Mosaea 4--6

• Ua i ai i nisi tagata le manatu faaseseina faapea o le salamo e manaomia ai sina taumafaiga laitiiti; o isi ua talitonu e manaomia ai se taumafaiga tele. Ina ia fesoasoani i tagata o le vasega ia malamalama atili i le mea e manaomia e maua ai se faamagaloga o agasala, e mafai ona e valaaulia i latou e sailiili i aoaoga a le Tupu o Peniamina i le Mosaea 4:1--12, ma vaavaai mo tulaga na afua ai ona toina mai e le Tama Faalelagi se faamagaloga o a tatou agasala. E mafai e tagata o le vasega ona lisi i luga o le laupapa mea latou te mauaina. Fai i ai e mafaufau i se talafaatusa e fesoasoani e faamalamalama ai mea sa latou aoaoina. Mo se faataitaiga, e mafai ona latou faatusatusaina le faamagaloga o agasala i se tagata aitalafu “ua totogi” pe faaleaogaina se aitalafu. Pe e mafai foi ona latou faatusaina le faatumauina o se faamagaloga o a tatou agasala i le tausiga o se mea e manaomia le faaleleia e le aunoa, e pei o se togalaau po o se fale.

• Mafaufau e fesili i tagata o le vasega pe o le a sa latou tala i se tasi o tau manatunatu pe aoga taumafaiga ia salamo ai. E faapefea ona latou fesoasoani i se tasi ua lotovaivai ma lagona faapea o le faatoilaloina o le agasala ma vaivaiga e le mafai? E mafai ona e fesoasoani e saunia tagata o le vasega mo na talatalanoaga e ala i le fesili atu ia i latou e faaalu ni nai minute e sailiili ai i upu a le Tupu o Peniamina i le Mosaea 4:1--12 mo upumoni e mafai ona fesoasoani i se isi i se tasi o nei tulaga. Ona mafai lea e tagata o le vasega ona faasoa mai upumoni latou te maua i se tasi o nofo i ona autafa.

• E faapefea ona tatou iloa pe ua tatou maua se faamagaloga o a tatou agasala? Sa faamatala e le Tupu o Peniamina ni nai taunuuga o le salamo moni---valaaulia tagata o lau vasega e sue i le Mosaea 4:13--16. E mafai foi ona e valaaulia i latou e mafaufau loloto i o latou lava olaga ma iloilo pe o le a le lelei o latou ola ai i aoaoga o i nei fuaiupu. O a faailoga ua vaai i ai tagata o le vasega e faapea ai ua liua i latou? E faapefea ona suia a tatou sootaga ma isi a o tatou o mai ia Keriso e ala i le salamo? Atonu e mafai e tagata o le vasega ona fefaasoaai pe o faapefea ona latou vaaia lenei mea ua tupu i o latou olaga.

• Mosaea 4:11–12 ma le 14–16 e mafai ona uunaia ai se talanoaga e uiga i mea e musuia ai tulaga faamatua amiotonu. O a mea o loo aoao mai e nei fuaiupu e uiga i auala e avea ai ma ni matua sili atu?

• Afai ua e lagona le musuia e faia se talanoaga e uiga i aoaoga a le Tupu o Peniamina e tusa ai ma le tausiga o e matitiva ma le tagolima, e mafai ona e valaaulia tagata o le vasega e feauauai i le faitauina o fuaiupu mai le Mosaea 4:16--27. A mavae le faitauina o fuaiupu taitasi, e mafai e le tagata o loo faitauina ona aotele i ana lava upu mea na aoao mai e le Tupu o Peniamina. Savali a Elder Jeffrey R. Holland “Pe Le o i Tatou Uma Ea o Ni Tagata Aisi?” (Ensign po o le Liahona, Nov. 2014, 40-42) e mafai ona faaaoga e faaopoopo i le talanoaga. E mafai faapefea ona tatou mulimuli i le fautuaga a le Tupu o Peniamina e aua le “tamoe televave atu nai lo le malosi [ua tatou maua]”? (Mosaea 4:26–27). E faapefea ona fesootai le poloaiga e “faasoa atu a [tatou] mea i e matitiva” ma le faamagaloina o a tatou agasala?

