ʻOku Tau Fatongia ʻaki ʻEtau Akó

Ako e fakaafe ʻa e Fakamoʻuí ke, “Haʻu, ʻo muimui ʻiate au,” ʻa ia ʻoku maʻu ʻi he Luke 18:22. Fai ha foʻi vaʻinga ʻoku fai ai ʻe ha tamasiʻi/taʻahine ha ngāue pea talaange ki he fānau kehé, “Haʻu, ʻo muimui ʻiate au.” Fakaafeʻi ʻa e fānaú ke nau toe fai ʻa e ngāue tatau.

Fakaʻaliʻali ha ngaahi fakatātā ʻo e kakai ʻoku nau muimui ki he Fakamoʻuí ʻi ha ngaahi founga kehekehe, lolotonga ʻEne ngāue ʻi he māmaní pea ʻi hotau kuongá ni. Te ke lava ʻo maʻu ha ngaahi fakatātā ʻi he Tohi Fakatātā ʻo e Ongoongoleleí pe ngaahi makasini ʻa e Siasí. Te ke lava foki ʻo huluʻi e vitiō “Light the World” (LDS.org). Tuku ki he fānaú ke nau feinga ke ʻiloʻi e founga ʻoku muimui ai e kakaí ki he Fakamoʻuí.

Tokoniʻi e fānaú ke nau fakakaukau ki he ngaahi meʻa ʻoku nau fai ke muimui ai ki he Fakamoʻuí. ʻE lava ke nau maʻu ha ngaahi fakakaukau ʻi hono hivaʻi e “Fekumi Kei Siʻi ki he ʻEikí,” Tohi Hiva ʻa e Fānaú, 67. Tuku ke nau tā ha ngaahi fakatātā ʻo kinautolu ʻi heʻenau fai e ngaahi meʻá ni.

Fakaafeʻi ʻa e fānaú ke nau fakamatala fekauʻaki mo ha ngaahi meʻaʻofa ʻoku nau saiʻia taha ai kuo nau maʻu ʻi he hoko honau ʻaho fāʻeleʻí pe ko ha taimi kehe. ʻOmi ha tatau ʻo e folofolá kuo ʻosi kofu fakameʻaʻofa, tuku ke fakaava ia ʻe ha tokotaha, pea fakamoʻoni ko e folofolá ko ha meʻaʻofa ia mei he Tamai Hēvani kiate kitautolu.

Fakaʻaliʻali ki he fānaú ha ngaahi tohi ʻoku ʻi ai ha ngaahi talanoa faʻu, pea fehuʻi ange fekauʻaki mo e ngaahi talanoa ʻoku nau saiʻia aí. Fakaʻaliʻali ange kiate kinautolu ʻa e folofolá, pea fakamoʻoni ange ʻoku ʻi he folofolá ʻa e folofola ʻa e ʻOtuá kiate kitautolú, pea talanoa ki ha kakai mo ha ngaahi meʻa moʻoni naʻe hoko.

Vahevahe ʻa e ngaahi pōpoaki ʻi he 2 Tīmote 3:15 mo e Molonai 10:3–5, ʻo tokoniʻi e fānaú ke nau toe lea ʻaki ha ngaahi kupuʻi lea. Tokoniʻi ke mahino kiate kinautolu, ʻe lava ke nau ʻiloʻi ʻiate kinautolu pē ʻoku moʻoni ʻa e folofolá.

Fufuuʻi ha fakatātā ʻo e Fakamoʻuí, pea ʻoange ki he fānaú ha ngaahi fakaʻilonga ke tokoni ke nau ʻiloʻi ai ia. Tokoniʻi e fānaú ke mahino e founga ʻe lava ke tokoni ai e fekumi ʻi he folofolá, ke tau ʻiloʻi ʻa Sīsū Kalaisí. Tuku ki he fānaú ke nau taufetongi ʻi hono fufuuʻi e fakatātaá pea ʻoange ha fanga kiʻi fakaʻilonga tokoni ki he fānau kehé.

Hiva fakataha e “Fekumi Kei Siʻi Ki he ʻEikí” mo e “Fekumi, Fifili pea mo Lotu,” Tohi Hiva ʻa e Fānaú, 66-67, pea tokoniʻi e fānaú ke nau fakatātaaʻi e ngaahi lea ʻo e hivá. Vahevahe mo e fānaú ha taha pe ua ʻo hoʻo ngaahi folofola manakó, pea talaange kiate kinautolu e founga naʻá ke ʻiloʻi ai ʻoku moʻoni ʻa e folofolá. Kapau ʻoku ʻi ai ha ngaahi folofola pe talanoa manako e fānaú mei he folofolá, fakaafeʻi kinautolu ke nau vahevahe ia.

