Ibukin te Moanrinan—Katauraoaia Ataei nakon Maiuakinan ana Kawai ni Berita te Atua

Anganiia ataei tamnei aika a tei ibukin te onimaki iroun Iesu Kristo, te rairannano, te bwabetito, ao te kamatoa (taraa Gospel Art Book, nambwa. 1, 111, 103, ao 105). Warekia ke taekinna ma ataei n taekan te kaaua n onimaki, ao tuangiia bwa a na tabekirake aia tamnei ngkana e taekinaki te tua ke te otenanti anne. Buokiia ataei ni kaotaia bwa a kanga tuua ma otenanti aikai n buokiira n riki n ai aron Tamaia are i Karawa ao Iesu Kristo.

Ko na kanga ni buokiia ataei ni kaotaia bwa te onimaki, te rairanano, te bwabetito, ao te kamatoa bon tiaki bwaai aika riki n tii teuana te tai ma a bon karika naba rikiraken tamneira rinanon maiura? Te katooto, ko kona n kaota nakoia tamnein te koraa ke te ati ao te aroka ae bubura (ke korei tamneia iaon te burakibooti). Buokiia n iangoi bwaai ake a buoka rikiraken te ati aio ao n riki bwa te aroka ae bubura, n aron te ran, te tano ke te bon, ao te riringa. Buokiia bwa a na ataia ae titebo bwaai aikai ma bwaai ae ti karaoi bwa ti aonga n kaaniaki iai ma te Atua rinanon maiura—karikirakea ara onimaki iroun Iesu Kristo, rairannano ni katoa bong, maiuakinan ara berita ngke ti bwabetitoaki, ao kakauongo nakon te Tamnei ae Raoiroi.

Tibwauaia ma ataei karakinan te firecracker (rebwetaua man te ai) man ana rongorongo Elder Dale G. Renlund “How Can Repenting Help Me Feel Happy?” (Te Rao, Ritembwa 2017, 12–13, ke Riaona, Ritembwa 2017, 70–71; taraa naba te witeo “Repentance: A Joyful Choice” [Gospel Library]).

N taai tabetai inanon tain te karaki, kaoia ataei bwa a na iangoia bwa aekara ana namakin Elder Renlund. Bukin tera ti namakina te kimwareirei ngkana ti raira nanora? Tibwauaia ma ataei te kimwareirei ao te tangira ae ko namakinna ngke ko butiia Tamam are i Karawa bwa e na kabwarai am bure.

Kaota tamnein ana bwabetito te tia Kamaiu ao ana bwabetito temanna (ke noora Gospel Art Book, nambwa. 35 ke nambwa 103 ke nambwa 104). Tuangiia ataei bwa a na tibwaia bwa tera ae kaokoro ao n titebo imarenan tamnei aika uoua aikai. Uaia ni wareka Mataio 3:13–17 ke “Mwakoro 10: E Bwabetitoaki Iesu” inanon te Karaki n te Nu Tetemanti, 26–29, ke mataku n te witeo n te Gospel Library.

Anga te tai nakoia ataei bwa a na kotei bwaai n te tamnei ake a atongaki n te wareware ke te witeo. Tuangiia ataei taekan am tangira ibukin te Tia Kamaiu ao nanom ni kan Iriiria.

Ongora nakon ke anenea te anene ae taekan te bwabetito, n aron “When Jesus Christ Was Baptized” (Aia Boki n Anene Ataei,, 102). Tera ae ti reiakinna iaon te bwabetito man te anene aei? Wareka 2 Nibwaai 31: 9–10, ao kaoiia ataei bwa a na ongora bwa bukin tera ngke e bwabetitoaki Iesu Kristo. Kaoiia bwa a na korei tamneia n te bong are a bwabetitoaki iai.

