Npaj Koj cov Me Nyuam Taug Vajtswv txoj Kev Ua Raws Li Kev Khi Lus Tas Ib Sim Neej

Nifais qhia hais tias “lub qhov rooj uas [peb] yuav tsum nkag” yog “txoj kev hloov siab lees txim thiab txoj kev ua kev cai raus dej” (2 Nifais 31:17). Koj tej kev siv zog pab koj cov me nyuam npaj ua kev cai raus dej thiab txais kev pom zoo yuav pab lawv sawv khov kho ntawm txoj kev ntawd. Tej kev no pib thaum koj qhia txog kev ntseeg Yexus Khetos thiab kev hloov siab lees txim. Kuj pib thaum qhia txog qhov uas peb rov qab khi lus li tau ua kev cai raus dej thaum lawv txais lub cim nco txog txhua lub lim tiam.

Nov yog tej uas pab tau koj: 2 Nifais 31; Phau Qhia txog Vaj Lug Kub, “Kev Cai Raus Dej,” topics.ChurchofJesusChrist.org.

• Thaum twg muaj ib lub sij hawm uas koj txoj kev ntseeg Leej Txiv Saum Ntuj Ceeb Tsheej thiab Yexus Khetos loj tuaj, cia li qhia rau koj tus me nyuam. Pab nws to taub tias kev ntseeg yog ib yam uas yuav loj tuaj zuj zus tas nws ib sim neej. Muaj tej yam twg uas koj tus me nyuam ua taus kom txhawb nws txoj kev ntseeg Yexus Khetos ua ntej nws ua kev cai raus dej?

• Thaum koj tus me nyuam xaiv ua yuam kev, cia li zoo siab hais txog lub txiaj ntsim uas yog kev hloov siab lees txim. Thaum thaum koj xaiv ua yuam kev, cia li hais txog kev xyiv fab uas los ntawm kev hloov siab lees txim. Cia li ua tim khawv tias vim Yexus Khetos raug txom nyem thiab tuag rau peb tej kev txhaum, Nws muab hwj chim rau peb kom muaj peev xwm hloov siab. Thaum koj tus me nyuam thov zam txim pub rau nws, cia li ua siab dawb zam txim pub rau nws.

• Qhia koj tus me nyuam txog lub sij hawm koj tau ua kev cai raus dej. Muab daim duab rau lawv saib thiab Qhia txog qhov uas koj xav li cas, koj tej kev khi lus thaum ua kev cai raus dej tau pab koj li cas kom paub Yexus Khetos zoo dua, thiab vim li cas tej kev khi lus ntawd tseem pab koj ua neej. Yaum koj tus me nyuam kom nug tej yam.

• Thaum twg muaj neeg hauv koj tsev neeg los sis pawg ntseeg ua kev cai raus dej, coj koj tus me nyuam mus saib. Sib tham ua ke txog tej yam uas koj thiab koj tus me nyuam pom thiab hnov. Yog tias ua tau, nrog tus neeg uas ua kev cai raus dej sib tham thiab nug tej yam xws li: “Koj tau ua li cas kom txiav txim ua li no? Koj tau ua li cas kom npaj tau?”

• Thaum koj pom koj tus me nyuam ua ib yam dab tsi raws li nws tau cog lus ua, cia li qhuas nws. Qhia nws tias kev ua raws li tau cog lus ua yuav pab peb npaj ua raws li tej kev kh lus thaum peb ua kev cai raus dej. Peb cog lus tias yuav ua dab tsi rau Vajtswv thaum peb ua kev cai raus dej? Nws cog lus tias Nws yuav ua li cas? (saib Mauxiyas 18:8–10, 13).

• Thaum koj thiab koj tus me nyuam txais kev tshoov siab dawb ceev ua ke (xws li thaum nyob hauv lub tsev koom txoos, thaum nyeem vaj lug kub, los sis thaum pab lwm tus), qhia nws txog tej kev xav hauv koj lub siab. Caw koj tus me nyuam qhia tias nws xav li cas. Nco txog ntau txoj kev uas tus Ntsuj Plig hais lus rau tib neeg, tsis hais tej kev uas Nws hais lus rau koj tus kheej. Pab koj tus me nyuam nco txog tej lub sij hawm thaum nws txais kev tshoov siab los ntawm tus Vaj Ntsuj Plig Dawb Huv.

