Disyembre 23–29: “Magakari Sia sa Kalibutan sa Pagtubos sang Iya Katawhan.” Paskwa
“Disyembre 23–29: ‘Magakari Sia sa Kalibutan sa Pagtubos sang Iya Katawhan.’ Paskwa,” Dali, Magsunod sa Akon—Para sa Puluy-an kag Simbahan: Libro ni Mormon 2024 (2023)
“Disyembre 23–29. Paskwa,” Dali, Magsunod sa Akon—Para sa Puluy-an kag Simbahan: 2024 (2023)
Litrato
Si Jose, Maria, kag ang lapsag nga si Jesus sa pasungan
Behold the Lamb of God [Yari Karon ang Cordero sang Dios], ni Walter Rane
Disyembre 23–29: “Magakari Sia sa Kalibutan sa Pagtubos sang Iya Katawhan”
Paskwa
Halin kay Nefi hasta kay Moroni, ang tagsa ka propeta sa Libro ni Mormon nangin dedikado sa sagrado nga katuyuan nga ginpalip-ot sa tig-ulo nga pahina: “sa pagpasanag sa [tanan nga katawhan] nga si Jesus amo ang Cristo.” Isa ka propeta ang nakakita sa Iya bilang isa ka espiritu antes sa kabuhi sa duta kag ang isa pa nakakita sang Iya dutan-on nga pag-alagad sa isa ka palanan-awon. Ang isa nagtindog sa pader para ipahayag ang mga tanda sang Iya pagkabun-ag kag sang Iya kamatayon, kag ang isa pa nagluhod sa atubang sang Iya nabanhaw nga lawas, nga nagahikap sang mga pilas sa Iya mga kamot, tiil, kag kilid. Tanan sila nakahibalo sining tig-una nga kamatuoran: “Wala na sing iban pa nga paagi ukon mga pahito nga sa sini ang tawo mahimo nga maluwas, lamang paagi sa nagapasag-uli nga dugo ni Jesucristo, nga … magaabot sa pagtubos sang kalibutan” (Helaman 5:9).
Gani sa sining tion sang Paskwa, samtang ang mga tumuluo sa bilog nga kalibutan nagaselebrar sang kaayo kag gugma sang Dios sa pagpadala sang Iya Anak, binagbinaga kon paano ang Libro ni Mormon nagpabakod sang imo pagtuo kay Cristo. Samtang imo ginahunahuna ang Iya pagkabun-ag, binagbinaga kon ngaa Sia nagkari kag kon paano ginbag-o sang Iya pagkari ang imo kabuhi. Kag sa sina imo maeksperiyensyahan ang matuod-tuod nga kalipay sang Paskwa—ang regalo nga ginhatag ni Jesucristo sa imo.
Mga Ideya sa Pagtuon sa Puluy-an kag sa Simbahan
Si Jesucristo natawo agud mangin akon Manluluwas.
Kinaandan na nga magbasa sang istorya parte sa pagkabun-ag sang Manluluwas sa Bag-ong Katipan sa tion sang Paskwa, pero makakita ka man sang makatalandog nga mga propesiya sang sining sagrado nga hitabo sa Libro ni Mormon. Halimbawa, ang mga propesiya parte sa pagkabun-ag kag pag-alagad sang Manluluwas makita sa 1 Nefi 11:13–36; Mosias 3:5–10; kag Helaman 14:1–13. Ano nga mga panghunahuna parte kay Jesucristo ang nagaabot sa imo samtang imo ginabasa ining mga dinalan kag ginapadaluman sang pensar ang simbolismo sang mga tanda sang Iya pagkabun-ag? Paano ginpabakod sang mga testimonya sining mga propeta ang imo testimonya kay Cristo kag sa Iya misyon?
