“June 24–30. Maciu 28; Marika 16; Luke 24; Joni 20–21: ‘Sa Tucake Tale ko Koya’” Lako Mai, Mo Muri Au—Me Baleti Ira na Lalai: Veiyalayalati Vou 2019 (2019)
“June 24–30. Maciu 28; Marika 16; Luke 24; Joni 20--21,” Lako Mai, Mo Muri Au—Me Baleti Ira na Lalai: 2019
Vakani Ira na Noqu Sipi, mai vei Kamille Corry
June 24--30
Maciu 28; Marika 16; Luke 24; John 20–21
“Sa Tucake Tale ko Koya”
Tekivuna na nomu vakavakarau ena wiliki ni Maciu 28; Marika 16; Luke 24; kei na Joni 20–21. Lako Mai, Mo Muri Au—Baleta na Tamata Yadua kei na Matavuvale kei na ituvatuva oqo e rawa ni vukei iko mo digia na ivakavuvuli ena veiwase oqo ka na vakaibalebale vei ira na gone ena nomu kalasi.
Vola na Veika o Uqeti Kina
Sureta na Veiwasei
Na raici ni dua na iyaloyalo sa rawa ni vukei ira na gone ni nanuma na veika era a vulica e vale se ena ituvaki tale eso. De vinaka mo na vakaraitaka na iyaloyalo ena ituvatuva ni macawa oqo ena Lako Mai, Mo Muri Au—Baleta na Tamata Yadua kei na Matavuvale ka kerei ira na gone me ra wasea na ka era kila me baleta na italanoa e vakaraitaki tu ena iyaloyalo.
Vakavulica na iVunau
Gone Sobu
Maciu 28; Marika 16; Luke 24; John 20:1--23
Au na bula tale niu sa mate oti, me vakataki Jisu.
Na Veisorovaki i Jisu Karisito, oka kina na Nona Tucake Tale, sai koya na vakayacoka bibi duadua ni veigauna, ka sa yavu ni vakabauta Vakarisito. Ni o wilika na veika e baleta na Tucake Tale, vakananuma titobu na ivakarau o na vukei ira kina na gone me ra tara cake na nodra vakabauti Jisu Karisito.
iTaviqaravi e Rawa ni Caka
-
Tukuna na italanoa ni Tucaketale i Jisu ena nomu vosa. Kerei ira na gone me ra veivukevuke ni tokaruataka lesu tale vei iko na italanoa. E rawa ni o raica na “Wase 54: Jesus Is Risen,” New Testament Stories, 139-44, se na kena vidio ena (LDS.org). Vakamacalataka ni gauna sa mate kina o Jisu, sa biuta na Yagona na Yalona. Ni sa tucake tale o Koya, erau sa cokoti vata tale na Yalona kei na Yagona.
-
Sureta e vica na lewe ni tabanalevu me ra sotia, agilosi, Meri Makitalena, Pita, Joni, tisaipeli, kei Tomasi ka tukuna na ka era a vakadinadinataka ni oti na Tucaketale nei Jisu.
-
Vakaraitaka na vidio “What Happens after We Die?” (LDS.org), ka tukuna e dua o kila ka sa mate. Wasea na nomu ivakadinadina ni tamata kece ena tucake tale ena dua na siga. Sureti ira na gone mera wasea na nodra ivakadinadina.
-
Navuca ni lagata vata “Did Jesus Really Live Again?” kei na “When He Comes Again,” Children’s Songbook, 64, 82. Kerei ira na gone me ra raitayaloyalotaka se na vakaevei na nodra raici Jisu ni sa tucake tale. Me ra na wasea ki na kalasi na nodra nanuma.
Au rawa ni vakabauti Jisu Karisito dina ga niu sega ni raici Koya rawa.
Navuca na ivakarau o na rawa ni vukei ira kina na gone me ra kila na cava na vakabauta kei na ivakarau era rawa ni cakacakataka kina na vakabauta kivua na iVakabula.
iTaviqaravi e Rawa ni Caka
-
Vakaraitaka na iyaloyalo Christ Approaches Thomas (LDS.org) ni o tukuna tiko na veika a sotava o Tomasi ena Joni 20:24–29. Tokaruataka malua na italanoa ena lesoni, ia me ra tukuna na gone eso na kena matailalai ena gauna oqo.
-
Vakaraitaka e dua na bola ka tiko i loma e dua na iyaya era sega ni rawa ni raica na gone, ka vakamacalataka na iyaya vei ira na gone. Tarogi ira kevaka era vakabauta ni tiko dina i loma ni bola na iyaya kei na cava na vuna. Qai vakaraitaka vei ira na iyaya, ka vakamacalataka ni vakabauta sai koya na noda vakadinata na veika eda sega ni raica. Na vakabauta bibi duadua e rawa ni noda sai koya na vakabauti Jisu Karisito.
Raica na Ligaqu, mai vei Jeff Ward.
Au rawa ni vakaraitaka na noqu lomani Jisu ena qaravi ira na tani.
O na vakauqeti ira vakacava na gone me ra lomani ka vukei ira na wavoliti ira tu?
iTaviqaravi e Rawa ni Caka
-
Wilika na John 21:15–17, se vakaraitaka na vidio “Feed My Sheep” (LDS.org). A sega ni vinakata o Jisu me qoli tiko ena gauna taucoko o Pita. Ia, a vinakati Pita o Koya me wasea na kosipeli ka sureta na tamata kecega me ra lako mai Vua. Solia vei ira yadua na gone e dua na pepa sipi, ka kerei ira me ra vola kina e dua na ka era rawa ni cakava me vukea na nodra vakani na sipi i Jisu.
