“11–17 ni Feperueri. Joni 2–4: ‘E Dodonu Mo Sucu Tale’” Lako Mai, Mo Muri Au—Me Baleti Ira na Lalai: Veiyalayalati Vou 2019 (2019)
“11–17 ni Feperueri. Joni 2–4,” Lako Mai, Mo Muri Au—Me Baleti Ira na Lalai: 2019
11–17 ni Feperueri
Joni 2–4
“E Dodonu Mo Sucu Tale”
Nomu vakavakarau ena veivakavulici e tekivu ena nomu wilika na Joni 2–4. Lako Mai, Mo Muri Au—Baleta na Tamata Yadua kei na Matavuvale e rawa ni vukea nomu kila na wase eso oqo, ka rawa ni solia vei iko na ituvatuva oqo na vakasama eso ni veivakavulici.
Vola na Veika o Uqeti Kina
Sureta na Veiwasei
Vakauqeti ira na gone me ra wasea na veika era vulica ka sotava tiko ena nomu tarogi ira ena ka era a cakava me ra “gonedau ni tamata” (Matthew 4:19). O na gadreva beka mo railesuva vata kei ira na lesoni ni macawa sa oti.
Vakavulica na iVunau
Gone Sobu
Au gadreva meu papitaiso ka vakadeitaki meu lesu tale ka bula vata kei Tamada Vakalomalagi.
O ira na gone o vakavulica era sa vakarau tiko me ra cavuta na ikalawa bibi ni laki bula vata tale kei Tamada Vakalomalagi ena nodra papitaiso (sucu ena wai) ka vakadeitaki (sucu ena Yalo). E rawa vakacava mo vukei ira me ra kila na bibi ni cakacaka vakalotu e rua oqo?
iTaviqaravi e Rawa ni Caka
-
Vakalekalekataka na italanoa kei Jisu ni vakavulici Nikotimo tiko. Yalataka vei ira na gone ni ra sa papitaiso, ena solia vei ira o Tamada Vakalomalagi na isolisoli ni Yalo Tabu.
-
Vakayagataka na Joni 3:5 kei na tabana ni itaviqaravi ni macawa oqo mo vakavulica ni da gadreva me da papitaiso ka vakadeitaki me da laki bula vata tale kei Tamada Vakalomalagi.
-
Kerei ira na gone me ra veivosakitaka na ka era dau cakava me ra savata na ligadra. Vakaraitaka na iyaloyalo Papitaiso na Goneyalewa (iVola ni iYaloyalo Vakosipeli, naba. 104), ka vukei ira na gone me ra veidutaitaka na savati ni ligada ena wai kei na veisavai vakayalo ena papitaiso.
E lomani au na Tamada Vakalomalagi, sa solia kina vei au e dua na iVakabula.
E rawa ni o vukei ira vakacava na gone me ra vulica na dina vakamareqeti oqo?
iTaviqaravi e Rawa ni Caka
-
Kerei ira na gone me ra vakacavara na iyatuvosa vaqo: “Ni rau lomani au na noqu itubutubu, erau. …” Wilika na Joni 3:16. Qai vukei ira na gone yadua me ra tokaruataka na Joni 3:16, ka sosomitaka na vosa “na kai vuravura” ena yacana, me ra qai vakarogoca na gone na ka a cakava na Tamada Vakalomalagi ena Nona lomani keda. Sureti ira na gone me ra droinitaka na iyaloyalo ni ka e dau vukei ira me ra vakila na loloma ni Tamada Vakalomalagi ena vukudra (me vaka na matavuvale, na veika bula, na ivolanikalou, kei na so tale). Kerei ira me ra veiwaseitaka na nodra droini.
-
Me ra taura cake na gone e dua na iyaloyalo kei Jisu ena veigauna era lagata kina na “Son” ena “He Sent His Son,” Children’s Songbook, 34–35.
O Jisu Karisito na noqu “wai ni bula.”
O ira kece na gone ena nomu kalasi era rawa kila na cava na karamaca. O na vakayagataka beka vakacava na gagadre oqori me vukea na nodra vakila na gone na levu ni noda gadreva na wai ni bula e solia tu ko Jisu Karisito?
iTaviqaravi e Rawa ni Caka
-
Vakayagataka na iyaloyalo ena ituvatuva ni macawa oqo ena Lako Mai, Mo Muri Au—Baleta na Tamata Yadua kei na Matavuvale mo tukuna kina na italanoa kei Jisu kei na yalewa ena tobuwai. Kerei ira na gone me ra tukuna tale na italanoa.
-
Vakaraitaka e dua na bilo wai, ka tarogi ira na gone na cava ena yaco kevaka eda sa karamaca sara tu vakalevu qai lala tu na bilo. Vakalekalekataka na Joni 4:5–15, ka vakadinadinataka ni o Jisu Karisito kei na Nona kosipeli erau solia na bula ki na yaloda, me vaka sa solia na bula ki yagoda na wai.
Vakavulica na iVunau
Gone Qase Cake
Au rawa ni rokova na tinaqu me vaka a vakayacora o Jisu.
Ena vakamau mai Kena, a tukuna vei Jisu o Meri ni sa maca na waini. Me vaka na ivakadewa nei Josefa Simici, a sauma o Jisu vei Tinana ena nona taroga, “Yalewa, na cava ko sa vinakata meu vakayacora vei iko? oqori au na vakayacora” (Joni 2:4, ivakamacala e ra a). O Jisu na ivakaraitaki ni ivakarau me ra raici tinadra kina na gone.
iTaviqaravi e Rawa ni Caka
-
Sureti ira na gone me ra wilika na Joni 2:1–11 ka veivuke ena kena tukuni tale eso na kena iwase ena nodra vosa ga.
