Ibukiia Kaaro—Katauraoaia Ami Ataei nakon Maiuakinan ana Kawai ni Berita te Atua

E reireiniira Nibwaai bwa “te mataroa are [ti] na rin iai” ni kawain te berita ae tabu “bon te rairannano ma te bwabetito inanon te ran” (2 Nibwaai 31:17). Am mwakuri ni buokiia natim ni katauraoia ibukin te bwabetito ao te kamatoa e kona ni kakorakoraia inanon touan te kawai anne. Mwakuri aikai e moanaki man te reirei iaon taekan te onimaki iroun Iesu Kristo ao te rairannano. N ikotaki ma te reirei iaon arora ni kaboui ara berita n ara bwabetito man kanakin te toa ni katoa wiiki.

Aikai bwaai n ibuobuoki riki tabeua aika a kona ni buokiko: 2 Nibwaai 31; te rongorongo ae onoti n te Rao maekatiin ibukin te bwabetito; Gospel Topics, “Baptism,” Gospel Library.

• Ngkana iai bwaai aika ko a tia n rinanona aika a tia ni kakorakoraa am onimaki iroun Tamam are i Karawa ao Iesu Kristo, ao tibwauaia ma natim. Buokia ni kaotaia bwa te onimaki bon te bwai ae kona n rikirake ni korakora ao ni korakora riki inanon te maiu. Tera tabeua bwaai aika e kona am ataei ni karaoi ni karikirakea korakoran riki ana onimaki iroun Kristo imwain ae bwabetitoaki?

• Ngkana e karaoi rinerine am ataei aika bure, taetae ma ngaia rinanon kukureim iaon taekan te bwaintangira n te rairannano. Ao ngkana ko karaoa te rinerine ae bure, tibwaua te kimwareirei are reke ngke ko raira nanom. Kaotia bwa e bon koaua ae a tia ni korakai ao ni mate Iesu Kristo ibukin ara bure, ao E a tia naba n anganiira te mwaaka ni bitaki. Ngkana e ukoukora kabwaraan ana bure natim, kabwara raoi ao te kukurei ae bati.

• Tuanga am ataei rongorongon am bwabetitio. Kaoti tamnei ao tibwauai am ururing. Taekina aron am namakin, e kanga am berita ake ko karaoi inanon am bwabetito ni buokiko n ataa raoi Iesu Kristo, ao n teimatoa ni uota te kakabwaia inanon maium. Kaunga am ataei bwa e na titiraki.

• Ngkana iai te bwabetito n am utu ke n am uoote, kaira am ataei bwa e na noria. Maoroakinna ma ngaia aron te bwai ae kam noria ao n namakinna. Ngkana e riai, taetae nakon te aomata are e bwabetitoaki ao titirakinna titiraki n aron aikai: “Ko kanga n rineia bwa ko na karaoa te babaire aei? Ko kanga ni katauraoiko?”

• Ngkana ko noora natim ni karaoa te bwai are e a tia ni berita bwa e na karaoia, ao kaota am tangira nakoina. Taekinna nakoina ae kawakinan motinnano e buokiira ni katauraoira ni kawakin ara berita aika ti karaoi ngke ti bwabetitoaki. Tera ara berita ae ti karaoia nakon te Atua ngke ti bwabetitoaki? Tera ae E berita iai nakoira? (taraa Motiaea 18:8–10, 13).

• Ngkana iai te bwai ae kakawaki ao n tabu ae kam a tia ni kaai n rinanona ngkoe ma natim (n aron n tain te taromauri, ke inanon ami tai ni wareki booki aika tabu, ke ni buoka temanna), tuanga natim aron am namakin ao nanom n tamnei aika iai iroum. Kaoa natim bwa e na tibwaua ana namakin. Tarai kawai aika kakaokoro ae kona n taetae iai te Tamnei nakoia aomata, n raonaki ma kawai ae E taetae raoi iai ma ngkoe. Buoka am ataei n uring taai ake e namakina iai ana wirikiriki te Tamnei ae Raoiroi.

• Kaai ni matakuakin tabeua tamnei n te witeo inanon te Gospel Library ae atuunaki “Hear Him!” Uaia ni marooro iaon aia kawai ana toro te Uea aika kakaokoro n ongora Bwanaana. Kaoa am ataei bwa e na korea te tamnei ke ni karaoa te witeo iaon arona n ongo bwanaan te Tia Kamaiu.