Kabwarabwara bwa te berita ae tabu bon te berita are i marenan temanna ao Tamara are i Karawa. Ngkai ti kabanea ara konaa n kawakin ara berita nakon te Atua, te Atua e berita bwa e na kakabwaiaira. Koroia iaon te burakibooti Au Berita nakon te Atua ao Ana Berita te Atua Nakoiu. Uaia n wareka Motiaea 18:10, 13 ao Reirei ma Berita aika Tabu 20:37, ao buokiia ataei n koroi berita ake a kona n kunei iaan atuu n reirei ake a tau ni mena i aana (taraa naba Dallin H. Oaks, “Your Baptism Covenant,” Rao, Beberuare 2021, 2–3). Tibwaia bwa e kanga Tamara are i Karawa n kakabwaiako ngkai ko keiaki n kawakin am berita ngke ko bwabetitoaki.

Kaotii nakoia ataei tamnein bwaai ake e karaoi Iesu ngke E mena iaon te aba (ibukin katooto tabeua, taraa te Gospel Art Book, nambwa. 33–49). Tuangiia ataei bwa a na kabwarabwara bwa tera ae e karaoia Iesu n tamnei akanne. Wareka Motiaea 18:8–10, 13, ao kaoiia ataei bwa a na kakauongo nakon bwaai ake a beritani bwa a na karaoi ngkana a bwabetitoaki (taraa naba “The Baptism Covenant,” Rao, Beberuare 2019, 7; Riaona, Beberuare. 2019, F3). A na kanga berita aikai n buoka aron ara mwakuri ni katoa bong? Kaoiia ataei bwa a na bon korei tamneia ngke a buoka temanna n aron are e karaoia Iesu. Ke ko kona n karaoa aia badge ataei ae a kona ni bwainna ma aran te Tia Kamaiu iaona.

Tamnei

e bwabetitoaki te ataeinimwaane

Kaoa temanna ae e a tibwa tia ni bwabetitoaki ao n kamatoaaki nakon te kiraati bwa e na tibwauaia bwa tera arona ngke a kamatoaaki. Tera nanon ae e a riki bwa te membwa n Ana Ekaretia Iesu Kristo ibukiia Aika Itiaki ni Boong aika Kaitira nakon te aomata aio? Buokiia ataei bwa a na iangoi kawai ake a na kona n kawakinii iai aia berita aika tabu ngke a bwabetitoaki ao n riki bwa membwa n te Ekaretia (n aron karaoan te mwakuri n ibuobuoki nakoia tabeman, kaoaia tabeman bwa a na reiakina taekan Iesu, karaoan te tataro n tain te bootaki, ao a mwaiti riki). Tibwauaia bwa a kanga karaoan bwaai aikai n buokiko n namakina te kukurei ni kaainakin ana Ekaretia Kristo.

Kaota tamneia aomata ake a mena n Ranin Moomon (taraa Gospel Art Book, nambwa. 76), ao tuangiia ataei bwa ana kabwarabwara te bwai ae a kona n nooria n te tamnei. Karakina rongorongon Aramwa ao ana aomata ake a bwabetitoaki ikekei (taraa Motiaea 18:1–17; “Mwakoro 15: Alma Teaches and Baptizes,” Book of Mormon Stories, 43–44, ke tamneina n te witeo n te Gospel Library).

Manga taraa Motiaea 18:8–9 ao kaoiia ataei bwa a na katei kaina bwa e na buokiia n uringii bwaai are a kukurei nanoia aomata ni karaoi ngkai membwa ngaiia n ana Ekaretia Kristo. Tibwaua te tai ae ko a tia n kakoauaa bwa membwa n te Ekaretia a ibuobuoki n anga aikai.

Wareka Reirei ao Berita aika Tabu 33:15, ao tuangiia ataei bwa a na kakauongo nakon te bwaintangira ae onoti are ti anganaki iroun Tamara are i Karawa ngkana ti bwabetitoaki ao n kamatoaaki. Bwa aonga n reiakina riki ae bati bwa e na kanga ni buokiia te bwai n tituaraoi ae te Tamnei ae Raoiroi, bootaki n rinanon Ioane 14:26; I-Karatia 5:22–23; 2 Nibwaai 32:5; 3 Nibwaai 27:20. Ko kona naba n rinanon te rongorongo ae “The Holy Ghost Is …” (Rao, Tuun 2019, 24–25; Liahona, Tuun 2019, F12–F13).