Ari ang pila sa mga panugyan nga makabulig sa imo nga magtutok kay Jesucristo sa tion sang Paskwa:
Nakahibalo bala kamo nga pwede kamo magtan-aw sang mga mensahe halin sa nagliligad nga mga debosyonal sa Paskwa sang Unang Pangulohan sa Librarya sang Ebanghelyo? Pamensara nga ipaambit ining mga mensahe kag musika para ipalapnag ang kasadya sang Paskwa.
Pamensara nga magplano sang mga aktibidades nga pwede himuon sang inyo pamilya sa inadlaw padulong sa Paskwa para mabatyagan ang Espiritu ni Cristo, pareho sang pagserbisyo sa isa ka tawo ukon pagkanta sang mga himno sa Paskwa sing ululupod. Magkadto sa LighttheWorld.org para sa mga ideya.
Ang mayor nga rason nga ginaselebrar naton ang pagkabun-ag ni Jesucristo amo ang Iya nagabayad-sala nga sakripisyo. Tungod sinang pagsakripisyo, maluwas Niya kita halin sa sala kag kamatayon, mapaumpawan ang aton mga kalisud, kag mabuligan kita nga “magmangin himpit sa Iya” (Moroni 10:32). Ano ang imo natun-an sa Libro ni Mormon sini nga tuig parte sa gahum sang Manluluwas sa pagtubos sa imo? May mga panaysayon bala ukon pinanudlo nga daw nangibabaw gid para sa imo? Pamensara kon ano ang ginatudlo sa imo sang masunod nga mga dinalan parte sa nagapangtubos nga misyon sang Manluluwas: 2 Nefi 2:6; Alma 7:7–13; 11:40; kag Helaman 5:9; 14:16–17. Ano ang ginainspirar sa imo nga imo himuon para ipakita sa Iya ang imo kapasalamatan?
Litrato
seminary icon
Ang Libro ni Mormon nagapamatuod kay Jesucristo.
Ang “Isa pa ka Katipan nahanungod kay Jesucristo” labaw pa sangsa pangaduha nga tig-ulo sang Libro ni Mormon; isa ini ka pahayag sang iya diosnon nga katuyuan. Binagbinaga kon ano ang imo matun-an sa masunod nga balaan nga mga kasulatan parte sa misyon sang Libro ni Mormon nga magpamatuod parte kay Cristo: 1 Nefi 6:4; 19:18; kag 2 Nefi 25:23, 26; 33:4, 10.
Pamensara nga isulat sa isa ka journal kon paano ang pagtuon sang Libro ni Mormon sini nga tuig nagpalapit pa gid sa imo kay Cristo. Ang masunod nga mga tanda mahimo nga makabulig:
“Ang akon natun-an ukon nabatyagan parte sa Manluluwas sini nga tuig amo ang …”
“Ang pagtuon parte sa Manluluwas sa Libro ni Mormon nagliwat sang pamaagi nga akon …”
“Ang akon paborito nga tawo [ukon istorya] sa Libro ni Mormon nagtudlo sa akon nga ang Manluluwas …”
Basi may tawo nga mabugayan sa paghibalo sang imo nabatyagan parte sa Libro ni Mormon. Paano mo ayhan iistorya ang imo mga eksperiyensya kag testimonya? Basi mangin inspirado ka sa paghatag sang kopya bilang regalo sa Paskwa. Ang app nga Libro ni Mormon nagapahapos sang pag-share.
Si Bishop Gérald Caussé naglista sang pila ka kamatuoran halin sa Libro ni Mormon parte kay Jesucristo (tan-awa sa “Isa Ka Buhi nga Saksi sang Buhi nga Cristo,” Liahona, Mayo 2020, 39–40). Pwede mo tan-awon ang iya listahan kag binagbinagon kon paano ang tagsa sining mga kamatuoran nagbag-o—ukon magabag-o—sang imo kabuhi.
Si Jesucristo amo ang regalo sang Amay nga Langitnon sa akon.