• Marooroakin kakabwaia ake a tia n reke iroum ngke ko riki bwa kaain Ana Ekaretia Iesu Kristo ibukiia Aika Itiaki ni Boong aika Kaitira. Ko kanga ni kaaniaki riki ma Tamam are i Karawa ao Iesu Kristo ngke ko a tia ni beku ibukiia tabeman ao tabeman a tia ni beku ibukim? Buoka am ataei n iangoi aanga aika e na kona ni beku ao ni kakorakoraia iai tabeman ngkai ngaia kaain te Ekaretia.

• Karaoa te toa bwa te tai ae tabu ao ni kakukurei inanon am utu. Buoka am ataei ni karekei aanga aika e na kona ni kabanea riki iai ana iango iaon Iesu Kristo n tain te toa. Ti na kangaa ni kaotia bwa e tabu te toa nakoira?

• A mwaiti kaongora n te Rao maekatiin n ikotaki ma rongorongo, karaki, ao waaki ni kakukurei aika e na buokiia ataei ni katauraoiia ibukin te bwabetito ao te kamatoa. Angan natim ana tai bwa e na wareki tabeua ni kukurei iai ma ngkoe. (Taraa naba “Preparing for Baptism” n aia mwakoro ataei n te Gospel Library.)

  Tamnei

  e bwabetitoaki te ataeinimwaane

Te nakoanibonga bon te kariaiakaki ao mwaakan te Atua are ngaia ae E kakabwaiaiia iai Natina. Ana nakoanibonga te Atua e mena iaon te aba n te bong aei inanon Ana Ekaretia Iesu Kristo ibukiia Aika Itiaki ni Boong aika Kaitira. Ni kabane kaain te Ekaretia ake a kawakin aia berita a kakabwaiaaki ma mwaakan te nakoanibonga mairoun te Atua inanon mweengaia ni kakorakoraia i bon irouia ao aia utu (taraa Aeniboki ni Kabuta: Te Beku n Ana Ekaretia Iesu Kristo ibukiia Aika Itiaki ni Boong aika Kaitira, 3.5, Gospel Library). Te mwaaka aei e na buokiia membwa ni karaoa ana mwakuri te Atua ni kamaiu ao ibukin karietataakia n aron tein maiuia ao aia utu (taraa Aeniboki ni Kabuta,2.2).

Ti karekei otenanti man ana kariaia te nakoanibonga. Ngkana mwaane ao aine a karaoi tibwangaia inanon te Ekaretia, a karaoia man ana kariaia te nakoanibonga, iaan aia kaetieti ake iai irouia kiingin te nakoanibonga. Natin Tamara are i Karawa ni kabane—Natina mwaane ao Natina aine—a na kakabwaiaaki inanon rikiraken ataakin te nakoanibonga.

N reiakina riki taekan te nakoanibonga, taraa Russell M. Nelson, “Kakabwaia n Tamnei,” Riaona, Nob. 2019, 76–79; Russell M. Nelson, “The Price of Priesthood Power,” Riaona, Meei 2016, 66–69; “Priesthood Principles,” mwakoro 3 inanon Aeniboki ni Kabuta.

• Karaoi otenanti n te nakoanibonga bwa teuana mwakoron maiun am utu ae ko na kateimatoa. Te katooto, buoka am ataei ni katauraoia n tamneina ibukin te toa ni katoa wiiki. Kaunga am ataei bwa e na ukoukori kakabwaia n te nakoanibonga ngkana e aoraki ke e kainnanoa te rau ke tao kairana. Karaoia bwa anuam n atai kawai ae kakabwaia iai am utu te Uea rinanon mwaakan te nakoanibonga.

• Ngkana kam kaai ni wareki booki aika tabu, tarai aanga ake e na reke iai maroroakinan aron te Atua ni kakabwaiaia aomata rinanon Mwaakana. Tibwauai am taneiai ngke e a tia te Atua ni kakabwaiako rinanon Ana nakoanibonga. Ibukin katooto n taian kakabwaia aika ti karekei mairoun te Atua rinanon te nakoanibonga, taraa Aeniboki ni Kabuta, 3.2,3.5.

