“Manatu e Faaleleia ai a Outou Suesuega Faaleaiga o Tusitusiga Paia,” Sau, Mulimuli Mai ia te Au—Mo Tagata Taitoatasi ma Aiga: Tusi a Mamona 2020 (2020)
“Manatu e Faaleleia ai a Outou Suesuega Faaleaiga o Tusitusiga Paia,” Sau, Mulimuli Mai ia te Au—Mo Tagata Taitoatasi ma Aiga: 2020
Manatu e Faaleleia ai a Outou Suesuega Faaleaiga o Tusitusiga Paia
O le suesue faaleaiga o tusitusiga paia e le aunoa o se ala mamana lea e fesoasoani ai i lou aiga e aoao le talalelei. O le a le tele po o le a foi le umi tou te faitau ai o se aiga e le tutusa le taua ma le faifai pea e le aunoa o a outou taumafaiga. A o e faia le suesue o tusitusiga paia o se vaega taua o lou olaga faaleaiga, o le a e fesoasoani i tagata o lou aiga e faalatalata atili atu ia Iesu Keriso ma fausia a latou molimau i le faavae o Lana upu.
Mafaufau i fesili nei:
-
E mafai faapefea ona e faamalosiauina tagata o le aiga e suesue e i latou lava ia tusitusiga paia?
-
O le a se mea e mafai ona e faia e faamalosiauina ai tagata o le aiga e faasoa mai mea ua latou aoaoina?
-
E mafai faapefea ona e faamamafaina mataupu faavae o loo e aoaoina i le Tusi a Mamona i taimi e aoao atu ai i aso uma?
Manatua o le fale o le nofoaga lelei tele lea mo le aoaoina o le talalelei. E mafai ona e aoaoina ma aoao atu le talalelei i le fale i auala e le mafai ona faia i le vasega i le Lotu. Ia fatufatu mea fou a o e mafaufau i auala e fesoasoani ai i lou aiga e aoao mai tusitusiga paia. Mafaufau i nisi o manatu nei e faalautele ai le suesueina o tusitusiga paia e lou aiga.
Faaaoga Musika
Usu pese e faamalosia ai mataupu faavae na aoaoina i tusitusiga paia. O le Faaopoopoga O o loo i lenei punaoa o loo aofia ai musika e faatatau i aoaoga faavae o loo i otootoga o vaiaso taitasi.
Faasoa Atu ni Mau Anoa
Tuu atu i tagata o le aiga se taimi e faasoa mai ni fuaitau o mau latou te mauaina e anoa i le taimi o a latou suesuega faaletagata lava ia.
Faaaogaina o Au Lava Upu
Valaaulia tagata o le aiga e aotele i a latou lava upu mea latou te aoao mai mau tou te suesueina.
Faaaoga Mau i Lou Olaga
A uma ona faitau se mau, fai i tagata o le aiga e fasoa mai ni auala e faaaoga ai le fuaitau i o latou olaga.
Fai se Fesili
Valaaulia tagata o le aiga e fai se fesili faaletalalelei, ona faaalu lea o se taimi e sue ai fuaiupu e mafai ona fesoasoani e tali ai le fesili.
Faaali i luga se Mau
Filifili se fuaiupu e te iloa e anoa, ma faaali i se mea o le a vaai soo i ai tagata o le aiga. Valaaulia isi tagata o le aiga e feauaua’i e filifili se mau e faaali i luga.
Fai se Lisi o Mau
I le avea ai o se aiga, filifili ni fuaiupu e te manao e talanoaina i le vaiaso a sau.
Tauloto ia Mau
Filifili se mau e anoa i lou aiga, ma valaaulia tagata o le aiga e tauloto e ala i le faifai soo i aso taitasi pe fai foi se taaloga faatauloto.
Faasoa Lesona Faatino
Sue ni mea e fetaui ma mataupu ma fuaiupu o loo outou faitauina o se aiga. Valaaulia tagata o le aiga e talanoa e uiga i le auala e fesootai ai mea faitino taitasi i aoaoga i tusitusiga paia.
Filifili se Autu
Tuu e feauaua’i tagata o le aiga e filifili se autu o le a suesue faatasi e le aiga. Faaaoga le Taiala mo Autu, le Bible Dictionary, po o le Guide to the Scriptures (scriptures.ChurchofJesusChrist.org) e sue ai mau e uiga i le autu.
Tusi se Ata
Faitau ni nai fuaiupu o se aiga, ona tuu lea o se taimi i tagata o le aiga e tusi ai se mea e fesootai ma mea o loo outou faitauina. Faaalu se taimi e talanoaina ai e le tasi ma le isi ia ata na tusi.
Faatino se Tala
A uma ona faitau se tala, valaaulia tagata o le aiga e faatino mai. A uma, talanoa pe faapefea ona fesootai le tala ma mea sa outou oo i ai taitoatasi faapea foi o se aiga.
Na aoao mai Elder David A. Bednar: “O tatalo faaleaiga taitasi, o mataupu taitasi o suesuega o tusitusiga paia, ma afiafi faaleaiga taitasi e tofu ma se tosi po o se aafiaga i o tatou agaga. E le mafai ona foliga faatosinaloto tele pe manatua pea se tasi mea i le isi. Ae pei lava ona paleni ia tosi lanu samasama ma le lanu auro ma maua mai ai se faiva alofilima matagofie naua, o le mea la lea, o lo tatou faia pea e le aunoa o nai mea iti faigofie, e mafai ona tulai mai ai taunuuga faaleagaga maoae” (“Ia Matua Maelega ma Mafaufau i le Aiga” Ensign po o le Liahona, Nov. 2009, 19–20).