Nobiyembre 25–Disyembre 1: “Pinaagi sa Hugot nga Pagtuo ang Tanan nga mga Butang Matuman.” Ether 12–15
“Nobiyembre 25–Disyembre 1: ‘Pinaagi sa Hugot nga Pagtuo ang Tanan nga mga Butang Matuman.’ Ether 12–15,” Dali, Sunod Kanako—Alang sa Panimalay ug sa Simbahan: Basahon ni Mormon 2024 (2024)
“Nobiyembre 25–Disyembre 1. Ether 12–15,” Dali, Sunod Kanako—Alang sa Panimalay ug sa Simbahan: 2024 (2024)
Imahe
Ether nagsulod sa usa ka langob
Ether Hiding in the Cavity of a Rock [Ether Nagtago sa Lungag sa usa ka Dakong Bato], ni Gary Ernest Smith
Nobiyembre 25–Disyembre 1: “Pinaagi sa Hugot nga Pagtuo ang Tanan nga mga Butang Matuman”
Ang mga panagna ni Ether ngadto sa mga Jaredite mga “mahinungdanon ug kahibulongan” (Ether 12:5). Siya “misulti kanila sa tanan nga mga butang, gikan sa sinugdanan sa tawo” (Ether 13:2). Siya nakakita “sa mga adlaw ni Kristo” ug sa ulahing adlaw nga Bag-ong Jerusalem (Ether 13:4). Ug namulong siya mahitungod sa “[pag]laom alang sa maayo nga kalibotan, oo, gani usa ka dapit diha sa tuo nga kamot sa Dios” (Ether 12:4). Apan gisalikway sa mga Jaredite ang iyang mga pulong, tungod sa samang rason nga ang katawhan kasagaran nagsalikway sa mga panagna sa mga sulugoon sa Dios karon—“tungod kay “sila wala [makakita] niini” (Ether 12:5). Nagkinahanglan kini og hugot nga pagtuo ang pagtuo sa mga saad o mga pasidaan mahitungod sa mga butang nga dili nato makita, sama usab nga si Ether nagkinahanglan og hugot nga pagtuo sa pagpanagna kabahin sa “mahinungdanon ug kahibulongan nga mga butang” ngadto sa dili matuohon nga katawhan. Nagkinahanglan kini og hugot nga pagtuo alang kang Moroni ang pagsalig nga ang Ginoo makatangtang sa iyang “kahuyang diha sa pagsulat” ug sa pag-usab niini ngadto sa kalig-on (tan-awa diha sa Ether 12:23–27). Mao kini ang matang sa hugot nga pagtuo nga naghimo kanato nga “lig-on ug makanunayon, sa kanunay puno sa maayo nga mga buhat, gitultulan ngadto sa paghimaya sa Dios” (Ether 12:4). Ug mao kini ang matang sa hugot nga pagtuo pinaagi diin “ang tanan nga mga butang matuman” (Ether 12:3).
Mga Ideya alang sa Pagkat-on diha sa Panimalay ug sa Simbahan
Ang hugot nga pagtuo diha ni Jesukristo mahimong mosangpot ngadto sa mga milagro.
Komon kini karon, sama ra kini sa panahon ni Ether, nga ang mga tawo gusto nga makakita og ebidensiya sa dili pa motuo sa Dios ug sa Iyang gahom. Unsa ang imong makat-onan gikan sa Ether 12: 5–6 mahitungod niini nga ideya?
Samtang basahon nimo ang Ether 12, mahimo nimong timan-an o markahan ang matag higayon nga makit-an nimo ang pulong nga “hugot nga pagtuo.” Ikonsiderar kon unsay gitudlo sa matag higayon mahitungod sa hugot nga pagtuo. Ang mga pangutana sama niini makatabang: Unsa ang hugot nga pagtuo? Unsa ang buot ipasabot nga magpakita og hugot nga pagtuo? Unsa ang mga bunga sa hugot nga pagtuo diha ni Jesukristo? Mahimo usab nimong irekord ang imong mga hunahuna mahitungod sa mga saksi nga imong naangkon “human sa pagsulay sa inyong hugot nga pagtuo” (Ether 12:6).
