“Feperueri 11-17. Joni 2-4: ‘Mo Sa Sucu Tale’” Lako Mai, Mo Muri Au—Me Baleti Ira na Tamata Yadua kei na Matavuvale: Veiyalayalati Vou 2019 (2019)
“Feperueri 11-17. John 2-4,” Lako Mai, Mo Muri Au—Me Baleti Ira na Tamata Yadua kei na Matavuvale: Veiyalayalati Vou 2019
11–17 ni Feperueri
Joni 2–4
“Mo Sa Sucu Tale”
Ni o wilika na Joni 2–4, ena vakavulici iko na Yalotabu ena veika me baleta na nomu saumaki. Vola toka na Nona veivakauqeti. Ena rawa beka ni o kunea eso nai kuri ni raikiloma mai na veivakasama ni vuli ena idusidusi oqo.
Vola na Nomu Veivakasama
Ena dua na kanavata ni vakamau mai Kena, e veisautaka kina na wai me waini na Karisito—e dua na ka e vakatoka o Joni me “vakatekivu oqo ni cakamana” (Joni 2:11). Oqori e dina ka levu cake mai na dua na vakasama: e dina ni se qai matai ni cakamana e vakayacora e matana levu o Jisu, ena rawa talega ni ivakatakilakila ni dua nai vakatekivu ni cakamana—na ikalawa ni noda vukici meda ucuya vakalevu cake na nodai Vakabula. Na cakamana ni bula taucoko oqo e tekivu mai na digidigi me vakamuri Jisu Karisito, me veisau ka bulataka e dua na bula e vinaka cake ena Vukuna. Ena rawa ni yacova sara na veisau oqo me vakataucokotaki na “sucu tale” sa dua na sala vinaka duadua me vakamacalataki kina (Joni 3:7). Ia na sucu tale sa itekitekivu ga ni salatu ki na bula vakatisaipeli. Na nona vosa na Karisito vua na marama ni Samaria ena tobu ni wai e vakananuma vei keda, ni kevaka eda na muria tikoga na salatu oqo, ena yaco me “mata ni wai” e lomada, “sa tovure ki na bula tawamudu” (Joni 4:14).
Vakasama eso ni Vuli iVolanikalou Yadua
Na kaukauwa i Jisu Karisito ena rawa ni veisautaki au.
Ni o wilika na nona vukica na wai me waini nai Vakabula ena Joni 2:1–11, na raikiloma cava o rawata me baleta na kena rawa ni veisautaki iko na kaukauwa i Karisito?
O na rawata talega eso tale na raikiloma ni o vakananuma na nodra rai eso tale na tamata, me vakataki Meri, o irataou na tisaipeli, kei ira na so tale. Na cava era sotava o ira oqo ena cakamana oya? Ena rawa ni o vakatautauvatataka na veika o vulica me baleta na cakamana ena veitikina oqo ena veika e vakatavulici Nikotimo kina o Jisu Karisito (raica na Joni 3:1–8) kei na marama ena tobu ni wai (raica na Joni 4:3–26).
Me’u na sucu tale me rawa ni’u curu ki na matanitu ni Kalou.
Ena gauna e lako vuni mai kina o Nikotimo vei Jisu, e a dauvakadidike qaqarauni. E muri, e a qai, taqomaki Jisu e matana levu (raica na Joni 7:45–52) ka qai tomani ira na dauvakabauta ena veibulu ni Vakabula (raica na Joni 19:38–40). Nai vakavuvuli cava so o kunea ena Joni 3:1–21 ka a rawa beka ni vakauqeti Nikotimo me vakamuri Jisu ka sucu tale?
E vakatavulica na Parofita o Josefa Simici, “Na sucu tale, e yaco mai ena Yalo ni Kalou ena cakacaka vakalotu” (Na Nodra iVakavuvuli na Peresitedi ni Lotu: Josefa Simici [2007], 95). Na itavi cava e cakava na nomu papitaiso (ni “sucu ena wai” [Joni 3:5]) kei na veivakadeitaki (ni sucu “ena Yalo” [Joni 3:5]) ena nomu sucu tale? Na cava o cakava tiko me tomana tikoga na ikalawa oqo ni veisau? (raica Alama 5:11–14).
Raica talega na Mosaia 5:7; 27: 25 – 26; “Salvation,” Na Ulutaga Vakosipeli, topics.lds.org; David A. Bednar, “E Dodonu Mo Sucu Tale,” Ensign, se Liaona, Me 2007, 19–22
E vakaraitaka na Nona loloma vei au na Tamada Vakalomalagi mai vei Jisu Karisito.
E vakatavulica o Elder Jeffrey R. Holland, “Ia na imatai ni dina cecere ni veigauna tawamudu o ya ni Kalou sa lomani keda ena Yalona taucoko, igu, vakasama, kei na kaukauwa” (Ena Cakacaka Mana na Turaga vei Kemuni ena Mataka,” Ensign se Liaona, Me 2016, 127). O sa vakila vakacava na nona loloma na Kalou ena isolisoli ni Luvena?
