Mātiu 26; Maʻake 14; Luke 22; Sione 18

Fakamatala fakanounouʻi e talanoa ʻo hono fakafeʻiloaki ʻe Sīsū ʻa e sākalamēnití. Te ke lava fakaʻaongaʻi e “Vahe 49: Ko e Fuofua Sākalamēnití,” Ngaahi Talanoa ʻo e Fuakava Foʻoú, 124–26. Tokoniʻi e fānaú ke mahino kiate kinautolu, ʻoku tau manatua ʻa Sīsū lolotonga e sākalamēnití.

Fehuʻi ki he fānaú pe ʻoku nau ʻiloʻi e meʻa ʻoku fakafofongaʻi ʻe he maá mo e vaí ʻi he sākalamēnití. Fakamatalaʻi ange ʻoku tokoni e ngaahi fakaʻilonga ko ʻení ke tau manatuʻi naʻe pekia ʻa Sīsū maʻatautolu pea toe tuʻu mei he maté. Fakaʻaliʻali ha konga mā mo ha ipu vai lolotonga hoʻo tokoniʻi e fānaú ke nau maʻuloto e kupuʻi lea “ʻI he fakamanatu kiate [Ia]” (Luke 22:19).

Kole ki he fānaú ke kuikui honau matá pea fakakaukau ki ha taha ʻoku nau ʻofa aí, pea fakaafeʻi leva kinautolu ke nau fakamatala fekauʻaki mo e tokotaha ko iá. Kole ange ke toe kuikui honau matá, fakakaukau ki he Fakamoʻuí, pea vahevahe leva ha ngaahi meʻa ʻoku nau ʻilo kau kiate Iá. Poupouʻi kinautolu ke nau fakakaukau kau kia Sīsū lolotonga e sākalamēnití he uike takitaha.

Fakaafeʻi e fānaú ke nau fakahaaʻi ko e hā te nau lava ʻo fai ke nau manatuʻi ai ʻa Sīsū pea ke nau loto-ʻapasia lolotonga e sākalamēnití.

Tokoniʻi e fānaú ke nau faʻu e kiʻi tohi tufa ʻoku fakamatalaʻi ʻi he peesi ʻekitivitī ki he uike ní. Fokotuʻu ange ke nau fakaʻaongaʻi ia ke tokoniʻi kinautolu ke nau fakakaukau kau kia Sīsū lolotonga e sākalamēnití.

Tokoniʻi e fānaú ke nau kumi ʻi ha ngaahi makasini ʻa e Siasí ki ha ngaahi fakatātā ʻo Sīsū pea faʻu ha ngaahi fakatātā kuo fakatahatahaʻi (collage) ke nau sio ki ai lolotonga e houalotu sākalamēnití.

Fakaafeʻi e fānaú ke nau fakakaukau ki ha taimi ne nau ongoʻi loto mamahi ai. ʻO kapau ʻe taau, fakaafeʻi ha niʻihi ʻo e fānaú ke nau vahevahe. Fakaʻaliʻali ange ʻa e fakatātā ʻi he lēsoni ki he uike ní ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí. Fakamatalaʻi ange naʻe ongoʻi ʻe Sīsū ʻa e kotoa ʻo e mamahi mo e loto mamahi kuo ongoʻi ʻe he tokotaha kotoa pē, ʻi ha founga ʻoku ʻikai ke fuʻu mahino kakato kiate kitautolu. ʻOku ʻuhinga ʻeni te Ne lava tokoniʻi kitautolu ke tau ongoʻi sai ange ʻi he taimi ʻoku tau ongoʻi loto mamahi mo ʻita aí.

Hivaʻi fakataha mo e fānaú e “ʻOku Ongo ʻa e ʻOfa,” Tohi Hiva ʻa e Fānaú, 42–43. Fakaafeʻi kinautolu ke nau vahevahe ha ngaahi founga ʻa ia kuo nau ongoʻi ai e ʻofa ʻa Sīsuú.

Fakaafeʻi e fānaú ke nau taufetongi hono lau e ngaahi veesi ʻi he Maʻake 14:22–24 (vakai foki Liliu ʻa Siosefa Sāmita, Maʻake 14:20–24 [Fakahinohino ki he Ngaahi Folofolá]) mo e Tokāteline mo e Ngaahi Fuakava 20:75–79. Ko e hā ha ngaahi foʻi lea mo e fakakaukau ʻoku faitatau ʻi he ongo kupuʻi potu folofolá?

Fehuʻi ki he fānaú ko e hā ʻoku nau fai ke tokoniʻi ai kinautolu ke nau fakakaukau kau kia Sīsū lolotonga e sākalamēnití. Tokoniʻi kinautolu ke nau kumi ha ngaahi folofola pe lea mei he ʻū himi sākalamēnití, ʻa ia te nau lava ʻo lau lolotonga e sākalamēnití, pea lisi leva kinautolu ʻi ha kaati ʻa ia ʻe lava ʻe he fānaú ʻo fakaʻaongaʻi ʻi he taimi hoko te nau maʻu ai e sākalamēnití. Hivaʻi fakataha mo e fānaú ha niʻihi ʻo e ngaahi hiva ko ʻení (vakai Ngaahi Himí, fika 89–107).