Tugoti ang uban nga mopakigbahin, ug usahay motudlo. Labing maayong makakat-on ang mga tawo kon sila adunay mga oportunidad sa pagpakigbahin sa unsay ilang nakat-onan o gani motudlo diha sa usa ka pormal nga kahimtang. Sa panimalay o sa simbahan man, ikonsiderar ang pagtugot sa uban, lakip ang kabatan-onan, sa pagtudlo og usa ka bahin sa leksiyon.
Si Jesukristo naghatag kanato og “labaw nga maayo nga paglaom.”
Agig dugang sa halawom nga mga panabot mahitungod sa hugot nga pagtuo, ang Ether 12 adunay daghan usab nga ikasulti mahitungod sa paglaom. Tugoti kini nga mga pangutana nga mogiya sa imong pagtuon:
Unsa ang mga rason nganong si Ether kinahanglang “molaom alang sa maayo nga kalibotan”? (tan-awa sa Ether 12:2–5).
Unsa ang katuyoan sa usa ka angkla? Unsa ang mabuhat sa paglaom alang sa imong kalag nga susama sa unsay buhaton sa usa ka angkla alang sa usa ka barko? (tan-awa sa Ether 12:4).
Si Jesukristo makahimo sa akong kahuyang ngadto sa kalig-on.
Kon atong basahon ang gamhanan nga mga sinulat ni Moroni, sayon ang pagkalimot nga nabalaka siya mahitungod sa iyang “kahuyang diha sa pagsulat” ug nahadlok nga ang katawhan mobiaybiay sa iyang mga pulong (tan-awa diha sa Ether 12:23–25). Kon mibati ka nga nabalaka mahitungod sa imong kaugalingon nga kahuyang, basaha ang kabahin sa mga panglimbasog ni Moroni—ug ang tubag sa Manluluwas—diha sa Ether 12:23–29. Mahimo usab kang mamalandong sa mga higayon sa dihang si Jesukristo mitabang kanimo sa pag-ila sa imong kahuyang ug mihimo kanimo nga lig-on—bisan kon Siya wala hingpit nga mitangtang niini. Hunahunaa usab ang mahitungod sa mga kahuyang nga sa karon ikaw nakigbisog. Unsa ang kinahanglan nimong buhaton aron makadawat sa saad sa Manluluwas nga “mohimo sa mahuyang nga mga butang nga mahimo nga malig-on”? (Ether 12:27).
Ikonsiderar ang pagsiksik sa mosunod nga mga tudling aron makita kon sa unsang paagi ang uban diha sa mga kasulatan nakaangkon og kalig-on pinaagi sa grasya ni Jesukristo:
Ang pagsalikway sa mga propeta sa Ginoo nagbutang kanako sa espirituhanong kakuyaw.
Ang pagkahimong hari sa mga Jaredite nahimong, sa kasaysayan, usa ka makuyaw nga katungdanan. Kini ilabi ka tinuod alang ni Coriantumr, kay daghang “gamhanan nga mga tawo … nagtinguha sa paglaglag kaniya” (Ether 13:15–16). Diha sa Ether 13:15–22, tan-awa kon unsa ang gihimo ni Coriantumr sa pagpanalipod sa iyang kaugalingon ug kon unsa ang gitambag ni propeta Ether nga iyang buhaton hinuon. Samtang basahon nimo ang nahibilin sa basahon ni Ether, pamalandongi ang mga sangpotanan sa pagsalikway sa mga propeta. Unsay mahitabo sa katawhan kon “ang Espiritu sa Ginoo [mohunong] sa pagdasig kanila”? (Ether 15:19). Unsa kaha ang gusto sa Ginoo nga imong makat-onan gikan niini nga mga istorya? Hunahunaa kon unsay imong buhaton aron sa pagsunod sa Iyang mga propeta.
Ang hugot nga pagtuo mao ang pagtuo sa mga butang nga dili nako makita.