Agud buligan ang imo pamilya nga magtutok sa regalo nga ginhatag sang Amay nga Langitnon sa aton paagi sa pagpadala sang Iya Anak, pwede mo putson ang litrato ni Jesucristo nga daw regalo sa Paskwa. Pwede ninyo hambalan sang imo kabataan ang paborito ninyo nga mga regalo sa Paskwa nga nabaton na ukon gusto mabaton. Dayon pwede nila buksan ang ginputos nga litrato ni Cristo kag hambalan kon paano Sia nangin malahalon nga regalo para sa aton.
Si Jesucristo natawo agud mangin akon Manluluwas.
Basi masadyahan ang imo mga kabataan sa pag-istorya sa imo sang ila nahibal-an parte sa pagkabun-ag ni Jesus. Ang Libro sang mga Larawan nga Pang-Ebanghelyo may pila ka mga litrato nga makabulig sa ila sa pagsugid sang istorya (tan-awa sa mga num. 28, 29, 30, 31). Pwede man kamo magtan-aw sang mga litrato nga nagapakita sang kabuhi kag nagabayad-sala nga sakripisyo sang Manluluwas. Ngaa ginpadala sang Amay nga Langitnon si Jesucristo?
Basi masadyahan man ang imo mga kabataan sa pagdrowing sang ila kaugalingon nga mga larawan sang pagkabun-ag kag pag-alagad ni Jesus. Basi pwede nila drowingon ang ginlaragway sa 1 Nefi 11:13–23; Mosias 3:5–10; Helaman 14:1–13; kag 3 Nefi 1:4–22. Dayon pwede nila iistorya sa imo ang ginatudlo sang ila mga gindrowing parte kay Jesucristo.
Para ipatalupangod nga ang Biblia kag Libro ni Mormon pareho nga nagatudlo parte sa pagkabun-ag ni Jesus, pwede mo ilista ang mga hitabo nga ginlaragway sa Lucas 2:4–14; Mateo 2:1–2; kag 3 Nefi 1:15, 19–21. Dayon ang imo kabataan pwede magpangita sa sining balaan nga mga kasulatan para hibaluon kon ano nga mga hitabo ang natabo sa Betlehem, sa kadutaan sang Amerika, ukon sa pareho nga mga lugar. Ngaa nagapasalamat kita nga may Libro ni Mormon bilang ikaduha nga saksi sang pagkabun-ag ni Jesus?
Nanamian ang mga kabataan sang mga istorya. Ang mga istorya isa sa pinakamaayo nga mga paagi para buligan ang mga kabataan nga magtuon kag madumduman ang mga kamatuoran. Samtang ginasaysay mo ang istorya sang pagkabun-ag ni Jesus, pamensara man nga isugid ang mga istorya sa imo kabuhi nga nakabulig pabakod sang imo pagtuo sa Manluluwas.
Ang Libro ni Mormon nagapamatuod kay Jesucristo.
Sa pagtapos ninyo sang imo kabataan sang inyo pagtuon sang Libro ni Mormon sini nga tuig, basi maayo ini nga tion para iistorya sa isa kag isa ang inyo paborito nga mga istorya ukon mga dinalan halin sa sining sagrado nga libro. Ang pagtan-aw sang pila ka mga litrato sa Dali, Magsunod sa Akon makabulig sa imo kabataan nga madumduman ang ila gintun-an sini nga tuig. Buligi sila nga makita kon ano ang ginatudlo sining mga istorya sa aton parte kay Jesucristo.
Pwede mo man hatagan ang imo kabataan sang litrato ni Jesus, ukon padrowingon sila sang ila. Hagara sila nga ipataas ang ila mga gindrowing tagsa nga mabatian nila ang ngalan ni Cristo samtang imo ginabasa ang 2 Nefi 25:23, 26. Magpamatuod nga ang Libro ni Mormon ginsulat para buligan kita sa “pagpati kay Cristo” (2 Nefi 25:23).
Para sa dugang nga mga ideya, tan-awa sa isyu sang Abyan nga magasin sini nga bulan.