-
Kerei ira rawa e vica na gone me ra wasea na veika era sa cakava tiko me ra lomani ka qaravi ira na tani, se na sala eso era sa qaravi kina mai vei ira na tani.
-
Vola na yacadra yadua na gone ena nomu kalasi ena tikinipepa koti vaka na sipi, ka qai biuta wavoki na sipi oqori ena rumu. (Okata na yacadra na gone era sega ni dau tiko wasoma.) Sureti ira na gone me ra sokumuna na sipi ena raici ni dua e koto kina na yacadra. Na cava eda rawa ni cakava me da qarava kina e dua na sipi lakosese eda kila?
Vakavulica na iVunau
Gone Qase Cake
Maciu 28; Marika 16; Luke 24; John 20:1–23
Baleta ni sa vakaturicake tale o Jisu, ena vakaturicake tale na tamata kecega.
Sa matau tu me ra vakananuma na gone na cava ena yaco ni da sa mate oti. Navuca na iwalewale o rawa ni vakavulica kina na Tucaketale ka me na taracake na nodra vakabauta.
iTaviqaravi e Rawa ni Caka
-
Sureti ira na gone me ra bobo ka raitayaloyalotaka ni ra dabe tikiva toka na ibulubulu i Jisu ni o wilika na Joni 20:1–17 se vakalekalekataka na italanoa ni Nona Tucaketale (raica talega “Wase 54: Jesus Is Risen,” New Testament Stories, 139–44, se na kena vidio ena LDS.org). Ena vakaevei beka na ituvaki ni noda raica na iVakabula sa tucake tale?
-
Kerei ira yadua na gone me ra vulica na veika a sotava e dua ka raica na iVakabula sa tucake tale ka wasea vei ira na vo ni kalasi na ka sa vulica.
-
Sarava kei ira na gone e dua se levu vei ira na vidio oqo: “Jesus Is Laid in a Tomb,” “Jesus Is Resurrected,” “Christ Appears on the Road to Emmaus,” kei na “The Risen Lord Appears to the Apostles” (LDS.org).
Au rawa ni vakabauti Jisu Karisito dina ga niu sega ni raici Koya rawa.
Na cava era sa cakava tiko na gone o vakavulica me vaqaqacotaka na nodra vakabauti Jisu Karisito? E rawa vakacava mo vukei ira?
iTaviqaravi e Rawa ni Caka
-
Sureta e vica na gone me ra veivukevuke ni wilika na veitikina ena Joni 20:24–29. (Raica talega na vidio “Blessed Are They That Have Not Seen, and Yet Have Believed,” LDS.org.)
-
Vola na vosa yadua ena malanivosa “Blessed Are They That Have Not Seen, and Yet Have Believed” ena veitikinipepa duidui. Sureti ira na gone me ra tuva vakadodonu na vosa. Sureti ira me ra tukuna na veika era sotava ka ra a vakila kina na loloma ni iVakabula kevaka mada ga era sega ni raici Koya.
-
Sureti ira na gone me ra droinitaka na iyaloyalo ni veika e rawa ni ra cakava me vaqaqacotaka na nodra vakabauta. Ni ra droini, wasea na ka o sa cakava me vaqaqacotaka na nomu vakabauti Jisu Karisito.
Au rawa ni vakaraitaka noqu lomani Jisu ena noqu vakani ira na Nona sipi.
E rawa ni ra veivakayarayarataki vakalevu na gone vei ira na wavoliti ira tu. O rawa vakacava ni vakauqeti ira mera vaqaqacotaki ira na tani ena kosipeli?
iTaviqaravi e Rawa ni Caka
-
Ni bera ni wiliki vata na Joni 21:1–17 tarogi ira na gone se ra sa bau laki siwa mada eliu. E a vakacava tu? Taroga kevaka e dua e sa bau rawata “e levu na ika” (Joni 21:6).
-
Wilika na Joni 21:15–17, ia vakaisosomitaka na yacai Saimoni ena yacadra na gone. O cei na sipi nei Jisu? E rawa vakacava meda vakania na Nona sipi?
-
Wasea vata kei ira na gone e dua na ivakalomavinaka rawarawa. Ni ra sa kana tiko, tarogi ira se sa vakatauvatani vakacava na wasei ni kosipeli ki na dua tale kei na nodra vakani voli.
Vakauqeta na Vuli e Vale
Sureti ira na gone me ra vakayagataka na itaviqaravi ni macawa oqo me ra vakavulica na nodra matavuvale me baleta na iotioti ni macawa ni bula ni iVakabula.
Vakatorocaketaki Noda Veivakavulici
Vakamuria na veisureti me caka. Ni o sureti ira na gone me ra cakava na ka era sa vulica tiko, vakamuria na nomu veisureti ena kalasi ka tarava. Oqo e vakaraitaka vei ira na gone ni o kauwaitaka na ivakarau e sa vakalougatataka tiko kina na nodra bula na kosipeli. Ni ra wasea na veika era sotava, era na vaqaqacotaki ka ra na veivukei vakaiira ni bulataka na kosipeli.