Imwaain te kiraati, butiia aia karo ataei bwa ana tibwauaia bwa tera kakabwaiaia ae reke bukina ngkai iai irouia ana bwaintituaraoi te Tamnei ae Raoiroi. E kanga ni buokiia? A kanga n ongo Bwanaana?

Bootaki n anenea te kuna ae taekan te Tamnei ae Raoiroi, n aron “The Holy Ghost” (Aia Boki n Anene Ataei, 105). Buokiia ataei bwa ana oota n te bwai ae a reiakinna man te anene aio bwa e na kanga n buokiira te Tamnei ae Raoiroi.

Buokiia ataei bwa ana iangoi kawai are a na kona n reitaki iai ma raraoia ae e raroanako aia tabo ni maeka, n aron korean te reta, kanakoan am imeeri, ke te taetae iaon te tareboon. Reireiniia ae Tamara are i Karawa e kona n taetae nakoira rinanon te Tamnei are Raoiroi. Kabonganaa ana marooro Beretitenti Dallin H. Oaks “How Does Heavenly Father Speak to Us?, ni buokiia ataei n ataia ae aanga ake e kona iai n taetae te Tamnei ae Raoiroi bon te taetae nakon ara iango ao nanora (Rao, Maati 2020, 2–3; Riaona, Maati 2020, F2–F3).

Tibwaua am taneiai ngke ko reitaki ma te Tamnei ae Raoiroi, tao n rinanon am iango ke rinanon te namakin i nanom (taraa Reirei ao Berita aika Tabu 6:22–23; 8:2–3; taraa naba Henry B. Eyring, “Open Your Heart to the Holy Ghost,” Rao, Aokati 2019, 2–3; Riaona, Aokati 2019, F2–F3). Kaota am koaua nakoia ataei bwa te Tamnei ae Raoiroi e kona n buokiia ni kawai n aron naba aikanne.

Buokia ataei n iangoi taai are a namakina iai te tamnei—te katooto, ngkana a anenea te anene i bukin te Tia Kamaiu ke ngkana a karaoa te bwai ae tamaroa ibukiia tabemwaang. Buokiia ni kinai namakin n tamnei are e uotia te Tamnei ae Raoiroi. Bukin tera ngkai te Tamnei ae Raoiroi e anganiira namakin ae aron akanne? Buokiia ataei n iangoi baika ti riai n karaoi bwa ti aonga n ongo ana taetae te Tamnei ae Raoiroi nakoira. Marooroakina te bwai ae ko karaoia n ongo nakon te Tamnei n te aro ae e itiaki.

Kaoiia ataei bwa ana karana “Jesus Introduced the Sacrament to the Nephites” inanon Scripture Stories Coloring Book: Ana Boki Moomon (2019), 26. Tuangiia bwa ana taekina te bwai ae a iangoia aomata ake inanon te tamnei. Warekii nakoia ataei tabeua kiibu man 3 Nibwaai 18:1–12 ke “Mwakoro 45: Jesus Christ Teaches about the Sacrament and Prayer,” Book of Mormon Stories, 126–27, ke ni matakuakina te witeo iaon ChurchofJesusChrist.org. Tera ae ti kona ni karaoia bwa tina uringa Iesu Kristo n tain te toa?