• Reirei ana karinan ni kariaiakaki n te nakoanibonga temanna man am utu. (Ake iai irouia te Nakoanibonga ae te Merekitereka a kona ni karekei katotoon aia karinan ni kariaiakaki man kanakoan te imeeri nakon LineofAuthority@ChurchofJesusChrist.org; taraa naba “Request a Priesthood Line of Authority” inanon te Tienta n Ibuobuoki iaon ChurchofJesusChrist.org.) Maroroakinna bwa bukin tera e kakawaki ataakin ae e roko te kariaiakaki n te nakoanibonga mai Iroun Iesu Kristo. Bukin tera E tibwauaia ma ngaira?

• Reireina am ataei bwa imwiin te bwabetito, ao e kona ni karekea mwaakan te nakoanibonga man kawakinan te berita n te bwabetito. Kaai n rinanon ana rongorongo Beretitenti Russell M. Nelson “Spiritual Treasures” (Riaona, Nob. 2019, 76–79). Tuanga am ataei bwa a kanga otenanti n te nakoanibonga ni uota mwaakan te Atua nakon maium. Ibukin ataakin aanga tabeua aika ti kakabwaiaaki iai man ni mwaakan te nakoanibonga, taraa Aeniboki ni Kabuta,3.5.

• Maroroakina te titiraki “E kanga aron taraakin ana toro te Uea?” Bootaki ni wareka Reirei ao Berita aika Tabu 121:36–42, ao kakaei rekeia. Ngkana arona bwa ko nooria bwa am ataei (ke tabeman riki) a karaoi kanoan moan tua ke bwaai ake a mwaneweaki inanon kiibu aikai, ao katerei bwa ana ataia.

• Ngkana arona bwa e kabonganaa te kiing natim ni kauka te mataroa ke ni kamaiua te kaa, anaa te tai teutana ni kabotauii kiing akanne ma kiingin te nakoanibonga ake irouia ara mataniwii. (Ibukin kabwarabwaraan kiing n te nakoanibonga, taraa Aeniboki ni Kabuta, 3.4.1). Tera ae e kona kingin te nakoanibonga ni “kauki” ke ni “kamaiuii” ibukira? Taraa naba Gary E. Stevenson, “A Ngaa Kiing ao te kariaia n te Nakoanibonga?,” Riaona, Meei 2016, 29–32; “Where are the Keys?” (witeo), Gospel Library.

• Ngkana ko kamatoaaki nakon te wewete anne, ao kaira natim, ngkana e kona. Kariaia natim bwa e na noora arom ni kakoroa nanon te wewete anne. Ko kona naba ni kakaei aanga aika e na kona ni buokiko iai natim. Kabwarabaraa aron am namakin ni mwaakan te Uea inanon te wewete anne.

Tembora bon mwakoron ana babaire Tamara are i Karawa ibukiia Natina. Inanon tembora, ao ti karaoi berita aika tabu ma Tamara are i Karawa rinanon otenanti aika tabu, ni kabane ake a bane ni kaeineti nakon Iesu Kristo. E a tia Tamara are i Karawa ni katauraoa te kawai ibukiia Natina ni kabane bwa a na karaoi berita aika tabu ao n irii karaoan otenanti, n ikotaki ma naake aki reke irouia n te maiu aei. Ni moan te ririki ao natim e a koro 12 ana ririki, ikanne are e a kona iai ni bwabetitoaki ao ni kamatoaaki inanon te tembora ibukiia ana bakatibu ake a tia ni mate.

• Kamwaita nanakom nakon te tembora n aron ae ko kona. Marooro ma natim ibukin kawaran te tembora ao arona ni kakorakoraa iai aron am reitaki ma Tamara are i Karawa ao Iesu Kristo.

• Uaia n rinanoi ao maroroakin titiraki ake a irekereke ma te tembora . Marooro ma natim iaon bwaai ake a na karaoaki n tain te intawiu ibukin karekean te kariaia n rin n te tembora. Tibwauaia mangaia bukina ngkai e kakawaki karekean te kariaia n rin n te tembora iroum.

• Ikotaki wareka Maraki 4:6. Maroroakinna bwa e kanga nanom n rairaki nakoia am bakatibu. Karekea riki rongorongoia am bakatibu inanon ami kakaei iaon rongorongoia am utu n te FamilySearch.org. Kakaeia am bakatibu ake a kainanoa bwabetitoakiia ao kamatoakiia. Te tia rabakau ibukin rongorongon te utu n te tembora n am uoote e kona n ibuobuoki.

