1 ma le 2 Tesalonia

Sa amata e Paulo lana Tusi i a Tesalonia i le faamanatu atu i le Au Paia o le auala sa faasoa atu ai e ia ma isi le talalelei ia i latou. Atonu o se avanoa lelei lea mo tagata o lau vasega e iloilo ai auala o loo latou faia i le aoao atu ma le aoao mai i le tasi ma le isi. E mafai ona e valaauliaina tagata o le vasega e faitau le 1 Tesalonia 1:5–8; 2:1–13 ma faailoa mai mataupu faavae e faatatau i le faasoa lelei atu o le talalelei. Ona latou tusia lea o ni fesili e faavae i nei fuaiupu, o le a fesoasoani ia i latou i le iloiloina o a latou taumafaiga e aoao atu le talalelei i isi. Mo se faataitaiga, atonu o se tasi o fesili o le “Pe o au ea o se faataitaiga o mea ua ou iloa?” (tagai 1 Tesalonia 1:7). E mafai faapefea e le mulimuli i mataupu faavae o loo i lenei fasifuaitau ona fesoasoani ia tatou avea ai ma ni faifeau lelei ia i latou tatou te aoaoina?

O le faitauina o le 1 Tesalonia 1:5–8; 2:1–13 e ono faamanatu atu ai i tagata o le vasega ni faiaoga faapei o Keriso o e na faatosinaina lelei i latou “pei o le tama i lana lava fanau” (1 Tesalonia 2:11). Valaaulia tagata o le vasega e saili i nei fasifuaitau ia maua ai se uiga auaumama o se faifeau faamaoni ma mafaufau i se faiaoga latou te iloa o le o faaalia lena uiga auaumama. Atonu e te fai atu i tagata o le vasega e tusi se tusi pe fatu se faailoga o se tusifaamaonia mo le faiaoga o loo latou mafaufau i ai. Ia uunaia i latou ia aofia ai i le tusi po o le faailoga se fuaiupu mai le 1 Tesalonia ma se faamatalaga o le auala o loo faaalia ai e le faiaoga lena fuaiupu. Atonu foi e musuia i latou e tuuina atu le tusi po o le faailoga i le tagata sa latou tusi e uiga i ai.

Sa aoao e Paulo le Au Paia i Tesalonia e faapea, “E lei valaauina i tatou e le Atua ia amioleaga, a ia faapaiaina lava” (1 Tesalonia 4:7). Ina ia amata se talanoaga e uiga i le paia, e mafai ona usu e lau vasega po o se tagata se toatasi le pese “More Holiness Give Me” (Hymns, no. 131). Fai i tagata o le vasega e talanoa i ia uiga auaumama o le paia o loo taua i le viiga e faapea ona tulaga ese ia i latou. Tusi i luga o le laupapa le Mea paia e tele mo au, tele … , ma valaaulia tagata o le vasega e vaavaai mo upu ma fasifuaitau mai le 1 Tesalonia 3:9–13; 4:1–12 e faauma ai le fuaiupu. E mafai faapefea ona tatou atinaeina nei uiga auaumama?

Mo nisi, o le valaauliaina ia paia e foliga mai e lofituina ia i latou. Atonu e aoga pe a malamalama tagata o le vasega, o le atinaeina o le paia o se faagasologa faifai pea e manaomia ai ona tatou “faasilisili pea i ai” i le aluga o taimi (1 Tesalonia 4:10). Ina ia faapupula atu lenei faagasologa, e mafai ona e valaaulia se tagata o le vasega e talanoa atu e uiga i taleni po o se mea e ausia lea e alu ai se taumafaiga faifai pea i le aluga o taimi, e pei o le faiga o se ie soosoo po o le taina o se mea faimusika. E faapefea ona tutusa lenei mea ma le faagasologa o le avea ma se [tagata] paia? Valaaulia tagata o le vasega e toe faamanatu le 1 Tesalonia 3:9–13; 4:1–12 ma faasoa mai ni malamalamaaga manino e faatatau i taumafaiga e manaomia e avea ai ma se [tagata] paia i auala o loo faamatalaina e Paulo. O le a se mea na fesoasoani ia i tatou e agai ai i luma i le faapaiaina?