Tuangiia ataei bwa ana tuangko tabeua bwaai aika a na riai n ururing bwa ana karaoia, n aron kabaean aia kau ke tebokan baia imwain ae a amwarake. Bukin tera e kakawaki uringakin bwai aikai? Wareka Moronaai 4: 3 nakoia ataei, ao kaoiia bwa ana kakauongo nakon baike ti beritan bwa tina ururingnga n tainako ngkana ti anaa te toa. Bukin tera e kakawaki bwa tina ururinga Iesu Kristo? Buokiia ataei ni kaotaia bwa e kanga te kariki ma te ran ake n te toa n buokiira n uringnga bwa tera ae e a tia n karaoia i bukira Iesu (taraa Moronaai 4:3; 5:2).

Koroia iaon te burakibooti “I berita bwa n na …” Wareki tataron te toa nakoia ataei (taraa Reirei ao Berita aika Tabu 20:77, 79). Ngkana a ongo te berita ae ti karaoia nakon te Atua, tooki teutana ao buokiia n kabwanina te tiententi iaon te burakibooti ma te berita are a ongo. Buokiia ni kaotaia bwa ngkana ti anaa te toa, ti bon karaoi naba berita ake ti karaoi ngke ti bwabetitooaki.

Tera ae nanonaki ni katoka iaom aran Iesu Kristo? Bwa ko aonga ni buokiia ataei ni kaekaa te titiraki aio, tibwauaa te katooto iaon te bwai teuana ae ti katokai arara iaona. Bukin tera ti korei arara iaon bwaai aikai? Bukin tera ngkai Iesu Kristo e tangiria ni kan katokaa Arana iaora? Iangoia bwa kona tibwauaa te kabwarabwara mai iroun Beretitenti Russell M. Nelson: “Katokaan aran te Tia Kamaiu iaora bon katanoataan ao te kakoaua nakoia tabeman—n ara mwakuri ao n ara taetae—bwa Iesu bon te Kristo” (“Aran te Ekaretia ae e Eti,” Riaona, Nobembwa 2018, 88).

Buokiia ataei bwa ana kinai kakabwaia ake a karekei ibukin te nakoanibonga. N anganiia iango tabeua, ko kona n kaota te witeo “Blessings of the Priesthood” (Gospel Library).

Iangoia ni koroi ni karinanii kakabwaia aikai iaon te burakibooti. Bukin tera ngkai a kakawaki kakabwaia aikai nakoira? Kakoaua bwa kakabwaia aikai a roko nakoira ibukin Iesu Kristo ao mwaakan Ana nakoanibonga.

Koroi atuun marooro aikai iaon te burakibooti: Mwaakan te Atua ao Mwaakan ao ana kariaiakaki te Atua anganaki mwaane iaon te aba. Tuangiia ataei bwa ana kanimii tamnei iaan te moan atuu ni marooro are e na buokiira ni kaotaira bwa e kanga te Atua n kabonganaa mwaakana ni lakabwaiaira, n aron karikan te aonaaba, kairiirara ao kawakinara, ni kaotia nakoira ae E tangiriira ao E kinaira, ao ongoraea ao ni kaekai ara tataro (taraa Gospel Art Book, nambwana.3, 68, 90, 111). Tuangiia ngkanne bwa ana kanim tamnei iaan te kauoua n atuu are e na buokiira n kaotaira bwa a kanga mwaane aika a itiaki ke n tau iaon te aba ni kabonganaa mwaakan ao ana kariaiakaki te Atua ni kakabwaiaira, n aron kakabwaiakiia aoraki, te bwabetito, te kamatoa, karaoan te toa, ao kabaeakiia utu (taraa Gospel Art Book, nambwa 46, 104, 105, 107, 120). Tibwauaia bwa bukin tera ngkai ko kakaitau ibukin te nakoanibonga ao te naan kakabwaia ake e uotii.