E vakarautaka na sakaramede e dua na gauna me vakananumi vakatitobu kina na loloma ni Kalou kei na isolisoli ni Luvena. Na serenilotu cava so e vukei iko mo vakila na loloma oqo? Navuca mo sarava na vidio ni Matasere ni Mormon Tabernacle ni ra lagata na “I Stand All Amazed” (LDS.org). Na cava o rawa ni cakava me vakaibalebale cake kina na sakaramede?
E Yalo li na Kalou?
Eso era na rawa ni veilecayaki ena veika e kaya o Jisu ni yalo na Kalou. Na iVakadewa i Josefa Simici ni tikina oqo e vakarautaka e dua na veivakamatatataki bibi: “E sa yalataka na Kalou na nona Yalotabu” (ena Joni 4:24, ivakamacala e ra a). Nai vakatakila ena gauna oqo e vakavulica ni vakalewe kei na sui na Kalou (raica na VV130:22–23; Vakatekivu 5:1–3; Iperiu 1:1–3).
E solia vei au o Karisito na wai ni bula mai Vua.
Na cava e vakaibalebaletaka o Jisu ni a kaya vua na marama ni Samaria ni o koya ga e gunuva na wai e solia o Koya ena sega ni via guna ka tawamudu? Na kosipeli e tautauvata vakacava kei na wai ni bula?
Na kosipeli i Karisito e wai bula ka vakabulabulataka na yaloda.
E dua na nona itukutuku nai Vakabula vua na marama ni Samaria ni iwalewale ni noda sokalou e bibi cake mai na vanua eda sokalou kina (raica na Joni 4:21–24). Na cava o sa cakava tiko mo “lotu vakayalo ka vakaidina vei Tamada”?? (Joni 4:23).
Raica talega na iDusidusi ki na ivolanikalou, “Worship”; Dean M. Davies, “Na veivakalougatataki ni sokalou,” Ensign se Liaona, Nove. 2016, 93 – 95.
Eso na Vakasama me baleta na Vuli iVolanikalou Vakavuvale kei na Lotu Vakavuvale ena Moniti
Ni o wilika na ivolanikalou kei na nomu vuvale, ena rawa ni vukei iko na Yalo mo kila na ivakavuvuli cava mo vakabibitaka ka veivosakitaka me rawa ni sotavi kina na gagadre ni nomu vuvale. Oqo eso na vakatutu:
Ni wilika nomu vuvale na veiwase oqo ena macawa oqo, vakaraica matua na nona vakayagataka nai Vakabula na veika ni veisiga—sucu, cagi, wai, kei na kakana—me vakavulica na veidina vakayalo. Na iyaya cava ena loma ni nomu vale o rawa ni vakayagataka mo vakavulica kina na veidina vakayalo?
Ni o levea na veika ena vakadukadukalitaka vakayago ka vakayalo na nomu vale, ena rawa ni yaco me vanua tabu—me vaka na valetabu. Na cava e gadrevi me biu tani mai loma ni nomu vale me rawa ni vanua tabu? Na cava o rawa ni cakava me tiko ga e tuba na veika oqori?
Kerea nomu lewe ni vuvale me ra vakasamataka na cakacaka mana ni bukete kei na vakasucu—na iwalewale ni kena buli e dua na ka bula, e yavala tiko, ka vuku sara. E vakatavulica o Karisito ni sa dodonu me da sucu tale ni se bera ni da curu ki na matanitu ni Kalou. Na cava e ivakatauvatani vinaka sara kina na sucu tale me baleta na veisau e gadrevi vei keda ni se bera ni da curu ki na matanitu ni Kalou? Eda sa sotava oti vakacava na ikalawa ni sucu tale?
Sureti ira na lewe ni matavuvale mera tukuna tale na tikina oqori ena nodra duivosa me vaka era vakamacalataka tiko vua e dua na itokani. E sa vukei keda vakacava o Karisito meda vakila na loloma ni Kalou ena noda bula?
Na cava e vakavulici keda tiko kina na iVakabula ena Nona vakatautauvatataka na Nona kosipeli ki na wai ni bula? Vakananuma mo dulaka cake e dua na bilo wai qai kerea na nomu vuvale me vakamacalataka mai na ituvaki yaga ni wai. Na cava eda gadreva kina meda gunu wai ena veisiga? Na cava e vakatauvatana kina o Jisu Karisito na Nona kosipeli ki na “mata ni wai sa tovure ki na bula tawamudu”?? (Joni 4:14).
Me ikuri ni tukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Me Baleta na Lalai.
Vakavinakataki ni Vuli Yadudua
Vakaraica na ivakatakilakila. E dau vakayagataka nai volanikalou na iyaya, ka yaco, cakacaka, se ivakavuvuli me vakaibalebaletaka na dina vakayalo. Na ivakatakilakila oqo e rawa ni vakavutuniyautaka na nomu kila vinaka na ivakavuvuli e vakatavulici tiko. Me ivakaraitaki, na iVakabula e vakatauvatana na saumaki ki na sucu tale.
Na Wai Bula, mai vei Simon Dewey.