Organisasyon ug Katuyoan sa Pamilya

Ang pamilya sagrado sa Ang Simbahan ni Jesukristo sa mga Santos sa Ulahing mga Adlaw ug mao ang labing importante nga sosyal nga yunit karon ug sa kahangturan. Gitukod sa Dios ang mga pamilya aron makahatag og kalipay ngadto sa Iyang mga anak, motugot kanila nga makat-on sa husto nga mga baruganan sa kahimtang nga mahigugmaon, ug moandam kanila alang sa kinabuhing dayon.

Ang panimalay mao ang labing maayong dapit sa pagtudlo, pagkat-on, ug paggamit sa mga baruganan sa ebanghelyo. Dinhi ang mga indibidwal makat-on sa pagsangkap og pagkaon, sinina, kapuy-an, ug uban pang gikinahanglan nila. Ang amahan ug ang inahan, isip magkatimbang, kinahanglang motabang sa matag sakop sa pamilya nga:

• Mangita sa kamatuoran ug mopalambo og hugot nga pagtuo sa Dios.

• Maghinulsol sa mga sala, magpabunyag alang sa kapasayloan sa mga sala, magpasakop sa Ang Simbahan ni Jesukristo sa mga Santos sa Ulahing mga Adlaw, ug modawat sa Espiritu Santo.

• Mosunod sa mga kasugoan sa Dios, mokugi sa pagtuon sa mga kasulatan, mohalad og personal nga mga pag-ampo matag adlaw, ug moserbisyo sa uban.

• Mopakigbahin sa ebanghelyo ngadto sa uban.

• Magpa-endowed ug magminyo sa templo ngadto sa usa ka takus nga kauban alang sa kahangturan, maghimo og malipayon nga panimalay alang sa pamilya, ug mosuporta sa pamilya pinaagi sa gugma ug sakripisyo.

• Mangita og kasayuran mahitungod sa patay na nga katigulangan ug mopahigayon sa mga ordinansa sa templo alang kanila.

• Mosangkap sa pangpahimsog nga gikinahanglan alang sa espirituhanon, pisikal, ug emosyonal nga kahimsog.

Ang amahan maoy mangulo sa pamilya ug maoy responsable sa pagtudlo sa mga anak ug mosangkap sa mga kinahanglanon sa kinabuhi alang sa pamilya. Ang usa ka takus ug angayan nga amahan sa Simbahan adunay kahigayunan nga mohupot sa priesthood, nga mao ang gahum ug katungod sa paglihok gamit ang pangalan sa Dios. Uban niini nga gahum ug katungod, ang amahan mahimong lider sa priesthood sa iyang pamilya. Iyang giyahan ang iyang pamilya sa pagpangandam sa pagbalik ngadto sa presensya sa atong Langitnong Amahan. Ang iyang asawa mao ang iyang labing importante nga kauban, partner, ug magtatambag. Ang bana ug asawa kinahanglang magsabutsabut sa tanang mga butang nga makaapekto sa pamilya ug panimalay.

Ang amahan kinahanglang mosangkap sa espirituhanong mga panginahanglan sa iyang pamilya. Kinahanglang iyang siguroon nga sila matudloan sa ebanghelyo ni Jesukristo ug kinahanglang buhaton niya ang tanan nga iyang mahimo sa pag-awhag kanila ug motabang kanila nga mosunod sa mga kasugoan sa Ginoo.

Ang amahan nga naghupot sa priesthood makapanalangin sa mga sakop sa iyang pamilya ug makasangkap sa ilang espirituhanong mga panginahanglan. Pinaagi sa awtoridad sa tukma nga priesthood ug uban sa pagtugot sa iyang lider sa priesthood, ang amahan maka:

1. Hatag og pangalan ug panalangin sa mga anak.

2. Bunyag sa mga anak (ug sa uban).

3. Kumpirma sa mga anak (ug sa uban) nga mahimong mga miyembro sa Simbahan ug makatugyan kanila sa Espiritu Santo.

4. Tugyan sa priesthood ngadto sa iyang mga anak (ug sa uban) ug mo-ordinar kanila sa mga katungdanan sa priesthood.

5. Panalangin ug makapasa sa sakramento.

6. 6. Pahinungod sa mga lubnganan.