Teuana mai ibuakon anga ike ti karekei iai kakabwaia man mwaakan te Atua inanon maiura bon rinanon otenanti man te nakoanibonga (taraa Reirei ao Berita aika Tabu 84:20). Bwa ko aonga ni buokiia ataei bwa ana reiakina te koaua aio, ko konaa ni koroi ni karinanii kiibu aikai iaon te burakibooti: 3 Nibwaai 11:21–26, 33 (bwabetito); Moronaai 2, (kamatoa); Moronaai 4–5 (te toa). A kona ataei n tatabemaniia nako n rinea teuana mai ibuakon kibu n taeka aikai ao n kanikinaea te otenanti are e kabwarabwaraa. Kaoiia ataei bwa a na tibwaia bwa a kanga n tia ni kakabwaiaki man karekean otenanti man te nakoanibonga.

Buokiia ataei bwa ana oota ae a na karekea te mwaaka mai iroun te Atua ngkai a bwabetitoaki ao n kawakinii aia berita aika tabu inanon te bwabetito. Titirakiniia ataei bwa e na kanga te mwaaka n buokiia.

Warekia ma ataei Mareko 3:14–15, ao kaotia nakoia te tamnei n te bwaai are e riki ao n kabwarabwaraaki naba ikekei (n aron Gospel Art Book, nambwa. 38). Tuangiia ataei ngkana arona bwa a tia n noora temanna ae e katabuaki nakon te aobiti n nakoanibonga ke tao n angnaki te wewete (ke bon tuangiia ibukin taneiai ake ko a tia n karekei). E kanga n titeboo anne nakon are e karaoia te Tia Kamaiu ao Ana Abotoro? Buokiia ataei ni koroi iaon te burakibooti aobitin te nakoanibonga ke wewete ake a kona n anganaki membwa n te Ekaretia, n aron te tia reirei ke te tia kairiiri n te bootaki. Irarikin aobiti ke wewete n tatabeua nako, ko kona n koreia bwa tera te aobiti ke te wewete are iai te kariaia ni karaoia. Tuangiia ataei bwa e kanga te kamatoaaki iroun temanna iaan ana kairiiri kiing n te nakoanibonga n tia ni buokiko n karaoa am beku.

Buokiia ataei bwa ana iangoa te bwai teuana ae ko na kainanoa iai te kiing ibukina, n aron te kaa ke te mataroa. Tera ae e na rki ngkana arona bwa akea iroum te kiing? Ikotaki wareka Reirei ao Berita aika Tabu 65:2, ao kaota am koaua iaon kakawakin ae iai kiingin te nakoanibonga iaon te aonaaba. Ko konaa naba n mataku n te witeo “Where Are the Keys?” (Gospel Library) ao kakaea bwa tera ae e reiakiniira Unimwaane Stevenson iaon kiingin te nakoanibonga.

Titirakina temanna n te uoote ae iai irouna kiing bwa e na roko nakon te kiraati ao n tibwauaia ma ataei tera nanon tauakin kiingin te nakoanibonga. Kaoia bwa e na kabwarabwarai tabena. Tera mwakoron ana mwakuri te Atua ae e kairia? E kanga ni buokia te Tia Kamaiu?

Kaota teuana ke e raka riki tamnein te tembora. Tuangiia ataei bwa tera ae e karika te tembora bwa te tabo ae e onoti. Kamataata ae iaon tembora ni kabane e koreaki ae kangai: “E tabu bwa a na bwai te Uea: Ana Auti te Uea.” Tuangiia ataei bwa tera nanon “E Tabu bwa Ana Bwai te Uea.” Bukin tera ngkai e aranaki te tembora bwa Ana auti te Uea? Tera ae ti reireinaki n aei ibukin te Tembora? Ngkana iai mai buakoia ataei ae a tia n rin n te tembora, a kona n tibwauaia bwa tera aia namakin ngke a mena ikekei. Ngkana ko a tia n rin n te tembora, tibwauaia bwa ko kanga n namakina tamnein te Uea ikekei, ao maroroakinna bwa bukin tera ngkai te tembora bon te tabo ae tabu nakoim.