Ikonsiderar ang pagtabang sa inyong mga anak sa pagsabat uban kaninyo sa “Ang hugot nga pagtuo mao ang mga butang nga gilaoman ug dili makita” gikan sa Ether 12:6. Mahimong malingaw sila sa pagtan-aw sa mga hulagway nga nagpakita sa mga ehemplo sa hugot nga pagtuo diha sa Ether 12:13–15, 19–21 (tan-awa sa Libro sa mga Hulagway sa Ebanghelyo, mga nu. 78, 85, ug ang pahina sa kalihokan niining semanaha). Tugoti ang inyong mga bata sa pagpasabot sa unsay ilang nahibaloan mahitungod sa matag istorya. Ania ang pipila ka pangutana sa pagtabang kaninyo sa paghisgot niini nga mga ehemplo sa hugot nga pagtuo:
Unsa ang gilaoman niini nga mga tawo?
Sa unsang paagi gisulayan ang ilang hugot nga pagtuo?
Unsay nahitabo tungod sa ilang hugot nga pagtuo?
Mahimo usab kang mopakigbahin sa imong kaugalingon nga mga kasinatian sa pagpakita og hugot nga pagtuo.
Ang paglaom nahisama sa usa ka angkla sa akong kalag.
Aron masabtan unsay gitudlo sa Ether 12:4 mahitungod sa paglaom, kamo ug ang inyong mga anak mahimong motan-aw sa usa ka hulagway sa usa ka barko ug sa usa ka angkla. Nganong ang mga barko nagkinahanglan man og mga angkla? Unsa ang mahitabo sa usa ka barko nga walay angkla? Samtang magkauban ninyong basahon ang Ether 12:4, hisgoti kon sa unsang paagi ang paglaom motabang kanato sa paagi nga ang usa ka angkla motabang sa usa ka barko. Dapita ang inyong mga anak sa pagdrowing og mga hulagway sa usa ka barko ug angkla aron makatudlo sila sa uban mahitungod sa paglaom.
Kon ang inyong mga anak magkinahanglan og kahulogan sa paglaom, tabangi sila sa pagpangita og kahulogan diha Giya ngadto sa mga Kasulatan, “Paglaom” (Librarya sa Ebangheyo). Sumala niini nga kahulogan ug sa Ether 12:4, 32, unsa ang kinahanglan natong laoman? (tan-awa usab sa Moroni 7:40–42). Tabangi ang inyong mga anak sa paghunahuna og ubang mga pulong alang sa paglaom, uban sa mga pulong nga sukwahi ang kahulugan sa paglaom. Mahimo usab kamong mopakigbahin sa usag usa og pipila ka kamatuoran sa ebanghelyo nga naghatag kaninyo og paglaom.
Si Jesukristo makatabang kanako nga espirituhanong magmalig-on.
Ang mga bata usahay mag-atubang og mga sitwasyon diin mobati sila nga huyang, sama sa nahitabo ni Moroni. Tabangi ang inyong mga anak nga mahibaloan kon nganong ingon niini ang gibati ni Moroni diha sa Ether 12:23–25, ug pangutan-a sila kon sila ba aduna gayoy susama nga mga pagbati. Dayon dapita sila sa pagbasa sa mga bersikulo 26–27 aron mahibaloan kon giunsa sa Ginoo pagtabang ni Moroni.
Tingali ang inyong mga anak makadrowing og hulagway sa usa ka butang nga mahuyang ug usa ka butang nga lig-on. Dayon mahimo nilang idugang ngadto sa ilang drowing ang pipila ka pulong ug mga hugpong sa mga pulong gikan sa Ether 12:23–29 nga motudlo kanila mahitungod kon sa unsang paagi ang Manluluwas makatabang kanato sa paghimo sa atong kahuyang nga kalig-on. Awhaga ang inyong mga anak sa paghunahuna mahitungod sa usa ka kahuyang nga anaa sila ug dayon magtinguha sa tabang sa Manluluwas aron mamahimong lig-on. Mahimo usab kamong mopakigbahin og usa ka kasinatian sa dihang ang Manluluwas mitabang kaninyo nga mahimong igo nga lig-on sa pagbuhat og usa ka butang nga malisod.
Alang sa dugang nga mga ideya, tan-awa ang isyu karong bulana sa Higala nga magasin.
Imahe
Ether nagluhod diha sa baba sa langob
Marvelous Were the Prophecies of Ether [Kahibulongan ang mga Panagna ni Ether], ni Walter Rane