• Saib ob peb qhov vidi-aus ua ke nyob hauv Txoj Moo Zoo cov Ntawv hu ua “Mloog Nws Hais!” Sib tham ua ke txog tej kev ntau uas tus Tswv cov tub qhe siv kom hnov Nws lub suab. Caw koj tus me nyuam kos duab los yog tsim ib qho vidi-aus txog qhov uas nws ua li cas kom hnov tus Cawm Seej lub suab.

• Sib tham txog qhov uas koj tau koob hmoov vim koj yog ib tug mej zeej hauv Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg. Koj tau ua li cas kom nyob ze Leej Txiv Saum Ntuj Ceeb Tsheej thiab Yexus Khetos thaum koj pab lwm tus thiab thaum lwm tus tau pab koj? Pab koj tus me nyuam xav txog tej txoj kev uas cov mej zeej ntawm lub Koom Txoos pab thiab txhawb nqa lwm tus.

• Muaj kev xyiv fab thaum koj nrog koj tsev neeg txais lub cim nco txog. Pab koj tus me nyuam npaj tsom ntsoov rau Yexus Khetos thaum nws txais lub cim nco txog. Peb yuav ua li cas kom qhia Yexus tias kev txais lub cim nco txog yog ib qho tseem ceeb rau peb?

• Phau Phooj Ywg muaj tej zaj lus, dab neeg, thiab tej yam ntxim saib ntxim ua uas pab cov me nyuam npaj ua kev cai raus dej thiab kev pom zoo. Cia koj tus me nyuam xaiv tej zaj uas nws xav nyeem nrog koj. (Kuj saib cov ntawv “Npaj Ua Kev Cai Raus Dej” nyob hauv feem rau cov me nyuam ntawm Txoj Moo Zoo cov Ntawv.)

  Daim Duab

  me nyuam tub ua kev cai raus dej

Lub pov thawj hwj yog Vajtswv txoj cai thiab lub hwj chim uas Nws siv kom foom koob hmoov rau Nws cov me nyuam. Vajtswv lub pov thawj hwj yeej nyob hauv lub ntiaj teb hauv Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg. Txhua tus mej zeej hauv lub Koom Txoos uas ua raws li lawv tej kev khi lus yeej tau koob hmoov los ntawm Vajtswv lub hwj chim pov thawj hwj nyob hauv tsev kom txhawb lawv thiab lawv tsev neeg lub zog (saib General Handbook: Serving in The Church of Jesus Christ of Latter-day Saints, 3.5, ChurchofJesusChrist.org). Lub hwj chim no yuav pab cov mej zeej ua Vajtswv txoj hauj lwm cawm seej thiab kev tsa nto nyob hauv lawv thiab lawv tsev neeg lub neej (saib General Handbook, 2.2).

Peb txais cov kab ke los ntawm txoj cai pov thawj hwj. Thaum tib neeg ua hauj lwm hauv lub Koom Txoos, lawv siv txoj cai pov thawj hwj, raws li cov uas tuav yawm sij pov thawj hwj txoj kev qhia. Tag nrho Leej Txiv Saum Ntuj Ceeb Tsheej cov me nyuam—Nws cov tub thiab cov ntxhais—yuav tau koob hmoov thaum lawv to taub txog lub pov thawj hwj zoo dua.

Yog xav kawm ntxiv txog lub pov thawj hwj, cia li saib Russell M. Nelson, “Tej Nqi Zog ntawm Sab Ntsuj Plig,” Liahona, Kaum Ib Hlis Ntuj 2019, 76–79; Russell M. Nelson, “Tus Nqi ntawm lub Hwj Chim Pov Thawj Hwj,” Liahona, Tsib Hlis Ntuj 2016, 66–69; “Priesthood Principles,” tshooj 3 nyob hauv General Handbook.

• Nco txog cov kab ke pov thawj hwj hauv koj tsev neeg. Piv txwv hais tias, koj pab tau koj tus me nyuam npaj txais lub cim nco txog txhua lub lim tiam. Hais kom koj tus me nyuam thov txais cov koob hmoov pov thawj hwj thaum nws muaj mob los sis thaum nws xav tau kev nplij siab. Cia li qhia tias thaum twg tus Tswv foom koob hmoov rau koj tsev neeg los ntawm Nws lub hwj chim pov thawj hwj.

