Pashka

Paraqitni figura të Shpëtimtarit duke u pagëzuar, duke shëruar të tjerët, duke u kryqëzuar dhe si një qenie e ringjallur (shih faqen e veprimtarisë së kësaj jave ose Librin e Figurave Artistike të Ungjillit, nr. 35, 41, 57, 59). Kërkojuni fëmijëve t’ju dëftojnë se çfarë po ndodh në secilën figurë. Shpjegoni se shumë vite përpara se Jezusi të vinte në tokë, Perëndia u zbuloi profetëve në Librin e Mormonit se Ai do t’i bënte këto gjëra. Lexoni te 1 Nefi 11:27; Mosia 3:5; 15:7 e Helamani 14:16–17, dhe ndihmojini fëmijët që t’i lidhin këto shkrime të shenjta me figurat përkatëse.

Ndërsa fëmijët punojnë me faqen e veprimtarisë së kësaj jave, flisni për profetët e paraqitur në figura dhe atë çka ata dhanë mësim rreth Jezu Krishtit. Thuajuni fëmijëve disa nga gjërat e mrekullueshme që ka bërë Jezusi për ne.

Paraqitni figura të vdekjes dhe Ringjalljes së Shpëtimtarit. Pyetini fëmijët mbi atë që dinë rreth këtyre ngjarjeve. Sipas nevojës, përdorini “Kapitulli[n] 53: Jezusi Kryqëzohet” dhe “Kapitulli[n] 54: Jezusi u Ngrit” (Tregime nga Dhiata e Re, f. 136–138, 139–144) për t’u dëftuar fëmijëve këto histori.

Duke përdorur figura nga Libri i Figurave Artistike të Ungjillit ose Eja, Më Ndiq – Për Individët dhe Familjet, dëftojuni fëmijëve për vizitën e Shpëtimtarit të ringjallur në kontinentin amerikan, siç përshkruhet te 3 Nefi 11:1–17. Përsëriteni disa herë historinë, duke i ftuar fëmijët që t’ju ndihmojnë. Theksoni hollësi që ju mendoni se do të ishin kuptimplote për fëmijët. Në veçanti, theksoni që edhe pse Jezusi kishte vdekur në kryq, njerëzit mund ta shihnin se tani Ai ishte ringjallur. Lërini fëmijët që me radhë ta ritregojnë historinë me fjalët e tyre.

Tregoni historinë e Jezusit që i bekon fëmijët nefitë (shih 3 Nefi 17:11–25). Këndoni së bashku “Easter Hosanna [Hosana Pashkës]” [Liahona, prill 2003, f. M8–9] ose vargun e fundit të “Book of Mormon Stories [Ngjarjet e Librit të Mormonit]”, Children’s Songbook [Libri i Këngëve të Fëmijëve], f. 62. Ftojini fëmijët të vizatojnë figura të asaj që përshkruan kënga. Pastaj kërkojuni fëmijëve që t’i tregojnë vizatimet e tyre dhe çfarë mendojnë se do të kishin ndier po të kishin qenë të pranishëm kur Jezusi i vizitoi nefitët.

Lexojuni fëmijëve disa nga rreshtat e parë te Mosia 3:7 dhe ftojini që të hiqen sikur po ndiejnë “dhembje … , uri, etje dhe lodhje [sfilitje]”. Kërkojuni atyre të tregojnë raste kur ata i kanë ndier këto gjëra. Më pas u thoni fëmijëve se ky varg përshkruan disa nga gjërat që ndjeu Jezu Krishti kur vuajti në Kopshtin e Gjetsemanit. Për shkak të kësaj, Ai di se si të na ndihmojë kur ne i ndiejmë këto gjëra.

Lexoni me zë të lartë tek Alma 7:11 dhe pyetini fëmijët nëse njohin dikë që është i sëmurë apo ka dhembje. Dëshmoni se Jezu Krishti i ndjeu të gjitha “dhembjet dhe sëmundjet” tona, që të mund të kuptonte se si të na ngushëllonte (Alma 7:11–12).

Kërkojuni fëmijëve t’ju dëftojnë atë që dinë për vdekjen dhe Ringjalljen e Jezu Krishtit. Shkruani në tabelë pyetje të tilla si: Çfarë do të thotë të ringjallesh? dhe Kush do të ringjallet? Ndihmojini fëmijët t’i gjejnë përgjigjet te 2 Nefi 9:10–15; Alma 11:41–45; dhe Alma 40:21–23 dhe t’ia thonë klasës atë që gjejnë.

Dëftojuni fëmijëve rreth dikujt që ju e njihni, i cili ka vdekur. Kërkojuni fëmijëve të hiqen sikur ju nuk dini gjë për Ringjalljen. Si do t’ju ndihmonin ata për ta kuptuar se çfarë është ajo? Nxitini që t’i përdorin vargjet te 2 Nefi 9:10–15; Alma 11:41–45 ose Alma 40:21–23 për t’ju dhënë mësim rreth ringjalljes. Gjithashtu, ftojini ata që të japin dëshmi për Ringjalljen e Shpëtimtarit si pjesë e përgjigjes së tyre.

Paraqitiuni fëmijëve një këmishë të bardhë të pastër dhe një këmishë të bardhë të pisët. Lexoni së bashku nga Alma 13:11–12. Si u pastruan njerëzit nga mëkatet e tyre? Çfarë i bëri kjo që të ndienin për mëkatin? Flitni për mënyrën se si ndiheni kur pendoheni dhe merrni falje, dhe jepni dëshminë tuaj për fuqinë e Shpëtimtarit për të na pastruar nga mëkati.

Ftojini fëmijët të zgjedhin të mësojnë për një prej njerëzve të mëposhtëm: Enosin (shih Enosi 1:2–8), Alma të Riun (shih Mosia 27:8–24) ose anti‑nefi‑lehitët (shih Alma 24:7–19). Ndërsa e lexoni së bashku historinë, ftojini fëmijët që të vërejnë se si ky person ose grup ndryshoi për shkak të Shlyerjes së Jezu Krishtit. Si mund t’i ndjekim shembujt e këtyre njerëzve?

Caktojini çdo fëmije të studiojë një nga vargjet vijuese për të gjetur se çfarë vuajti Jezu Krishti: Mosia 3:7; Mosia 15:5; ose Alma 7:11. Ftojini ata që të renditin në tabelë atë që gjetën dhe të mendojnë për rastet kur i kanë ndier disa nga këto gjëra. Sipas Almës 7:12, përse e vuajti Jezusi të gjithë këtë? Përse është e rëndësishme të dimë se Ai i vuajti këto gjëra për ne?

Këndoni së bashku një himn rreth Shpëtimtarit, të tillë si “E Di, Jeton Shëlbuesi Im” (Himne, nr. 74). Ftojini fëmijët të kërkojnë te himni frazat që e përshkruajnë mënyrën se si na ngushëllon Shpëtimtari dhe të thonë përse këto fraza janë domethënëse për ta. Shprehni ndjenjat tuaja për Jezu Krishtin dhe ftojini fëmijët të shprehin ndjenjat e tyre.