Etere 6-11

Ungafumana iimbono zomoya ukuba uthelekisa uhambo lwamaYeredayithi lokuwela ulwandle nohambo lwakho lobomi basemhlabeni. Ngokomzekelo, yintoni iNkosi ekuxhobise ngayo ekhanyisa indlela yakho njengamatye kwizikhephe zamaYeredayithi? Ingaba yintoni emelwe zizikhephe, okanye umoya “owawuvuthuzela ngakulo ilizwe lesithembiso”? (Etere 6:8). Ufunda ntoni kwizenzo zamaYeredayithi, ngaphambili, ngexesha, nangasemva kohambo? INkosi ikukhokela njani ukuya kwilizwe lakho lesithembiso?

Umfanekiso

Usapho lwamaYeredayithi ngaphakathi kwisikhephe sawo

Nangona ikratshi nenkohlakalo zibonakala zisongamela imbali yamaYeredayithi, kukho kananjalo imizekelo yokuthobeka kwezi zahluko—ingakumbi ku Etere 6:5–18, 30; 9:28–35; no 10:1–2. Ukucingisisa le mibuzo ilandelayo kungakunceda ufunde kule mizekelo: Kwakutheni la maYeredayithi azithobe kwezimeko? Bakubonisa njani ukuthobeka kwabo? UThixo wabasikelela njani ngenxa yoko? Cinga into ongayenza ngokuzithandela “ukuhamba uthobekile phambi kweNkosi” (Etere 6:17) kunokuba unyanzeliswe ukuthobeka (bona Mozaya 4:11–12; Alma 32:14–18).

Izahluko 7–11 zika Etere ziquka ebuncinaneni izizukulwana ezingama-28. Nangona kungekho nkcazelo ingako inokunikelwa kwindawo encinane ngolo hlobo, iphatheni ivela ngokukhawuleza malunga neziphumo zobunkokeli obulungileyo nobungendawo. Ufunda ntoni ngobunkokeli kwimizekelo—emibi kunye neyakhayo—yookumkani abadweliswe ngezantsi?

• Oriha—Etere 6:30; 7:1

• Shule—Etere 7:23–27

• Yerede—Etere 8:1–7, 11–15

• Emeri noKoriyantam—Etere 9:21–23

• Heti—Etere 9:26–30

• Shez—Etere 10:1–2

• Riplakhish—Etere 10:5–8

• Moriyantoni—Etere 10:9–11

• Lib—Etere 10:19–28

• Etem—Etere 11:11–13

• Yesu Krestu—Mateyu 18:1–4; 20:20–28; 23:11

Cingisisa ngokufunda lo myalezo—ingakumbi amabali awabalisayo—ukhangela imigaqo okanye iipatheni zobunkokeli obufana nobukaKrestu. Ukhe wayibona nini le migaqo okanye iipatheni zibonakaliswa kubantu abakhokelayo?

Njengokuba ucingisisa ngento oyifundileyo, cinga ngamathuba onawo okukhokela okanye ukuphembelela abanye ekhayeni lakho, ekuhlaleni, kubizo lwaseBandleni, njalo njalo. Ungaziphuhlisa njani iimpawu zobunkokeli obufana nobukaKrestu, nokuba akunasabelo sikhethekileyo sobunkokeli?

Xa abantu bebhunga ukugcina izenzo zenkohlakalo emfihlakalweni, bazifaka kumayelenqe afihlakeleyo. Ukongeza kumayelenqe afihlakeleyo achazwe ku Etere 8:7–18, eminye imizekekelo ingafunyanwa ku Hilamani 1:9–12; 2:2–11; 6:16–30; Moses 5:29–33. Cinga ngokuchasanisa le miqolo kunye no 2 Nifayi 26:22–24, apho uNifayi wachaza indlela iNkosi eyenza ngayo umsebenzi waYo. Kutheni ucinga ukuba uMoronayi wayalelwa ukuba abhale oko wakwenzayo malunga namayelenqe afihlakeleyo?

Yintoni oyifundileyo kwincwadi kaEtere engakunceda ufumane iintsikelelo ezichazwe ku Etere 8:26?

• Wonke umntu uneentsuku ezinzima—nkqu nabantwana abancinane. Mhlawumbi ungabanceda abantwana bakho bafumane amagama namabinzana ku Etere 6:1–12 abonisa indlela amaYeredayithi amthemba ngayo uThixo ngeentsuku ezithile ezinzima ngokwenene nezoyikekayo. Cinga ngokwabelana omnye nomnye ngamava xa uThixo wakuncedayo ngamaxesha anzima ebomini bakho.

• Emva kokufika ngokukhuselekileyo kwilizwe ledinga, amaYeredayithi ayenombulelo kangangokuba “baphalaza iinyembezi zovuyo” (Etere 6:12). Ungabakhuthaza abantwana bakho ukuba bazive benombulelo ngeentsikelelo zikaThixo ngokubanceda bafumane amabinzana aku Etere 6:9, 12 abonisa indlela amaYeredayithi awawuvakalisa ngayo umbulelo wawo kuThixo.   Cela abantwana bakho bakuxelele ngezinye izinto abanombulelo ngazo.

• Mhlawumbi abantwana bakho banokufunda u Etere 6:30; 7:27; no 10:2 kwaye bafumane oko ikumkani ezingamalungisa zikukhumbulayo. Yayichaphazela njani indlela ababekhokela ngayo abantu babo? Wena nabantwana bakho ninokuxoxa iindlela zokuzikhumbuza ngoko uThixo anenzele kona. Ngokomzekelo, mhlawumbi banokubhala ngayo okanye bazobe imifanekiso. Usenokucebisa ukuba bazenzele umkhwa wokubhala phantsi rhoqo iintsikelelo abaziphawulayo ezivela kuThixo.

• Mhlawumbi wena nabantwana bakho ningakonwabela ukulinganisa ezinye zezinto umprofeti asifundise ukuba sizenze. Ningakujika kube ngumdlalo apho niqikelela ukuba izenzo zimele ntoni. Oku kunokubalungiselela abantwana bakho ukuba baxoxe ukuba kutheni kubalulekile ukulandela umprofeti kaThixo. Usenokufunda u Etere 7:24–27 ukuze ufumanise ukuba kwenzeka ntoni xa abantu bethobela umprofeti kaThixo. Sisikelelwa njani ngokulandela umprofeti namhlanje?

• Ukukhangela iipatheni bubuchule bokufunda izibhalo eziluncedo. Incwadi kaEtere iqulethe umzekelo ophindaphindiweyo ogxininisa inceba yeNkosi. Ukunceda abantwana bakho bafumane le phatheni, bameme ukuba bafunde u Etere 9:28–35 no Etere 11:5–8, bekhangela ukufana phakathi kwezi ngxelo zimbini. Yintoni esiyifundayo kula mabali?