Roma 1–6

O tusi o tusi ia sa tusia e taitai o le Ekalesia i le Au Paia i vaega eseese o le lalolagi. Sa tusia e le Aposetolo o Paulo le tele o tusi i le Feagaiga Fou—e amata i le Roma ae faaiu i le Filemoni. O ana tusi ua faatulagaina i le uumi. E ui o le [tusi] a Roma o le tusi muamua i le Feagaiga Fou, ae o le mea moni sa tusia i le latalata i le faaiuga o malaga faafaifeautalai a Paulo. Mo nisi faamatalaga e uiga i tusi, tagai i le Bible Dictionary, “Pauline Epistles.”

O faauigaga nei e mafai ona fesoasoani ia e malamalama lelei ai i le Tusi i Roma:

O le tulafono:Ina ua tusi Paulo e uiga “i le tulafono,” sa ia faatatau atu i le tulafono a Mose. E faapena foi, o le upu “galuega” i tusitusiga a Paulo e masani ona faatatau i sauniga o le tulafono a Mose. Sa faatusatusa e Paulo le tulafono lenei ma “le tulafono o le faatuatua” (tagai Roma 3:27–31), po o le aoaoga faavae a Iesu Keriso, o le punavai moni o lo tatou olataga.

Peritomeina, le peritomeina:I aso anamua, o le peritomeina sa o se faailoga po o se faatusa o le feagaiga na osia e le Atua ma Aperaamo. Sa faaaoga e Paulo le upu “peritomeina” e faatatau atu i tagata Iutaia (o tagata o le feagaiga) ma le “le peritomeina” e faatatau i tagata o Nuuese (o i latou e le aofia i le feagaiga faaAperaamo). Ua le toe manaomia le peritomeina e avea ma se faailoga o le feagaiga a le Atua ma Lona nuu (tagai Galuega 15:23–29).

Tauamiotonuina, Tauamiotonu:O upu nei e faasino i le faamagaloina po o le faamagaloga o agasala. Pe a tauamiotonuina i tatou, ua faamagaloina i tatou, folafola atu le le sala, ma faasaoloto mai faasalaga e faavavau mo a tatou agasala. E pei ona faamalamalama mai e Paulo, ua mafaia lenei mea e ala mai ia Iesu Keriso (tagai Taiala i Tusitusiga Paia, “Justification, Justify,” scriptures.lds.org; tagai foi D. Todd Christofferson, “Justification and Sanctification,” Ensign, Iuni 2001, 18–25). I le faaRoma, o upu e pei o le amiotonu ma le amiosao e mafai ona vaaia o ni upu uiga tutusa ma upu e pei o le tonu ma le tauamiotonuina.

Alofa tunoa:O le alofa tunoa o le “fesoasoani po o le malosi faalelagi, e tuuina mai e ala i le alofa mutimutivale ma le alofa tele o Iesu Keriso.” E ala mai i le alofa tunoa, o le a toetutu ai tagata uma ma maua le tino ola pea. E faapena foi, o le “Alofa tunoa, o se mana gafatia lea e mafai ai e alii ma tamaitai ona maua le ola e faavavau ma le faaeaga pe a uma ona faia a latou lava taumafaiga silisili.” Tatou te le maua le alofa tunoa e ala i a tatou taumafaiga; nai lo o lena, o le alofa tunoa lea e aumaia ia i tatou le “malosi ma le fesoasoani e fai ai galuega lelei lea semanu [tatou] te le mafai ona faatumauina” (Bible Dictionary, “Grace”; tagai foi Dieter F. Uchtdorf, “The Gift of Grace,” Ensign po o le Liahona, Me 2015, 107; 2 Nifae 25:23).

Ua faaalia i aoaoga a Paulo e faapea, o nisi o tagata Kerisiano Iutaia i Roma sa talitonu pea o le usiusitai i sauniga ma faatulagaga o le tulafono a Mose e aumai ai le olataga. E foliga mai o lenei mea o se faafitauli e le o toe faatatau i ai talu ai tatou te le o ola i le tulafono a Mose. Ae a o e faitau i tusitusiga a Paulo, ae maise lava i le Roma 2:17–29, mafaufau i a oe lava taumafaiga e ola i le talalelei. Pe o taitai atu oe e au faatinoga i fafo, e pei o le tagofia o le faamanatuga po o le auai i le malumalu, i le liua ma le faamalosia o lou faatuatua ia Keriso? (tagai Alema 25:15–16). E faapefea ona e faamautinoaina o au faatinoga i fafo o loo taitai atu ai oe i se suiga o le loto?

Tagai foi Dallin H. Oaks, “O Le Luitau ia Avea ma se Tasi,” Ensign, Nov. 2000, 32–34.

E mafai ona lagona e nisi o tagata le lotovaivai i le tautinoga lototoa a Paulo e faapea “e leai se amiotonu, e leai lava se tasi” (Roma 3:10). Ae o loo i ai foi savali o le faamoemoe i le Roma. Vaavaai mo ia [savali] i le mataupu 3 ma le 5, ma mafaufau pe aisea ua avea ai le “ua agasala tagata uma lava, ma ua le oo i le viiga mai le Atua” (Roma 3:23) o se laasaga taua agai atu i le aoao ia “mitamita…ma le faamoemoe” e ala ia Iesu Keriso (Roma 5:2).

Na aoao mai Paulo o le talalelei e tatau ona suia le auala o tatou ola ai. O a ni faamatalaga i le Roma 6 o le a e faaaogaina e fesoasoani ai i se tasi ia malamalama i le ala ua fesoasoani ai le talalelei ia e “savali i le ola toefuataiina”? (fuaiupu  4). O a ni aafiaga patino e te faasoaina atu?

E mafai faapefea ona tatou faaalia tatou te “le ma i le talalelei ia Keriso”?

E ono fai mai nisi o tagata talu ai ona ua “nao le alofa tunoa o le [Atua] ua tauamiotonuina ai i tatou” (Faaliliuga a Iosefa Samita, Roma 3:24 [i le Roma 3:24, vaefaamatalaga a]), ua leai ai ni tulaga manaomia tatou te maua ai le alofa tunoa. E ui ina le mafai ona lava a tatou mea e fai e “maua” ai le alofa tunoa o le Atua, e le fai mai le Atua ia tatou faia ni mea faapitoa ia maua ai. O le a se mea e mafai ona tatou faia e maua ai le alofa tunoa?

O a ni puapuaga ua tatou oo i ai? O faapefea ona fesoasoani nei puapuaga ia tatou atinae ai le onosai, potomasani, ma le faamoemoe?

O le a le tala a Paulo i nei fuaiupu e uiga i le faafaatusa o le papatisoga? Atonu e mafai ona fuafua lou aiga e auai i se papatisoga o loo loma. Pe e mafai e se tagata o lou aiga ona faasoa mai ni ata po o ni mea e manatua mai lona papatisoga. E faapefea ona fesoasoani le osia ma le tausia o a tatou feagaiga o le papatisoga ia tatou “savali i le ola toefuataina”?

Ata

o se alii o loo papatisoina le isi alii i se vaituloto