“17--23 Iuni Mataio 27; Mareko 15; Luka 23; Ioane 19: ‘Ua Mae’a’” Sau, Mulimuli Mai ia te Au—Mo Tagata Taitoatasi ma Aiga: Feagaiga Fou 2019 (2019)
“17--23 Iuni Mataio 27; Mareko 15; Luka 23; Ioane 19,” Sau, Mulimuli Mai ia te Au—Mo Tagata Taitoatasi ma Aiga: 2019
Ecce Homo, saunia e Antonio Ciseri
17--23 Iuni
Mataio 27; Mareko 15; Luka 23; Ioane 19
“Ua Mae’a”
Mataio 27; Mareko 15; Luka 23; ma le Ioane 19 e aofia ai faamatalaga o toe itula o le soifuaga faaletino o le Faaola. Saili ia lagonaina Lona alofa mo oe a o e suesue e uiga i Lana taulaga ma le maliu.
Tusifaamaumau Ou Lagona Uunai
I upu uma ma galuega, sa faataitai mai ai e Iesu Keriso le alofa moni—le mea lea na ta’ua e le Aposetolo o Paulo o le alofa mama (tagai 1 Korinito 13). E leai se taimi na sili ona iloagofie ai nai lo toe itula o le soifua o le Faaola. O Lona filemu mamalu i mata o tuua’iga pepelo sa faaalia ai o Ia “e le faaitaitagofie” (1 Korinito 13:5). O Lona naunautai e gauai atu i le sasaina, tauemuga, ma le faasatauroga---e ui ina ua alu Lona mana e faauma ai Ona mafatiaga---sa faaalia foi faapea sa Ia “agamalu” ma ”onosai i mea uma” (1 Korinito 13:4, 7). O Lona mutimutialofa i Lona tina ma Lona alofa mutimutivale i e na faasatauroina o Ia---i le taimi o Ona puapuaga e le mafaatusalia---sa faaalia ai sa Ia “lei sailia [Ana] lava mea” (1 Korinito 13:5). I Ona toe taimi i le fogaeleele, sa faia ai e Iesu mea sa Ia faia i Lana galuega atoa i le tino---o le aoao mai o i tatou i le faaalia mai ia i tatou. E moni lava, o le alofa moni o le “alofa mama o Keriso” (Moronae 7:47).
Manatu mo Suesuega Faaletagata Lava Ia o TusitusigaPaia
Mataio 27; Mareko 15; Luka 23; Ioane 19
O le naunautaiga o Iesu Keriso e mafatia ua faaalia ai Lona alofa mo le Tama ma mo i tatou uma.
E ui ina i ai le mana o le Faaola e aumaia ai i lalo “lekeona o agelu” (Mataio 26:53), ae sa Ia filifili lava Ia e onosaia faamasinoga le tonu, o tauemuga mataga, ma le tiga faaletino e le mafuatiaina. Aisea na Ia faia ai? “Ona o lona agalelei alofa,” na molimau mai Nifae, “ma lona talitiga i le fanauga a tagata” (1 Nifae 19:9).
E mafai ona amata lau suesuega o toe itula o le Faaola i le faitauina lea o le 1 Nifae 19:9. O gafea o le Mataio 27; Mareko 15; Luka 23; ma le Ioane 19 e te maua ai ni faataitaiga o mea taitasi na ta’ua e Nifae o le a mafatia ai Iesu?
“[Latou] te faamasino ia te ia o se meanoa”
“Na latou faatiga ia te ia.”
“Na latou fepo ia te ia.”
“Ua latou feanu ia te ia.”
O fea fuaitau ua fesoasoani e te lagonaina ai le “alofa agalelei” o le Tama Faalelagi ma Iesu ia te oe? O le fea o uiga faaleatua na faaalia e le Faaola ua musuia oe e atinae atoatoa?
Tagai foi “Jesus Is Condemned before Pilate” and “Jesus Is Scourged and Crucified” (videos, LDS.org).
Mataio 27:27–49, 54; Mareko 15:16–32; Luka 23:11, 35–39; Ioane 19:1–5
O le tauemuina o upumoni a le Atua e le tatau ona faavaivaia ai lo’u faatuatua.
E ui ina sa onosaia e Iesu tauemuga i Lana galuega atoa, ae sa atili ai ona faateteleina i le taimi o le sasaina o Ia ma le Faasatauroga. Ae o lea tauemuga sa lei mafai ona suia le upumoni: O Iesu o le Alo o le Atua. A o e faitau e uiga i le faamaasiasiga sa onosaia e Iesu, mafaufau e uiga i tetee ma tauemuga o loo feagai ma Lana galuega i aso nei. O a ni malamalamaaga ua e maua e uiga i le onosaia o tetee? O le a se mea ua uunaia ai oe e uiga i upu a le taitai ole toaselau? Mataio 27:54?
Pe na lafoaia e le Tama Faalelagi ia Iesu i luga o le satauro?