• Thaum nej nyeem cov vaj lug kub ua ke, nrhiav cib fim sib tham txog qhov uas Vajtswv ua li cas kom foom koob hmoov rau cov neeg los ntawm Nws lub hwj chim. Hais txog tej lub sij hawm thaum Vajtswv tau foom koob hmoov rau koj los ntawm Nws lub pov thawj hwj. Yog xav kawm ntxiv txog cov koob hmoov uas Vajtswv pub rau peb dhau los ntawm lub pov thawj hwj, cia li saib General Handbook, 3.2, 3.5.

• Kawm txog keeb kwm txoj cai pov thawj hwj ntawm ib tug hauv koj tsev neeg. (Cov uas tuav lub Pov Thawj Hwj Mekhixedes txais tau ib daim ntawv qhia tias yus tau txais txoj cai pov thawj hwj ntawm leej twg thaum xa email rau LineofAuthority@ChurchofJesusChrist.org; kuj saib “Request a Priesthood Line of Authority” nyob hauv Help Center nyob ntawm ChurchofJesusChrist.org.) Sib tham txog qhov uas vim li cas yuav tsum paub tias txoj cai pov thawj hwj yeej los ntawm Yexus Khetos. Vim li cas Nws muab rau peb?

• Qhia koj tus me nyuam tias tom qab nws ua kev cai raus dej, nws yuav txais tau lub hwj chim pov thawj hwj thaum nws ua raws li nws txoj kev khi lus thaum nws ua kev cai raus dej. Cia li nyeem Thawj Tswj Hwm Russell M. Nelson zaj lus “Tej Nqi Zog ntawm Sab Ntsuj Plig” (Liahona, Kaum Ib Hlis Ntuj 2019, 76–79). Qhia koj tus me nyuam tias vim li cas cov kab ke pov thawj hwj tau ua rau koj muaj Vajtswv lub hwj chim hauv koj lub neej. Yog xav kawm tias peb tau koob hmoov los ntawm lub hwj chim pov thawj hwj li cas, saib General Handbook, 3.5.

• Sib tham txog lo lus nug no “Tus Tswv ib tug tub qhe zoo li cas?” Nyeem phau Lus Qhuab Qhia thiab Kev Khi Lus 121:36–42 ua ke, thiab nrhiav lus teb. Thaum twg koj pom koj tus me nyuam (los sis lwm tus) ua raws li ib lub ntsiab cai los sis tej cwj pwm hauv tej nqe no, cia li qhia nws.

• Thaum koj los sis koj tus me nyuam siv yawm sij qhib ib lub qhov rooj los sis qhib lub tsheb, cia li siv sij hawm muab cov yawm sij piv rau cov yawm sij uas cov thawj coj pov thawj hwj tuav. (Yog xav paub lub ntsiab ntawm cov yawm sij pov thawj hwj, saib General Handbook, 3.4.1). Cov yawm sij pov thawj hwj “qhib” dab tsi rau peb? Kuj saib Gary E. Stevenson, “Cov Yawm Sij thiab txoj Cai ntawm lub Pov Thawj Hwj Nyob Qhov Twg?,” Liahona, Tsib Hlis Ntuj 2016, 29–32; “Where Are the Keys?” (vidi-aus), ChurchofJesusChrist.org.

• Thaum uas yuav tsa koj rau ib txoj hauj lwm uas Vajtswv hu koj ua, caw koj tus me nyuam nyob ntawd. Cia koj tus me nyuam saib koj ua koj txoj hauj lwm ntawd. Tej zaum koj yuav xav nrhiav tej yam nws ua tau kom pab koj. Piav tias koj hnov tus Tswv lub hwj chim thaum koj ua txoj hauj lwm Nws hu koj ua.

Cov tuam tsev yeej yog ib feem ntawm Leej Txiv Saum Ntuj Ceeb Tsheej txoj hau kev rau Nws cov me nyuam. Nyob hauv cov tuam tsev, peb khi lus nrog Leej Txiv Saum Ntuj Ceeb Tsheej thaum peb txais cov kab ke dawb ceev, es tag nrho tej no ua rau peb nco txog Yexus Khetos. Leej Txiv Saum Ntuj Ceeb Tsheej tau npaj ib txoj kev rau Nws cov me nyuam tag nrho khi lus thiab txais cov kab ke, tsis hais cov uas tsis tau txais nyob hauv lub neej no. Xyoo uas koj tus me nyuam yuav muaj 12 xyoo, koj tus me nyuam yuav muaj cib fim ua kev cai raus dej thiab txais kev pom zoo nyob hauv lub tuam tsev sawv cev tam cov poj koob yawm txwv uas tau tas sim neej lawm.

