Mensahe gikan sa Unang Pangulohan

Palangga kamo namon kag may salig kami sa inyo. Matuod gid nga upod kamo sa pinili nga mga espiritu sang Amay nga Langitnon, nga ginpadala sa duta sa sining panahon sa paghimo sang importante nga mga butang.

Mahimo nga may mga tiyempo nga pamatyag ninyo indi kamo mabakod ukon makasarang. Normal lang ina. Sa sini gid nga tinion, magliso sa Manluluwas. Sia ang “kusog sang mga lamharon.”

Ang ini nga giya makabulig sa inyo sa pagpahamtang sang mabaskog nga pundasyon sa paghimo sang mga pagpili para magpabilin sa dalan sang kasugtanan. Buligan kamo sini nga maghanda sa paghimo sang sagrado nga mga kasugtanan sa templo, maghanda sa pag-alagad sa misyon, kag magpangita sang kalipay sa pagsunod kay Jesucristo sa bilog ninyo nga kabuhi. Nagalaum kami nga mabatyagan ninyo nga parte kamo sang Simbahan sang Manluluwas kag makaangkon sang gahum halin sa Iya para tumanon ang Iya mga katuyuan para sa inyo.

Nakahibalo kami nga buhi ang Dios. Ginapangamuyo namon nga magpabilin kamo nga mabakod sa dalan sang kasugtanan nga nagapadulong pabalik sa inyo Amay sa Langit. Kon himuon ninyo ini, mangin impluwensya kamo para sa kaayuhan, nga nagapaambit sang ebanghelyo sing malipayon kag ginahanda ang kalibutan para sa Ika-duhang Pagkari sang Manluluwas.