• Kaai n rinanoi tabeua kanoan booki ma reirei ake a maneweaki n te mwakoro are taekinaki iai te “Tembora” n aia mwakoro ataei n te Gospel Library. (Taraa naba “Preparing Your Child for Temple Baptisms and Confirmations” n te ChurchofJesusChrist.org.)

E kona n riki ana kakabwaia te tamanuea bwa kairakira, te mweeraoi, ao te kairiiri. E kaota ana babaire ae onoti Tamara are i Karawa ibukira ao ni kaotaira bwa ti na ataia raoi bwa antai ngaira ao tera bukin rokora ikai. Reireina natim kakawakin karekean te kakabwaia n te tamanuea aei bwa e aonga ni buokia ni katauraoia imwain karekean kakabwaia n te tamanuea.

N reiakina ae mwaiti riki, taraa Gospel Topics, “Ana Kakabwaia te Tamanuea,” Gospel Library.

• Tibwauaa am taneiai ma natim ngke ko karekea ana kakabwaia te tamanuea. Ko kona n tibwauai bwaai n arom ni katauraoiko ni karekea, e kanga n tia ni buokiko ni kaan riki ma te Atua, imwiin karekeana iroum, ao arom ni kabongana te kakabwaia inanon maium. Ko kona naba ni kaoa natim bwa e na marooro ma kaain te utu ake tabeman ake a tia ni karekea ana kakabwaia te tamanuea.

• Anaa tabeua te tai ni bootaki n rinanoi tabeua kanoan taian reirei inanon Gospel Topics, “Ana Kakabwaia te Tamanuea.” N reiakina aron karekean ana kakabwaia te tamanuea, taraa te Aeniboki ni Kabuta,18.17.

• Ngkana iai am bakatibu aika a tia ni karekea ana kakabwaia te tamanuea ao, e na kona n buokiko riki ni kaira am iango ngkana ko warekia ma natim. Ngkana ko kan karekea mwiin aia kakabwaia am ikawai ake a tia ni mate ao, rinnako n te webutiaite ae ChurchofJesusChrist.org, kotea te kanikina ae mena ietan am tikuriin man te angaatai, ao rinea “Ana Kakabwaia te Tamanuea.”

• Ngkana e a tia am ataei ni karekea ana kakabwaia te tamanuea, ao kaoiia kaain am utu ake raomi n te tai anne bwa a na tibwauai aia namakin ma am ataei anne.

E tangiriira te Atua bwa ti na karekea te entaumente, ke ni kakabwaiaia, ni kabane Natina ma “te mwaaka mai ieta” (Reirei ao Berita aika Tabu 95:8). Ti nakon te tembora ibukin karekean ara entaumente tii n te taina, ma berita aika tabu aika ti karaoi ma te Atua ao te mwaaka n tamnei are E anganiira bwa kanoan te entaumente anne e kona n anganiira te kakabwaia ni katoa bongin maiura.

• Kaota tamnein te tembora inanon mweengam. Tuanga natim aron am namakin ngke ko nako n te tembora. Kataia ni kakaotia inanon am marooro aron tangirakin te Uea ao Ana auti ao berita aika tabu ake ko a tia ni karaoi inanona.

• Kaai n rinnako ni mamataku inanon te temples.ChurchofJesusChrist.org. Uaia ni wareka taian rongorongo n aekan “About the Temple Endowment” ao “Prepare for the House of the Lord.” Angan natim bwa e na titiraki iaon rongorongon te tembora. Ibukin kairakim iaon rongorongo ake ko kona ni maroroakin i tinanikun te tembora ao, wareka ana rongorongo Unimwaane David A. Bednar “Prepared to Obtain Every Needful Thing” (Ensign ke Riaona, Meei 2019, 101–4; taraa riki te mwakoro ae atuunaki n “Reiakinan ao te Katauraoi nakon te Tembora ae Boto n te Mweenga man Boutokaaki n te Ekaretia”).

• Ngkana ngkoe ao natim kam irii ke ni kakoaua ibukin karaoan otenanti ake tabeua (n aron te toa ke te kakabwaia ni katoki aoraki), kataia maroroakina te kanikina are irekereke ma te otenanti anne. Tera ae a tei ibukina kanikinaa aikanne? A kanga ni kaota koauan Iesu Kristo? Aio e kona ni buoka am ataei ni katauraoa nanona n iangoi nanon kanikina aika tei ibukin otenanti n te tembora aikai, are e kaota naba koauan Iesu Kristo.

