“Epereli 15-21. Na Siga ni Mate: ‘Ko iko Bulubulu, Sa Evei na Nomu Gumatua?’” Lako Mai, Mo Muri Au—Me Baleti Ira na Tamata Yadua kei na Matavuvale: Veiyalayalati Vou 2019 (2019)

“Epereli 15-21. Siga ni Mate,” Lako Mai, Mo Muri Au—Me Baleti Ira na Tamata Yadua kei na Matavuvale: Veiyalayalati Vou 2019

iVakatakilakila

iBulubulu ena Were

Epereli 15-21

Siganimate

“Ko iko Bulubulu, Sa Evei na Nomu Gumatua?”

Ni o wilika tiko na ivakadinadina eso ni Tucake tale na iVakabula ena idusidusi oqo, mo toqa toka eso na vakanananu kei na ka o vakila e yaco vei iko mai na Yalo Tabu.

Vola na Nomu Veivakasama

Ena iotioti ni macawa ni nona bula na iVakabula, e lewevuqa na Jiu ka wavoliti Koya tu era vakaitavi ena ivakarau vakavanua ni Kanavata ni Lako Sivia. Era vakarautaka na kakana, lagati na sere, ka kumuni vata me vakananumi kina na nodra vakabulai na Isireli mai na veivakabobulataki mai vei ira na kai Ijipita. Era vakarogoca na vuvale nai talanoa ni nodra lako sivia na agilosi veivakarusai ena nodra vale na nodra qase e liu, era sa makataka na nodra katuba ena dra ni lami. Ena soqo ni marau oqo ka vutuniyau ena ivakatakilakila ni veivakabulai, e lailai vei ira era kila tu ni o Jisu Karisito, na Lami ni Kalou, ena vakabulai ira mai na veivakabobulataki ni valavala ca kei na mate—ena Nona vakararawataki, mate, ka qai Tucake tale. E dina sara, e a tiko talega o ira era kilai Jisu ni nodra Mesaia yalataki, nodra Dauveisereki tawamudu. Mai na siga oya, era sa vakadinadinataka ki vuravura taucoko na tisaipeli i Jisu Karisito “ni sa mate na Karisito ena vuku ni noda ivalavala ca … ; ni sa bulu talega, ka ni sa tucake tale e nai katolu ni siga” (1 Korinica 15:3–4).

iVakatakilakila

ivakatakilakila ni vuli yadua

Vakasama eso ni Vuli iVolanikalou Yadua

Maciu 21–28

E tiko vei Jisu Karisito na kaukauwa me vukei au meu vorata nai valavala ca, mate kei na malumalumu.

E dua na sala me da vakanamata kina ki na veivakalougatataki ni Veisorovaki ni iVakabula ena macawa oqo me da solia na gauna ena veisiga yadua me da wilika na iotioti ni macawa ni nona bula o Jisu (e dua nai tuvatuva ni wiliwili e tarava). Na cava o kunea ena veiwase ni vola oqo ka vukei iko mo vakila na loloma ni iVakabula vei iko? Na cava o vulica me baleta na Nona kaukauwa me sereki iko mai na ivalavala ca kei na mate? Na cava o vulica me baleta na vosoti ni dredre kei na ulabaleti ni malumalumu eso? O vakaraitaka tiko vakacava na vakabauta ki na Nona kaukauwa ni veisereki?

Sigatabu: Na curu qaqa ki Jerusalemi (Maciu 21:6–11)
Moniti: Vakasavasavataki ni valetabu (Maciu 21:12–16)
Tusiti: Veivakavulici e Jerusalemi (Maciu 21–23)
Vukelulu: Tomani na veivakavulici (Maciu 24–25)
Lotulevu: Na Kana ni Lako Sivia kei na vakararawataki i Karisito ena Were o Kecisemani (Maciu 26)
Vakaraubuka: Vakatovolei, Vakoti ena Kauveilatai, kei na veibulu (Maciu 27:1–61)
Vakarauwai: E davo toka na yagoi Karisito ena ibulubulu (Maciu 27:62–66) ni veiqaravi tiko na Yalona ena vuravura ni yalo (VV 138)
Sigatabu: Nona rairai mai na Karisito sa vakaturi cake tale mai na mate (Maciu 28:1–10)

Na iOtioti ni Vakayakavi, mai vei Carl Heinrich Bloch

Maciu 28:1–10; Luke 24:13–35; Joni 20:19–29; 1 Korinica 15:1–8, 55

E levu na ivakadinadina era tukuna na Tucake tale nei Jisu Karisito.

Vakasamataka mada ena vakacava beka vei iratou na tisaipeli ni ratou sa sarava na vakalialiai, vakalolomataki ka qai vakoti ena kauveilati o Jisu. Eratou a vakadinadinataka na Nona kaukauwa, vakila na dina ni Nona ivakavuvuli, ka vakabauta ni o Koya na Luve ni Kalou. Ni ra sarava tu na Nona vakamatei, e a vakatovolei beka kina eso, ia, era qai vakadinadinataka na cakamana cecere ni Nona Tucaketale.

