“Epereli 1-14 Maciu 16-17; Marika 9; Luke 11: ‘Sa Talai Ira na Lewe Tinikarua Oqo Ko Jisu’’’ Lako Mai, Mo Muri Au—Me Baleti Ira na Tamata Yadua kei na Matavuvale: Veiyalayalati Vou 2019 (2019)
“Epereli 1-14 Maciu 16-17; Marika 9; Luke 9,” Lako Mai, Mo Muri Au—Me Baleti Ira na Tamata Yadua kei na Matavuvale: 2019
Na Vakamataliataki, mai vei Carl Heinrich Bloch
Epereli 1–14
Maciu 16–17; Marika 9; Luke 9
“Oi Kemuni na Karisito”
Ena rua na macawa ka tarava, vakananuma na ivakadinadina i Pita, ka kunei ena Maciu 16:15–17, kei na nodra ivakadinadina na parofita kei na iapositolo ko na rogoca ena koniferedi raraba.
Vola na Nomu Veivakasama
E sega li ni kurabuitaki ni ra mai tukuna vua na Farisi kei na luvei Setoki me vakaraitaka vei ira “e dua na ivakatakilakila mai lomalagi”? E sega beka ni rauti ira na vuqa na cakacaka mana rogo levu? Vakacava na Nona ivakavuvuli qaqa se na vuqa na sala ka vakavotukanataka kina na veiparofisai makawa? Na nodra kudru e vu sega ni baleta ni lailai na ivakatakilakila ia e baleta ga ni ra sega ni yalorawarawa me “kila na veivakatakilakila” ka ciqomi ira. (Raica na Maciu 16:1–4.)
Ko Pita, me vakai ira na Farisi kei na luvei Setoki, era vakadinadinataka na Nona cakacaka mana na iVakabula ka rogoca Nona ivakavuvuli. Ia na ivakadinadina deivaki nei Pita, “Oi kemuni na Karisito, na Luve ni Kalou bula,” e sega ni lako mai na nona vakila vakayago—na nona “lewe kei na dra.” Na nona ivakadinadina e a vakatakilai vua mai vei “Tamada sa tu mai lomalagi.” A iVakatakila sa vatu ka tara kina na iVakabula na Nona Lotu ena gauna e liu kei na gauna oqo—a ivakatakila mai lomalagi ki vei ira Nona italai. Ia sai koya oqo na vatu ka rawa ni da tara kina na noda itutu vakatisaipeli—a ivakatakila ni ko Jisu sa Karisito ia ko ira Nona italai era taura tu “na idola ni matanitu.” Ni da tara cake ena dela ni yavuvatu oqo, “[eda] na sega ni rawata na matamata ni koro i eli.” (Maciu 16:15–19.)
Vakasama eso ni Vuli iVolanikalou Yadua
Maciu 16:13 - 17; Luke 9:18 -21
Na ivakadinadina kei Jisu Karisito e yaco mai ena ivakatakila.
Kevaka me tarogi ira na tamata ko Jisu Karisito nikua, “Era sa kaya na tamata se ko cei koi au na Luve ni tamata?” na kena isau ena rawa ni duidui mai na kena era sauma ena Nona gauna. Na cava na ituvaki ni yalo ni gauna vou ki vei Jisu ko sa bau raica? Ko na sauma vakacava ke sa tarogi iko ko Jisu, “Ia dou sa kaya se ko cei koi au?” (Raica na Maciu 16:13–15.)
Vakananuma na nomu ivakadinadina ni iVakabula ka ko a ciqoma vakacava. Na cava ko vulica mai na Maciu 16:15–17 ka rawa ni vaqaqacotaka? Kevaka ko via vulica tale me baleta na ivakadinadina kei na ivakatakila yadudua, vakasaqaqara ena vei tiki ni ivolanikalou oqo: Joni 15:26; 1 Korinica 12:3; 2 Nifai 31:18; Alama 5:45–48; and Vunau kei na Veiyalatalati 8:2–3.
Maciu 17: 1 - 9; Marika 9:2-10; Luke 9:28 -36
Na cava e a yaco ena Ulunivanua ni Veivakamataliataki?
Ni kauti iratou o Pita, Jemesa, kei Joni o Jisu ki na “dua na ulunivanua cecere,” e a vakamataliataki (se vakalagilagi) e matadratou. Erau a rairai talega ko Mosese kei Iliasa (Ilaija) ka rau solia na idola ni matabete ki vei iratou na iApositolo. Ko ira na idola oqo e vakaukauwataki ira mera liutaka na Lotu i Karisito e vuravura ni oti na Nona Tucaketale (raica na Bible Dictionary, “Transfiguration, Mount of”) O ira na idola oqo era sa vakalesui mai ena noda gauna (raica na VV 110).
Na cava soti “na idola ni matanitu vakalomalagi”?
Na “idola ni matanitu vakalomalagi” ka a yalataka me solia vei Pita na iVakabula era idola vakamatabete (Maciu 16:19). Na idola ni matabete sai koya na lewa ni Kalou sa soli vei ira na iliuliu ni matabete mera veidusimaki kina, vakatulewa, ka liutaka na vakayagataki ni Nona matabete ena vuravura oqo. Na kena vakayagataki na dodonu ni matabete ena liutaki mai vei ira era taura tu na kena idola (raica VV 65:2; 81:2; 124:123). O ira e tiko vei ira na idola ni matabete sa na tiko vei ira na veivakadonui mera liutaka e dua na wasewase ni lotu” (iVoladusidusi 2: Veiliutaki ena Lotu [2010], 2.1.1).
Na “na idola ni matanitu vakalomalagi” era idola ni matabete.