• Buoka natim bwa e na ataa aron kawakinakin te berita ae tabu ibukin te bwabetito are kabwarabwaraki n Motiaea 18:8–10, 13. Buoka naba am ataei bwa e na ataia ae e kakabwaiaaki iroun te Uea. Karikirakea ana konabwai natim ni kateimatoaa kawakinan berita aika tabu ake e karaoi.

• Kabatia am tai ni marooro raoi ibukin am berita aika tabu ake ko karaoi inanon te tembora ao aia ibuobuoki ni kaira am rinerine ao ni kaniiko riki ma Iesu Kristo. Ko kona ni kabongana te Aeniboki ni Kabuta, 27.2, n rinanoi berita aika tabu ake ti karaoi inanon te tembora.

E reireiniira Unimwaane David A. Bednar: “Te bwai ae rangi ni kakawaki ae ko na riai ni karaoia bwa katauraoam imwaain am beku bon arom n riki bwa te mitinare imwain ae ko nakon am mition. … Te bwai ae tina ataia bwa tiaki te nako ni mitinare; ma arora, n riki bwa mitinare ao ni karaoa kanoana inanon maiura ma nanora, ara onimaki, ara iango, ao korakorara. … Ko katauraoiko ibukin te mwakuri ni mitinare ni uaa tokin maium” (“Becoming a Missionary,” Riaona, Nob. 2005, 45–46). Mwakuri ake e a tia n rinanona natim ngke e riki bwa te mitinare e na anganna te kakabwaia ae akea tokina, ma tiaki ti inanon ana tai are kabaeaki iai n ana mwakuri ni mitinare.

N reiakina riki ae bati, taraa Russell M. Nelson, “Tataekinan te Euangkerio n Rau,” Riaona, Meei 2022, 6–7; M. Russell Ballard, “I Kakabwaiaaki Man te Mwakuri ni Mitinare,” Riaona, Meei 2022, 8–10; Missionary Preparation: Adjusting to Missionary Life, Gospel Library.

• Karaoan banna ibukin tibwauakin te euangkerio n aanga aika ti taneiai iai. Tatauraoi n taainako nakon tibwauakin am namakin ma tabeman ibukin Tamam are i Karawa ao ara Tia Kamaiu ao kakabwaia ake ko a tia ni karekei ngke ko kaaina Ana Ekaretia. Kaoiia te koraki bwa a na raoniia am utu n te Ekaretia ao n ami waaki ni kakukurei inanon ami utu.

• Kakaei aanga aika e na kona n reke angaia kaain am utu ni kaitiboaki iai ma mitinare. Kaoiia bwa a na reireiniia raoraom, ao kariaia rokoia bwa a na reireiniia kaain mweengam. Tuangiia mitinare taekan waaki ake a karekea ao e kanga ni buokia te mwakuri ni mitinare ni kaniia nakon Iesu Kristo. Titirakiniia naba tera ae a karaoia (ke tera ae a tangiria bwa a kaman tia ni karaoia) ibukin katauraoakiia n riki bwa mitinare.

• Ngkana ko karaoa te mwakuri ni mitinare, marooroakin n taainako bwaai ake ko aitara mangaai. Ke kaoiia raoraom ke kaain am utu ake a tia ni karaoa te mwakuri ni mitinare bwa a na karakina aroia. Ko kona naba ni maroroakina arom n tibwauaa te euangkerio ma tabeman inanon maium. Buoka am ataei bwa e na kona n iangoi aanga ake e kona n tibwauaa iai te euangkerio.

• Angan am ataei ana tai n reireiniia ami utu tuua nako n te euangkerio. E kona naba am ataei ni kataneiaa n tibwauaa ana koaua ma tabeman aomata. Tao te katooto, ko kona ni maroroakin titiraki n aron “Ti na kangaa n taekina rongorongon Ana Boki Moomon nakon te aomata ae e tuai man ongoongo taekana mai imwaaina?” ke “Ti na kangaa ni kabwarabwaraa kainanoakin te Tia Kamaiu nakon temanna ae tiaki te Kiritian?”

