Filipi; Kolose

• Atonu e te manao e fesoasoani i lau vasega ia vaai faalemafaufau i le uiga o le “toeseina le tagata tuai” ma le “oofu i le tagata fou” e ala ia Iesu Keriso (Kolose 3:9–10). Ina ia faia lenei mea, atonu e te faaalia atu se mea tuai ma se mea fou (e pei o se fualaau aina ua ova le pula ma se fualaau aina fou po o se ofu tuai ma se ofu fou). E mafai e tagata o le vasega ona talanoa i auala tatou te “fou” ai e ala i lo tatou faatuatua ia Iesu Keriso ma lo tatou naunau e ola i Lana talalelei. E avea o se vaega o lenei talanoaga, e mafai ona e fai atu i le afa o le vasega e suesue le Filipi 2:1–5, 14–18; 4:1–9 ae o le isi afa e suesue i le Kolose 3:1–17, ma faailoa ai uiga o le “tagata tuai” ma le “tagata fou.” E mafai foi ona e valaauina ni nai tagata o le vasega e faasoa mai pe na faapefea ona fesoasoani le i ai o le faatuatua ia Iesu Keriso ma le ola i Lana talalelei ia i latou e avea ai ma ni tagata fou. O isi mau e mafai ona outou suesueina faatasi e aofia ai le Roma 6:3–7; Mosaea 3:19; ma le Alema 5:14, 26.

• E ui ina ese o tatou tulaga mai i tulaga o Paulo, ae e mafai ona tatou aoao uma mai i lona naunau ia lotomalie ma olioli i tulaga uma o lona olaga. Ina ia amata se talanoaga i lenei autu, e mafai ona e toe faamanatuina nisi o tofotofoga sa oo ia Paulo (tagai, mo se faataitaiga i le, 2 Korinito 11:23–28). Ona e fai atu lea i tagata o le vasega e toe faamanatu le Filipi 4:1–13 e sue ai le fautuaga na tuuina mai e Paulo lea e mafai ona fesoasoani ia tatou olioli ai, e oo lava i taimi o tofotofoga.

  Afai e te manao e suesue atili lenei autu, atonu e te fai atu i se tagata o le vasega e faasoa mai nisi o tala musuia po o faamatalaga mai le saunoaga a Peresitene Russell M. Nelson “Olioli ma le Ola ai Faaleagaga” (Ensign po o le Liahona, Nov. 2016, 81–84), pe e mafai foi ona matamata e le vasega le vitio “Trial of Adversity” (LDS.org). Na faapefea ona maua e tagata i le saunoaga a Peresitene Nelson po o le tamaitai i le vitio ona maua le olioli, e ui lava i o latou tulaga faigata?

• Atonu e mafai e tagata o le vasega ona maua le fautuaga i le Filipi 4 e faapea ona fesoasoani ia i latou pe a latou oo i tofotofoga. Atonu e te tuuina atu i tagata o le vasega se kata laitiiti e tusi ai le mea latou te maua. Fai atu ia i latou e tuu i se mea latou te iloa atu ai pe a latou manaomia.

• O nisi taimi, o se viiga e mafai ona faaleleia lo latou malamalamaaga i tusitusiga paia. Mo se faataitaiga, a uma ona faitau le Filipi 4:7, 13, e mafai ona outou usuina faatasi le “O Fea Lo’u Filemu?” po o le fuaiupu muamua o le “Faaola e ia Ou Alofa” (Viiga, nu. 68, 150). O a ni sootaga o vaaia e tagata o le vasega i le va o upu o nei viiga ma le Filipi 4:7, 13? Atonu e mafai ona latou faasoa mai ni aafiaga i se taimi na latou lagonaina ai “le manuia mai le Atua, o loo silisili lava i mea uma e manatu i ai” po o se taimi sa latou lagonaina ai le faamalosi “mai o Keriso” e ausia se mea na semanu e le mafai ona latou faia. O le aafiaga a Elder Jay E. Jensen o loo maua i le “Punaoa Faaopoopo,” atonu e fesoasoani e musuia ai le talanoaga e uiga i nei fuaiupu.

• Talu ai ua faateteleina le amioleaga i le lalolagi i aso nei, o le a manuia lau vasega mai le fautuaga a Paulo e “mafaufau i” mea e moni, matagofie, logoleleia, mama, pe tauleleia (Filipi 4:8). Atonu e mafai ona e tofi atu i tagata taitoatasi o le vasega (po o vaega toalaiti o tagata o le vasega) se tasi o uiga auaumama o loo lisiina i le Filipi 4:8 po o le Mataupu Faavae o le Faatuatua 1:13. E mafai e i latou taitoatasi ona faaaoga le Taiala o Autu e sue ai mau e uiga i a latou uiga auaumama na totofi atu ma faasoa mai i le vasega mea latou te maua. E mafai foi ona latou faasoa mai ni faataitaiga o na uiga auaumama i olaga o tagata. E faapefea ona tatou “saili atu i nei mea”?