Na idola ni matabete ka a soli vei Pita kei rau na iApositolo ena Ulunivanua ni Veivakamataliataki e sa vakalesui tale mai ena noda gauna (raica na VV 110:11–16). O ira ga ka ra taura na idola ni matabete e wili kina o iratou na Veiliutaki Taumada kei na Kuoramu ni Tinikarua na iApositolo kei ira na Veiliutaki Raraba; o ira na peresitedi ni valetabu, kaulotu, iteki, kei na iwasewase; kei ira na bisopi, peresitedi ni tabana, kei na peresitedi ni kuoramu.
Raica talega Neil L. Andersen, “Kaukauwa e Tiko ena Matabete,” Ensign se Liahona, Nove. 2013, 92–95; Dina ena Vakabauta, 126–27; “Priesthood Keys: The Restoration of Priesthood Keys” (vidio, LDS.org).
Maciu 17:14 -21; Marika 9:14 -29
Ni vakasaqarai na vakabauta levu cake, e dodonu me’u taura matua toka mada na vakabauta ka sa toka vei au.
Na tama ka tukuni tiko ena Maciu 17 kei na Marika 9 e tu vua na ibalebale me vakatitiqa kina ni rawa ni vakabulai luvena ko Jisu. Eratou a saga mada e liu na tisaipeli me vakabula na luvena tagane oqo, eratou a sega ni rawata. Ia ni sa sureti koya na iVakabula me yavalata nona vakabauta, e sa sega ni vakanamata tiko ki na nona vakatitiqa. “Kemuni na Turaga, au sa vakabauta,” e a kaya, oti oya, me vakaraitaka ni sega ni taucoko nona vakabauta, e a kuria yani, “Vukea na noqu tawa-vakabauta.”
Na cava e vakavulica vei iko na Yalotabu ni o wilika na cakacaka mana oqo? Sa vukei iko vakacava na Tamada Vakalomalagi me tubu kina nomu vakabauta? Na cava o rawa ni cakava mo tara cake kina nomu vakabauta ena dela ni koya sa tu rawa? E rawa beka ni ko kumuna e dua na ituvatuva ni veitiki ni ivolanikalou, itukutuku ni koniferedi, se na ka ko a sotava ka vakaukauwataka nomu vakabauta.
Raica talega na Jeffrey R. Holland, “Kemuni na Turaga, Au Sa Vakabauta,” Ensign se Liaona, Me 2013, 93–95.
Eso na Vakasama me baleta na Vuli iVolanikalou Vakavuvale kei na Lotu Vakavuvale ena Moniti
Ni o wilika na ivolanikalou kei na nomu vuvale, ena rawa ni vukei iko na Yalo mo kila na ivakavuvuli cava mo vakabibitaka ka veivosakitaka me rawa ni sotavi kina na gagadre ni nomu vuvale. Oqo eso na vakatutu:
Me ra vakavulici ira na luvedra me baleta na idola ni matabete, o na rawa ni tukuna na Elder Gary E. Stevenson na italanoa me baleta na idusidusi ni kena lokataki tu nona motoka (raica na “Ka sa na idola kei na lewa ni matabete?” Ensign se Liaona, Me 2016, 29 – 32). E rawa ni ko laivi ira na luvemu mera vakayagataka na idola mera dolava na vale, na motoka, se so tale na loka. Navuca mo vakaraitaka na itaba ni Peresitedi ni Lotu ka vakadinadinataka ni taura tu o koya na idola taucoko ni matabete, me vakataki Pita e liu.
O ira na parofita ni ra vakabauti Jisu Karisito era tosoya na ulunivanua (raica Jekope 4:6; Mosese 7:13). Na ivakadinadina ni veika oqo mai vei bisopi Richard C. Edgley e rawa ni sema na tikina oqo ki na nomu vuvale: “Au se sega ni vakadinadinataka na tokitaki ni dua na ulunivanua. Ia, au sa raica ni vakavuna na vakabauta na kena tokitaki e dua na ulunivanua ni vakatitiqa kei na taqaya ka vakaisosomitaki ena vakanuinui kei na yalodei. Au sa raica ni vakavuna na vakabauta me vakaisosomitaka na ulunivanua ni ivalavala ca na veivutuni kei na veivosoti. Au sa raica ni vakavuna na vakabauta na ulunivanua ni mosi me sosomitaka na vakacegu, vakanuinui, kei na vakavinavinaka. Io, au sa raica na kena kau tani eso na ulunivanua” (“Vakabauta—e Nomu Na Digidigi,” Ensign se Liahona, Nove. 2010. 33). Na cava e so na ulunivanua ena noda bula ka sa gadrevi me kau tani? Eda vakaraitaka vakacava noda vakabauta na kaukauwa ni Kalou me vukei keda meda tokia na veiulunivanua oqo?
Na cava na kena ibalebale me rai lesu ni sa taura na isiviyara? Na cava e sega ni yaga kina ki na matanitu ni Kalou na ituvaki ni yalo oqo?
Me ikuri ni tukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Me Baleta na Lalai.
Vakatorocaketaki ni Noda Veivakavulici
Soqoni vata vakawasoma E vakatavulica o Peresitedi Henry B. Eyring: “Kua ni calata e dua na madigi mo soqoni ira vata na gone mera vulica na ivakavuvuli i Jisu Karisito. Na veigauna vakaoqo e vakavudua ni vakatauvatani kei na sasaga ni vunica” (“Na Kaukauwa ni Vakatavulici na iVunau,” Ensign Me, 1999, 74).
Turaga, Au Sa Kauta Mai na Luvequ Tagane Vei Kemuni, mai vei Walter Rane