Mormoni 1–6

Duke filluar te kapitulli i parë i Mormonit, ju do të vini re ndryshime të mëdha midis Mormonit dhe popullit përreth tij. Ndërsa lexoni kapitullin te Mormoni 1, merrni parasysh të bëni dallimin ndërmjet cilësive dhe dëshirave të Mormonit me cilësitë dhe dëshirat e popullit të tij. Vini në dukje pasojat që i erdhën atij si edhe atyre (ju do të gjeni një shembull te vargjet 14–15). Çfarë mësoni që ju frymëzon të jetoni me drejtësi në një botë të ligë?

Ndërsa i lexoni kapitujt te Mormoni 2–6, vazhdoni të kërkoni mënyrën se si Mormoni e shprehu besimin e tij tek Ati Qiellor dhe Jezu Krishti pavarësisht nga ndikimet e liga përreth tij.

Pamja

Nefitët dhe lamanitët duke u ndeshur me njëri‑tjetrin

Kur Mormoni e pa hidhërimin e popullit të vet, ai shpresoi se ata do të pendoheshin. Por “keqardhja e tyre nuk i çonte në pendim” (Mormoni 2:13) – nuk ishte lloji i trishtimit sipas Perëndisë që çon drejt ndryshimit të vërtetë (shih 2 Korintasve 7:8–11). Në vend të kësaj, nefitët ndien trishtim sipas botës (shih Mormoni 2:10–11). Që të kuptoni ndryshimin midis trishtimit sipas Perëndisë dhe trishtimit sipas botës, merrni parasysh të bëni një tabelë ku mund të shënoni atë që mësoni nga Mormoni 2:10–15 rreth këtyre dy llojeve të trishtimit. Tabela juaj duhet të duket diçka si kjo:

Teksa mendoni thellë për atë që mësoni, merreni parasysh se si ajo mund të ndikojë në përpjekjet tuaja që ta kapërceni mëkatin dhe të bëheni më shumë si Ati Qiellor dhe Shpëtimtari.

Shih edhe Diter F. Uhtdorf, “Ti Mund t’ia Dalësh Tani!”, Ensign ose Liahona, nëntor 2013, f. 55–57.

Mormoni shënoi një dobësi që e pa te nefitët: ata nuk arrinin t’i dallonin mënyrat se si Zoti i kishte bekuar. Presidenti Henri B. Ajring na këshilloi që “të gje[jmë] mënyra që të dallo[jmë] dhe kujto[jmë] mirësinë e Perëndisë. … Lut[uni] dhe … meditoni, duke bërë pyetjet: ‘A dërgoi Perëndia një mesazh që ishte vetëm për mua? A [e] kam parë dorën e Tij në jetën time ose në jetën e fëmijëve të mi?’ … Unë dëshmoj se Ai na do dhe na bekon, më shumë sesa shumica nga ne e kanë kuptuar tashmë” (“O Kujtoni, Kujtoni”, Ensign ose Liahona, nëntor 2007, f. 67, 69).

Ndërsa i lexoni vargjet te Mormoni 3:3, 9, ju mund të përsiatni mënyrën se si po e njihni ndikimin e Perëndisë në jetën tuaj. Çfarë bekimesh vijnë kur e njohim ndikimin e Tij? Cilat janë pasojat kur nuk e njohim Atë? (Shih Mormoni 2:26.)

Nefitët nuk i pranuan mësimet e Mormonit, por ai kishte shpresë që ky anal do të ndikonte te ju. Ndërsa i lexoni vargjet te Mormoni 5:8–24 dhe 6:16–22, çfarë mësoni rreth pasojave të mëkatit? Çfarë mësoni nga këto fragmente rreth ndjenjave të Atit Qiellor dhe Jezusit për ju, edhe kur mëkatoni? Si e keni ndier Jezu Krishtin duke u afruar drejt jush me krahët të hapur? Çfarë ndiheni të frymëzuar të bëni si rrjedhojë?

Çfarë do të thotë të jesh “i shpejtë për të vënë re”? Mund të gjeni ide tek artikulli i Plakut Dejvid A. Bednar “Quick to Observe” (Ensign, dhjetor 2006, f. 30–36). Si ishte një bekim për Mormonin dhurata e të qenit i shpejtë për të vënë re? Si mund të jetë ajo një bekim për ne?

A e kuptojnë fëmijët në familjen tuaj se ata mund të zhvillojnë cilësi të mëdha shpirtërore dhe fuqi të madhe shpirtërore edhe pse janë të vegjël? Shembulli i Mormonit mund t’i ndihmojë ata. Merreni parasysh të bëni një bosht kohor për fëmijërinë dhe rininë e Mormonit, duke përdorur moshat dhe ngjarjet e dhëna te Mormoni 1:1–6, 15 dhe 2:1–2. Teksa diskutoni për cilësitë dhe përvojat e Mormonit, vini në dukje cilësi që i kanë fëmijët tuaj, të cilat ju frymëzojnë ju dhe njerëzit e tjerë përreth tyre.

Çfarë fjalësh përdori Mormoni që të përshkruante botën në të cilën jetoi? Si e ruajti ai shpresën pavarësisht nga ligësia përreth tij? Si mund të bëjë të njëjtën gjë familja jonë?

Si u ndie Mormoni ndaj njerëzve përreth tij, edhe pse ata ishin të ligj? Çfarë mund të bëjmë që të zhvillojmë llojin e dashurisë që pati ai?

Përse mund të ngurrojmë që t’i lutemi Atit Qiellor kur po hasim vështirësi? Çfarë mund të bëjmë për t’u mbështetur më shumë tek Ati Qiellor?

Për ta ndihmuar familjen tuaj që të përfytyrojë se çfarë do të thotë të “hidhen sa andej këtej si byku në erë” (vargu 16), griseni një fletë letre në copa të vogla dhe lejojini pjesëtarët e familjes që t’i fryjnë ato përreth. Shpjegojuni se byku është një ashkël që del nga një farë dhe është mjaft i lehtë që të fryhet përreth. Në ç’mënyrë është të qenit “pa Krisht dhe pa Perëndi në këtë botë” (vargu 16) si byku në erë?