• Reireina am ataei bwa e na kona n taetae nakoia aomata n akea ana kangaanga. Tera aanga aika tamaroa aika ko kona ni moana iai am marooro? Kaungaa natim bwa e na rabakau n ongoraa nakon te bwai ae a taekinna tabeman, kataia ota bwa tera are e mena inanoia, ao tibwauaa koauan te euangkerio are a na kona ni kakabwaiai maiuiia.

• Kakaei aanga aika e na kona am ataei n reiakin aron katei ma onimaki ake tabeua. Buokia bwa e aonga ni kinai ao ni karinei tamaroan ao koauan moan tua n aia onimaki ake tabeman.

Inanon te tembora, ao a kona ni mareaki taanga ibukin te tai ae akea tokina. E karaoaki aei n te otenanti ae atongaki bwa te kabaebae. E ngae ngke e tuai n roro natim ni karaoa te otenanti aei, ma arom n uaia ni kaai ni karaoi mwakuri inanon ririki aika imwaaimi e na kona ni katauraoa natim ibukin karekean te kakabwaia aei.

• Bootaki ni wareka “Te Utu: Te Katanoata nakon te Aonaaba” n te Gospel Library. Tera ae e reiakinai n te katanoata aei iaon rongorongon te maiu ni kukurei inanon te utu ao te maiu n taanga ae nakoraoi? Rineia ma natim, teuana mai ibuakon moan tua ake a maneweaki inanon te katanoata anne. Ko kona naba ni kakaei rongorongo inanon booki aika tabu ake a kaeineti nakon te moan tua anne inanon te Guide to the Scriptures. Ko kona naba ni katei am kouru inanon am utu ake a na kona ni kaeineti ma te moan tua anne. Ngkana ko mwakurii am kouru, bootaki ni maroroakina korakoran te moan tua anne ae kona n anganiko inanon te maiu n utu.

• Warekia ma natim, ana rongorongo Beretitenti Dieter F. Uchtdorf “In Praise of Those Who Save” (Ensign ke Riaona, Meei 2016, 77–80). Ngkana ko roko n te mwakoro ae atuunaki n “A Society of Disposables,” ao ko kona n tarai bwain mweengam aika a kona ni bane taia ao aika aki. Maroroakina aron kawakinan bwaai n aron teia aika kakaokoro bwa aonga n tei maan. Tera ae e tuangiia aei iaon arora are ti riai ni karaoi ibukin kawakinan ara mare ao ara reitaki inanon ara utu? Tera riki ae ti reiakinna man ana rongorongo Beretitenti Uchtdorf iaon aron ana ibuobuoki te Tia Kamaiu ni kakorakorai maiura n taanga ao ara utu?

• Ngkana ko a tia n iein, ao kataia mamarooro ma natim iaon bwaai ake ko namakin bwa a nakoraoi inanon am tai ni maiu n taanga, bwaai ake ko reiakin, ao am anga ni kataia ni kanakoraoi riki. Ngkana ko a tia ni kabaeaki ma buum inanon te tembora, ao kaotia nakon natim rinanon mwakuri ni katooto ake ko karaoi bwa e aonga n teimatoa am berita ma buum ao te Uea. Kaotia nakon natim bwa ko teimatoa ni katea Tamam are i Karawa ao am Tia Kamaiu bwa boton aan ami reitaki ao Aroia ni buokiko.

• Ngkana e kainnanoaki karaoan ana babaire te utu, karaoi bootaki ao marooro n te utu. Kakoauaa raoi bwa ana riai n ongoraeaki aia iango kaain te utu ni kabane ao ni karauaki raoi n rinanoaki. Kabonganai marooro aikai bwa te tai ni kanakoraoa aron te marooro n reitaki ao te itangitangiri inanon te reitaki n utu, e ngae ngkana iai tabeman aika a kakaokoro tein aia taratara.

• Ngkana iai te aki nanoraoi ke te unraa inanon te utu, ao kaota te taotaona n nano ao te nanoanga. Buoka natim bwa e na noora aron kanakoraoan te unraa rinanon ana kawai Kristo are e na kona ni katauraoa teuanne ke neienne ibukin te mare ae kakukurei. Bootaki ni wareka Reirei ao Berita aika Tabu 121:41–42, ao maroroakina aron kairan taian moan tua aikai inanon te maiu n taanga.