“ພາກຫ້ອຍທ້າຍ ງ: ສຳລັບກຸ່ມຖານະປະໂລຫິດແຫ່ງອາໂຣນ ແລະ ຫ້ອງຮຽນຍິງໜຸ່ມ—ວາລະການປະຊຸມ” ຈົ່ງຕາມເຮົາມາ—ສຳລັບບ້ານ ແລະ ໂບດ: ພຣະຄຳພີມໍມອນ 2024 (2023)
“ພາກຫ້ອຍທ້າຍ ງ,” ຈົ່ງຕາມເຮົາມາ—ສຳລັບບ້ານ ແລະ ໂບດ: 2024
ພາກຫ້ອຍທ້າຍ ງ
ສຳລັບກຸ່ມຖານະປະໂລຫິດແຫ່ງອາໂຣນ ແລະ ຫ້ອງຮຽນຍິງໜຸ່ມ—ວາລະການປະຊຸມ
ວັນທີປະຊຸມ:
ການດຳເນີນ (ສະມາຊິກໃນຝ່າຍປະທານຫ້ອງ ຫລື ຝ່າຍປະທານກຸ່ມ):
ການເປີດ
ເພງສວດ (ເລືອກເຮັດໄດ້):
ການອະທິຖານ:
ກ່າວຄຳຂວັນຂອງຍິງໜຸ່ມ ຫລື ຄຳຂວັນຂອງກຸ່ມຖານະປະໂລຫິດແຫ່ງອາໂຣນ.
ປຶກສາຫາລືນຳກັນ
ນຳພາໂດຍບຸກຄົນທີ່ດຳເນີນການປະຊຸມ, ຫ້ອງຮຽນ ຫລື ກຸ່ມຈະໃຊ້ເວລາ 5 ເຖິງ 10 ນາທີ ປຶກສາຫາລືນຳກັນກ່ຽວກັບໜ້າທີ່ຮັບຜິດຊອບຂອງເຂົາເຈົ້າ ໃນວຽກງານແຫ່ງຄວາມລອດ ແລະ ຄວາມສູງສົ່ງ. ນີ້ແມ່ນໂອກາດສຳລັບຝ່າຍປະທານຫ້ອງ ຫລື ຝ່າຍປະທານກຸ່ມທີ່ຈະຕິດຕາມເບິ່ງສິ່ງທີ່ໄດ້ສົນທະນາໃນການປະຊຸມຝ່າຍປະທານ ຫລື ໃນການປະຊຸມສະພາຊາວໜຸ່ມ.
ບຸກຄົນທີ່ດຳເນີນກໍສາມາດໃຊ້ຄຳຖາມຂໍ້ໜຶ່ງ ຫລື ຫລາຍກວ່ານັ້ນຂອງຄຳຖາມເຫລົ່ານີ້:
ການດຳລົງຊີວິດຕາມພຣະກິດຕິຄຸນ
-
ປະສົບການລ່າສຸດຢ່າງໃດແດ່ທີ່ເພີ່ມຄວາມເຂັ້ມແຂງໃຫ້ແກ່ປະຈັກພະຍານຂອງເຮົາ ເຖິງພຣະເຢຊູຄຣິດ ແລະ ພຣະກິດຕິຄຸນຂອງພຣະອົງ?
-
ເຮົາກຳລັງເຮັດສິ່ງໃດເພື່ອຫຍັບເຂົ້າໃກ້ພຣະຜູ້ຊ່ວຍໃຫ້ລອດຫລາຍຂຶ້ນ? ເຮົາກຳລັງພະຍາຍາມເປັນເໝືອນດັ່ງພຣະອົງຫລາຍຂຶ້ນແນວໃດ?
-
ເຮົາຮູ້ສຶກເຖິງການນຳພາຂອງພຣະຜູ້ເປັນເຈົ້າໃນຊີວິດຂອງເຮົາແນວໃດ?
ການດູແລຄົນຂັດສົນ
-
ເຮົາຮູ້ສຶກໄດ້ຮັບການນຳພາໃຫ້ຊ່ວຍເຫລືອ ຫລື ຮັບໃຊ້ໃຜ? ການມອບໝາຍຢ່າງໃດແດ່ທີ່ເຮົາໄດ້ຮັບຈາກຝ່າຍອະທິການ ເພື່ອຊ່ວຍບາງຄົນທີ່ຂັດສົນ?
-
ເຮົາຈະສະໜັບສະໜູນກັນແລະກັນໃນສິ່ງທີ່ເຮົາກຳລັງຜ່ານຜ່າແນວໃດ?
