“12-18 Aokuso. Roma 7–16: ‘Faatoilaloina le Leaga i le Lelei’” Sau, Mulimuli Mai ia te Au—Mo Tagata Taitoatasi ma Aiga: Feagaiga Fou 2019 (2019)
“12-18 Aokuso. Roma 7–16,” Sau, Mulimuli Mai ia te Au—Mo Tagata Taitoatasi ma Aiga: 2019
12-18 Aokuso
Roma 7–16
“Faatoilaloina le Leaga i le Lelei”
Ua na o ni mataupu faavae laiti o le talalelei o loo i le Roma 7–16 e mafai ona faaaofia i le otootoga lenei, o lea la, aua le faatapulaaina oe lava i mea ua talanoaina iinei. Ia gauai atu i le musumusuga e te maua ao e suesue.
Tusifaamaumau Ou Lagona Uunai
Ao ia amatalia lana tusi i Roma, sa faafeiloai e Paulo tagata o le Ekalesia i Roma i le tauina o i latou ua “alofaina e le Atua” o e “ua valaauina e fai ma tagata paia.” Sa ia faapea atu “[sa] ta’ua lo [latou] faatuatua i le lalolagi uma” (Roma 1:7–8). E ui ina sa faaalu e Paulo le tele o lana tusi e faasa’o ai manatu sese ma amioga faaletonu, e foliga mai sa manao foi o ia e faamautinoa atu i nei tagata Kerisiano fou liliu mai, o i latou moni o Au Paia sa alofaina e le Atua. I se faaalia faamaualalo o le loto malamalama, sa faailoa atu ai e Paulo sa ia lagonaina le pei o se “tagata malaia” i nisi o taimi (Roma 7:24), ae o le talalelei a Iesu Keriso sa tuuina atu ia te ia le malosi e faatoilalo ai le agasala (tagai Faaliliuga Iosefa Samita, Roma 7:22–27 [i le faaiuga o le Tusi Paia]). Sa ia faasoa mai ni fautuaga maaleale mo i tatou uma o e o loo tauivi ia lagona le alofaina ma mo i latou o e foliga mai e le mafai ona oo atu i le avea ma ni tagata paia. “Aua le faatoilaloina oe i le leaga,” sa ia fai mai ai—i le leaga i le lalolagi ma le leaga i totonu o i tatou lava—“a ia e faatoilaloina le leaga i le lelei” (Roma 12:21).
Manatu mo Suesuega Faaletagata Lava Ia o Tusitusiga Paia
Afai ou te mulimuli i le Agaga, e mafai ona ou faatoilaloina le agasala ma saunia ai mo se tofi faatasi ma le Atua.
E ui lava ina mavae le ulu atu i se “ola toefuataiina” e ala i le sauniga o le papatisoga (Roma 6:4), atonu sa e lagonaina nisi o feteenaiga i totonu lea na faamatalaina e Paulo i le Roma 7—o le “tau le taua” i le va o le tagata o le lalolagi ma o tatou manaoga amiotonu (Roma 7:23). Ae sa tautala foi Paulo e uiga i le faamoemoe i le Roma 8:23–25. O a ni pogai mo lenei faamoemoe e te maua i le mataupu 8? E mafai foi ona e vaavaai mo faamanuiaga ia e oo mai mai le “nofo [o] le Agaga o le Atua i totonu ia te outou” (Roma 8:9). E mafai faapefea ona e sailia atoatoa atili le mafutaga a le Agaga Paia i lou olaga?
O le mamalu faavavau o loo faatalitali mai i e faamaoni e sili mamao atu i tofotofoga o le olaga faitino.
E nao ni nai tausaga talu ona uma ona tusi e Paulo le tusi lenei, ae pagatia le Au Paia i Roma i sauaga matautia leaga. O le a se mea e te maua i le Roma 8:17–39 lea atonu e ono fesoasoani i nei Au Paia i le taimi na oo atu ai sauaga? E mafai faapefea ona faatatau nei upu ia te oe ma tofotofoga o loo feagai nei ma oe?
Vaavaai mo fesootaiga i le va o nei fuaiupu ma le fautuaga lenei mai ia Sister Linda S. Reeves: “Ou te le iloa pe aisea ua tele ai o tatou tofotofoga, ae o lo’u lava lagona patino, uso e, e maoae le taui, e matuai faavavau ma tumau, e matua tumu i le olioli ma e le oo i ai lo tatou malamalama pe a oo i lena aso o le taui, atonu tatou te fia fai atu i lo tatou Tama alofa ma alofa mutimutivale, ‘Pe sa na o le pau lava lena o le mea sa manaomia?’ Ou te talitonu afai e mafai ona tatou manatuaina i aso taitasi ma iloa le loloto o le alofa o lo tatou Tama Faalelagi ma lo tatou Faaola mo i tatou, o le a tatou naunau e faia soo se mea ina ia tatou toe foi atu ai i lo La’ua afioaga, ma siomia i lo La alolofa e faavavau. O le a le mea e afaina ai, ... mea tatou te mafatia ai iinei pe afai, i le iuga, o na tofotofoga o mea tonu lava na o le a faaagavaaina ai i tatou mo le ola e faavavau ma le faaeaga i le malo o le Atua faatasi ma lo tatou Tama ma le Faaola?” (“O Le Mana o Folafolaga e Tausia,” Ensign po o le Liahona, Nov. 2015, 11).