Na aumaia e Elder Jeffrey R. Holland le malamalamaaga lenei: “Ou te molimau atu … e le’i lei lafoaia e se Tama atoatoa Lona Alo i lena itupo. … Ae peitai, o lena taulaga silisili ese a Lona Alo atonu na atoatoa a faapei ona ofofua mai ma tasi lava, na aveesea e le Tama i sina taimi ititi mai ia Iesu le mafanafana o Lona Agaga, le lagolago atu o Lona lava i ai patino. … Aua o le Togiola [a le Faaola] e le iu ma e faavavau, sa tatau ona Ia iloa pe faapei le oti faaletino ma le faaleagaga, ia iloa pe faapei pe a aveesea le Agaga o le Atua, ma tuua toatasi ai le tagata, ma atuatuvale ma ua leai se faamoemoe ” (“Sa Leai Se Tasi na I Ai Faatasi ma Ia,” Ensign po o le Liahona, Me 2009, 87–88).
O le Faaola o lo tatou faataitaiga o le faamagalo atu.
O a ni ou lagona pe a e faitauina upu a le Faaola i le Luka 23:34? (tagai i le malamalamaaga na tuuina mai i le Faaliliuga a Iosefa Samita i le vaefaamatalaga c). I le faasino atu i upu a le Faaola, na aoao mai ai e Peresitene Henry B. Eyring: “E tatau ona tatou faamagalo atu ma aua nei faatauagavale ia i latou o e tausuai mai ia i tatou. Na faia e le Faaola le faataitaiga sili i luga o le satauro. … Tatou te le iloa loto o e na tausuai mai ia i tatou” (“Ina Ia Tasi i Tatou,” Liahona, Me 1998, 68). E mafai faapefea ona fesoasoani lenei fuaiupu ia te oe pe afai e faigata ia te oe ona faamagalo atu i se tasi?
O le a le uiga o le “parataiso” i le fetalaiga a le Faaola i le pagota?
I tusitusiga paia, o le upu parataiso e masani ona faauiga “o se nofoaga o le filemu ma le fiafia i le lalolagi o agaga pe a mavae le olaga nei”---o se nofoaga ua saunia mo e amiotonu. Na aoao mai e le Perofeta o Iosefa Samita e faapea o le upu parataiso i le Luka 23:43 “o se faaliliuga ua sese; o le fetalaiga moni a le Alii e fapea o le i ai o le pagota faatasi ma ia i le lalolagi o agaga” (Faamaoni i le Faatuatua, 111; tagai foi Joseph Smith, Journal, June 11, 1843, josephsmithpapers.org). I le lalolagi o agaga, o le a faalogo ai le pagota i le talalelei o folafola atu.
Manatu mo Suesuega Faaleaiga o Tusitusiga Paia ma Afiafi Faaleaiga
A o faitauina faatasi ma lou aiga ia mau, e mafai ona fesoasoani le Agaga e te iloa ai po o a mataupu faavae e faamamafa ma talanoaina ina ia taulimaina ai manaoga o lou aiga. O ni nai fautuaga nei:
E ui ina sa iloa lelei e Iuta ia Iesu, ae sa ia “fulitua mai ia [Iesu] ma sa tiga ona o ana upu” (Faaliliuga Iosefa Samita, Mareko 14:31 [in Mareko 14:10, vaefaamatalaga a]). Mata o le a le mea e ono faapogai ai ona liliu ese mai le Faaola tagata e foliga mai e malolosi a latou molimau? E mafai faapefea ona tatou tumau faamaoni ia Iesu Keriso?
Mataio 27:11–26; Mareko 15:1–15; Luka 23:12–24; Ioane 19:1–16
Aisea na tuuina atu ai e Pilato ia Iesu ina ia faasatauroina, tusa pe sa ia iloa e mama Iesu? O a lesona tatou te aoaoina mai le aafiaga o Pilato e uiga i le tu atu mo le mea sa’o? E ono fesoasoani mo lou aiga le faatino i taga o faataitaiga e mafai ai ona latou faata’ita’ia le tutu atu mo le mea sa’o.
“Ma ua ave e ia lona satauro ua maliu atu foi i … Kolokota”(Ioane 19:17).
Atonu e mafai ona filifili se tasi pe sili atu o fetalaiga a le Faaola na faia i luga o le satauro, o loo maua i fuaiupu nei, i tagata taitasi o le aiga ma fai i ai e faasoa mai mea latou te aoaoina e uiga i le Faaola ma Lana misiona.
O faapefea ona faamalolosia a tatou molimau o Iesu o le “Alo o le Atua”? ona ua tatou faitau e uiga i le Faasatauroga?
O a mea ua tatou aoao mai i nei fuaiupu e uiga i le auala e tatau ona tatou alolofa ma lagolago ai tagata o le aiga?
Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.
Faaleleia o Lo Tatou Aoao Atu
Faataitai i le soifuaga o le Faaola “E fesoasoani tele le suesueina o ala na aoao mai ai le Faaola—o metotia sa Ia faaaogaina ma mea sa Ia fetalai ai. Ae o le mana a le Faaola e aoao ma siitia ai isi na sau mai le … ituaiga o tagata na avea ai o Ia. O le filiga tele e te taumafai ai e ola ai e pei o Iesu Keriso, o le a atili ai ona mafai ona e aoao atu e pei o Ia” (Aoao Atu i le Ala a le Faaola, 13).
O Keriso i luga o le Satauro, saunia e Carl Henrich Bloch.