Yog xav kawm ntxiv txog kev cai raus dej thiab kev pom zoo rau cov neeg tuag, saib “About Proxy Baptism and Confirmation,” temples.ChurchofJesusChrist.org.

• Mus rau lub tuam tsev ntau npaum li koj mus tau. Nrog koj tus me nyuam tham txog vim li cas koj mus rau lub tuam tsev thiab qhov uas lub tuam tsev pab koj nyob ze Leej Txiv Saum Ntuj Ceeb Tsheej thiab Yexus Khetos.

• Sib tham txog cov lus nug kom txais tau ib daim ntawv tso cai nkag tuam tsev ua ke. Nrog koj tus me nyuam tham txog qhov uas ua dab tsi hauv kev xam phaj kom tau ib daim ntawv tso cai nkag tuam tsev. Qhia vim li cas qhov uas koj muaj ib daim ntawv tso cai nkag tuam tsev yog ib qho tseem ceeb rau koj.

• Nyeem Malakis 4:6 ua ke. Sib tham txog yuav ua li cas kom muab nej lub siab tig mus rau koj cov poj koob yawm txwv. Kawm ntxiv txog koj cov poj koob yawm txwv thaum nej nrhiav tsev neeg zaj keeb kwm ua ke nyob ntawm FamilySearch.org. Nrhiav cov poj koob yawm txwv uas xav ua kev cai raus dej thiab txais kev pom zoo. Ib tug kws pab ua hauj lwm hauv lub tuam tsev thiab nrhiav tsev neeg zaj keeb kwm hauv pawg ntseeg pab tau koj.

• Saib tej kev pab nyob hauv pawg ntawd hu ua “Lub Tuam Tsev” nyob hauv feem rau cov me nyuam ntawm Txoj Moo Zoo cov Ntawv. (Kuj saib “Preparing Your Child for Temple Baptisms and Confirmations” nyob hauv ChurchofJesusChrist.org.)

Yawg suab txoj koob hmoov pab tau yus txais kev cob qhia, kev nplij siab, thiab kev tshoov siab. Qhov no muaj lus ntuas los ntawm Leej Txiv Saum Ntuj Ceeb Tsheej rau peb thiab pab peb to taub tias peb yog leej twg thiab peb muaj lub hom phiaj twg mus ib txhis li. Pab koj tus me nyuam npaj txais yawg suab txoj koob hmoov thaum koj qhia nws txog qhov uas yawg suab cov koob hmoov tseem ceeb thiab dawb ceev npaum li cas.

Yog xav kawm ntxiv, saib Phau Qhia txog Vaj Lug Kub, “Yawg Suab tej Koob Hmoov,” topics.ChurchofJesusChrist.org.

• Qhia koj tus me nyuam txog lub sij hawm thaum koj txais yawg suab txoj koob hmoov. Tej zaum koj yuav xav qhia tias koj tau npaj li cas thaum koj tau txais, txoj koob hmoov no tau pab koj li cas kom nyob ze Vajtswv, thiab koj tau siv txoj koob hmoov no li cas nyob hauv koj lub neej. Tej zaum koj yuav xav caw koj tus me nyuam sib tham nrog lwm tus hauv koj tsev neeg uas tau txais lawv cov koob hmoov pov thawj hwj.

• Kawm ua ke los ntawm tej kev pab uas nyob hauv Phau Qhia txog Vaj Lug Kub, “Yawg Suab tej Koob Hmoov.” Yog xav kawm txog tus txheej txheem txais yawg suab txoj koob hmoov, saib General Handbook, 18.17.

• Yog koj muaj cov poj koob yawm txwv uas tau txais yawg suab cov koob hmoov, tej zaum koj yuav xav nyeem rau koj tus me nyuam. Yog xav nyeem cov koob hmoov ntawm cov poj koob yawm txwv uas tau tas sim neej lawm, nkag hauv ChurchofJesusChrist.org, nias lub cim rau avkhauj ntawm sab saud sab xis, thiab nias “Yawg Suab txoj Koob Hmoov.”

