Disyembre 23–29: “Siya Moanhi sa Kalibotan aron sa Pagtubos sa Iyang mga Katawhan.” Pasko
“Disyembre 23–29: ‘Siya Moanhi sa Kalibotan aron sa Pagtubos sa Iyang mga Katawhan.’ Pasko,” Dali, Sunod Kanako—Alang sa Panimalay ug sa Simbahan: Basahon ni Mormon 2024 (2023)
“Disyembre 23–29. Pasko,” Dali, Sunod Kanako—Alang sa Panimalay ug sa Simbahan: 2024 (2023)
Imahe
Jose, Maria, ug ang batang Jesus diha sa pasongan
Behold the Lamb of God [Tan-awa ang Kordero sa Dios], ni Walter Rane
Disyembre 23–29: “Siya Moanhi sa Kalibotan aron sa Pagtubos sa Iyang mga Katawhan”
Pasko
Gikan sa Nephi ngadto sa Moroni, ang matag propeta sa Basahon ni Mormon mipasalig ngadto sa sagradong katuyoan nga gi-summarize diha sa ulohan nga pahina sa basahon: “ang pagpamatuod ngadto sa [tanang katawhan] nga si Jesus mao ang Kristo.” Usa ka propeta nakakita Kaniya isip usa ka premortal nga espiritu, ug ang lain nakakita sa Iyang mortal nga pagpangalagad diha sa usa ka panan-awon. Ang usa mibarog diha sa usa ka paril sa pagsangyaw sa mga timailhan sa Iyang pagkatawo ug sa Iyang kamatayon, ug ang lain miluhod atubangan sa Iyang nabanhaw nga lawas, nga naghikap sa mga samad diha sa Iyang mga kamot, tiil, ug kilid. Tanan kanila nahibalo niining mahinungdanon kaayo nga kamatuoran: “Walay lain nga paagi ni mga pamaagi diin ang tawo maluwas, lamang pinaagi sa matubsanon nga dugo ni Jesukristo, kinsa … moabot aron sa pagtubos sa kalibotan” (Helaman 5:9).
Busa atol niining panahon sa Pasko, samtang ang mga tumutuo libot sa kalibotan nagsaulog sa kamaayo ug sa gugma sa Dios sa pagpadala sa Iyang Anak, palandonga kon giunsa sa Basahon ni Mormon paglig-on sa imong hugot nga pagtuo diha ni Kristo. Samtang ikaw naghunahuna sa Iyang pagkatawo, pamalandongi kon nganong Siya mianhi ug giunsa sa Iyang pag-anhi pag-usab sa imong kinabuhi. Niana ikaw makasinati sa tinuod nga kalipay sa Pasko—ang gasa nga si Jesukristo naghatag nganha kanimo.
Mga Ideya alang sa Pagkat-on diha sa Panimalay ug sa Simbahan
Si Jesukristo natawo aron mahimo nga akong Manluluwas.
Tradisyon kini ang pagbasa sa istorya sa pagkatawo sa Manluluwas diha sa Bag-ong Tugon atol sa adlaw sa Pasko, apan makakaplag ka usab og makapahinuklog nga mga panagna mahitungod niining sagradong hitabo diha sa Basahon ni Mormon. Sama pananglitan, ang mga panagna kabahin sa pagkatawo ug pagpangalagad sa Manluluwas makaplagan diha sa 1 Nephi 11:13–36; Mosiah 3:5–10; ug Helaman 14:1–13. Unsa nga mga impresyon mahitungod ni Jesukristo ang miabot kanimo samtang ikaw nagbasa niini nga mga tudling ug naghunahuna sa simbolismo sa mga timailhan sa Iyang pagkatawo? Giunsa sa mga pagpamatuod niini nga mga propeta sa paglig-on sa imong pagpamatuod kabahin ni Kristo ug sa Iyang misyon?
Ania ang ubang pipila ka sugyot aron sa pagtabang nimo nga makapunting kang Jesukristo sa panahon sa Pasko:
Kamo ba nahibalo nga kamo makatan-aw og mga mensahe gikan sa miagi nga Unang Kapangulohan nga mga debosyonal sa Pasko diha sa Gospel Library? Pangitaa kini diha sa “Mga Bidyo sa Holiday” nga koleksiyon. Hunahunaa ang pagpakigbahin niini nga mga mensahe ug musika aron sa pagpakaylap sa kalipay sa Pasko.
