Disyembre 16–22: “Magkari kay Cristo, kag Magmangin Himpit sa Iya.” Moroni 10
“Disyembre 16–22: ‘Magkari kay Cristo, kag Magmangin Himpit sa Iya.’ Moroni 10,” Dali, Magsunod sa Akon—Para sa Puluy-an kag Simbahan: Libro ni Mormon 2024 (2023)
“Disyembre 16–22. Moroni 10,” Dali, Magsunod sa Akon—Para sa Puluy-an kag Simbahan: 2024 (2023)
Litrato
Si Jesus nga nagapakita sa mga Nefinhon
That Ye May Know [Agud Inyo Mahibal-an], ni Gary L. Kapp
Disyembre 16–22: “Magkari kay Cristo, kag Magmangin Himpit sa Iya”
Ang Libro ni Mormon nagabukas sa promisa ni Nefi nga ipakita sa aton nga “ang mahinuklugon nga mga kaluoy sang Ginuo nagapangibabaw sa tanan nga iya mga pinili, tungod sang ila pagtuo” (1 Nefi 1:20 Ang libro nagatakop nga may pareho nga imbitasyon halin kay Moroni: “Dumduma kon nangin daw ano kamaluluy-on ang Ginuo” (Moroni 10: 2– 3). Ano nga mga halimbawa sang kaluoy sang Ginuo ang imo nakita sa Libro ni Mormon? Pwede mo binagbinagon ang maluluy-on nga paagi nga ginpangunahan sang Dios ang pamilya ni Lehi patabok sa kamingawan kag patabok sa dalagko nga mga tubig, ang mahinuklugon nga kaluoy nga Iya ginpakita kay Enos sang ang iya kalag ginutom sa kapatawaran, ukon ang kaluoy nga Iya ginpakita kay Alma, isa ka masupog nga kaaway sang Simbahan nga nangin isa sang iya wala-kahadlok nga tagpangapin. Ukon mahimo nga magliso ang imo hunahuna sa kaluoy nga ginpakita sang nabanhaw nga Manluluwas sa katawhan sang Iya ginpang-ayo ang ila mga masakiton kag ginbendisyunan ang ila magagmay nga kabataan. Siguro ang pinakaimportante, ining tanan makapadumdom sa imo kon “nangin daw ano ka maluluy-on ang Ginuo” sa imo, kay ang Libro ni Mormon ginsulat para agdahon ang kada isa sa aton nga batunon ang kaluoy sang Dios—isa ka imbitasyon nga ginpabutyag sing simple sa nagapaalam nga mga pulong ni Moroni, “Magkari kay Cristo, kag magmangin himpit sa iya” (Moroni 10:32).
Sarang ko mahibal-an ang kamatuoran sang tanan nga butang paagi sa gahum sang Balaan nga Espiritu.
Ang promisa sa Moroni 10:3–7 nagbag-o sang mga kabuhi sang minilyon nga mga tawo sa bilog nga kalibutan. Paano sini ginbag-o ang imo kabuhi? Samtang imo ginbasa ang Moroni 10:3–7, pamensara nga basahon ini sing mas maid-id sangsa nagliligad. Pwede mo usisaon ang tagsa ka dinalan, nga ginapamangkot ang imo kaugalingon pareho sang mga ini: Ano ang buot silingon sini? Paano ko ini himuon sing mas maayo? Ano ang akon nangin mga eksperiyensya sa sini?
Samtang imo ginabinagbinag ang imo personal nga pagpangita sang espirituhanon nga kamatuoran, basi makabulig ang pagtuon kon paano nakita sang iban ang kamatuoran paagi sa gahum sang Balaan nga Espiritu. Ginlaragway ni Elder Mathias Held ang iya eksperiyensya bilang bag-o nga miyembro sang Simbahan (tan-awa sa “Pagpangita sang Kaalam paagi sa Espiritu,” Liahona, Mayo 2019, 31–33). Pamensara ang pagbasa sining mensahe kag isulat ang bisan ano nga imo natun-an halin sa iya pagpangita sang kamatuoran nga makabulig sa imo.
Ano nga balaan nga kasulatan ang daw nakabulig gid sa imo ihibalo? Basi pwede ka magpili sang isa nga pwede mo ipaambit sa iban nga nagapangita man sang kamatuoran paagi sa Espiritu.
Isulat ang mga panghunahuna. Ang pagkahaylo sa ebanghelyo ni uJesucristo nagakahulugan sang pareho paghibalo kag pagpangabuhi sang ebanghelyo. Laban-laban ka nga mag-akto sa imo natun-an kon imo ini isulat. Kon nagatudlo ka, agdaha ang mga tawo nga imo ginatudloan nga isulat ang ila espirituhanon nga mga panghunahuna.
Ang Dios naghatag sa akon sang espirituhanon nga mga regalo.
Madamo ang paagi nga ang isa ka tawo mahimo nga “[magpanghiwala] … [sang] mga hiyas sang Dios” (Moroni 10:8). Pila ka mga tawo ang nagapanghiwala nga may ari sining mga hiyas. Ang iban nagapanghiwala sang ila mga hiyas paagi sa pagpatumbaya sini ukon sa indi pagpauswag sang mga ini. Samtang imo ginabasa ang Moroni 10:8–25, pangitaa ang mga kamatuoran nga makabulig sa imo nga diskubrehon ang imo espirituhanon nga mga hiyas kag gamiton ang mga ini agud bugayan ang mga anak sang Dios. Ang mga pamangkot pareho sini mahimo nga makabulig: Ano ang espirituhanon nga mga hiyas? Kay sin-o ini ginahatag? Ngaa ginahatag ini? Paano naton ini mabaton? May madumduman ka bala nga mga halimbawa sang mga tawo nga nagagamit sang mga hiyas nga nalista sa Moroni 10:9–16?
