“9-15 Setema. 2 Korinito 1–7: ‘Ia Outou Lelei ma le Atua’” Sau, Mulimuli Mai ia te Au—Mo Tagata Taitoatasi ma Aiga: Feagaiga Fou 2019 (2019)
“9-15 Setema. 2 Korinito 1–7,” Sau, Mulimuli Mai ia te Au—Mo Tagata Taitoatasi ma Aiga: 2019
9-15 Setema
2 Korinito 1–7
“Ia Outou Lelei ma le Atua”
A o e suesue i tusi a Paulo i Korinito, tusi i lalo nisi o mataupu faavae o le talalelei e te tau i ai ma mafaufau loloto pe faapefea ona e faaaogaina i lou olaga.
Tusifaamaumau Lagona e Uunaia Ai Oe
O nisi taimi, o le avea ma se taitai o le Ekalesia, o lona uiga o le fai atu o nisi o mea faigata. Sa moni lena mea i aso o Paulo e pei foi ona moni i aso nei. O le mea moni, o se tusi na muamua atu mai ia Paulo i le Au Paia i Korinito, sa aofia ai ni aoaiga ma sa mafua ai ni lagona tiga. I le tusi lea sa avea ma 2 Korinito, sa ia taumafai ai e faamalamalama atu le mea na faaosofia ai ana upu malolosi: “Aua o le puapuaga tele atoa ma le atuatuvale o le loto na ou tusi atu ai ia te outou ma loimata e tele; e le’i ina ia faatigaina outou, a ia outou iloa ai lo’u alofa ua matua tele ia te outou” (2 Korinito 2:4). Pe a e i ai i le itu e mauaina nisi o faasa’oga mai se taitai, e matuai fesoasoani lava le iloa e musuia lea e ala i le alofa faaKeriso. Ma e oo lava foi i na tulaga ia e le musuia ai e ala i le alofa faaKeriso], afai tatou te naunau e vaai atu i isi ma le ituaiga alofa lea sa lagonaina e Paulo, e faigofie lava ona tali lelei atu i soo se faatiga. E pei ona fautuaina mai e Elder Jeffrey R. Holland, “Ia agalelei ona o vaivaiga faaletagata—o ou vaivaiga faapea foi vaivaiga o i latou tou te galulue faatasi i se Ekalesia o loo taitaia e alii ma tamaitai e galulue fua. Vagana ai i le tulaga o Lona Alo Pele e Toatasi e atoatoa, na o tagata lē atoatoa lava sa galue ai le Atua” (“Le Alii e, Ua Ou Faatuatua,” Ensign po o le Liahona, Me 2013, 94).
Manatu mo Suesuega Faaletagata Lava Ia o Tusitusiga Paia
2 Korinito 1:3–7; 4:6–10, 17–18; 7:4–7
O ou tofotofoga e mafai ona avea ma se faamanuiaga.
A mafaufau i le tofotofoga sa feagai ma Paulo i lana auaunaga, e le o se mea e faateia ai le tele o mea na ia tusia e uiga i faamoemoega ma faamanuiaga o tofotofoga. Mafaufau i ni auala e mafai ona avea ai ou tofotofoga o se faamanuiaga a o e faitau i le 2 Korinito 1:3–7; 4:6–10, 17–18; ma le 7:4–7. Mo se faataitaiga, atonu e te mafaufau loloto i auala e “faamafanafana mai ia te [oe] e le Atua i [ou] puapuaga uma” ma le ala e mafai ai e oe, i se isi itu, ona “faamafanafana atu ia te i latou, ua maua i se tasi lava puapuaga” (2 Korinito 1:4). Pe atonu foi e te taulai atu i le malamalama o Iesu Keriso lea “ua faapupula mai ... i o matou loto,” e tusa lava pe e te “puapuagatia” ma “fememeai” (2 Korinito 4:6–10).
Tagai foi Mosaea 24:13–17; Gospel Topics, “Adversity,” topics.lds.org.
Ou te maua faamanuiaga ma faamanuia ai isi pe a ou faamagalo atu.
E le tele ni mea tatou te iloa i le tagata lea na faatatau i ai Paulo i le 2 Korinito 2:5–11—pau le mea, sa sala o ia (tagai fuaiupu 5–6) ma sa manao Paulo i le Au Paia e faamagalo o ia (tagai fuaiupu 7–8). Aisea tatou te le mafai ai i nisi o taimi ona “faamauina lo [tatou] alofa i” se tagata sa faatiga ia te oe? ( fuaiupu 8). E faapefea ona afaina isi ma i tatou lava i le taofiofia o le faamagalo atu? (tagai fuaiupu 7, 10–11). O le a le uiga ia te oe e faapea, o le taofiofia o le faamagaloga mai isi ua tuu atu ai ia “oleolegia i tatou e Satani”? (fuaiupu 11).
Tagai foi i le Mataupu Faavae ma Feagaiga 64:9–11.