• Tom qab koj tus me nyuam tau txais yawg suab txoj koob hmoov, caw tsev neeg uas nyob ntawd sau ntawv txog lawv tej kev xav thiab qhia rau koj tus me nyuam.

Vajtswv xav muab lub vaj txiaj ntsim, los sis foom koob hmoov, rau tag nrho Nws cov me nyuam kom muaj “hwj chim los saum ntuj los” (Lus Qhuab Qhia thiab Kev Khi Lus 95:8). Peb mus rau lub tuam tsev kom txais peb lub vaj txiaj ntsim ib zaug xwb, tiam sis tej kev khi lus uas peb khi nrog Vajtswv thiab lub hwj chim ntawm sab ntsuj plig uas Nws muab rau peb los ntawm lub vaj txiaj ntsim yeej yuav ua rau peb tau koob hmoov txhua hnub hauv peb lub neej.

Yog xav kawm ntxiv txog lub tuam tseev lub vaj txiaj ntsim, saib “About the Temple Endowment,” temples.ChurchofJesusChrist.org; Russell M. Nelson, “Prepare for the Blessings of the Temple,” Ensign, Kaum Hli Ntuj 2010, 41–51.

• Muab ib daim duab txog lub tuam tsev dai nyob rau hauv koj lub tsev. Qhia koj tus me nyuam txog tej kev xav uas koj muaj hauv lub tuam tsev. Sib tham ntau txog qhov uas koj hlub tus Tswv thiab Nws lub tsev thiab tej kev khi lus uas koj khi nyob haud.

• Kawm ua ke los ntawm temples.ChurchofJesusChrist.org. Nyeem tej zaj lus ua ke xws li “About the Temple Endowment” thiab “Prepare for the House of the Lord.” Cia koj tus me nyuam nug txog tej yam uas nws xav paub txog lub tuam tsev. Yog xav paub tias koj muaj cai hais txog tej yam twg nyob lub tuam tsev sab nraud, cia li nyeem Txwj Laug David A. Bednar zaj lus “Npaj Kom Tau Txhua Yam uas Yuav Tsum Muaj” (Liahona, Tsib Hlis Ntuj 2019, 101–4; qhov tseem ceeb feem hu ua “Kev Kawm hauv Tsev uas lub Koom Txoos Txhawb Nqa thiab Kev Npaj rau lub Tuam Tsev”).

• Thaum koj thiab koj tus me nyuam koom ua los sis pom lwm txoj kab ke (xws li thaum txais lub cim nco txog los sis tau koob hmoov kho mob), cia li siv sij hawm sib tham txog tej lub cim uas muaj hauv txoj kab ke ntawd. Tej cim no piv txog dab tsi? Tej cim no ua tim khawv txog Yexus Khetos li cas? Qhov no yuav pab koj tus me nyuam npaj xav txog lub ntsiab ntawm tej lub cim ntawm lub tuam tsev cov kab ke, uas kuj ua tim khawv txog Yexus Khetos.

• Pab koj tus me nyuam paub tias nws ua li cas kom ua raws li kev khi lus uas nws khi thaum nws ua kev cai raus dej nyob hauv Mauxiyas 18:8–10, 13. Kuj pab koj tus me nyuam pom tias tus Tswv foom koob hmoov dab tsi rau nws. Pab koj tus me nyuam ntseeg tias nws muaj peev xwm ua raws li nws tej kev khi lus.

• Sib tham ntau zaus txog qhov uas koj tej kev khi lus hauv lub tuam tsev pab koj xaiv thiab pab koj nyob ze Yexus Khetos dua ntxiv. Tej zaum koj yuav xav siv General Handbook, 27.2, kom kawm txog tej kev khi lus uas peb khi hauv lub tuam tsev.