Hiki ʻi he palakipoé ha ngaahi kupuʻi lea mei he lotu sākalamēnití, pea tokoniʻi e fānaú ke nau ako maʻuloto kinautolu. ʻOku ʻuhinga nai ki he hā ʻa e ngaahi kupuʻi lea ko ʻení? Ko e hā e ʻuhinga ʻoku tau houngaʻia ai ʻi heʻetau fakafoʻou ʻetau ngaahi fuakava ʻi he papitaisó he uike kotoá?

Fakaafeʻi ha tokotaha maʻu Lakanga Taulaʻeiki Faka-ʻĒlone ke talanoa ki he fānaú fekauʻaki mo ʻene aʻusia ʻi heʻene teuteu, tāpuakiʻi, pe tufaki e sākalamēnití. Ko e hā ʻokú ne tokoniʻi ia ke teuteu ke ne fai ʻení? Ko e hā ʻene ongoʻi heʻene fai iá? ʻOku fakamanatu fēfē nai ʻe he maá mo e vaí kiate ia ʻa e Fakamoʻuí?

Kole ki he fānau kuo ʻosi papitaisó ke nau vahevahe e meʻa ʻoku nau manatuʻi fekauʻaki mo honau papitaisó. Ne nau ongoʻi fēfē nai? Ko e hā ha ngaahi fuakava ne nau fai? (vakai Mōsaia 18:8–10). Tala ange kiate kinautolu, ko e uike kotoa pē ʻoku tau maʻu ai e sākalamēnití, ʻoku lava ke hangē pē ia ʻoku tau toe papitaisó—ʻe lava ke fakamolemoleʻi ʻetau ngaahi angahalá, pea tau fakafoʻou ʻetau ngaahi fuakavá.

Tokoniʻi e fānaú ke nau lau e Mātiu 26:36–42, ʻo fekumi ki he ngaahi lea pe ngaahi kupuʻi lea ʻokú ne fakamatalaʻi e meʻa ne ongoʻi ʻe Sīsū ʻi Ketisemaní. Ko e hā e meʻa ne aʻusia ʻe Sīsū ʻa ia naʻá ne ngaohi Ia ke ongoʻi pehení? ʻOange ha faingamālie ki he fānaú ke nau vahevahe ai ʻenau ngaahi ongo fekauʻaki mo Sīsū mo ʻEne feilaulau maʻatautolú.

Fakaafeʻi e fānaú ke vahevahe ha taimi ne nau ongoʻi loto mamahi pe faingataʻaʻia ai. Fehuʻi ange pe ʻoku nau ʻilo ha taha kuó ne ongoʻi e meʻa tatau. Fakamatalaʻi ange, naʻe ongoʻi ʻe Sīsū ʻi Ketisemani ʻa e faingataʻa mo e loto mamahi kotoa pē kuo ongoʻi ʻe he tokotaha kotoa pē. Naʻá Ne fai ʻeni kae lava ke Ne fakanonga kitautolu ʻi he taimi ʻoku tau fie maʻu aí (vakai ʻAlamā 7:11–12).

ʻOange ki ha tokotaha ha vaʻakau ʻoku lōloa ange ʻi he maokupu ʻo e matapā ki he lokiakó, pea kole ange ke ne puke faka-holisonitale ia pea feinga ke hū ʻi he matapaá. Fakamatalaʻi ange ʻoku fakafofongaʻi ʻe he vaʻakaú ʻa ʻetau ngaahi angahalá, ʻa ia ʻokú ne taʻofi kitautolu mei heʻetau hū ki he puleʻanga ʻa e ʻOtuá. Toʻo ʻa e vaʻakaú meiate ia ke fakahaaʻi ange, naʻe toʻo ʻe Sīsū kiate Ia ʻa ʻetau ngaahi angahalá kae lava ke fakamolemoleʻi kitautolu ʻi he taimi te tau fakatomala aí.

Ako maʻuloto mo e fānaú e kupuʻi lea “Kae ʻoua naʻa fai hoku lotó, ka ko e finangalo ʻoʻoú” (Luke 22:42) pea aleaʻi hono ʻuhingá. Ko e hā te tau lava ʻo fai ke tau talangofua ai ki he finangalo ʻa e Tamai Hēvaní?

Tokoniʻi e fānaú ke nau ʻiloʻi ha niʻihi ʻo e ngaahi fekau kuo nau tauhí. Fehuʻi ange: Ko e hā ha ngaahi tāpuaki naʻá ke maʻu ʻaki hoʻo talangofua ki he Tamai Hēvaní, neongo e taimi naʻe faingataʻa aí? Fakaafeʻi kinautolu ke nau vahevahe ʻenau ngaahi aʻusiá mo e ngaahi fakamoʻoní.

Fai e talanoa ʻo e Luke 22:41–43 ki he fānaú (ʻaki hano fakaʻaongaʻi e “Vahe 51: Ko e Mamahi ʻa Sīsū ʻi he Ngoue ko Ketisemaní,” Ngaahi Talanoa ʻo e Fuakava Foʻoú, 129–32. Fakamatalaʻi ange, ko e taimi naʻe lotu ai ʻa Sīsuú, naʻe ʻomi ʻe he Tamai Hēvaní ha ʻāngelo ke fakamālohia Ia. Ko hai ʻoku ʻomi ʻe he Tamai Hēvaní ke fakamālohia kitautolú?

Fakaʻaliʻali e fakatātā ʻo hono fakanonga ʻe he ʻāngeló ʻa Kalaisi ʻi he lēsoni ki he uike ní ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí, pea vahevahe ha aʻusia ʻa ia naʻá ke ongoʻi naʻe fakamālohia ai koe ʻe he Tamai Hēvaní.