“10–16 Fepuari. 2 Nifae 6–10: ‘E, Le Silisiliese Na’uā o le Fuafuaga a lo Tatou Atua!’” Sau, Mulimuli Mai ia te Au—Mo Tagata Taitoatasi ma Aiga: Tusi a Mamona 2020 (2020)

“10–16 Fepuari. 2 Nifae 6–10,” Sau, Mulimuli Mai ia te Au—Mo Tagata Taitoatasi ma Aiga: 2020

Ata

O Iesu o loo tatalo i Ketesemane

E Le o Lo’u Loto, A o Lou Finagalo, Ia Faia, saunia e Harry Anderson

10–16 Fepuari

2 Nifae 6–10

“E, Le Silisiliese Na’uā o le Fuafuaga a lo Tatou Atua!”

A o e faitau i le 2 Nifae 6–10, mafaufau po o le a se mea o loo taumafai le Alii e aoao atu ia te oe. A o e faailoa maia nei upumoni, tusifaamaumau ma mafaufau ma le lototatalo pe mafai faapefea ona e faatinoina mea o loo e aoaoina.

Tusifaamaumau Ou Lagona Uunai

A itiiti pe ua 40 tausaga talu ona tuua e le aiga o Liae ia Ierusalema. Sa latou i ai i se nuu fou e le masani ai, o le afa o le lalolagi le mamao mai Ierusalema ma le isi vaega uma o totoe o le nuu o le feagaiga a le Atua. Sa maliu Liae, ma ua amata e ana fanau le mea o le a avea o se fefinauai mo seneturi-le umi i le va o sa Nifae—”o e sa talitonu i lapataiga ma faaaliga mai le Atua”—ma sa Lamana, o e sa le talitonu (2 Nifae 5:6). I nei tulaga, o Iakopo, o le uso laitiiti o Nifae ma ua faauuina nei e avea ma a’oa’o mo sa Nifae, sa manao i le nuu o le feagaiga ia iloa o le a le faagaloina lava i latou e le Atua, o le mea lea e le tatau lava ona latou faagaloina o Ia. O se savali lea tatou te manaomia moni i lo tatou lava lalolagi, i le mea e faamamasagia ai feagaiga ma teena ia faaaliga. “Ia tatou manatua o ia, … aua e lei tuulafoaiina lava i tatou. … E maeu folafolaga a le Alii,” sa ia tautino atu ai (2 Nifae 10:20–21). Faatasi ai ma na folafolaga, e leai se folafolaga e sili atu i lo se “togiola e le i’u” e faatoilalo ai le oti ma seoli (2 Nifae 9:7). “O le mea lea,” sa faaiu ai e Iakopo, “ia fiafia outou loto”! (2 Nifae 10:23).

Ata

aikona o le suesuega faaletagata lava ia

Manatu mo Suesuega Faaletagata Lava Ia o Tusitusiga Paia

2 Nifae 6--8

E alofa mutimutivale le Alii i Lona nuu ma o le a faataunuuina Ana folafolaga.

Ina ia fesoasoani i lona nuu ia malamalama o i latou o se vaega o le aiga o Isaraelu ma e mafai ona faalagolago i le Atua ma Ana folafolaga, sa sii mai e Iakopo ia valoaga a Isaia, o loo tusia i le 2 Nifae 6–8. Sa faamatala e Isaia le faataapeapeina o Isaraelu ma le faapotopotoina na folafolaina e le Faaola ma le togiolaina o Lona nuu. A o e faitau, mafaufau loloto i fesili e pei o nei:

O le a se mea ou te aoaoina e uiga i le alofa togiola o le Faaola mo au?
O le a le faamafanafanaga ua ofo mai e le Faaola ia i latou o e saili ia te Ia?
O le a se mea e mafai ona ou faia, ina ia ou “faatalitali” atili ai ma le faamaoni mo le Faaola ma Ana faamanuiaga folafolaina?

2 Nifae 9:1–26

E ala i Lana Togiola, ua laveaiina ai e Iesu Keriso tagata uma mai le oti faaletino ma le faaleagaga.

O a upu ma faatusa o le a e faaaogaina e talanoa atu ai i se tasi lo tatou matua manaomia o se Togiola e laveaiina i tatou mai le oti ma le agasala? Sa faaaoga e Iakopo ia upu o le “matautia” ma le “sau’ai.” O le a le mea na aoao mai e Iakopo e uiga i “lena sau’ai, oti ma seoli” ma le “sosola ese” ua saunia e le Atua mo i tatou? (2 Nifae 9:10). A o e faitauina le 2 Nifae 9:1–26, mafaufau e maka i se lanu se tasi mea o le a tutupu ia i tatou e aunoa ma le Togiola a Iesu Keriso. Ona faaaoga lea o se isi lanu, maka ai mea e mafai ona tatou maua e ala i le Togiola a le Faaola. O a upumoni e te maua e uiga i le Togiola a Iesu Keriso e afua ai ona e viia le “poto o le Atua, lona alofa mutimutivale ma le alofa tunoa”? (2 Nifae 9:8).

Tagai “Atonement of Jesus Christ,” Gospel Topics, topics.ChurchofJesusChrist.org.

2 Nifae 9:27–54

E mafai ona ou sau ia Keriso ma maua ia faamanuiaga mamalu o Lana Togiola.