Ikaw ug ang imong pamilya mahimo usab nga malingaw sa pagpaminaw sa mga pinili gikan sa “Christmas Music” nga koleksiyon diha sa Gospel Library.
Ikonsiderar ang pagplano og mga kalihokan nga ikaw ug ang imong pamilya makahimo sa mga adlaw padulong sa Pasko aron mobati sa Espiritu ni Kristo, sama sa pagserbisyo og usa ka tawo o dungan nga pagpanganta og mga himno sa Pasko. Tan-awa diha sa LighttheWorld.org alang sa mga ideya.
Ang nag-unang rason nga kita nagsaulog sa pagkatawo ni Jesukristo kay tungod sa Iyang maulaong sakripisyo. Tungod niana nga sakripisyo, Siya makaluwas kanato gikan sa sala ug sa kamatayon, makahupay kanato sa mga kasakit, ug makatabang kanato nga mahingpit diha Kaniya” (Moroni 10:32). Unsay imong nakat-onan gikan sa Basahon ni Mormon niini nga tuig mahitungod sa gahom sa Manluluwas sa pagtubos kanimo? Aduna bay mga istorya o mga pagtulon-an nga talagsaon kanimo? Hunahunaa kon unsa ang gitudlo diha kanimo sa mosunod nga mga tudling mahitungod sa matubsanong misyon sa Manluluwas: 2 Nephi 2:6; Alma 7:7–13; 11:40; ug Helaman 5:9; 14:16–17. Unsa ang imong gibati nga nadasig buhaton sa pagpakita Kaniya sa imong pasalamat?
Imahe
icon sa seminary
Ang Basahon ni Mormon nagpamatuod ni Jesukristo.
“Lain nga Tugon ni Jesukristo” labaw pa kay sa usa lamang ka ubos nga ulohan [subtitle] alang sa Basahon ni Mormon; usa kini ka pamahayag sa balaan niini nga katuyoan. Pamalandongi kon unsay imong nakat-onan gikan sa mosunod nga mga kasulatan mahitungod sa misyon sa Basahon ni Mormon sa pagpamatuod ni Kristo: 1 Nephi 6:4; 19:18; ug 2 Nephi 25:23, 26; 33:4, 10.
Hunahunaa ang pagrekord diha sa journal kon giunsa ang pagtuon sa Basahon ni Mormon niini nga tuig pagdala kanimo nga mas maduol ngadto ni Kristo. Ang mosunod nga mga pag-aghat mahimong makatabang:
“Ang usa ka butang nga akong nakat-onan o gibati mahitungod sa Manluluwas niini nga tuig mao …”
“Ang pagkat-on mahitungod sa Manluluwas diha sa Basahon ni Mormon miusab sa paagi nga ako …”
“Ang akong paborito nga tawo [o istorya] diha sa Basahon ni Mormom mitudlo kanako nga ang Manluluwas …”
Tingali adunay usa ka tawo kinsa mapanalanginan nga makahibalo kon unsa ang imong gibati mahitungod sa Basahon ni Mormon. Unsaon kaha nimo pagpakigbahin sa imong mga kasinatian ug pagpamatuod? Mahimong mobati ka nga nadasig sa paghatag og kopya isip usa ka gasa sa Pasko. Ang Book of Mormon nga app mohimong yano sa pagpakigbahin.
Si Bishop Gérald Caussé milista og pipila ka kamatuoran gikan sa Basahon ni Mormon mahitungod ni Jesukristo (tan-awa sa “Usa ka Buhi nga Saksi sa Buhi nga Kristo,” Liahona, Mayo 2020, 39–40). Mahimo nimong tan-awon ang iyang lista ug pamalandongan kon sa unsang paagi ang matag usa niini nga mga kamatuoran miusab—o makausab—sa imong kinabuhi.
Tan-awa usab sa Gospel Topics, “Book of Mormon ,” Librarya sa Ebanghelyo [Gospel Library].
Si Jesukristo mao ang gasa sa Langitnong Amahan kanako.