-
ມີໃຜຫາກໍຍ້າຍເຂົ້າມາຢູ່ໃນຫວອດ ຫລື ເຂົ້າຮ່ວມສາດສະໜາຈັກຂອງເຮົາບໍ່? ເຮົາຈະຊ່ວຍເຫລືອເຂົາເຈົ້າ ໃຫ້ຮູ້ສຶກໄດ້ຮັບການຕ້ອນຮັບໄດ້ແນວໃດ?
ການເຊື້ອເຊີນທຸກຄົນໃຫ້ຮັບເອົາພຣະກິດຕິຄຸນ
-
ເຮົາສາມາດເຮັດສິ່ງໃດເພື່ອຊ່ວຍຄົນອື່ນໃຫ້ຮູ້ສຶກເຖິງຄວາມຮັກຂອງພຣະເຈົ້າ?
-
ມີກິດຈະກຳຢ່າງໃດແດ່ທີ່ຈະມາເຖິງໃນໄວໆນີ້ ທີ່ເຮົາສາມາດເຊື້ອເຊີນໝູ່ເພື່ອນຂອງເຮົາໃຫ້ມາຮ່ວມນຳ?
-
ມີການສົນທະນາກ່ຽວກັບແຜນການແບ່ງປັນພຣະກິດຕິຄຸນແນວໃດແດ່ຢູ່ໃນການປະຊຸມສະພາຊາວໜຸ່ມຫວອດ? ຫ້ອງຮຽນ ຫລື ກຸ່ມຂອງເຮົາຈະສາມາດມີພາກສ່ວນໄດ້ແນວໃດ?
ການເຕົ້າໂຮມຄອບຄົວເຂົ້າກັນຊົ່ວນິລັນດອນ
-
ມີວິທີໃດແດ່ທີ່ເຮົາສາມາດເຊື່ອມຕໍ່ເຂົ້າກັບສະມາຊິກໃນຄອບຄົວຂອງເຮົາ, ລວມທັງປູ່ຍ່າຕາຍາຍ ແລະ ຍາດພີ່ນ້ອງ?
-
ເຮົາກຳລັງເຮັດຫຍັງເພື່ອຊອກຫາລາຍຊື່ບັນພະບຸລຸດຂອງເຮົາ ຜູ້ທີ່ຕ້ອງການພິທີການພຣະວິຫານ? ເຮົາສາມາດເຮັດຫຍັງເພື່ອຊ່ວຍໃຫ້ຄົນອື່ນພົບເຫັນລາຍຊື່ບັນພະບຸລຸດຂອງເຂົາເຈົ້າ?
-
ເຮົາຈະສາມາດມີພາກສ່ວນໃນວຽກງານພຣະວິຫານຫລາຍເພີ່ມຂຶ້ນ—ເປັນສ່ວນຕົວ ແລະ ເປັນຫ້ອງຮຽນ ຫລື ເປັນກຸ່ມໄດ້ແນວໃດ?
ຮຽນຮູ້ນຳກັນ
ຜູ້ນຳທີ່ເປັນຜູ້ໃຫຍ່ ຫລື ສະມາຊິກໃນກຸ່ມ ຫລື ຫ້ອງຮຽນ ຈະນຳພາການແນະນຳກ່ຽວກັບການອ່ານປຶ້ມ ຈົ່ງຕາມເຮົາມາ ໃນອາທິດນີ້. ລາວຈະໃຊ້ແນວຄິດສຳລັບການສຶກສາຢູ່ໃນ ຈົ່ງຕາມເຮົາມາ—ສຳລັບບ້ານ ແລະ ໂບດ. ແນວຄິດສຳລັບການສຶກສາພ້ອມກັບ ໄອຄອນນີ້ ແມ່ນສອດຄ່ອງກັບຫ້ອງຮຽນສາດສະໜາ ແລະ ກ່ຽວຂ້ອງກັບຊາວໜຸ່ມໂດຍສະເພາະ. ເຖິງຢ່າງໃດກໍຕາມ, ແນວຄິດສຳລັບການສຶກສາຢ່າງອື່ນໆກໍສາມາດນຳໃຊ້ໄດ້. ຕາມປົກກະຕິແລ້ວ ພາກສ່ວນນີ້ຂອງການປະຊຸມຈະໃຊ້ເວລາປະມານ 35 ເຖິງ 40 ນາທີ.
ການປິດ
ບຸກຄົນທີ່ດຳເນີນການປະຊຸມຈະ:
-
ສະແດງປະຈັກພະຍານເຖິງຫລັກທຳທີ່ໄດ້ສິດສອນ.
-
ສົນທະນາວິທີທີ່ຫ້ອງຮຽນ ຫລື ກຸ່ມຈະປະຕິບັດຕາມສິ່ງທີ່ເຂົາເຈົ້າໄດ້ຮຽນຮູ້—ເປັນກຸ່ມ ຫລື ເປັນສ່ວນບຸກຄົນແນວໃດ.
ການອະທິຖານ: