo kabataan sa paghambalanay kon ngaa importante nga sundon ang propeta. Dayon pwede ninyo basahon ang Eter 7:24–27 para mahibal-an kon ano ang natabo sang ginsunod sang katawhan ang propeta sang Dios. Paano kita ginabugayan sang pagsunod sang propeta sa karon?
Ang pagpangita sang mga sulundan isa ka mapuslanon nga kinaadman sa pagtuon sang balaan nga mga kasulatan. Ang libro ni Eter nagaunod sang sulit-sulit nga sulundan nga nagapatalupangod sang kaluoy sang Ginuo. Para buligan ang imo kabataan nga makita ini nga sulundan, hagara sila nga basahon ang Eter 9:28–35 kag Eter 11:5–8, nga ginapangita ang pagpalareho sang duha ka mga panaysayon. Ano ang aton matun-an sa sining mga istorya? Basi pwede sila magtan-aw sa Libro sang mga Larawan nga Pang-Ebanghelyo sang iban nga mga tawo sa balaan nga mga kasulatan nga naghinulsol kag ginpatawad.
Para sa dugang nga mga ideya, tan-awa sa isyu sang Abyan nga magasin sini nga bulan.
Litrato
Jarednon nga mga barkasa sa dagat
Jaredite Barges [Jarednon nga mga Barkasa], ni Gary Ernest Smith