• O nisi taimi e foliga mai e faigofie atu pe afai e tuuina mai e le Alii ia i tatou se lisi auiliili o agasala uma e mafai ona i ai. Nai lo lena, ua Ia fetalai mai ia i tatou, “E vaavaaia outou lava, … ma tumau pea i le faatuatua i mea ua outou faalogo i ai e uiga i le afio mai o lo tatou Alii” (Mosaea 4:30). Ina ia fesoasoani i lau vasega e talanoaina lenei mataupu faavae, e mafai ona e fai atu ia i latou fesili e pei o nei: E faapefea e o tatou mafaufauga, upu, ma galuega ona aafia ai i tatou lava ma isi? O le a le uiga o le “tumau pea i le faatuatua”? O le a se fautuaga e mafai ona tatou fefaasoaai o le tasi ma le isi e “vaavaai” i tatou lava?

• Ina ia amatalia se talanoaga e uiga i le suiga e le mafaatusalia lea e mafai e le talalelei a Iesu Keriso ona aumai i o tatou olaga, e mafai ona e valaaulia tagata o le vasega e faasoa mai ni mafuaaga e tele ai ina faigata ona faia ni suiga tumau i o tatou olaga. Ona valaaulia lea o i latou e faitau le Mosaea 5:1–5, ma vaavaai mo le “suiga tele” lea na oo i ai le nuu o le Tupu o Peniamina. O a upumoni e faatatau i se suiga o le loto ua tatou aoao mai i o latou aafiaga? Mafaufau e fai atu i ni tagata o le vasega e faasoa mai pe na faapefea ona fesoasoani le Agaga Paia ia i latou e suia o latou loto. E mafai foi ona outou matamata i se tasi o vitio o loo fautuaina mai i “Punaoa Faaopoopo.”

  Ata

  O Keriso o loo faamalolo se fafine ma’i.

• A uma ona talanoaina ia upumoni i le Mosaea 5:1--7, atonu e taumanatunatu nisi o tagata o le vasega pe aisea e le foliga mai ai le suiga o o latou loto e maoae pe vave e pei ona sa oo i ai le nuu o le Tupu o Peniamina. O le saunoaga a Elder D. Todd Christofferson i le “Punaoa Faaopoopo” o loo talanoaina ai le fesili lenei. O le a se mea e mafai ona tatou aoao mai ia Elder Christofferson e uiga i le liuaina?

• Mosaea 5:5–15 e mafai ona fesoasoani i tagata o le vasega ia malamalama ai i faamanuiaga latou te maua pe a latou osia ma tausia feagaiga ma le Atua. E mafai ona e valaaulia i latou e iloilo nei fuaiupu faatasi ai ma feagaiga o le papatisoga ma le sauniga o le faamanatuga i le mafaufau ma faasoa mai mea latou te aoaoina. (Tagai foi MF&F 20:77, 79.)

• “Mea e Ai e Tatau ma le Aso: Suiga”

  

• “O Se Suiga o le Loto”

• “O Se Suiga Tele: Liua”

Na saunoa Elder D. Todd Christofferson e uiga i le suiga tele o le loto o loo faamatala mai i tusitusiga paia:

“Atonu tou te fesili, Aisea e le vave ai ona tupu lenei suiga tele ia te au? E tatau ona e manatua ia faataitaiga ofoofogia a le nuu o le Tupu o Peniamina, Alema, ma isi i tusitusiga paia e—matua ofoofogia ae e le o se mea e masani ai. O le toatele lava o i tatou, e faifai malie suiga ma e umi se taimi e tulai mai ai. O le toe fanaufouina, e le pei o lo tatou fananau mai i la le tino, o se faagasologa ae le o se mea ua fuafua e tupu. Ma o le galue ai i lena faagasologa o le faamoemoega tutotonu lea o le olaga nei.

”O Le taimi foi lea, aua ne’i o tatou tauamiotonuina i tatou lava i a tatou taumafaiga faasamasamanoa. Aua nei faamalieina i tatou e taofiofi ni lagona e faia le leaga. Ia tatou aai ma feinu ma le agavaa i le faamanatuga i vaiaso taitasi ma faaauau pea ona pipiimau i le Agaga Paia ina ia veleeseina ia muiaa o mea eleelea o loo totoe i totonu ia i tatou. Ou te molimau atu ao outou faaauau ai i le ala o le toe fanauina faaleagaga, o le a aveeseina e le alofa togiola o Keriso a outou agasala ma pisipisia o na agasala o loo ia te outou, o le a mou ese atu faaosoosoga, ma o Keriso o le a faapaiaina ai outou, e pei ona paia o Ia ma lo tatou Tama” (“Toe Fanauina,” Ensign po o le Liahona, Me 2008,  78).