“16-22 Setema. 2 Korinito 8-13: ‘E Alofa le Atua i Le Ua Foai ma le Loto Malie’” Sau, Mulimuli Mai ia te Au—Mo Tagata Taitoatasi ma Aiga: Feagaiga Fou 2019 (2019)
“16-22 Setema. 2 Korinito 8-13,” Sau, Mulimuli Mai ia te Au—Mo Tagata Taitoatasi ma Aiga: 2019
16-22 Setema
2 Korinito 8–13
“E Alofa le Atua i Le Ua Foai ma le Loto Malie”
O le tusifaamaumauina o lagona faaleagaga o le a fesoasoani e te manatua ai mea e te aoaoina i le taimi o lau suesuega o tusitusiga paia. E mafai ona e tusia i se apitalaaga mo suesuega, fai ni faamatalaga pupuu i avanoa i autafa o au tusitusiga paia, faaopoopo faamatalaga i lau polokalama o le Potutusi o le Talalelei [Gospel Library], pe pue se talatalaga o ou mafaufauga.
Tusifaamaumau Lagona e Uunaia ai Oe
O le a se mea e te faia pe a e faalogo sa tauivi i le mativa se aulotu o le Au Paia i se isi nofoaga? O le tulaga lenei sa faamatala atu e Paulo i le Au Paia i Korinito i le 2 Korinito 8–9. Sa faamoemoe na te faatauanaua le Au Paia i Korinito e foai atu nisi o a latou mea e tele i Au Paia sa manaomia le fesoasoani. Ae o tua atu o se talosaga mo foai, o loo i ai foi i upu a Paulo ni upumoni loloto e uiga i le foai atu: “Ia taitoatasi ma foai e pei ona filifili i lona loto; aua ma le tiga, aua foi ma le faatauanauina: aua e alofa le Atua i le ua foai ma le loto malie” (2 Korinito 9:7). I o tatou aso, o looi ai pea le Au Paia i le lalolagi atoa o loo manaomia le fesoasoani. O nisi taimi, o le mea sili lava tatou te faia mo i latou o le anapogi ma foai atu taulaga anapogi. I isi tulaga, o le tatou foai atu e mafai ona sili atu le tuusao ma le patino. Po o a lava a tatou ituaiga ositaulaga e fai, e aoga le iloilo o o tatou lagona e faaosofia ai le foai atu. Pe o a tatou osigataulaga o ni faaalia lea o le alofa? Aua, o le alofa lea e mafua ai le loto malie o se tagata foai.
Manatu mo Suesuega Faaletagata Lava Ia o Tusitusiga Paia
E mafai ona ou faasoa atu ma le loto malie mea ua maua e faamanuia ai e matitiva ma e le tagolima.
E toatele lava tagata o e o loo manaomia le fesoasoani i le lalolagi atoa. E mafai faapefea ona tatou faia se eseesega? Sa ofoina mai e Elder Jeffrey R. Holland le fautuaga lenei: “Mauoa pe mativa, e tatau ona tatou ‘fai le mea ua tatou mafai’ pe a i ai nisi e le tagolima [tagai Mareko 14:6, 8]. … [Le Atua] o le a fesoasoani ma taiala outou i ni galuega agaalofa faalesoo pe afai o outou mananao ma le lotofuatiaifo ma tatalo ma saili mo ni auala e tausi ai poloaiga ua Ia tuuina mai pea lava pea ia i tatou” (“Pe le o i tatou ea o ni Tagata Aisi?” Ensign po o le Liahona, Nov. 2014, 41).
Faitau le 2 Korinito 8:1–15; 9:6–15, ma ia malamalama i mataupu faavae sa aoao mai e Paulo e uiga i le tausiaina o e matitiva ma e le tagolima. O le a se mea ua musuia ai oe i le fautuaga a Paulo? Atonu e te tatalo mo le taitaiga e uiga i le mea e mafai ona e faia e faamanuia ai se tasi o manaomia le fesoasoani. Ia mautinoa e faamaumau ou lagona e te maua ma faatino.
Tagai foi Mosaea 4:16–27; Alema 34:27–29; Henry B. Eyring, “E Le o Lenei Ea le Anapogi Ou te Loto I Ai?” Ensign po o le Liahona, Me 2015, 22–25; Linda K.Burton, “Sa Fai A’u ma Tagata Ese,” Ensign po o le Liahona, Me 2016, 13–15.
E taumafai perofeta pepelo e taufaasese.
E mafai ona fesoasoani ia e malamalama i lenei mataupu le iloa ua tulai ae “aposetolo pepelo” i totonu o le Au Paia i Korinito (2 Korinito 11:13). O le a se mea ua e iloa mai fuaiupu 13–15 e uiga ia i latou o e aoao atu aoaoga faavae sese? O le a se mea ua e aoaoina e uiga i perofeta moni a o e faitau e uiga i aafiaga a Paulo i le avea ma se auauna a Keriso? (tagai fuaiupu 23--33).
E tatau ona “tofotofo” lo’u faamaoni i le talalelei a Iesu Keriso.