Walay pagtugot gikan sa iyang lider sa priesthood, ang amahan nga naghupot sa Melchizedek Priesthood makabalaan o makapahinungod [consecrate] sa lana ug makapanalangin sa mga miyembro sa iyang pamilya ug sa uban kon sila nagmasakiton ug makahatag kanila og espesyal nga mga panalangin sa laing mga higayon kon adunay panginahanglan. (Tanawa sa mga pahina 21–29 niini nga sumbanan nga basahon alang sa mga instruksyon mahitungod sa pagpahigayon sa mga ordinansa ug mga panalangin sa priesthood.)

Ang amahan mosiguro nga ang iyang pamilya aktibo nga miapil sa tulo ka sukaranang mga responsibilidad

1. Personal ug uban sa pamilya nga espirituhanon ug temporal nga pagpangandam.

2. Pagpakigbahin sa ebanghelyo.

3. Family history ug mga ordinansa sa templo alang sa buhi ug sa mga patay.

Ang inahan usa ka katimbang nga kauban ug magtatambag sa iyang bana. Siya motabang kaniya sa pagtudlo sa ilang mga anak sa mga balaod sa Dios. Kon walay amahan diha sa panimalay, ang inahan maoy mangulo sa pamilya.

Ang amahan ug ang inahan kinahanglan nga usa ra ang katuyoan. Ang ilang tumong mao ang pag-andam sa tanang mga sakop sa pamilya nga makabalik ngadto sa atong Langitnong Amahan. Kinahanglang magkahiusa gayud sila sa pagtrabaho sa pagkab-ot niing mao nga tumong. Ang Ginoo mitukod sa Simbahan aron sa pagtabang sa mga amahan ug mga inahan sa pagtudlo ug sa pag-atiman sa ilang mga pamilya.

Kon moabut ang mga anak sa pamilya, ang mga ginikanan kinahanglang mohigugma kanila, motudlo kanila sa mga kamatuoran sa ebanghelyo, ug magpakita og mga ehemplo sa matarung nga pagpuyo. Ang mga anak kinahanglang makat-on ug mosunod sa mga kasugoan sa Dios. Kinahananglan nga motahud ug mosunod sila sa ilang mga ginikanan.

Ang kalig-on sa Simbahan nag-agad sa mga pamilya ug sa tagsa-tagsa kinsa nagsunod sa ebanghelyo ni Jesukristo. Ang gidak-on sa kalipay nga matagamtaman sa pamilya ang mga panalangin sa ebanghelyo magagad gayud pag-ayo kon unsa ka maayo ang amahan ug ang inahan nakasabut ug naghimo sa ilang naguna nga mga katungdanan isip mga ginikanan. Ang Simbahan wala gayud motuyo sa paghatag og mga programa o mga responsibilidad ngadto sa mga amahan ug mga inahan nga makapabug-at o makadismaya kanila o makahimo kanila sa pagbaliwala niining pinakanag-una nga mga katungdanan.

Tungod kay ang atong Langitnong Amahan nahigugma kanato, gusto Niya nga kita mahimaya sama Kaniya. Aron sa pagtabang kanato, gihatagan kita Niya og plano nga sundon base sa balaan nga mga balaod sa kamatuoran. Kadtong makat-on kabahin sa plano ug matinud-anong mosunod niini sa umaabut mahimong sama sa Amahan sa Langit ug makatagamtama sa matang sa kinabuhi nga Iyang gipuy-an.

Kabahin sa plano mao nga kita mobiya sa langit ug moanhi sa yuta. Dinhi makaangkon kita og pisikal nga lawas, makat-on pinaagi sa mga kasinatian, ug mopamatuod sa atong mga kaugalingon nga takus nga mopuyo pag-usab sa presensya sa Dios. Atong mapamatud-an ang atong kaugalingon nga takus pinaagi sa gawasnong pagpili sa pagsunod sa Iyang mga balaod. (Tan-awa sa Abraham 3:23–25; 2 Nephi 2:27.)

Aron sa pagtabang kanato nga makaandam sa atong mga kaugalingon sa pagpuyo uban Kaniya, ang atong Langitnong Amahan mi-organisar kanato ngadto sa mga pamilya. Pinaagi sa sagrado nga mga ordinansa ug mga pakigsaad, ang atong mga pamilya mahiusa sa kahangturan.