Na cava o rawa ni vulica mai na nodra itukutuku na vakadinadinataka na Tucaketale ni iVakabula? Makataka se vola na veika era sotava na tamata yadua oqo ena Maciu 28:1–10; Luke 24:13–35; Joni 20:19–29; 1 Koronica 15:1–8, 55. (Me kilai ni tiko talega e so tale na ivakadinadina ni Karisito e tucake talega ena 3 Nifai 11; Momani 1:15; Ica 12:38–39; Vunau kei na Veiyalayalati 76:19–24; 110:1–10; kei na Josefa Simici—Ai Tukutuku 1:15–17.) Ena veitukutuku oqori, na cava e vaqaqacotaka na nomu vakabauta ena ibalebale dina ni nona Tucaketale na Turaga? Ni oti na Tucake tale ni iVakabula, era tucake talega e so tale ka basika yani vei ira e vuqa (raica na Maciu 27:52–53; 3 Nifai 23:9). Na cava o nanuma ni bibi kina me volaitukutukutaki vakarua na veika oqo ena Volatabu kei na iVola i Momani?

Raica talega na “Jesus Is Resurrected,” “The Risen Lord Appears to the Apostles,” “Blessed Are They That Have Not Seen, and Yet Have Believed” (videos, LDS.org).

1 Pita 1:3–11

E solia vei au na inuinui kei na reki o Jisu Karisito.

Na luvena yalewa o Elder Paul V. Johnson ko Alisa, ka tauvi koya na kenisa ena itagede ka sa sega ni rawa ni vakabulai sa vosota e vuqa na veisele vakavuniwai, e vakaraitaka o koya na “inuinui bulabula” me vaka e vakamacalataka o Pita ena 1 Pita 1:3–11. E a wilika o Elder Johnson e dua na ivola e a vola o Alisha ena gauna ni Siganimate, ni vo vakalailai ga me takali yani: “E ivakananumi ni veika kece au vakanuinui kina na Siganimate. Ni dua na siga au na vakabulai ka dua na siga au na taucoko tu. Dua na siga ena sega ni tiko e yagoqu na ka vakaukamea se palasitika. Dua na siga ena galala mai na rere na lomaqu ka galala na noqu vakasama ena lomaocaoca. … Au marautaka niu vakabauta dina na bula totoka e tarava mai na mate” (“Ia, Ena Sega Tale na Mate,” Ensign se Liaona, Me 2016, 121).

Na vosa cava se malanivosa ena 1 Pita 1:3–11 e solia vei iko nai nuinui baleti Jisu Karisito? Na gauna cava o vakila kina na inuinui oqori? Ena rawa vakacava mo wasea na inuinui e tiko vei iko baleti Jisu Karisito kei ira o lomana?

Raica talega na Alama 27:28; 36:1–24; 3 Nifai 9:11–17; Moronai 7:40–41.

iVakatakilakila

ivakatakilakila ni vuli vakavuvale

Eso na Vakasama me baleta na Vuli iVolanikalou Vakavuvale kei na Lotu Vakavuvale ena Moniti

Ni o wilika na ivolanikalou kei na nomu vuvale, ena rawa ni vukei iko na Yalo mo kila na ivakavuvuli cava mo vakabibitaka ka veivosakitaka me rawa ni sotavi kina na gagadre ni nomu vuvale. Oqo eso na vakatutu:

Mormon.org

Na iwasewase ni “Holy Week” ena mormon.org/easter e tiko kina na veika kece e yaco kei na kena matailalai ni veisiga yadua ena iotioti ni macawa ni nona bula na iVakabula. Ena siga yadua ena loma ni macawa e rawa ni taleva lesu nai vakamacala mo dou raica na veika e vakayacora na iVakabula ena siga oya, se rawa ni dou wilika vakamatavuvale na Nona iotioti ni macawa (raica e dua nai tuvatuva ena iwasewase ni “Vakasama ni Vuli Volanikalou Yadua”).

Serenilotu kei na Nodra Sere na Gonelalai

Navuca mo dou lagata vata na sere me baleta na Veisorovaki ni iVakabula kei na Tucake tale ena macawa oqo, oka kina e so o sega ni kila (raica na ituvatuva vakaiulutaga ena Serenilotu se Nodra Sere na Lalai, ena ruku ni ulutaga me vaka na “Veisorovaki,” “Siganimate,” se “Tucake tale”). Me vukei ira na lewenivuvale me ra vulica na sere, e rawa ni o vakaraitaka na iyaloyalo e sala vata kei na qaqana.

“Se Bula Tiko Na Karisito: Na Nodra iVakadinadina na iApositolo”

Wilika vakamatavuvale, na “Se Bula Tiko na Karisito: Na iVakadinadina ni Apositolo” (Ensign se Liaona, Epe. 2000, 2–3; raica talega na LDS.org), ka sureti ira yadua na lewe ni vuvale me digia e dua nai tukutuku mai na ivakadinadina me wasei kei ira na tani. Me ivakaraitaki, e rawa ni o tauyavutaka na ivola kabi me vakaraitaki ena tabana ni veimaliwai raraba ena initaneti, ena mata ni nomu katuba, se ena nomu katuba leka.

Me ikuri ni tukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Me Baleta na Lalai.

Vakavinakataki ni Vuli Yadudua

Vakarautaka na Lalawa e rawa ni o yacova. E vica ga na miniti ena dua na siga mo vulica na ivolanikalou ena rawa ni vakalougatataka na nomu bula. Yalataka mo vuli ena veisiga, vakasaqara na sala me rawa ni o vakananumi iko kina me baleta na nomu yalayala, ka vakayacora na nomu igu vinaka sara mo rawata.