Fakaafeʻi ʻa e fānaú ke nau talanoa ki ha kaungāmeʻa ofi ʻoku nau ʻiloʻi pea fakamatalaʻi ʻa e founga naʻe hoko ai ʻa e tokotahá ni ko ha kaungāmeʻá. Lau pea aleaʻi e Sione 5:39 mo e Sione 14:15 ke ʻiloʻi ha ngaahi founga te tau lava ʻo ongoʻi ofi ai kia Sīsū. Kole ki he fānaú ke nau vahevahe ha ngaahi taimi ne nau ongoʻi ofi ai kiate Ia.

Lue takai mo hoʻo kalasí ʻi he falelotú. Fakaafeʻi e fānaú ke hiki honau nimá ʻi heʻenau sio ki ha meʻa lolotonga ʻenau lué, ʻokú ne fakamanatu kiate kinautolu ha founga te nau lava ai ʻo muimui ki he Fakamoʻuí (hangē ko e vai papitaisó pe ko ha fakatātā).

Hiva fakataha mo e fānaú ʻa e “Muimui ʻIate Au,” Ngaahi Himí, fika 57. Fakaafeʻi e fānaú ke vahevahe ha ngaahi taimi kuo nau muimui ai ki he sīpinga ʻa e Fakamoʻuí.

Lau leʻolahi ʻa e Sione 5:39 mo e Ngāue 17:10–11, pea ʻeke ki he fānaú e meʻa ne nau ako fekauʻaki mo e founga ke ako ai e folofolá.

Fili ha ngaahi potufolofola faingofua mo mālohi mei he Fuakava Foʻoú, tohi takitaha ia ʻi ha laʻipepa, pea fufuuʻi ʻa e ngaahi laʻipepá. Faʻu ha ngaahi fakaʻilonga tokoni te ne taki ʻa e fānaú ʻi ha “kumi ha koloa fufū” ʻi he loki akó pe falelotú, ke maʻu ai ʻa e ngaahi potufolofola ko ʻení. Hili ʻenau maʻu ʻa e potufolofola takitaha, aleaʻi e ʻuhinga ʻo e potufolofolá mo e ʻuhinga ʻoku hoko ai ko ha mataʻikoloá.

Vahevahe ha potufolofola ʻe niʻihi ʻokú ke mahuʻingaʻia ai pea fakamatalaʻi ange ʻa e ʻuhinga ʻoku mahuʻingamālie ai kiate koé. Tauhi ha lisi fakakalasi ʻo e ngaahi potufolofola mahuʻinga naʻe maʻu ʻe he fānaú ʻi he Fuakava Foʻoú he taʻu ní—ʻi ʻapi pe ʻi he lolotonga e Palaimelí.

Fai ha fealēleaʻaki mo e fānaú ki he ʻuhinga ʻoku faʻa faingataʻa ai he taimi ʻe niʻihi ke lau e folofolá. Kole ki he fānaú ke nau fevahevaheʻaki ʻiate kinautolu fekauʻaki mo hono ako ʻo e folofolá. Kole ange foki ke nau vahevahe ha ngaahi aʻusia lelei ne nau maʻu mo e folofolá.

Tokoniʻi e fānaú ke nau faʻu ha tohi māhina faingofua ʻe lava ke nau fakaʻaongaʻi ke fakaʻilongaʻi e lahi ʻo ʻenau lau e folofolá. ʻE lava ke fakamanatu ʻe he ngaahi tohi māhiná ni kiate kinautolu ke nau lau e folofolá he ʻaho kotoa pē.

Vahevahe ʻa e talanoa ki he kau taupoʻou ʻe toko hongofulú (vakai, Mātiu 25:1–13; vakai foki “Vahe 47: Ko e Kau Taupoʻou ʻe Toko Hongofulú,” Ngaahi Talanoa ʻo e Fuakava Foʻoú, 118–20. Fehuʻi ki he fānaú: ʻOku tatau fēfē nai ʻetau ngaahi fakamoʻoní mo e ngaahi māmá? Ko e hā ʻoku mahuʻinga ai ke ʻi ai hatau ngaahi fakamoʻoní?

Aleaʻi e ngaahi meʻa te tau ala fakahoko ke fakamālohia ai ʻetau ngaahi fakamoʻoní. Ki ha ngaahi fakakaukau, fakaafeʻi e fānaú ke nau fekumi ʻi he Sione 7:17 mo e Molonai 10:3–5. Fakaafeʻi kinautolu ke vahevahe e ngaahi meʻa ʻoku nau ʻilo ʻoku moʻoní.

Kole ki he fānaú ke tokoni atu ki hono fakahingoa e fanga kiʻi poloká ʻaki e kupuʻi lea ʻoku nau fakamatalaʻi e ngaahi meʻa ʻoku tau fai ke fakatupulaki ai ʻetau ngaahi fakamoʻoni, hangē ko e lotú. Tuku ki he fānaú ke nau fokotuʻutuʻu ha faʻunga ʻokú ne fakafofongaʻi ʻa e fakamoʻoní, ʻo fakaʻaongaʻi e poloká.