-
Kerei ira na gone me ra vola eso na ka ena gadreva kina na veivuke na tinadra Sureti ira me ra vakatovotovotaka na ka e rawa ni ra tukuna vua ni ra vakayagataka eso na vosa nei Jisu: “Na cava ko sa vinakata meu vakayacora vei iko?” (Joni 2:4, ivakamacala e ra a).
-
Sureta eso na tina me lako mai ki na nomu kalasi ka wasea na veika a cakava na luvedra me vakaraitaka kina nodra rokovi ira.
E kaya ko Jisu vua na tinana, “Na cava ko sa vinakata meu vakayacora vei iko?” (iVakadewa nei Josefa Simici, Joni 2:4 [ena Joni 2:4, ivakamacala e ra a]).
Na noda papitaiso ka vakadeitaki e sa vaka na sucu tale.
Ni da sa papitaiso, na ka e vakatoka ko Jisu me “sucu ena wai,” eda sa rawata na vakabokoci ni noda ivalavala ca ka rawa ni “curu ki na matanitu ni Kalou” (Joni 3:5). Ena rawa vakacava ni o vukei ira na gone o vakavulica me ra kila na ibalebale ni sucu tale?
iTaviqaravi e Rawa ni Caka
-
Veibiuyaka na malanivosa ni iVakabula ena Joni 3:3 ka me ra qai tuva tale vakadodonu na gone. E tautauvata vakacava kei na sucu tale na noda papitaiso ka vakadeitaki?
-
Vakaraitaka na iyaloyalo ni dua na gone sucu vou kei na dua e papitaiso ka vakadeitaki (raica na iVola ni iYaloyalo Vakosipeli, naba 104 kei na 105). Eda na tautauvata vakacava kei na dua na gone sucuvou ni oti noda papitaiso ka vakadeitaki? (raica na Joni 3:3–5).
-
Sureti ira na gone me ra wasea na ivakananumi ni nodra papitaiso. Wilika na Mosaia 18:8–10 kei na Vunau kei na Veiyalayalati 20:37 me railesuvi kina na veiyalayalati ni papitaiso. Vakavulica vei ira na gone ni kena vakayagataki vakavuku na sakaramede ena veimacawa sa dua na sala me tomani kina na ivakarau ni sucu tale.
-
Vukei ira na gone me ra cavuqaqataka na Yavu ni Vakabauta 1:4.
E lomani au na Tamada Vakalomalagi, sa tala mai kina na Luvena.
E rawa vakacava ni o vukei ira na gone me ra kila ni a talai mai ko Jisu Karisito ki vuravura me ivakaraitaki ni nona loloma na Tamada Vakalomalagi?
iTaviqaravi e Rawa ni Caka
-
Kerei ira na gone me ra droinitaka e dua na iyaloyalo ni nodra iloloma taleitaki kei na tamata a solia vei ira na iloloma oya. Qai kerea e dua na gone me wilika na Joni 3:16 Na iloloma cava a solia vei keda na Tamada Vakalomalagi? E vakaraitaka vakacava na Nona loloma na isolisoli oqo?
-
Kerei ira na gone me ra vakarogoca na isau ni taro, “Cava na vuna e talai Jisu Karisito mai kina na Tamada Vakalomalagi?” ni ra lagata se vakarogoca na “He Sent His Son,” Children’s Songbook, 34–35.
E solia vei au o Jisu Karisito na “wai ni bula.”
Me vaka ga a vakayagataka o Jisu na wai me vakavulica na yalewa ni Samaria, e rawa ni o vakayagataka na wai mo vakavulici ira na gone ena vuna eda gadreva kina na kosipeli i Jisu Karisito.
iTaviqaravi e Rawa ni Caka
-
Solia vei ira na gone na wai me ra gunu, ka kerei ira me ra wasea e dua na gauna era a karamaca kina. Tukuna na veika eda vakila ena gauna eda qai gunu kina.
-
Vola na iyatuvosa leleka mai na italanoa ni yalewa ena tobuwai, ka kerei ira na gone me ra raica na Joni 4:6–23 me tuvai vakadodonu kina na iyatuvosa. Na cava a tovolea tiko o Jisu me vakavulica vua na yalewa?
-
Droinitaka ena papa e dua na bilo wai kei na toevu se uciwai. Sureti ira na gone me ra tukuna na ka eso, vaka na bilo wai, e dau vakacegui keda vagauna. Na cava eso na ka vaka na “wai ni bula” e rawa ni vakacegui keda vakaoti?
-
Vola ena papa E tautauvata vakacava kei na wai na kosipeli? Kerei ira na gone me ra vakasamataka na isaunitaro oqo ni ra wilika na Joni 4:6–23.
Vakauqeta na Vuli e Vale
Navuca mo kerei ira na gone me ra solia ki na lewe ni nodra matavuvale e dua na bilowai ni ra yaco i vale. Ni ra vakayacora vakakina, e rawa ni ra wasea na veika era sa vulica me baleta na wai ni bula.
Vakatorocaketaki Noda Veivakavulici
Vakayagataka na tabana ni itaviqaravi. Ni ra vakacavara na gone na tabana ni itaviqaravi, vakayagataka na gauna mo railesuva kina na ivakavuvuli mai na lesoni.