Tshaj Tawm txog Txoj Moo Zoo ntawm Kev Thaj Yeeb
Peb muaj kev lav ris dawb huv kom qhia txog Yexus Khetos lub hwj chim thiab txoj kev thaj yeeb rau txhua tus uas yuav mloog.
Kuv cov kwv tij thiab cov muam, zoo siab tos txais nej rau lub tuam rooj sab laj! Kuv twb tos ntsoov hnub no xav pom nej txhua tus. Kuv thov Vajtswv pab nej txhua hnub. Kuv kuj tau thov Vajtswv kom lub rooj sab laj no yuav txhawb nej txhua tus sab ntsuj plig.
Txij thaum lub tuam rooj sab laj tas los no, tseem muaj xwm txheej nyuaj heev hauv lub ntiaj teb. Phaum mob thoob ntiaj teb tseem hloov peb lub neej. Thiab tam sim no muaj kev ua tsov ua rog hauv lub ntiaj teb ua rau txiv neej, poj niam, thiab me nyuam coob ntshai kawg nkaus li.
Cov yaj saub tau pom peb lub caij nyoog, thaum muaj kev ua tsov rog thiab hnov lus paj lus cua txog kev ua tsov rog, thiab lub ntiaj teb yuav ntxhov hnyo.1 Vim peb yog cov uas coj raws li Yexus Khetos, peb thov cov thawj coj hauv txhua lub teb chaws nrhiav kev kom kho lawv tej teeb meem raws li kev thaj yeeb. Peb hais kom tib neeg nyob txhua qhov chaw thov Vajtswv pab cov uas txom nyem, kom ua tej yam lawv ua taus pab cov nyuaj siab, thiab nrhiav tus Tswv txoj kev pab kom txiav tej kev kev tsis sib haum li no.
Cov kwv tij thiab cov muam, yuav tsum muaj Yexus Khetos txoj moo zoo niaj hnub no ntau tshaj yav tas los. Kev sib cav sib ceg yeej txhaum txhua yam uas tus Cawm Seej tau qhia. Kuv hlub tus Tswv Yexus Khetos thiab ua tim khawv tias Nws txoj moo zoo yeej yog tib txoj kev uas kho tau tej teeb meem no kom muaj kev thaj yeeb. Nws txoj moo zoo yeej ua rau tib neeg muaj kev thaj yeeb.2
Nws txoj moo zoo yog tib yam uas yuav pab thaum tib neeg lub siab poob tas kom lawv ntshai kawg nkaus.3 Qhov no qhia tias tus Tswv tej lus rau Nws cov thwj tim tseem ceeb npaum li cas kom “mus thoob plaws lub ntiaj teb thiab qhia txoj moo zoo kom sawv daws hnov.”4 Peb muaj kev lav ris dawb huv kom qhia txog Yexus Khetos lub hwj chim thiab txoj kev thaj yeeb rau txhua tus uas yuav mloog thiab cov uas cia Vajtswv yeej hauv lawv lub neej.
Txhua tus neeg uas tau khi lus nrog Vajtswv tau cog lus tias lawv yuav saib xyuas lwm thiab pab cov uas txom nyem. Peb muaj peev xwm qhia tias peb ntseeg Vajtswv thiab npaj siab teb cov neeg uas nug peb vim li cas peb “muaj chaw cia siab.”5 Peb txhua tus muaj ib txoj hauj lwm ua thaum peb muab Ixayees sau los ua ke.
Hnub no kuv rov qab hais tas zog hais tias tus Tswv tau hais kom txhua tus tub hluas uas tsim nyog thiab muaj peev xwm kom lawv npaj thiab mus ua tub txib. Nej cov tub hluas uas yog Tsoom Haiv Neeg Ntseeg hauv Hnub Nyoog Kawg, txoj kev ua tub txib yog ib txoj kev lav ris ntawm lub pov thawj hwj. Twb tau tshwj nej cov tub hluas no tseg rau lub caij nyoog thaum tau cog lus tias yuav muab Ixayees sau los ua ke. Thaum nej ua tub txib, nej ua ib txoj hauj lwm tseem ceeb kawg hauv lub caij nyoog kawg no!
Nej cov ntxhais hluas, kev ua ntxhais txib yeej yog ib lub cib fim uas muaj hwj chim heev, tiam sis tsis tas ua. Peb hlub cov ntxhais txib thiab zoo siab kawg tos txais lawv. Tej hauj lwm nej ua mas yeej zoo kawg nkaus! Thov Vajtswv kom paub seb tus Tswv puas xav kom nej ua ntxhais txib, thiab tus Vaj Ntsuj Plig Dawb Huv yuav qhia nej hauv nej lub siab lub ntsws.
Kuv cov phooj ywg zoo, tus Tswv pom tias nej txhua tus tseem ceeb. Nws tau muab nej ceev cia mus txog lub sij hawm no kom nej pab muab Ixayees sau los ua ke. Nej txoj kev txiav txim ua ib tug tub txib ntxhais txib, tsis hais yog kev mus tshaj tawm los sis kev mus pab neeg, yuav foom koob hmoov rau nej thiab lwm tus coob heev. Peb kuj xav kom tej nkawm niam txiv laus ua thaum lawv ua taus. Lawv tej hauj lwm los yeej pauv tsis taus.
Txhua tus tub txib ntxhais txib qhia thiab ua tim khawv txog tus Cawm Seej. Kev tsaus ntuj ntawm sab ntsuj plig hauv lub ntiaj teb no ua rau peb xav tau Yexus Khetos txoj kev kaj ntxiv. Txhua tus yeej tsim nyog kom muaj cib fim paub txog Yexus Khetos txoj moo zoo. Txhua tus neeg tsim nyog kom paub tias lawv yuav nrhiav kev cia siab thiab kev kaj siab lug nyob qhov twg uas “tshaj txhua txoj kev to taub.”6
Thov kom lub rooj sab laj no yuav pab nej nyob kaj siab lug thiab hnov tus Ntsuj Plig. Thov kom nej yuav nrhiav thiab txais kev tshwm sim hauv tej tuas no, kuv thov los ntawm Yexus Khetos lub npe, amees.