Txwj Laug David A. Bednar qhia hais tias: “Tib qho tseem ceeb uas nej ua tau kom npaj txais kev hu ua hauj lwm yog kev ua ib tug tub txib ua ntej nej mus ua tub txib. … Lub hom phiaj tsis yog kev mus ua tub txib; tiam sis, lub hom phiaj yog kev ua ib tug tub txib thiab ua hauj lwm tas peb lub neej kawg siab kawg ntsws kawg plab kawg plawv. … Nej tab tom npaj ua cov tub txib txoj hauj lwm tas ib sim neej” (“Becoming a Missionary,” Liahona, Kaum Ib Hlis Ntuj 2005, 45–46). Tej lub sij hawm thaum koj tus me nyuam hloov los ua ib tug tub txib yuav foom koob hmoov rau nws nyob mus ib txhis li, tsis yog lub sij hawm thaum nws mus ua tub txib xwb.

Yog xav kawm ntxiv, saib Russell M. Nelson, “Tshaj Tawm txog Txoj Moo Zoo ntawm Kev Thaj Yeeb,” Liahona, Tsib Hlis Ntuj 2022, 6–7; M. Russell Ballard, “Kev Ua Tub Txib Ua rau Kuv Tau Koob Hmoov Tas Mus Li,” Liahona, Tsib Hlis Ntuj 2022, 8–10; Missionary Preparation: Adjusting to Missionary Life, ChurchofJesusChrist.org.

• Cia li coj yam ntxwv txog kev qhia txoj moo zoo raws li tej yam uas ib txwm ua. Cia li nrhiav cib fim kom qhia lwm tus txog koj tej kev xav txog Leej Txiv Saum Ntuj Ceeb Tsheej thiab tus Cawm Seej thiab cov koob hmoov uas koj txais vim koj yog ib tug mej zeej hauv Nws lub Koom Txoos. Caw lwm tus koom koj tsev neeg nyob hauv lub Koom Txoos thiab thaum ua yam ntxim saib ntxim ua nrog koj tsev neeg.

• Nrhiav cib fim rau koj tsev neeg nrog cov tub txib sib tham. Caw lawv qhia koj cov phooj ywg, los sis hais kom lawv qhia cov neeg nyob hauv koj lub tsev. Thov cov tub txib hais txog tej zaj los ntawm lawv lub neej thiab vim li cas kev ua hauj lwm ua ib tug tub txib pab lawv nyob ze Yexus Khetos ntxiv. Nug seb lawv tau ua dab tsi (los sis kheev lam lawv ua dab tsi) kom npaj ua tub txib.

• Yog koj tau mus ua tub txib, qhia siab hais ntau zaus txog lub sij hawm ntawd. Los sis caw cov phooj ywg los sis tsev neeg uas tau mus ua tub txib kom hais txog lub sij hawm ntawd. Tej zaum koj kuj yuav xav hais txog qhov uas koj tau qhia txog txoj moo zoo rau lwm tus tas koj lub neej. Pab koj tus me nyuam xav txog nws yuav ua li cas kom qhia txog txoj moo zoo.

• Muab cib fim rau koj tus me nyuam kom qhia koj tsev neeg txog tej ntsiab cai ntawm txoj moo zoo. Tej zaum koj tus me nyuam yuav xav xyaum qhia tias nws ntseeg li cas rau lwm tus. Piv txwv hais tias, nej sib tham txog tej lus nug xws li “Peb yuav ua li cas kom qhia txog Phau Ntawv Maumoos yog tias ib tug neeg tsis tau hnov dua?” los sis “Peb yuav piav txog tus Cawm Seej li cas rau ib tug uas tsis ntseeg Kheots?”

• Pab koj tus me nyuam muaj siab nyiam nrog lwm tus neeg sib tham. Tej kev zoo kom pib sib tham yog dab tsi? Yaum koj tus me nyuam kom nws kawm paub mloog tej uas lwm tus hais, to taub muaj dab tsi hauv lawv lub siab, thiab qhia tej yam tseeb ntawm txoj moo zoo uas yuav foom koob hmoov rau lawv lub neej.

• Nrhiav cib fim rau koj tus me nyuam kawm txog lwm yam kab lig kev cai thiab tej kev ntseeg. Pab nws pom thiab saib taus tej yam zoo thiab tej ntsiab cai tseeb los ntawm lwm tus txoj kev ntseeg.

Nyob hauv lub tuam tsev, ib tug txiv neej thiab nws tus poj niam sib yuav mus ib txhis li. Muaj li no thaum ua ib txoj kab ke hu ua kev khi. Txawm yog tshuav ntev ua ntej koj tus tub los sis tus ntxhais yuav txais txoj kab ke no los, tej yam me thiab yooj yim uas koj ua ib ke yuav pab nws npaj rau txoj koob hmoov zoo kawg no.