Na afio mai Iesu Keriso i le lalolagi ina ia mafai ona faaolaina e ia tagata uma pe afai latou te faalogologo i lona siufofoga” (2 Nifae 9:21; ua faaopoopo le faatusilima). I se isi faaupuga, e tatau ona tatou loto e talia ia faamanuiaga faaola o loo Ia ofoina mai. Ina ua uma ona faamatalatala mai le fuafuaga sili o le togiola, sa tuuina mai e Iakopo ni lapataiga taua ma valaaulia, o loo maua i le 2 Nifae 9:27–54, e fesoasoani ai ia tatou maua ia faamanuiaga o le Togiola. Mafaufau e tusia i se siata e pei o lea:

Lapataiga	Valaaulia
Lapataiga	Valaaulia
Lapataiga	Valaaulia

O le a se mea ua uunaia oe e le Agaga e fai e tali atu ai i nei lapataiga ma valaaulia?

2 Nifae 10:20, 23–25

Ona o le taulaga a Iesu Keriso, e mafai ona “fiafia” lo’u loto.

O le savali a Iakopo o se savali o le fiafia. “Ua ou fai atu ia mea,” na ia faapea mai, “ina ia outou olioli ma faaea i luga o outou ulu e faavavau” (2 Nifae 9:3). A o e faitauina le 2 Nifae 10:20, 23–25, o le a se mea e te maua e te maua ai le faamoemoe? O le a se isi mea na e maua i le 2 Nifae 9–10 ua e maua ai le faamoemoe? O le a se mea o le a e faia ina ia manatua ai nei mea pe a e lagonaina le lotovaivai?

Tagai foi Ioane 16:33.

Ata

aikona o le suesuega faaleaiga

Manatu mo Suesuega Faaleaiga o Tusitusiga Paia ma Afiafi Faaleaiga

A o e faitauina ma lou aiga ia tusitusiga paia, e mafai e le Agaga ona fesoasoani ia te oe ia iloa po o a mataupu faavae e faamamafa ma talanoaina ina ia taulimaina ai manaoga o lou aiga. O ni nai manatu nei.

2 Nifae 8:3–7

A e faitauina le 2 Nifae 8:3, e mafai ona e faaali atu ata o se toafa ma se togalaau. E faapefea e le Alii ona faaliliu ia toafa o o tatou olaga i ni togalaau? I fuaiupu 4–7, o le a le mea ua fautuaina i tatou e le Alii e fai ina ia tatou maua ai le olioli o loo faamatala mai i le fuaiupu 3?

2 Nifae 8:24–25

E faapefea i upu faamalosiau a Isaia i le nuu o Siona ona faamalosia ai i tatou ia tatou taumafaiga e avea atili o ni soo faamaoni o Iesu Keriso? E faapefea e le ala a’e i luga fai ofu ona tutusa ma le mea o finagalo le Atua ia i tatou e fai faaleagaga?

2 Nifae 9:1–26

O le a se mea e mafai ona fai e lou aiga ia malamalama atili ai i le maoae o le “togiola e le i’u” a Iesu Keriso? (fuaiupu 7). Atonu e mafai ona latou vaavaai i ai pe mafaufau e uiga i mea e foliga e le mafaitaulia i se fuainumera—tagutu o vao i se fanua, fatu o le oneone i luga o se matafaga, po o fetu i le lagi. E le i’u faapefea le Togiola a le Faaola? O a ni fasifuaitau i le 2 Nifae 9 ua faalolotoina ai lou lotofaafetai mo mea na faia e le Faaola mo i tatou?

2 Nifae 9:27–44

Atonu e mafai e lo outou aiga ona sailiili i se aso se tasi o lenei vaiaso i le 2 Nifae 9:27–38, ma vaavaai mo lapataiga (e tamua mai ai le “oi”). O le fea o nei mea e foliga e faapitoa le taua mo lou aiga e talanoaina? I se isi aso, e mafai ona outou sailiili i le 2 Nifae 9:39–44, ma vaavaai mo mea na valaaulia e Iakopo lona nuu ia manatua.

2 Nifae 9:28–29, 50–51

O a ni nai faataitaiga o “le fiatagata e, ma vaivaiga, ma le valelea o tagata”? (fuaiupu 28). O le a se mea e mafai ona tatou faia e tuu atili atu ai le faataua i mea a le Atua ae faaitiitita i mea a le lalolagi?

2 Nifae 9:45

E mafai ona fiafia lou aiga e fai se filifili pepa ona feauauai lea e faamaulu ma lulu ese. E faapefea ona pei agasala o filifili? E faapefea ona fesoasoani le Faaola ia i tatou e lulu ese?

Mo nisi manatu mo le aoaoina o fanau, tagai i le otootoga o le vaiaso lenei i le Sau, Mulimuli Mai ia te Au—Mo le Peraimeri.

Faaleleia o Lo Tatou Aoao Atu

Ia avanoa ma maua gofie. “O nisi o avanoa aupito lelei o le aoao atu e amata i se fesili po o se atugaluga i le loto o se tagata o le [aiga]. … Ta’u i tagata o le aiga ia iloa i au upu ma faatinoga ua e naunau e faalogologo atu ia i latou” (Aoao Atu i le Ala a le Faaola, 16).