Ona o aso nei, e toatele ua saili e taitai ese i tatou “mai le faigofie ia Keriso” (2 Korinito 11:3), atonu e te talia le valaaulia a Paulo e “tofotofo [oe lava], po ua outou i le faatuatua” (2 Korinito 13:5). Mo se faataitaiga, e mafai ona e mafaufau loloto i le mea e mafai ona e tuuesea mai lou olaga lea o le a fesoasoani e te taulai atu ai ia Keriso, pe mafai foi ona e faamaeaina le “Gaoioiga o Uiga” o loo i le Tala’i La’u Talalelei, itulau 135.
O le a “le lagi tua tolu,” ma o ai le tagata sa “segia” i ai?
I fuaiupu nei, sa tautala ai Paulo ia te ia lava, e aunoa ma le ta’uina sao o ia lava—atonu ia aloese ai ma le mimita i lana faaaliga vaaia maoae. O le fasifuaitau o “le lagi tua tolu” e faasino i le malo selesitila (tagai MFF 76:96–98).
Ua lava le alofa tunoa o le Atua e fesoasoani ou te maua ai le malosi i o’u vaivaiga.
Tatou te le iloa po o le a le “mea matuitui i le tino” o Paulo, ae e faigofie ona faatatau i lona naunau ina ia aveeseina. E tofu i tatou uma ma luitau ma faafitauli ua silafia e le Alii e le tatau ona aveesea mai o tatou olaga. Mafaufau po o a ni a oe lava luitau a o e faitau i le 2 Korinito 12:5–10. O le a le mea na aoao atu e Paulo e uiga i vaivaiga? O le a le uiga ia te oe [o le iloa], ua lava le alofa tunoa o le Atua mo oe? Pe ua e maua le mana faamalosi o le Atua?
Tagai foi Mosaea 23:21–24; 24:10–15; Eteru 12:27; Moronae 10:32–33.
O le a le uiga o le tala a Paulo ina ua ia talanoa e uiga i le “mau a le toalua po o le toatolu”?
I taimi o le Feagaiga Tuai, sa manaomia ai ni molimau se toalua pe toatolu e aumaia se tuuaiga e faasaga i se tasi (tagai Teuteronome 19:15). Sa ta’ua e Paulo lenei faiga masani ina ua ia faatatau atu i lana asiasiga lona tolu i Korinito. O faataitaiga i onapo nei o lenei mataupu faavae o molimau e toatele, e aofia ai Molimau e Toatolu o le Tusi a Mamona, o molimau a Iesu Keriso ua tuuina mai i le Tusi Paia ma le Tusi a Mamona, ma le masani a faifeautalai, faiaoga o aiga, ma faiaoga asiasi e molimau atu o ni soa.
Manatu mo Suesuega Faaleaiga o Tusitusiga Paia ma Afiafi Faaleaiga
A o e faitauina ma lou aiga ia tusitusiga paia, e mafai e le Agaga ona fesoasoani ia te oe ia iloa po o a mataupu faavae e faamamafa ma talanoaina ina ia taulimaina ai manaoga o lou aiga. O ni nai fautuaga nei:
O a ni mea e te maua i nei mataupu ua musuia ai lou aiga e aapa atu i e matitiva ma e le tagolima? Atonu o se taimi lelei lea e fuafua ai se faatinoga o se auaunaga faaleaiga mo se tagata o manaomia le fesoasoani.
E iloa e lou aiga se tagata e mafai ona faamatalaina o se “tagata foai loto malie”? E mafai faapefea ona tatou faia a tatou auaunaga i isi ia faateleina le loto malie?
E mafai faapefea ona e aoaoina lou aiga e uiga i le tatou “taua” e faasaga i le amioleaga? Mata o fiafia lou aiga e fau se papuipui po o se olo i nofoa ma palanikeke? O lenei mea e mafai ona taitai atu ai i se talanoaga e faatatau i auala e lafoai ese ai mea e faapea ona taitai ese ai i tatou mai le Atua ma “faatoilaloina manatu uma ia anaana ia Keriso.” O a “auupega” faaleagaga tatou te faaaogaina e pulea ai o tatou mafaufauga? (tagai Efeso 6:11–18).
O le a se mea e mafai ona faia e lou aiga e faateleina ai le taulai atu “[i le faigofie] ia Keriso”?
Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.
Faaleleia o Suesuega Faaletagata Lava ia
Tusifaamaumau lagona. Sa saunoa Elder Richard G. Scott: “O le malamalama ua faamaumauina lelei, o le malamalama lea e mafai ona maua i taimi e manaomia ai. ... [O le tusifaamaumauina o le taitaiga faaleagaga] e faaleleia ai lou ono mauaina o se malamalama faaopoopo” (“Mauaina o le Malamalama Faaleagaga,” Ensign, Nov.1993, 88; tagai foi Aoao Atu i le Ala a le Faaola, 12, 30).
“Ia taitoatasi ma foai e pei ona filifili i lona loto; aua ma le tiga, aua foi ma le faatauanauina: aua e alofa le Atua i le ua foai ma le loto malie” (2 Korinito 9:7).