E ala i le Togiola a Iesu Keriso, e mafai ai ona ou faalelei ma le Atua.
E tai pei foi o soo se isi lava, sa iloa e Paulo le tulaga sa i ai le avea ma se “tagata fou.” Sa sau o Ia mai le avea ma se tagata faaoosala o tagata Kerisiano i se tagata e le fefe e puipui Keriso. Sa ia iloa mo ia lava le auala e mafai ai e Iesu, o le “na le iloa le agasala,” ona aveese a tatou agasala ma tuu mai ia i tatou Lana “amiotonu,” e toefuatai ai i tatou ia tasi ma le Atua. A o e faitau i nei fuaiupu, mafaufau i le uiga o le ia faalelei i le isi tagata. E fesoasoani faapefea lenei mea ia te oe ia e malamalama i le uiga o le, ia faalelei ma le Atua? Mafaufau loloto i le mea atonu o loo va ai oe mai le Atua. O le a se mea e manaomia ona e faia ina ia saga faalelei atoatoa ai ma Ia?
Tagai foi 2 Nifae 10:23–25.
O le tiga e tusa i le Atua e taitai atu ai i le salamo.
E le masani ona tatou mafaufau i le faanoanoa o se mea lelei, ae sa tautala Paulo e uiga i le “tiga e tusa i le atua” o se vaega e manaomia o le salamo. O le a se mea ua e aoaoina e uiga i le tiga e tusa i le atua mai [mau] nei? 2 Korinito 7:8–11; Alema 36:16–21; Mamona 2:11–15; ma Gospel Topics, “Repentance,” topics.lds.org. O anafea na e lagonaina ai le faanoanoa e tusa i le atua, ma o le a se aafiaga sa i ai i lou olaga?
Manatu mo Suesuega Faaleaiga o Tusitusiga Paia ma Afiafi Faaleaiga
A o e faitauina ma lou aiga ia tusitusiga paia, e mafai e le Agaga ona fesoasoani ia te oe ia iloa po o a mataupu faavae e faamamafa ma talanoaina ina ia taulimaina ai manaoga o lou aiga. O ni nai fautuaga nei:
Pe na i ai se taimi na fai atu ai tagata o lou aiga i se tasi e tusi se tusi o le fautuaina atu mo i latou, e pei o se talosaga mo se galuega po o se aoga? Fai atu ia i latou e talanoa e uiga i lenei aafiaga ma pe na fai mai e a le tusi e uiga ia i latou. Na aoao mai Paulo, o olaga o le Au Paia sa pei o tusi o le fautuaina atu mo le talalelei mai ia Keriso lava Ia, “e lei tusia i le vaitusi, a o le Agaga o le Atua soifua.” A o outou faitau faatasi i le 2 Korinito 3:1–3, ia talanoa pe faapefea ona pei a tatou faataitaiga o tusi o le fautuaina atu mo le talalelei lea e mafai ona “iloa ma faitaulia e tagata uma.” Atonu e mafai e tagata taitoatasi o le aiga ona tusi se “tusi” e faamatala ai le auala na avea ai se isi tagata o le aiga ma se faataitaiga lelei o se soo o Iesu Keriso. E mafai ona faitau a latou tusi i le aiga ma tuu atu i le tagata o le aiga sa latou tusi e uiga i ai. Aisea e taua ai ona malamalama o o tatou olaga o “tusi a Keriso”?
O le a le uiga o le “faatuatua ua matou savavali ai, ae le o le tino mai o mea”? O a ni mea o tatou faia e faaali atu ai ua tatou talitonu i mea e le o mafai ona tatou vaai i ai?
E mafai ona mafaufau lou aiga i se—po o le sue—o ni faataitaiga i le natura o ni mea e uia ni suiga iloga ma avea ai ma ni mea fou? (tagai i ata o loo avatu faatasi ai ma lenei otootoga). O a ni mea ua aoao mai ia i tatou e nei faataitaiga e uiga i le ala e mafai ona suia ai i tatou e le talalelei a Iesu Keriso?
E tusa ai ma nei fuaiupu, o le a le uiga o le avea ma “auauna a le Atua”?
E mafai faapefea ona tatou mulimuli i le fautuaga a Paulo, “Ia o mai ai outou nai totonu [o le amioletonu], ma ia outou vavae mai,” ao avea foi ma ni faataitaiga lelei ia i latou e siomia i tatou?
Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.
Faaleleia o Lo Tatou Aoao Atu
Faasoa atu lesona faatino O nisi o manatu o le talalelei, e pei o le Togiola, e mafai ona faigata ona malamalama i ai. Mafaufau e faaaoga ata po o mea faitino e mafai ona fesoasoani ai i lou aiga ia malamalama i mataupu faavae e te tau i ai i mau.
Pe a tatou liliu mai i le talalelei a Keriso, e matuai o’oo’o lo latou suiga lea na faamatalaina e Paulo o le avea ma se “tagata fou” (2 Korinito 5:17).