Filifili po o le a lau mea o le a fai ia “manatua ai ma iloa i aso taitasi” le alofa o le Atua mo oe.
O le a le uiga o le faamatalaga a Paulo o le “tofia anamua,” “filifiliga,” ma le “silafia anamua”?
Sa faaaoga e Paulo nei faaupuga e aoao mai ai e faapea, o nisi o fanau a le Atua sa tofia anamua, pe muai tofia, e maua faamanuiaga ma tiute faapitoa ina ia mafai ona latou faamanuiaina ai malo uma o le lalolagi (tagai Taiala i Tusitusiga Paia, “Election”). Sa faavae lenei mea i le muai silafia e le Atua o le naunau o Lana fanau e mulimuli ia Iesu Keriso ma avea faapei o Ia (tagai foi Efeso 1:3–4; 1 Peteru 1:2). Ae peitai, ua faamamafa mai Paulo i le Roma 9–11 e tusa lava pe na faapefea ona tatou o mai i totonu o le aiga o Isaraelu—po o le avea ma se tagata o le Ekalesia—e tatau i tagata uma ona maua le faaolataga mo le tagata lava ia e ala i le faatuatua ia Iesu Keriso ma le usiusitai i Ana poloaiga.
Mo nisi faamatalaga, tagai Alema 13:1–5; “Foreordination,” Gospel Topics (topics.lds.org).
Ua valaaulia a’u e Paulo e avea ma se Au Paia moni ma se e mulimuli ia Iesu Keriso.
O mataupu mulimuli e lima o le Roma o loo i ai ni faatonuga patino e faatatau i auala e tatau ona ola ai le Au Paia. Atonu e le mafai ona e faaaogaina atoa lenei fautuaga i le taimi e tasi, ae ia faalogo i le Agaga, ma o le a fesoasoani o ia i lou sueina o se [fautuaga] se tasi pe lua e mafai ona e amata galue ai nei. Faasoa atu ou manao i lou Tama Faalelagi i le tatalo, ma ole atu mo Lana fesoasoani.
Manatu mo Suesuega Faaleaiga o Tusitusiga Paia ma Afiafi Faaleaiga
A o e faitauina ma lou aiga ia tusitusiga paia, e mafai e le Agaga ona fesoasoani ia te oe ia iloa po o a mataupu faavae e faamamafa ma talanoaina ina ia taulimaina ai manaoga o lou aiga. O ni nai fautuaga nei:
Ina ia fesoasoani i lou aiga ia malamalama atili e uiga i le “tau le taua” na faamatalaina e Paulo i le fuaiupu lenei, mafaufau e faasoa atu le tala i luko i le tusiga a Elder Shayne M. Bowen “Agency and Accountability” (New Era, Sete. 2012, 8–9).
E mafai ona fesoasoani le savali a Elder Wilford W. Andersen “O Le Musika o le Talalelei” (Ensign po o le Liahona, Me 2015, 54–56) e faamalamalama atili ai le mea o loo aoao mai e Paulo e uiga i le tulafono, galuega, ma le faatuatua. Atonu foi e fiafia lou aiga e talatalanoa i lana lauga ma taumafai e sisiva i le musika ma le leai o se musika. E faapefea ona pei le siva e aunoa ma se musika i le usitai i le talalelei e aunoa ma le faatuatua?
Na aoao mai Elder Wilford W. Andersen, “O le musika o le talalelei o le lagona fiafia faaleagaga.”
E faapefea ona aumaia ia i tatou e le suesue i le afioga a le Atua, ia faamanuiaga o loo faamatalaina i nei fuaiupu? Atonu e mafai e tagata o le aiga ona faasoa mai nisi o a latou mau e sili ona fiafia i ai (tagai foi 2 Nifae 25:26).
O le a le uiga o le, ia fai i tatou lava “o le taulaga ola, ma le paia, ma le malie i le Atua”? (Roma 12:1).
Atonu o le a faamanuiaina lou aiga mai le suesue i le fautuaga a Paulo e uiga i le faamasino atu ma le fefinauai i mea patino e fiafia ai isi tagata. Atonu e mafai ona e talanoa i auala talafeagai e tali atu ai pe a ese ia filifiliga a isi mai ia te oe. E mafai faapefea ona tatou magafagafa atili i auala e aafia ai isi tagata i a tatou lava filifiliga? O vitio “Judging Others? Stop It!” ma le “Looking through Windows” (LDS.org) e mafai ona tuuina mai ni malamalamaaga faaopoopo i lenei autu.
Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.
Faaleleia o Lo Tatou Aoao Atu
Tuu le avanoa i tamaiti e faailoa ai lo latou fatufatuai. “Pe a e valaaulia le fanau e fatufatu se mea e faatatau i se mataupu faavae o le talalelei, ia e fesoasoani ia latou malamalama lelei i le mataupu faavae. … Tuu atu ia i latou e fauina, tusi ni ata, valivali, tusitusi, ma fatufatu” (tagai Aoao Atu i le Ala o le Faaola, 25).
Abide with Me, saunia e Del Parson