Pwede ako mangin perpekto paagi sa grasya ni Jesucristo.
Ang laygay ni Moroni nga “magkari kay Cristo” masobra pa sangsa pagtuon kag pagpanumdom sa Iya. Kundi, isa ini ka imbitasyon nga magkari kay Cristo sa pinakakompleto nga paagi nga posible—ang mangin pareho sa Iya. Samtang imo ginabasa ang Moroni 10:30–33, tandai ang mga dinalan nga nagabulig sa imo nga maintiendihan kon ano ang buot silingon sang magkari kay Cristo, paano ini ginapatigayon, kag ang mga resulta sang paghimo sini.
Balikda ang imo pagtuon sang Libro ni Mormon sini nga tuig, kag binagbinaga kon ano ang imo nabatyagan kag natun-an parte kay Jesucristo. Halimbawa, paano ka nabuligan sang Libro ni Mormon nga magpalapit sa Iya? Paano ka sini ginbuligan nga mas magsalig sing lubos sa Iya grasya? Paano ini nakabulig sa imo nga “indi magpanghiwala” sang gahum sang Manluluwas? Pamensara nga iistorya ang imo kaugalingon nga saksi sang Libro ni Mormon sa tawo nga kinahanglan makabati sini, lakip na ang mga mahal sa kabuhi kag mga abyan nga basi wala pa makahibalo sang mensahe sini.
Sarang ko mahibal-an sa akon kaugalingon nga Ang Libro ni Mormon matuod.
Paano mo buligan ang imo kabataan nga batunon ang imbitasyon ni Moroni nga pamangkuton ang Dios kon ang Libro ni Mormon matuod? Pamensara nga hatagan sila sang magagmay nga panid sang papel nga may tinaga nga Basaha, Dumduma, Binagbinaga, kag Magpamangkot nga nasulat sa mga ini. Makita sang imo kabataan ini nga mga tinaga sa Moroni 10:3–4. Ano ang dapat naton basahon, dumdumon, binagbinagon, kag ipamangkot para makaagom ukon pabakuron ang aton mga testimonya sang Libro ni Mormon?
Ang mas magagmay nga kabataan mahimo nga masadyahan nga mag-akto nga kuno-abi si Moroni nga nagasulat sa mga lamina kag nagalubong sang mga ini. Iistorya sa kada isa ang inyo mga testimonya sang Libro ni Mormon.
Ang Amay nga Langitnon nagahatag sa akon sang espirituhanon nga mga regalo.
Para tudloan ang imo kabataan parte sa espirituhanon nga mga regalo, pwede mo isulat ang mga numero 9 hasta 16 sa separado nga mga panid sang papel kag putsa ang tagsa ka papel nga daw regalo. Pwede ang imo kabataan magbulos-bulos sa pagbukas sang mga regalo, pagbasa sang mga bersikulo sa Moroni 10:9–16 nga nagasanto sa mga numero, kag hibaluon ang tagsa ka espirituhanon nga regalo. Pwede mo ihambal nga gusto sang Amay nga Langitnon nga gamiton naton ining mga regalo para bugayan ang Iya mga anak. Pwede mo man buligan ang imo kabataan nga matalupangdan ang mga regalo nga ginhatag sang Amay nga Langitnon sa ila.
Nakahibalo bala ang imo kabataan kon ano ang buot silingon sang “magkari kay Cristo”? Basi pwede mo basahon ang Moroni 10:32 kag hagaron sila nga suliton ang dinalan upod sa imo. Dayon pwede nila ipiyong ang ila mga mata samtang ginabutang mo ang litrato ni Jesus sa isa ka lugar sa kuwarto. Dayon pamuklata na sila, ipapangita ang litrato, magtipon sa palibot sang litrato, kag hambalan ang mga paagi nga pwede kita magpalapit kay Cristo. Basi makabulig nga isulat ang pamangkot nga Ano ang buot silingon sang magkari kay Cristo? Buligi sila nga basahon ang Moroni 10:32–33 sa pagpangita sang posible nga mga sabat (tan-awa man sa Mga Artikulo sang Pagtuo 1:3–4. Magbuligay sa paglista sang gusto ni Cristo nga ipahimo sa aton kag sang Iya ginapromisa nga himuon para sa aton.
Basi masadyahan ang imo kabataan sa paghimo kag pagdekorar sang korte-korason nga mga tsapa nga nagasiling “Palangga ko ang Dios sa bug-os ko nga ikasarang, kaisipan kag kusog” (tan-awa sa Moroni 10:32). Pagkatapos nila, hambali upod sa ila kon paano naton mapakita sa Dios nga palangga naton Sia.
Para sa dugang nga mga ideya, tan-awa sa isyu sang Abyan nga magasin sini nga bulan.
Litrato
Si Moroni nga nagalubong sang bulawan nga mga lamina
Antes ginlubong ang mga sinulatan, gin-agda kita ni Moroni nga “dumduma kon nangin daw ano kamaluluy-on ang Ginuo” (Moroni 10:3).