2 Nifae 6--10 

Tau atu i tamaiti se tala e uiga i se tagata na paʻu i totonu o se lua na matua loloto lava e lei mafai ona ia pe’a mai i fafo. Sa sau se tamaloa ma siiina mai i fafo lenei tagata mai le lua. Atonu e te manao e tusi se ata o lenei tala i luga o le laupapa pe faatino faatasi ma tamaiti. Faamalamalama atu o lenei lua e pei o le oti ma le tamaloa na fesoasoani i le tagata e pei o Iesu Keriso, o le na laveaiina tagata uma mai le oti e ala i le tuuina mai ia i tatou o le meaalofa o le toetu. Tau atu i tamaiti o lenei lava tagata na pau i totonu o se isi lua. O le taimi lenei na tuʻuina atu ai e le tagata laveai se apefai e faʻaaoga e pe’a ai i fafo o le lua. Faamalamalama atu o lenei lua e pei o le agasala ma o le apefai o le Togiola lea a Iesu Keriso, lea e mafai ai e i tatou ona salamo ma faamagaloina ia tatou agasala. Faitau le 2 Nifae 9:22--23, ma tuuina atu lau molimau ia Iesu Keriso ma Lana Togiola.

Usu faatasi se pese e faatatau i le alofa o Iesu Keriso, e pei o le “Le Alofa o lou Faaola” (Tusipese a Tamaiti, 42--43). Valaaulia tamaiti e tusi ni ata o mea e fesoasoani ia latou iloa ai e alofa le Faaola ia i latou.

Faitau le 2 Nifae 9:49 i tamaiti, ma fesoasoani ia i latou e saili ma malamalama i mea na fai mai ai Iakopo e alofa ma inoino i ai o ia. Faasoa atu ni faataitaiga na faia ai e se tamaitiiti se filifiliga lelei po o se filifiliga le lelei, ma valaaulia tamaiti e tutu i luga pe a aumaia e le filifiliga le fiafia ma nonofo i lalo pe afai e aumaia e le filifiliga le faanoanoa. Aisea tatou te mauaina ai le olioli pe a filifili le mea sa’o? O anafea na e lagona ai le fiafia ona ua e faia le filifiliga saʻo?

Usu faatasi se pese e faatatau i le olioli e oo mai ona o le usiusitai, e pei o le “Pe A Tatou Fesoasoani” (Tusipese a Tamaiti, 108), ma fai i tamaiti e faʻalogo mo mea e faafiafiaina ai i tatou. Tuu atu i tamaiti e auauai e faafoliga o se matua o fai atu i isi tamaiti e fai se mea. Tuu atu i isi tamaiti e faataitai le usiusitai ma le olioli.

Fai atu i tamaiti e talanoa e uiga i nisi folafolaga na latou faia, e pei o se folafolaga na latou faia i se uo po o feagaiga na latou osia i le papatisoga. Aisea e faigata ai i nisi taimi ona tausia a tatou folafolaga? Aisea e taua ai le tausia o a tatou folafolaga? Faitau le faaupuga lenei: “O le a faataunuu e le Alii le Atua ana feagaiga na faia e ia i ana fanau” (2 Nifae 6:12). Faasoa atu se faataitaiga o le auala na tausia ai e le Atua Ana folafolaga, e tusa lava pe le vave ona oo mai faamanuiaga.

Faaali atu se ata o Iesu i autafa o se ata o se tamaitiiti. Faitau le 2 Nifae 7:1, ma faamatala atu afai e le toe usiusitai tagata o le Atua i Lana talalelei, e foliga mai ua latou “tetea” ma Ia. Ave ese le ata o le tamaitiiti mai le ata o Iesu e faaali atu ai afai tatou te le tausia a tatou feagaiga, e pei o le feagaiga o le papatisoga, tatou te vavaeeseina i tatou lava mai le Tama Faalelagi ma le Faaola. (Ina ia iloiloina feagaiga o le papatisoga, tagai MF&&F 20:37.) E faapefea e le Togiola a le Faaola ona faatagaina i tatou e faalatalata atu atili ia te Ia? A o e talanoaina lenei mea, valaaulia tamaiti e toe tuufaatasi ata.

Fai atu i tamaiti e fesoasoani ia te oe e tusi se auala i luga o le laupapa, ma valaaulia i latou e faaopoopo nisi o faafitauli po o poloka i luga o le auala. Faitau faatasi le 2 Nifae 9:10, ma valaaulia tamaiti e faaigoa ia faafitauli i luga o le auala i upu mai lenei fuaiupu o loo faamatalaina ai faafitauli e mafai ona taofia ai i tatou mai le toe foi atu i le Atua. Ona talanoa lea pe na faapefea ona faatoilaloina e Iesu Keriso nei faigata mo i tatou (tagai 2 Nifae 9:21--23, ma a’o e faia, valaaulia tamaiti e solo ese ia faigata.

Faaali atu se ata o Atamu ma Eva, e pei ua Tuua le Faatoaga o Etena (ChurchofJesusChrist.org). Faamalamalama atu ina ua ai e Atamu ma Eva le fua na faatonuina ai i laua e le Atua e aua nei aia i le Faatoaga o Etena, na la aumaia le agasala ma le oti i le lalolagi. Faaali atu se ata o Iesu Keriso. Ina ia fesoasoani i tamaiti ia malamalama i le auala na faatoilaloina ai e Iesu le agasala ma le oti, faamatala atu le tala i le tagata na paʻu i totonu o se lua, o loo maua i le uluai aoaoga i lalo o le “Tamaiti Laiti” i lenei otootoga. Ona fai atu lea i tamaiti e tusi ata o lenei tala pe faatino foi. Faitau le 2 Nifae 9:21--23, ma tuuina atu lau molimau ia Iesu Keriso ma Lana Togiola.

Fesoasoani i tamaiti taitoatasi e sue se pese e uiga i le Togiola a le Faaola i totonu o le tusipese po o le Tusipese a Tamaiti (o faasino upu i totonu o nei tusi e mafai ona fesoasoani). Valaaulia tamaiti e sue ma faasoa mai fuaitau mai le pese e faamatala ai le mea na faia e Iesu mo i tatou. Fai i tamaiti e faasoa mai o latou manatu ma lagona e uiga i le Togiola a le Faaola, pe faasoa atu lau molimau.

Valaaulia tamaiti e ta’u atu ia te oe se mea e tele lo latou iloa e uiga i ai, e pei o se tusi e sili ona fiafia i ai po o se gaoioiga e fiafia i ai. Fai atu i se tamaitiiti e faitau le 2 Nifae 9:20, ma molimau atu o le Atua e “[silafia] mea uma.” Aisea e taua ai lo tatou malamalama e silafia e le Atua mea uma?

Fai atu i tamaiti e mafaufau faapea na latou faalogo o fai mai se uo o poloaiga po o aoaoga a le Ekalesia e valea. O le a se latou tala e fai atu i le latou uo? Aisea e taua ai le talitonu i fautuaga a le Atua e tusa lava pe tatou te le o malamalama atoatoa i ai? Uunai tamaiti e vaai i totonu o le 2 Nifae 9:20, 28–29, ma le 42–43 mo se fesoasoani i le mafaufau loloto ma le talanoaina o nei fesili.