Pagpahigayon og Tulumanon sa Pagsimba [Worship Service ] diha sa Panimalay (Alang sa mga Pamilya sa Layo nga mga Dapit)

Ang ubang mga pamilya nagpuyo sa layo nga mga dapit ug dili kanunay nga matambong sa mga miting sa ward o branch. Uban sa pagtugot gikan sa presidente sa stake, misyon, o district, ang ingon niini nga mga pamilya kinahanglan nga magpahigayon og tulumanon sa pagsimba sa ilang panimalay. Sa mga dapit nga walay naestablisar nga mga yunit sa Simbahan, ang mga pamilya nagkinahanglan og pagtugot sa Area President.

Ang amahan o laing naghupot sa priesthood mahimong moandam ug mopanalangin sa sakramento kon siya takus, usa ka priest sa Aaronic Priesthood o naghupot sa Melchizedek Priesthood, ug adunay pagtugot gikan sa iyang mga lider sa priesthood. Bisan kinsa nga naghupot sa priesthood mahimong mopasa sa sakramento. Mga instruksyon alang sa pagpangalagad sa sakramento anaa sa mga pahina 25–27 niini nga sumbanan nga basahon.

Ang tulumanon sa pagsimba sa Dominggo kinahangalang yano lamang, may pagtahud, ug ligdong. Kini mahimo nga maglangkob sa:

1. Pangbukas nga himno

2. Pangbukas nga pag-ampo

3. Pagpanalangin ug pagpasa sa sakramento

4. Usa o mas daghan pa sa mosunod nga mga butang:

   • Usa o duha ka mubo nga mga pakigpulong o pagpamatuod

   • Pagbasa sa kasulatan ug paghisgut- hisgot isip usa ka pamilya

   • Usa ka leksyon nga ihatag sa usa ka sakop sa pamilya

5. Panapos nga himno

6. Panapos nga pag-ampo

Sa pagplano sa tulumanon sa pagsimba sa Dominggo, ang mga ginikanan kinahanglan magtinguha ug mosunod sa giya sa Espiritu sa Ginoo. Ang mga tawo sa Basahon ni Mormon mihatag og ehemplo niini nga matang sa tulumanon. “Ug ang ilang mga tigum gidumala … subay sa paagi sa mga kalihokan sa Espiritu, ug pinaagi sa gahum sa Espiritu Santo, kay samtang ang gahum sa Espiritu Santo moagak kanila aron sa pagsangyaw, o sa pag-awhag, o sa pag-ampo, o sa pagpangamuyo, o sa pag-awit, sa ingon kini gihimo” (Mormon 6:9).

Ang pamilya kinahanglang mogamit sa mga kasulatan isip maoy ilang sukaranan nga giya. Dugang pa, sila mahimong mogamit sa mga pakigpulong sa kinatibuk-ang komperensya, Mga Sukaranan sa Ebanghelyo, Mga Baruganan sa Ebanghelyo, Matinudanon sa Tinuhoan [True to the Faith], Alang sa Kalig-on sa Kabatan-onan, mga pamplet sa misyonaryo, mga magasin sa Simbahan, ug sa uban pang mga gimantala sa Simbahan ug audio visual nga mga butang.

Kon walay usa sa pamilya nga naghupot sa tukma nga priesthood, ang amahan o inahan mahimong mopundok sa mga sakop sa pamilya aron manganta og mga himno, magtuon sa mga kasulatan, mag-ampo, ug magkasuod sa usag usa ug sa Langitnong Amahan. Ang gitudlo nga lider sa priesthood sa pamilya mangita og paagi sa matag karon ug unya nga ang pamilya makadawat sa sakramento.

Ang mga ginikanan kinahanglan nga adunay mga kalihokan sulod sa semana, sama sa pag-hike, mga piknik, pagtan-aw og maayo nga mga salida sa sine, pagbisita sa mga paryente, mga sport, mga programa sa musika, ug swimming.

Ang pamilya kinahanglang mohatag og ikapulo, mga halad sa puasa, ug uban pang mga amot ngadto sa gitudlo nilang lider sa priesthood.

Ang pamilya dili mosumiter og sinulat nga mga report ngadto sa Simbahan, pero ang natudlo nilang lider sa priesthood mo-interbyu sa amahan kanunay, mohangyo kaniya sa pagreport mahitungod sa pamilya. Kon gikinahanglan, ang mga lider mahimong mopahigayon niini nga mga interbyu pinaagi sa telepono.