O fesili e pei o nei, e mafai ona musuia ai se talanoaga e uiga i le fautuaga a Paulo e faatatau i le galue: O a taunuuga o le paie? O le a sou manatu i le uiga o le tala a Paulo i upu “filemu” ma le “fifilemu”? (1 Tesalonia 4:11; 2 Tesalonia 3:12). Atonu e te manao e tusi fesili e pei o nei i luga o le laupapa mo tagata o le vasega e mafaufau loloto i ai ao latou faitau i le 1 Tesalonia 4:11–12 ma le 2 Tesalonia 3:7–13. Valaaulia i latou e talanoa i nei fesili i ni paga, i ni vaega toalaiti, po o se vasega. O le a se isi mau e fesoasoani ia tatou malamalama ai i le taua o le galue ma tulaga matautia o le paie? (tagai i fautuaga o loo i le “Punaoa Faaopoopo”).

O le malamalama i le Liliuese Tele e mafai ona faamalosia ai molimau a tagata o lau vasega e uiga i le Toefuataiga o le talalelei a Iesu Keriso. O leOtootoga o lenei vaiaso i le Sau, Mulimuli Mai ia te Au—Mo Tagata Taitoatasi ma Aiga o loo i ai nisi o punaoa e uiga i le Liliuese. E mafai ona e valaaulia ni nai tagata o le vasega e omai saunia e faasoa mai ni malamalamaaga manino mai a latou suesuega o nei punaoa, po o le suesue ma talanoa faatasi ai i le vasega. O loo i ai foi ni vitio e uiga i le Liliuese i le “Punaoa Faaopoopo” e mafai ona faaopoopo atu i le tou talanoaga.

Atonu e aoga ona talanoa i nisi o faataoto sa faaaoga e perofeta e faamatala ai le Liliuese, e pei o se tete’a ese (tagai 2 Tesalonia 2:3), o se oge (tagai Amosa 8:11–12), luko saua o e le faasaoina le lafu mamaoe (tagai Galuega 20:28–30), ma taliga feu (tagai 2 Timoteo 4:3–4). Mafaufau e vaevae tagata o le vasega i ni paga ma fai atu ia i latou e faitau se tasi pe sili atu o mau nei (po o isi e te filifilia), ma faamatala mai mea o aoao mai e fuaiupu e uiga i le Liliuese Tele. O le a le mea ua aoao mai e perofeta e uiga i le Liliuese ma aafiaga o le a i ai?

Ina ia fesoasoani i tagata o le vasega ia aoao atili e uiga i le Liliuese Tele, valaaulia i latou e vaai faalemafaufau faapea e iai sa latou uo e le malamalama i le manaomia o se toefuataiga o le talalelei. Fatu se siata e lua koluma i luga o le laupapa ma faaigoa Mafuaaga o le Liliuese ma le Aafiaga o le Liliuese. Valaaulia tagata o le vasega e saili o ni paga po o ni vaega toalaiti i le vaega ua faaautuina “O Le Liliuese Tele” i le Talai La’u Talalelei (itulau 35–36), ma vaavaai mo mafuaaga ma aafiaga o le Liliuese e tusi i luga o le laupapa. O a ni malamalamaaga manino mai le siata lenei e mafai ona latou faaaogaina e fesoasoani ai i le latou uo ia malamalama i le manaomia o le Toefuataiga?

Mata o le a manuia lau vasega mai le talanoaina o auala e taofia ai i tatou lava mai le “tete’a ese”? E mafai ona e valaaulia i latou e saili i le 2 Tesalonia 2 ma vaavaai mo le fautuaga e mafai ona latou tuuina atu i se uo, o le a fesoasoani ia te ia e aloese ai mai le liliuese faaletagata lava ia.