• O le molimau a Paulo e uiga i le Faaola o loo maua i le Kolose 1:12–23; 2:3–8 ua tuuina mai ai se avanoa lelei mo tagata o le vasega e mafaufau loloto ma faamalosia ai o latou lava faatuatua. E mafai e tagata o le vasega ona suesue i nei fuaiupu e maua ai mea e faamalosia ai o latou faatuatua ia Iesu Keriso. O le a le uiga o le ia “mauaa ma ia atiina ae ia [Iesu Keriso]”? (Kolose 2:7). O le ata o le laau o loo i le otootoga o le vaiaso lenei i le Sau, Mulimuli Mai ia te A’u—Mo Tagata Taitoatasi ma Aiga ma le vitio “Spiritual Whirlwinds” (LDS.org) e mafai ona fesoasoani i tagata o le vasega i le talanoaina o le fuaiupu lenei. (Tagai foi Neil L. Andersen, “Asiosio Faaleagaga,” Ensign po o le Liahona, Me 2014, 18–21.) O a ni mea e mafai ona faamalosia pe faavaivaia aa o se laau? E mafai faapefea e le “mauaa ma ia atiina ae ia [Iesu Keriso]” ona faamalosia i tatou e faasaga i faatosinaga o le lalolagi? (tagai Kolose 2:7–8; tagai foi Helamana 5:12; Eteru 12:4).

• Atonu ua nofouta tagata o lau vasega i filosofia ma aganuu a tagata ia e mafai ona “faatagataotauaina” ai le faatuatua o se tagata ia Keriso ona e feteenai ma upumoni o le talalelei ma atili faafaigata ai le ola i le talalelei (Kolose 2:8). Atonu e mafai e tagata o le vasega ona lisi ia nisi o manatu nei (atonu e fesoasoani manatu na fautuaina mai e Elder Dallin H. Oaks, o loo maua i le “Punaoa Faaopoopo,”). Ona outou talanoaina lea pe mafai faapefea e le mauaa i aoaoga a Iesu Keriso ona fesoasoani tatou te mulimuli ai i le fautuaga a Paulo: “Faapei ona outou talia o le Alii Keriso Iesu, ia savavali ai outou o ia te ia” (Kolose 2:6). E mafai faapefea ona tatou lagolagoina le tasi ma le isi i a tatou taumafaiga ia mulimuli i le Faaola ae le o tu ma aga sese o le lalolagi?

A o auauna ai o se tasi o le Au Fitugafulu, sa faasoa mai ai e Elder Jay E. Jensen le aafiaga lenei:

“O le atalii o le ma atalii, o Quinton na fanau mai ma le tele o ni mea faaletonu i lona soifua maloloina ma e toe tolu vaiaso atoa lona tausaga ae maliu, i lena taimi atoa na avatu ai i le falemai ma aumai. I le taimi lena o loo ma nonofo ma Sister Jensen i Atenitina. Sa ma mananao lava e ma te i ai faatasi ma le ma fanau e faamafanafana i latou ma ia faamafanafanaina ai foi i ma’ua e i latou. O le atalii o le ma tama lea sa ma alolofa lava i ai ma mananao e latalata ia te ia. Sa na o lo ma tatalo lava, ma sa faia ma le naunautai tele!

“Sa ma malaga ma Sister Jensen i se asiasiga faamisiona ae ma maua le tala ua maliu Quinton. Sa ma tutu i le ala savali o se falesa ma feopoa’i ma faamafanafana e le tasi le isi. Ou te molimau atu ia te outou na oo mai ia i maua le faamautinoaga mai le Agaga Paia, o se manuia o loo silisili atu i mea uma e manatu i ai ma o loo faaauau pea e oo mai i nei aso (tagai Filipi 4:7). Na ma’ua molimauina foi le meaalofa le faamatalatalaina a le Agaga Paia i olaga o le ma atalii ma lo ma afafine faaletulafono ma a la’ua fanau ia o loo tautalatala ai pea e oo mai i lenei taimi e uiga i le faatuatua, filemu, ma le mafanafana” (“O Le Agaga Paia ma le Faaaliga,” Ensign po o le Liahona, Nov. 2010, 78).

Sa faailoa mai e Elder Dallin H. Oaks nisi o aganuu faalelalolagi e feteenai ma upumoni o le talalelei (tagai “Salamo ma Suia,” Ensign po o le Liahona, Nov. 2003, 37–40):

• Le amanaiaina o le tulafono o le ola mama

• Tau le alu ma le musu e alu i le lotu

• Solia o le Upu o le Poto

• Le faamaoni

• Fafau mo “siitiaga” i tofiga o le Ekalesia

• O se aganuu o le [ola] faalagolago nai lo o tiutetauave o le tagata lava ia