Ikotaki wareka Reirei ao Berita aika Tabu 97:15–17. Tuangia ataei bwa a na kakaea te bwai ae kantaningaia te Uea irouia ake a rin n Ana auti ae tabu. Bukin tera ti riai n tau bwa ti aonga n rin n Ana auti? Inanon tain te marooro, maroroakinna nakoia ataei taekan te beeba ni kariaiakaki n rin n te tembora, n ikotaki ma aron karekean teuana. Ko kona n kaoa temanna kaain te bitiobiriki bwa e na tibwauaia ma ataei bwa tera aron te intawiu ibukin karekean te beeba n kariaiakaki n rin n te tembora ao tera titiraki aika a titirakinaki.

Tuangiia ataei bwa ana buokiko n rinanon riki te berita ae tabu are ti karaoia ma te Atua ngkana ti bwabetitoaki ao bwa tina kabooua ngkana ti anaa te toa (taraa Motiaea 18:10; Reirei ao Berita aika Tabu 20:77, 79). Kaota tamnein te tembora nakoia ao kabwarabwaraa ae Tamara are i Karawa e tiraua riki ana kakabwaia are E kan anganiira inanon te tembora.

Korea te mataroa are e kairiraa nakon te kawai. Tuangiia ataei bukin tera ngkai e ibuobuoki bwa e na iai te kawai ae e na touaki. Uaia n wareka 2 Nibwaai 31:17–20, ike Nibwaai e kabootaua te berita ae tabu nakon te mataroa ao e kaoira bwa tina reitinako iaon te kawai imwiin te bwabetito. A mwaiti riki berita aika tabu ae a na karaoaki imwiin te bwabetito, n ikotaki ma berita aika tabu ake a karaoaki inanon te tembora. Kabwarabwaraa ae Beretitenti Nelson e a tia n arana te kawai aio bwa “kawain te berita.”

Maroroakina te tai ike temanna e karaoa te bwai nakoim ae ko bon aki kona n karaoia ibukim. Kaoiia ataei bwa ana tibwai naba aia taneiai ae aekan anne. Kabwarabwaraa bwa ngkana ti nakon te tembora, ti kona n karekei otenanti aika tabu n ai aron te bwabetito ibukiia tabeman ake a tia ni mate. Ti kanga n riki n ai aron Iesu ngkana ti karaoi mwakuri i bukiia maate? Tera ae e a tia ni karaoia te Tia Kamaiu ibukira ae ti aki kona ni karaoia i bon ibukira?

Kaoiia ataei tabeman ake a tia ni bwabetitoaki bwa a na tibwaua te bwai are a rinanona. Titirakiniia bwa aekara te rin inanon te tembora. Kaungaiia bwa ana tibwauaa te namakin ae e roko irouia ngke a karaoa te mwakuri ibukiia aia bakatibu.

Korea tamnein te aroka iaon te burakibooti, n ikotaki ma wakaana ao mwaangana. Tuangiia ataei bwa ana iangoia bwa e kanga te utu ni kabotauaki bwa ai aron te aroka. Arana wakaana bwa Bakatibu, arana mwaangana bwa Kanoara, ao arana biroton te aroka bwa Ngkoe. Uaia n wareka te kibuntaeka aio man Reirei ao Berita aika Tabu 128:18.: “Bwa ti aki kona ni kakororaoaki n akeaia [ara bakatibu]; ke ana aki kona ni kakororaoaki raoi ngkana aki kakororaoaki iroura.” Maroroakin titiraki n aron aikai: “Bukin tera ngkai ti kainnanoiia ara bakatibu? Bukin tera ngkai a kainanoira kanoara? A kanga n tia ni buokiira ara karo, tibura, ao ara bakatibu?” Kaoiia ataei bwa ana ukora ni kabanea Reirei ao Berita aika Tabu 128:18 ni kakaea te kibuntaeka ae e kabwarabwaraa bwa tina kanga n buokiia ara bakatibu.

Iangoa te mwakuri ma aia kaaro ataei n tatabemani ni kakaea aran temanna ana bakatibu te ataei ni uotaki nakon te tembora (taraa FamilySearch.org).