Aron sa pagtabang sa inyong mga anak sa pagtutok diha sa gasa nga gihatag sa Langitnong Amahan kanato pinaagi sa pagpadala sa Iyang Anak, mahimo ninyong puston ang usa ka hulagway ni Jesukristo sama sa usa ka pinaskohan. Kamo ug ang inyong mga anak makahisgot mahitungod sa paboritong mga pinaskohan nga inyong nadawat o gipangandoy nga madawat. Dayon mahimo nilang ablihan ang hulagway ni Kristo ug hisgotan kon giunsa nga Siya nahimong usa ka bililhong gasa alang kanato. Ang usa ka awit sama sa “Mipadala sa Bugtong Anak”(Songbook sa mga Bata, 20–21) mahimong madugang ngadto niini nga panag-istoryahanay. Tabangi ang inyong mga anak sa pagpangita og mga hugpong sa mga pulong diha sa awit nga naghulagway sa mga panalangin nga anaa kanato tungod sa pagkatawo ni Jesus.
Si Jesukristo natawo aron mahimo nga akong Manluluwas.
Ang inyong mga anak mahimong malingaw sa pagpakigbahin kaninyo sa unsay ilang nahibaloan mahitungod sa pagkatawo ni Jesus. Ang Libro sa mga Hulagway sa Ebanghelyo adunay pipila ka hulagway nga makatabang nila sa pagsugilon sa istorya (tan-aw sa mga num. 28, 29, 30, 31). Mahimo usab kamong motan-aw sa mga hulagway nga nagpakita sa kinabuhi ug maulaong sakripisyo sa Manluluwas. Nganong gipadala sa Langitnong Amahan si Jesukristo?
Ang inyong mga anak tingali malingaw usab nga magdrowing sa ilang kaugalingong mga hulagway sa pagkatawo ug pangalagad ni Jesus. Mahimo nilang drowingon ang unsay gihulagway diha sa 1 Nephi 11:13–23; Mosiah 3:5–10; Helaman 14:1–13; ug 3 Nephi 1:4–22. Dayon mahimo nilang ipakigbahin kaninyo ang unsay gitudlo sa ilang mga litrato mahitungod ni Jesukristo.
Aron sa paghatag og gibug-aton nga ang Biblia ug ang Basahon ni Mormon parehong nagtudlo sa pagkatawo ni Jesus, mahimo ninyong ilista ang mga panghitabo nga gihulagway diha Lucas 2:4–14; Mateo 2:1–2; ug 3 Nephi 1:15, 19–21. Dayon ang inyong mga anak mahimong mosiksik niini nga mga kasulatan aron sa pagtino kon unsa nga mga panghitabo ang nahitabo sa Betlehem, sa Amerika, o sa duha. Nganong mapasalamaton man kita nga anaa ang Basahon ni Mormon isip ikaduha nga saksi sa pagkatawo ni Jesus?
Ang mga bata ganahan og mga istorya. Ang mga istorya maoy usa sa labing maayong mga paagi sa pagtabang sa mga bata nga makakat-on ug makahinumdom sa mga kamatuoran. Samtang inyong ipakigbahin ang istorya sa pagkatawo ni Jesus, ikonsiderar usab ang pagpakigbahin og mga istorya gikan sa inyong kinabuhi nga nakatabang sa pagpalig-on sa inyong hugot nga pagtuo diha sa Manluluwas.
Ang Basahon ni Mormon nagpamatuod ni Jesukristo.
Samtang kamo ug ang inyong mga anak motapos sa inyong pagtuon sa Basahon ni Mormon niining tuiga, mahimong maayo kini nga panahon sa pagpakigbahin sa usag usa sa inyong paborito nga mga istorya o mga tudling gikan niining sagrado nga basahon. Ang pagtan-aw sa pipila ka mga hulagway diha sa Dali, Sunod Kanako o sa Mga Sugilanon sa Basahon ni Mormon makatabang sa inyong mga anak nga makahinumdom sa unsay ilang nakat-onan niining tuiga. Tabangi sila nga makakita kon unsa ang gitudlo kanato niini nga mga istorya mahitungod ni Jesukristo.
Mahimo usab ninyong hatagan ang inyong mga anak og usa ka hulagway ni Jesus, o padrowinga sila og ilang kaugalingon. Dapita sila sa pag-isa sa ilang mga hulagway sa matag higayon nga makadungog sila sa ngalan ni Kristo samtang basahon nimo ang 2 Nephi 25:23, 26. Ipamatuod nga ang Basahon ni Mormon gisulat aron sa pagtabang kanato sa “pagtuo kang Kristo” (2 Nephi 25:23).
Alang sa dugang nga mga ideya, tan-awa ang isyu karong bulana sa Higala nga magasin.