Kuj saib Gospel Topics, “Sealing,” topics.ChurchofJesusChrist.org.

• Nyeem “Tsev Neeg: Ib zaj Lus Tshaj Tawm rau lub Ntiaj Teb” ua ke nyob ntawm ChurchofJesusChrist.org. Zaj lus tshaj tawm no qhia dab tsi txog kev zoo siab hauv tsev neeg thiab txog tej kev sib yuav uas muaj kev zoo siab? Nrog koj tus me nyuam, xaiv ib lub ntsiab cai nyob hauv zaj lus tshaj tawm thiab kawm txog lub ntsiab cai ntawd. Tej zaum koj kuj yuav xav nrhiav tej nqe vaj lug kub txog lub ntsiab cai ntawd nyob hauv Phau Qhia txog Vaj Lug Kub. Tej zaum koj yuav xav cuab hom phiaj txog lub ntsiab cai ntawd nrog koj tsev neeg. Thaum koj ua hauj lwm kom muaj raws li koj cov hom phiaj, sib tham ua ke txog qhov uas kev ua raws li lub ntsiab cai ntawd tau pab koj tsev neeg li cas.

• Nrog koj tus me nyuam, cia li nyeem Thawj Tswj Hwm Dieter F. Uchtdorf zaj lus “Qhuas Cov uas Cawm Lwm Tus” (Liahona, Tsib Hlis Ntuj 2016, 77–80). Thaum koj nyeem txog feem hu ua “Lub Sawm Fem uas Tso Txhua Yam Tseg,” tej zaum koj yuav xav nrhiav hauv koj lub tsev nrhiav tau tej yam uas yus tso tseg thiab lwm yam uas yus tsis muab tso tseg. Sib tham ua ke txog tej yam uas yus xav kom kav ntev thiab yus ua li cas tu tej ntawd. Qhov no qhia peb tias peb yuav tsum xav li cas txog kev sib yuav thiab kev sib raug zoo hauv peb tsev neeg? Peb kawm dab tsi ntxiv los ntawm Thawj Tswj Hwm Uchtdorf zaj lus txog qhov uas tus Cawm seej pab peb li cas kom muaj kev sib yuav zoo thiab tsev neeg uas muaj zog?

• Yog tias koj yuav txiv los yuav poj niam lawm, qhib siab rau koj tus me nyuam txog tej yam uas neb ua zoo, tej yam uas neb tab tom kawm, thiab tej yam uas neb sim ua zoo dua. Yog koj thiab koj tus khub neb tau ua kev cai sib khi hauv lub tuam tsev, coj yam ntxwv zoo rau koj tus me nyuam kom ua raws li nej tej kev khi lus uas nej ib leeg khi rau ib leeg thiab khi rau tus Tswv. Qhia koj tus me nyuam tias koj ua li cas kom tsom ntsoov rau Leej Txiv Saum Ntuj Ceeb Tsheej thiab tus Cawm Seej thiab nkawd pab koj li cas.

• Thaum yuav tsum txiav txim ua ke nrog koj tsev neeg, ua tsev neeg kev sab laj thiab sib tham ua ke. Ua tib zoo kom txhua tus hauv koj tsev neeg yuav hais tej yam uas lawv xav thiab saib lawv rau nqi. Siv tej kev sib tham no kom qhia tias ib tsev neeg yuav sib tham li cas thiab muaj siab dawb siab zoo, txawm yog ib leeg tsis tshua xav zoo ib yam li ib leeg.

• Thaum twg tsis xav zoo ib yam los sis tsis sib raug zoo hauv koj tsev neeg, cia li ua siab ntev thiab muaj kev hlub tshua. Pab koj tus me nyuam pom tias kev ua zoo li Yexus Khetos thaum tib neeg tsis sib raug zoo yuav pab nws npaj muaj kev zoo siab thaum nws sib yuav. Nyeem phau Lus Qhuab Qhia thiab Kev Khi Lus 121:41–42 ua ke, thiab sib tham txog qhov uas yuav siv cov ntsiab cai no li cas hauv kev sib yuav.