“Manatu e Faaleleia ai Au Suesuega Faaletagata Lava Ia o Tusitusiga Paia,” Sau, Mulimuli Mai ia te Au—Tusi a Mamona 2020 (2020)
“Manatu e Faaleleia ai Au Suesuega Faaletagata Lava Ia o Tusitusiga Paia,” Sau, Mulimuli Mai ia te Au—Mo Tagata Taitoatasi ma Aiga: 2020
Manatu e Faaleleia ai Au Suesuega Faaletagata Lava Ia o Tusitusiga Paia
O ni nai auala faigofie ia e faalautele ai lau suesuega o le upu a le Atua i tusitusiga paia.
Vaavaai mo Upumoni e uiga ia Iesu Keriso
Ua aoao mai i tatou e tusitusiga paia o mea uma lava e molimau atu ia Keriso (tagai 2 Nifae 11:4; Mose 6:63), o lea la, vaavaai mo Ia i mea o tutupu, o tala, ma aoaoga o le Tusi a Mamona. Fuafua e matau pe maka ia fuaiupu o loo aoao mai e uiga i le Faaola ma pe faapefea ona mulimuli ia te Ia.
Tagai mo ni Upu ma ni Fasifuaitau Musuia
Atonu e te maua e i ai ni upu ma ni fasifuaitau patino i mau e uunaia ai oe, e pei na tusia faapitoa lava mo oe. E ono lagonaina le taua patino ma le musuia ma faaosofia ai oe. Fuafua e maka i au tusitusiga paia pe tusi foi i lau tusi talaaga.
Vaavaai mo Upumoni o le Talalelei
O nisi taimi o upumoni (e tele ina ta’ua o aoaoga faavae po o mataupu faavae) e tuusa’o mai lava, ma o nisi taimi e faaiteite mai i se faataitaiga po o se tala. Fesili ifo ia te oe lava, “O a upumoni faavavau o loo aoao mai i nei fuaiupu?”
Faalogo i le Agaga
Mataitu ou mafaufauga ma lagona, tusa lava pe le fesootai ma mea o loo e faitauina. O na lagona uunai atonu o mea tonu na e finagalo lou Tama Faalelagi e te aoaoina.
Ia Faatatau Mau i Lou Olaga
Mafaufau pe faapefea ona faaaoga tala ma aoaoga o loo e faitauina i lou olaga. Mo se faataitaiga, e mafai ona e fesili ifo ia te oe lava, “O a ni o’u aafiaga e tutusa ma mea o loo ou faitauina?” po o le “E mafai faapefea ona ou mulimuli i le faataitaiga a le tagata o loo i le mau?”
Fai Fesili a o e Suesue
A o e suesue i mau, e mafai ona oo atu fesili i lou mafaufau. O nei fesili e ono fesootai ma mea o loo e faitauina po o lou olaga masani. Manatunatu loloto i nei fesili ma vaavaai mo tali a o e suesue pea i tusitusiga paia.
Faaaoga Fesoasoaniga mo le Suesueina o Tusitusiga Paia
Ina ia maua ni malamalamaaga loloto faaopoopo i fuaiupu o loo e faitauina, faaaoga ia vaefaamatalaga, o le Taiala mo Autu, o le Bible Dictionary, o le Taiala i Tusitusiga Paia (scriptures.ChurchofJesusChrist.org), ma isi fesoasoaniga mo suesuega.
Mafaufau i le Talaaga o Tusitusiga Paia
E mafai ona e maua ni malamalamaaga loloto naua e uiga i se mau pe a e mafaufau i lona talaaga—o tulaga po o le nofoaga o tusitusiga paia. Mo se faataitaiga, o le iloaina o pogai ma talitonuga o tagata na saunoa atu i ai se perofeta, e mafai ona fesoasoani e te malamalama ai i le faamoemoega o ana saunoaga.
Tusifaamaumau ou Mafaufauga ma Lagona
E tele auala e tusifaamaumau ai lagona uunai ia e o mai i au suesuega. Mo se faataitaiga, e mafai ona e makaina se upu anoa po o se fasifuaitau ma tusifaamaumau ou mafaufauga e fai ma faamanatu i au tusitusiga paia. E mafai foi ona tausi sau tusitalaaga o malamalamaaga, lagona, ma uunaiga e te maua.
Suesue i Upu a Perofeta ma Aposetolo o Aso e Gata Ai
Faitau mea ua aoao mai e perofeta ma aposetolo o aso e gata ai e uiga i mataupu faavae e te maua i mau (mo se faataitaiga, tagai conference.ChurchofJesusChrist.org ma mekasini a le Ekalesia.
Fefaasoaai Malamalamaaga Loloto
O le talanoaina o malamalamaaga loloto mai lau suesuega faaletagata lava ia e le gata o se auala lelei lea e aoao atu ai isi, ae e fesoasoani foi e faamalosia ai lou malamalama i mea sa e faitauina.
Ola I Mea Ua E Aoaoina
O le suesueina o tusitusiga paia e le gata ina tatau ona musuia ai i tatou, ae e tatau foi ona taitai atu ai i tatou ina ia suia le ala tatou te ola ai. Faalogo i mea e uunaia ai oe e le Agaga e fai e pei ona e faitauina, ona tautino atu lea e faatino na uunaiga.
Na saunoa mai Peresitene Russell M. Nelson: “Afai o le a outou ‘fetaomi atu i luma, ma taumamafa fiafia i le afioga a Keriso, ma tumau e oo i le iuga, … o le a [tatou] maua le ola e faavavau’ [2 Nifae 31:20].
“O le fiafia o lona uiga e sili atu nai lo le na ona tofo. O le fiafia o lona uiga o le taumafa. Tatou te fiafia i tusitusiga paia e ala i le suesue i ai i se agaga o mea fou matagofie ua maua atoa ma le usitai faamaoni. Pe a tatou taumamafa i afioga a Keriso, o lona uiga ua tusia ai “i papatusi maa o le loto.’ [2 Korinito 3:3]. E avea ai ia mea ma se vaega taua o o tatou natura” (“Ola i le Taitaiga Faatusitusiga Paia,” Ensign, Nov. 2000, 17).